Lēsoni 14 Naunau ʻa e Faiakó

Hoko ko ha Meʻangāue ʻi he Toʻukupu ʻo e ʻOtuá

Hili e fakatomala ʻa e ngaahi foha ʻo Mōsaiá pea nau ului ki he ongoongolelei ʻo Sīsū Kalaisí, ne nau hoko ko ha kau faifekau lelei pea nau tokoni ki ha kakai Leimana tokolahi ke omi kiate Ia. ʻE ʻoange ʻe he lēsoní ha faingamālie maʻá e kau akó ke vahevahe e founga ʻe lava ke fakamālohia ai ʻe heʻenau ului fakataautahá ʻa ʻenau loto holi ke vahevahe e ongoongoleleí mo e niʻihi kehé. ʻE fakakaukau e kau akó ki he meʻa ʻe lava ke nau fakahoko ke hoko ko ha meʻangāue lelei ange ʻi he toʻu kupu ʻo e ʻOtuá ʻi heʻenau tānaki ʻa ʻIsileli ʻi he teuteu ki he Hāʻele ʻAnga Ua Mai ʻa e ʻEikí.

Ngaahi Fokotuʻu ki hono Akoʻí

Ko e ului ʻa e ngaahi foha ʻo ʻAlamā mo Mōsaiá mo ʻenau ʻalu atu ke malanga ki he kakai Leimaná.

Fakaʻaliʻali e fakamatala ko ʻení. Kole ki he kau akó ke nau fakafuofuaʻi kinautolu ʻi he foʻi fakamatala takitaha mei he 1 ki he 5 (1 = mātuʻaki ʻikai poupou mo e 5 = poupou mālohi).

1. ʻOku ou loto holi ke vahevahe e ongoongoleleí mo e niʻihi kehé.

2. ʻOku ou lotua ha ngaahi faingamālie ke vahevahe ai e ongoongoleleí.

3. Ko hono vahevahe ʻo e ongoongoleleí ko ha konga angamaheni mo fakanatula ia ʻeku moʻuí.

4. ʻOku ou faifeinga ke hoko ko ha meʻangāue lelei ʻi he toʻukupu ʻo e ʻOtuá ʻaki hono vahevahe ʻEne ongoongoleleí.

Hili hono maʻu ʻe he kau akó ha taimi ke fakahoko e vakaiʻi fakataautaha ko ʻení, fakaʻaliʻali e fehuʻi ko ʻení: Ko e hā te u lava ʻo fai ke hoko ko ha meʻangāue lelei ange ʻi hono vahevahe e ongoongolelei ʻo Sīsū Kalaisí? Fakaafeʻi e fānaú ke nau fanongo mo lekooti ha faʻahinga ongo pē ʻe ala tokoni kiate kinautolu ke tali e fehuʻi ko ʻení.

Fakamanatu ki he kau akó naʻe hoko e ngaahi foha ʻo Mōsaiá ko ha meʻangāue ʻi he toʻukupu ʻo e ʻOtuá ʻi heʻenau ʻaukai mo lotu ke maʻu Hono Laumālié mo malanga ʻaki ʻEne ongoongoleleí (vakai, ʻAlamā 17:3, 9, 11; 26:3, 15). Fakaafeʻi e fānaú ke lau ʻa e Mōsaia 27:35–36 mo e Mōsaia 28:1–3, ʻo kumi e founga ne liliu ai e loto ʻo e ngaahi foha ʻo Mōsaiá hili ʻenau uluí.

Ko Hono Fakatupulaki ʻEtau Founga Akoʻí mo e Akó

Fai ha ngaahi fehuʻi ʻokú ne fakatupulaki ʻa e ako ʻi he lotó. ʻI he taimi ʻokú ke fakatokangaʻi ai ʻoku mahino ki he kau akó ha tefitoʻi moʻoni ʻo e ongoongoleleí, ʻeke ha ngaahi fehuʻi te ne ueʻi e ngaahi aʻusia fakaakó ki honau lotó. ʻOku fakaʻatā ʻe he ngaahi fehuʻi pehení ʻa e kau akó ke nau fekumi ʻi honau lotó, fakakaukau ki heʻenau ngaahi aʻusiá mo vahevahe ʻenau ngaahi fakamoʻoni fakataautahá. ʻE lava ke ʻeke e ngaahi fehuʻi peheé ʻi he foungá ni: “Ko e fē ha taimi naʻá ke aʻusia ai … ?” “ʻOkú ke ʻilo fēfē … ?” pe “Ko e hā hoʻo ongo fekauʻaki… ?”

• Ko e hā naʻá ke fakatokangaʻi fekauʻaki mo e ngaahi holi ʻa e ngaahi foha ʻo Mōsaiá? Ko e hā te tau lava ʻo ako mei he founga ne takiekina ai ʻe heʻenau uluí ʻenau loto holi ke hoko ko ha ngaahi meʻangāue ʻi he toʻukupu ʻo e ʻOtuá? (ʻE lava ke ke fakaafeʻi e kau akó ke nau toe vakaiʻi ʻa e fakamatala ʻa Palesiteni Tāleni H. ʻOakesi ʻi he vahe 1 ʻo e naunau teuteú. ʻI hono fakaʻaongaʻi e ngaahi tali ʻa e kau akó, hiki ʻi he palakipoé ha tefitoʻi moʻoni tatau mo ʻení: ʻI he loloto ange ʻetau uluí, ʻe tupulaki ange ai ʻetau loto holi mo e loto fiemālie ke hoko ko ha meʻangāue ʻi he toʻukupu ʻo e ʻOtuá mo vahevahe e ongoongoleleí.)

• ʻOkú ke pehē ʻoku fakamālohia fēfē ʻe hono fakaloloto ʻetau uluí ʻa ʻetau loto holi ke vahevahe e ongoongoleleí? ʻE tokoniʻi fēfē ʻe he mahino kiate kitautolu e tefitoʻi moʻoni ko ʻení ke tau teuteu ki he ngāue fakafaifekaú pe lelei ange ʻetau vahevahe e ongoongoleleí ʻi heʻetau moʻui fakaʻahó?

• Ko e hā ha ngaahi sīpinga mei he folofolá pe hisitōlia ʻo e Siasí ʻokú ne fakatātaaʻi e tefitoʻi moʻoni ko ʻení? Ko e hā ha ngaahi aʻusia kuó ne tokoniʻi koe ke ke ʻilo ʻoku moʻoni ʻa e tefitoʻi moʻoni ko ʻení? (Mahalo te ke fie fakaafeʻi e fānau akó ke vahevahe ʻenau ngaahi sīpingá mo e sīpinga fakataautahá mo hanau hoa.)

ʻOange ki he fānaú ha ngaahi miniti siʻi ke toe vakaiʻi e sivi-fakataautaha ne nau fakahokó mo fakalaulauloto ki he fehuʻi ne ʻoange kiate kinautolu ʻi he kamataʻanga ʻo e kalasí. ʻE lava ke ke fakaafeʻi kinautolu ke lekooti e ngaahi fakakaukau mo e ngaahi ongo kuo nau maʻu lolotonga ʻa e kalasí.

Ne hoko e ngaahi foha ʻo Mōsaiá ko ha meʻangāue ʻi he toʻukupu ʻo e ʻEikí.

Fakaafeʻi e kau akó ke vahevahe ha faʻahinga pole pē kuo nau fehangahangai mo ia ʻi heʻenau feinga ke vahevahe e ongoongoleleí. (Mahalo te ke fie lisi ʻenau ngaahi talí ʻi he palakipoé mo aleaʻi e founga ʻe lava ke taʻofi ai kitautolu ʻe he ngaahi pole ko ʻení mei hono vahevahe e ongoongoleleí.)

Hiki e fakamatala taʻe kakato ko ʻení ʻi he palakipoé: ʻE lava ke tau hoko ko ha meʻangāue lelei ange ʻi he toʻukupu ʻo e ʻOtuá ʻi heʻetau …

Toe vakaiʻi nounou e ngaahi faingataʻa ne fehangahangai mo e ngaahi foha ʻo Mōsaiá ʻi heʻenau kamata ke malanga ʻaki e ongoongoleleí ʻi he lotolotonga ʻo e kakai Leimaná (vakai, konga 2 ʻo e naunau teuteú). Fakaafeʻi e kau akó ke toe vakaiʻi ʻa e ʻAlamā 17:2–3, 9–11, ʻo kumi ʻa e meʻa ne fakahoko ʻe he ngaahi foha ʻo Mōsaiá ke ikunaʻi honau ngaahi faingataʻá pea hoko ko ha ngaahi meʻangāue lelei ange ʻi he toʻukupu ʻo e ʻOtuá.

• ʻI hono fakaʻaongaʻi ʻo e meʻa kuo tau ako mei he ngaahi foha ʻo Mōsaiá, te tau lava fēfē ʻo fakakakato e fakamatala ʻi he palakipoé ke faʻu ha tefitoʻi moʻoní? (ʻI hono fakaʻaongaʻi e ngaahi lea ʻa e kau akó, fakakakato e fakamatalá koeʻuhí ke maʻu ha tefitoʻi moʻoni hangē ko ʻení: ʻE lava ke tau hoko ko ha meʻangāue lelei ange ʻi he toʻukupu ʻo e ʻOtuá ʻi heʻetau lotu, ʻaukai, mo fekumi ʻi he folofolá.)

Fakaafeʻi e kau akó ke nau fakatokangaʻi mei he ʻAlamā 17:2–3 ʻa e ngaahi tāpuaki fakalaumālie ne maʻu ʻe he kau faifekau ko ʻení ʻi heʻenau lotu, ʻaukai mo fekumi ʻi he folofolá. (Tokoni ki he kau akó ke nau maʻu ha tefitoʻi moʻoni ʻe taha hangē ko ʻení: ʻI heʻetau lotu, ʻaukai mo fekumi ʻi he folofolá, te tau lava ai ʻo maʻu e laumālie ʻo e fakahaá.)

• Ne tokoni fēfē e laumālie ʻo e fakahaá kia ʻĀmoni ke hoko ko ha meʻangāue lelei ange ʻi he toʻukupu ʻo e ʻOtuá? (Mahalo te ke fie fakaafeʻi ha tokotaha ako ke ne toe fakamatalaʻi fakanounou e aʻusia ʻa ʻĀmoni mo e Tuʻi ko Lamonaí pea lau leva ʻa e ʻAlamā 18:33–35.)

• Ko e hā ʻoku mahuʻinga ai ke maʻu e laumālie ʻo e fakahaá ʻi heʻetau faifeinga ke hoko ko ha meʻangāue ʻi he toʻukupu ʻo e ʻOtuá?

• Kuo tokoniʻi fēfē koe ʻe he laumālie ʻo e fakahaá ke ke hoko ko ha meʻangāue lelei ange ʻi he toʻukupu ʻo e ʻOtuá?

ʻE lava ke ke fakaafeʻi ha tokotaha ako ke lau ʻa e fakamatala ko ʻeni meia Palesiteni Lāsolo M. Nalesoní:

ʻI he taimi ʻoku tau feinga ai ke fanongó—ʻo fanongo moʻoni—[kia Sīsū Kalaisí], ʻe tataki kitautolu ke tau ʻilo e meʻa ke tau fai ʻi ha faʻahinga tūkunga pē. …

ʻOku ou fakafoʻou atu ʻeku kolé ke mou fai ha meʻa pē ʻe lava ke fakalahi ai homou ivi fakalaumālie ke maʻu e fakahā fakatāutahá. (“Fanongo Kiate Ia,” Liahona, Mē 2020, 89, 90)

Fakaafeʻi e kau akó ke toe vakaiʻi e fakamatala ʻa ʻEletā Tieta F. ʻUkitofa ʻi he konga 3 ʻo e naunau teuteú mo fakalaulauloto ki he ongo fehuʻi ko ʻení:

• Ko hai te u lava ʻo fakaafeʻi ke ʻunu ofi ange ki he Fakamoʻuí?

• Ko e hā te u lava ʻo fai ke hoko ko ha meʻangāue ʻi he toʻukupu ʻo e ʻEikí ke tokoniʻi ha niʻihi fakataautaha ke ʻunu ofi ange kia Kalaisi?

Mahalo te ke fie ʻoange ki he kau akó ha taimi ke lekooti ai ʻenau ngaahi fakakaukaú mo e ongó. Te ke lava foki ʻo fakaafeʻi ha faʻahinga tokotaha ako pē ʻoku loto-fiemālie ke vahevahe ʻa e meʻa ʻoku nau palani ke fakahokó.

Fakamahinoʻi ange koeʻuhí ko e teuteu ʻa e ngaahi foha ʻo Mōsaiá, ne nau maʻu foki e laumālie ʻo e kikité pea ne nau lava ʻo faiako ʻaki e mālohi mo e mafai. (ʻE ala tokoni ke fakamatalaʻi ange ʻe lava ke ʻuhinga e kupuʻi lea “laumālie ʻo e kikité” ki he “fakamoʻoni kia Sīsū” [Fakahā 19:10].) Fakapapauʻi ange ki he kau akó te tau lava foki mo kitautolu ʻo maʻu e ngaahi tāpuaki tatau ʻi heʻetau teuteu ke hoko ko ha meʻangāue ʻi he toʻukupu ʻo e ʻOtuá.

Te ke lava ʻo vahevahe hoʻo fakamoʻoní tuʻunga ʻi he tokoni ʻa e ʻEikí, te tau lava takitaha ʻo hoko ko ha meʻangāue ʻi Hono toʻukupú mo tokoni ʻi hono tānaki ʻo ʻIsilelí.

Ki he Kalasi Hokó

ʻEke ki he kau akó ke nau fakakaukau ki honau tuʻunga mateuteu ki he Hāʻele ʻAnga Ua mai ʻa Kalaisí. Fakamatalaʻi ange ʻoku fekauʻaki ʻa e ʻiuniti hokó mo e ʻaʻahi ʻa e Fakamoʻuí ki he kakai Nīfai ʻi he ongo ʻAmeliká. ʻI he teuteu ʻa e kau akó ki he kalasi hokó, poupouʻi kinautolu ke nau fekumi pe ko e hā ʻe lava ke akoʻi ange ʻe he ngaahi meʻa ne hoko ʻo aʻu ki he hā ʻa e Fakamoʻuí ki he kakai Nīfaí fekauʻaki mo e teuteu ki Heʻene liuaki mai ʻi he ngaahi ʻaho fakaʻosí.