“Lēsoni 16 Naunau Teuteu ki he Kalasí: ʻOku Ngāue Fakaetauhi ʻa Sīsū Kalaisi ki he Tokotaha Taki Taha,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó (2021)
“Lēsoni 16 Naunau Teuteu ki he Kalasí,” Ngaahi Akonaki mo e Tokāteline ʻo e Tohi ʻa Molomoná Naunau ʻa e Faiakó
Lēsoni 16 Naunau Teuteu ki he Kalasí
ʻOku Ngāue Fakaetauhi ʻa Sīsū Kalaisi ki he Tokotaha Taki Taha
ʻOku ʻomi ʻe he ngāue ʻa Kalaisi kuo toetuʻú ʻi he lotolotonga ʻo e kakai ʻi he fonua ko Mahú ha fakamoʻoni mālohi kiate kitautolu ki he tuʻunga fakalangi ʻo Sīsū Kalaisí mo ha sīpinga maʻongoʻonga ki he founga ʻo e ngāue fakaetauhi ki he niʻihi kehé. ʻI hoʻo ako e naunau ko ʻení, fakalaulauloto ki he meʻa te ke lava ke fakahoko ke fakamālohia ai hoʻo fakamoʻoni ko Sīsū Kalaisí ʻa hoʻo Fakamoʻuí. ʻI hoʻo fakakaukau ki he anga ʻEne ngāue fakaetauhí, fakakaukauʻi ʻi he faʻa lotu ko hai te ne fie maʻu ke ongoʻi e ʻofa ʻa e Fakamoʻuí ʻo fakafou ʻiate koé.
Konga 1
Te u lava fēfē ʻo fakamālohia ʻeku fakamoʻoni ko Sīsū Kalaisi hoku Fakamoʻuí?
Hili e fuʻu fakaʻauha lahi mo e ʻaho ʻe tolu ʻo e fakapoʻulí ʻo fakamoʻoniʻi ai ki he kakaí kuo pekia e Fakamoʻuí, ne fakatahataha hake ki he temipale he fonua ko Mahú ha meimei kakai tangata, houʻeiki fafine mo e fānau ʻe toko 2,500. Naʻa nau fanongo ki ha leʻo, ʻa ia naʻe ʻikai ke tomuʻa mahino kiate kinautolu. ʻI he hokohoko atu ʻenau fanongó, ne toki mahino kiate kinautolu ko e leʻo ia ʻo e Tamai Hēvaní ʻi hono fakafeʻiloaki mai Hono ʻAlo ko Sīsū Kalaisí. (Vakai, 3 Nīfai 11:1–10.) Naʻe hāʻele hifo leva mei he langí ʻa e Fakamoʻuí ʻo folofola mai: “Vakai, ko au ko Sīsū Kalaisi, ʻa ia naʻe fakamoʻoniʻi ʻe he kau palōfitá ʻe haʻu ki he māmaní” (3 Nīfai 11:10).
Naʻe lea ʻa ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e momeniti ko ʻení ʻo pehē:
Naʻe hoko ʻa ʻene hā maí mo ʻene folofola ko iá ko e tefitoʻi meʻa mahuʻinga taha, mo e tumutumu ʻo e hisitōlia kotoa ʻo e Tohi ʻa Molomoná. Ko hono fakahaaʻi mo tuʻutuʻuni ia kuo fakahinohinoʻi mo ueʻi fakalaumālie e palōfita Nīfai kotoa pē ʻi he ngaahi taʻu ʻe onongeau kuohilí. …
“Ne talanoa, hiva, fakaʻānaua mo lotua ʻe he taha kotoa ʻa ʻEne hā maí—ka kuo ʻi heni tonu. Ko e ʻaho mahuʻinga tahá ʻeni! Kuo tūʻuta mai e ʻOtua ʻokú ne liliu e pō fakapoʻulí ki he maama ʻo e pongipongí. (Christ and the New Covenant: The Messianic Message of the Book of Mormon [1997], 250–51)
Ako ke Teuteu ki he Kalasí
Lau ‘a e 3 Nīfai 11:13–17, pea sio ki he meʻa naʻe fai ʻe he kakaí ke fakamālohia ai ʻenau fakamoʻoni ko Sīsū ʻa e Kalaisi kuo toetuʻú.
Fakalaulauloto ke Teuteu ki he Kalasí
Ko e hā te ke lava ‘o ako kau ki he ʻulungaanga ʻo Sīsū Kalaisí ʻi Heʻene feohi mo e kau Nīfaí mo e kau Leimaná?
Naʻe akoʻi ʻe ʻEletā Uolotā F. Konisālesi ʻo e kau Fitungofulú ʻa e fakamatala ko ʻeni kau ki he aʻusia ʻa e kakai naʻa nau fakamoʻoni ki he Kalaisi kuo toetuʻú:
“Haʻu kiate au, koeʻuhi ke mou ala mo mamata” [3 Nīfai 18:25]. Ko ha fekau ʻeni naʻe fai ʻe he Fakamoʻuí ki he kakai ko ʻeni ne nau nofoʻi ʻa ʻAmelika he kuonga muʻá. Naʻa nau ala ʻaki honau nimá mo mamata ʻaki honau matá, ko Sīsū ‘a e Kalaisí. ʻOku mahuʻinga tatau pē kiate kitautolu he ʻahó ni ʻa e fekaú ni mo ia ʻi honau kuongá. ʻI heʻetau haʻu kia Kalaisí, ʻe lava ke tau ongoʻi pea “ʻiloʻi pau” [3 Nīfai 11:15]—ʻo ʻikai ʻaki pē hotau nimá mo e matá kae ʻaki hotau lotó mo e ʻatamaí—ko Sīsū ʻa e Kalaisí.
Ko e founga ʻe taha ke haʻu ai kia Kalaisí ko ʻetau feinga ke ako e ngaahi moʻoni mahuʻingá ʻaki hotau lotó. ʻI heʻetau fai iá, ʻe ʻomi ai kiate kitautolu ʻe he ngaahi ueʻi mei he ʻOtuá ha ʻilo he ʻikai ke tau lava ʻo maʻu mei ha toe founga kehe.. (“Ako ʻaki Hotau Lotó,” Liahona, Nōvema 2012, 81)
Lekooti Hoʻo Ngaahi Fakakaukaú
ʻI hoʻo fakalaulauloto ki hoʻo fakamoʻoni kia Sīsū Kalaisí, hiki ʻi hoʻo tohinoa fakatāutahá ha aʻusia kuó ne fakamālohia hoʻo fakamoʻoni kiate Iá. Pe ko hoʻo maʻu ha himi ʻokú ne fakahaaʻi e anga hoʻo ongo ki he Fakamoʻuí pea hiki e ngaahi ongo ʻokú ke maʻu he taimi ʻokú ke fanongo pe hivaʻi ai e himi ko ʻení.
Konga 2
Ko e hā te u lava ʻo ako ʻo kau ki he ngāue fakaetauhí mei he sīpinga ʻa e Fakamoʻuí?
Hili hono ʻoange ʻe he Fakamoʻuí ha faingamālie ki he tokotaha kotoa pē ke ala ki he ngaahi matakafo ʻi Hono ongo nimá mo e vaʻé, naʻá Ne ui e kau ākonga ʻe toko hongofulu mā uá pea akoʻi ki he kakaí ha ngaahi moʻoni mahuʻinga lahi (vakai, 3 Nīfai 11–16). ʻI he ʻamanaki ke mavahe ʻa Sīsuú, naʻá Ne folofola ʻo pehē, “ʻOku hā mai kiate au … ʻoku ʻikai faʻa mahino kiate kimoutolu ʻa ʻeku ngaahi lea kotoa pē,” pea naʻá ne fakaafeʻi ʻa e kakaí ke foki ki honau ngaahi ʻapí, ʻo fakalaulauloto ki he meʻa kuó Ne akoʻi kiate kinautolú, mo teuteuʻi kinautolu ki Heʻene toe hāʻele mai he ʻaho hono hokó (3 Nīfai 17:1–3).
Ako ke Teuteu ki he Kalasí
Lau ‘a e 3 Nīfai 17:5–10, pea kumi ki he ngaahi founga naʻe fakahaaʻi ai ʻe he ʻEikí ʻa e angaʻofá mo e manavaʻofá ʻi Heʻene ngāue fakaetauhi ʻi he lotolotonga ʻo e kakaí.
Hili hono fakamoʻui ʻe he Fakamoʻuí ʻa e fuʻu kakai tokolahi, naʻá Ne fekauʻi ke “ʻomi ʻenau fānau īkí” kiate Ia (3 Nīfai 17:11) pea ʻoku totonu ke tūʻulutui e tokotaha kotoa pē. Naʻa ne fai leva lotu maʻanautolu ʻa ia naʻe “fuʻu maʻongoʻonga mo fakaofo” (veesi 16–17) pea naʻe ʻikai ke kei mapukepuke e fiefia lahi ʻa e kakaí. (Vakai, 3 Nīfai 17:10–19.)
Ako ke Teuteu ki he Kalasí
Lau ʻa e 3 Nīfai 17:19–24, pea fakalaulauloto ki he ʻuhinga naʻe maʻu ai ʻe he Fakamoʻuí e fiefiá ʻi he ngāue fakaetauhí.
Na‘e akoʻi ‘e Palesiteni Siini B. Pingihami, ko e Palesiteni Lahi ʻo e Fineʻofá, e mahuʻinga ʻo e muimui ki he sīpinga ʻa e Fakamoʻuí ʻi heʻetau ngāue fakaetauhí:
Hili hono fai mo lea ʻaki e meʻa kotoa pē, ʻoku toki fakahoko pē ʻa e ngāue fakaetauhi moʻoní, ʻi he aʻutonu fakataautaha ki aí ʻo fakalotoa ʻe he ʻofá. Ko e mahuʻinga mo hono ʻaonga mo e fakaofo ʻo e ngāue fakaetauhi fakamātoató, he ʻokú ne liliu moʻoni ʻe ia ʻa e moʻuí! ʻI he taimi ʻoku fakaava ai hotau lotó ʻo fiemālie ke ʻofa mo fakakau mai, poupouʻi mo fakafiemālié, he ʻikai toe lava ke taʻofi ai e mālohi ʻo ʻetau ngāue fakaetauhí. ʻI hono fakalotoa ʻe he ʻofá, ʻe hoko ha ngaahi mana. …
Ko e Fakamoʻuí ʻa hotau faʻifaʻitakiʻanga ʻi he meʻa kotoa pē—ʻo ʻikai ngata pē ʻi he meʻa ʻoku totonu ke tau faí, ka ko e ʻuhinga ʻoku totonu ke tau fai ai iá [vakai, ʻEfesō 5:2]. (“Ngāue Fakaetauhi ʻo Hangē ko e Fakamoʻuí,” Liahona, May 2018, 106)
Fakalaulauloto ke Teuteu ki he Kalasí
Fakakaukau ki ha taha te ne fie maʻu hoʻo tokoní. Te ke muimui fēfē ki he sīpinga ʻa e Fakamoʻuí mo fakahaaʻi ʻa e angaʻofa mo e manavaʻofa ki he tokotaha fakafoʻituitui ko ʻení?