Wase 12

Na Gadrevi Vagumatua ni Wasei ni Kosipeli

Era gadreva tu o ira na tacida kei na ganeda e vuravura taucoko na itukutuku ni kosipeli vakalesuimai, ka sa noda madigi meda na wasea yani vei ira.

Na Bula nei George Albert Smith

E dua na itokani voleka i George Albert Smith a vola vakaoqo: “O Peresitedi George Albert Smith e dua dina na daukaulotu. Mai na gauna se itabagone kina sa dau gadreva dina tu mai o koya me na wasea vei ira na wekana na ivakavuvuli ni kosipeli, me ra kila o ira na ‘luvena tagane kei na yalewa na Kalou,’ o ira kece e kila o koya ni ra sa tacina ka ganena, o ya na dina ka a vakatakilai vei Josefa Simici na Parofita.

“E a noqu madigi ena so na gauna meu gole vata tu ena sitimanivanua kei Peresitedi Smith. Ena veigauna yadua oqori au raica kina ni gauna ga sa vakacagau kina na ilakolako, e laki taura sara mai e nona beqi eso na tikidua ni kosipeli, biuta i nona taga, ka gole yani vei ira na pasidia. Ena nona ivakarau vinaka, kei na veiyaloni e yaco sara me kila e dua e vodo tiko, ka totolo sara na nona tukuna na itukutuku ni kena sa tauyavutaki na Lotu mai vei Josefa Simici na Parofita se nona tukuna na nodra lakoyani na Yalododonu mai Nauvoo kei na nodra vakatovolei kei na veika dredre ni ra kosova na buca kei Utah se vakamacalataka eso na ivakavuvuli ni kosipeli vei koya na nona itokani vou o ya. Ena veitarataravi na veivosaki kivei ira yadua na pasidia me yacova ni sa laki cava na ilakolako. Ena neirau veikilai tu mai kei Peresitedi Smith, ka sa sivia e vasagavulu na yabaki, au vulica ni vanua cava ga e tiko kina, ena vakaliuci koya taumada tiko ni sa dua na daukaulotu ni Lotu i Jisu Karisito ni Yalododonu Edaidai.”¹

A volai talega vakaoqo baleti Peresitedi Smith: “E tukuna talega na itukutuku ni lotu vei koya e dausasamaki tiko e nodratou ikuvukuvu. E vakavudua sara me calata me vakamacalataka na ‘dina tawamudu ni kosipeli vakalesuimai’ vei ira na nona itokani se vulagi. E tukuna o koya, ni oqo sara ga na yalovinaka e cecere duadua, ni itukutuku i Karisito sa ikoya na ka ni loloma bibi duadua ena dau solia o koya.”² [Raica na vakatutu 1 ena tabana e 143.]

Baleta ga ni wasei ni kosipeli e ulutaga e dau vosa kina vakawasoma ena nona veivakavulici o Peresitedi Smith, sai koya oqo na imatai ni tolu na wase me baleta tiko na ulutaga oqo ena ivola oqo. Na wase oqo e vakatabakidua tiko ki na vuna eda wasea kina na kosipeli; na wase 13 e tukuna tiko e vica na sala eda rawa ni vakaitavi kina ena cakacaka bibi oqo; kei na wase e 14 e vakamacalataka na sala me na mana kina na noda sasaga oqo.

iVakavuvuli nei George Albert Smith

Sa gadreva tu o vuravura na ka sa tiko vei keda—o ya na kosipeli i Jisu Karisito, sa vakalesui mai ena kena taucoko.

Sa veilecayaki tiko ko vuravura, ka vakaleqai, mai na yasana kadua ki na kena kadua. Era sa veiraiyaki na turaga kei na marama, me ra vakasaqara na vanua me ra gole kina ka laki vakayacora na veika me na kauta mai vei ira na vakacegu. Sa vakalesui mai na kosipeli i Jisu Karisito. Na dina sa vakatakilai mai lomalagi sa tiko oqo ka sa ikoya na dina o ya, na kosipeli o ya, ni kevaka me na kila mada ga ko vuravura, sa qai yaco me iwali ni nodra leqa kecega. Sai koya ga oqo ena kauta mai vei ira na vakacegu ena gauna era tiko kina ena vuravura oqo.³

Sa qai gadrevi kina vei ira na lewe i vuravura me ra raicalesu mada na nodra ilakolako ka lesu tale ki na yavu sa vakadavora tu na iVakavuvuli ni lomalagi kei vuravura, na yavu ni vakabauta, veivutuni kei na papitaiso ena tabadromuci me vakabokoci ni ivalavala ca, kei na ciqomi ni Yalo Tabu mai na ligadra sa tiko vei ira na lewa vakalou. Oqori na ka e gadreva tu ko vuravura. Au sa vakavinavinaka vakalevu ni vuqa sara era sa rai tiko kina. Era sa lakova mataboko tiko e dua na salatu e mua ki na rarawa kei na veilecayaki, ia sa mai vakatikori kina vakavoleka e dua na iwali ni leqa kecega—na kosipeli i Jisu Karisito. Sa vakarautaki tu kina vei ira na tamata kecega e dua na salatu, e dina ga ni rabalailai, ka dredre me vakamuri, ia e veiliutaki lesu vei koya na Tamada kecega na tamata; ka sega tale ni dua na salatu e veilliutaki i kea.⁴

O ira na lotu e vuravura era sa saga tiko, ena nodra sala, me ra kauta mai na vakacegu ki na yalodra na tamata. E tiko vei ira e vuqa na bula dodonu kei na vuqa na dina, ia sa sega vei ira na veivakadonui vakalou. O ira talega na nodra bete era sega ni lesi vakalou.⁵

O ira duadua ga na Yalododonu Edaidai ka sa tiko vei ira na lewa mai vua na Tamada Vakalomalagi me ra qarava kina na cakacaka vakalotu ni Kosipeli. Sa gadrevi keda dina tiko o vuravura.⁶

Sa yaco dina tiko e vuravura e dua na dausiga ni vosa ni Turaga, ka vuqa vei ira na tamata yalodina era sa vakasaqara dina tiko me ra kila na veika sa gadreva tiko na Tamada Vakalomalagi mai vei ira. Au sa sotavi ira oti e vuqa na iliuliu ni veimatalotu eso, kau sa raica kina ena kedra maliwa eso era tamata vakaturaga era yalodina ena cakacaka vinaka, ia e kunekune dredre meu raica ena kedra maliwa o ira era sa kacivi ki na cakacaka vakalotu ena veimatalotu eso, o ira era sa kila vakavinaka na inaki ni nodra bula tiko oqo, se o ira era kila tiko na vuna eda mai tiko kina ena vuravura oqo. Era na sega ni vakavulica rawa na tamata na veika era sega tiko mada ga ni kila vakai ira. O ira na tamata vinaka oqo, era sega ni kila vakavinaka na kosipeli kei na kedra yaga na kena cakacaka vakalotu, era sa vakatabakiduataka ga na nodra veivakavulici ki na lesoni ni bula savasava kei na wiliki ni same vei ira na nodra ivavakoso. Era digitaka na veitiki tale eso ni ivolanikalou me lewe ni vosa e baleta na bula dodonu, yalodina, kei na so tale, ka ra sa veivuke ka veivakatatakicaketaki, ia e lailai wale na vunau e vakamacalataka na veika e gadrevi vei ira na tamata yadua ni bera ni da curuma na matanitu vakalomalagi. Sa ikoya oqo na itukutuku sa gadreva dina tu ko vuravura. E vica na italatala e tiko na veika me ra tukuna vei ira na nodra ivavakoso e vakauqeti ira me ra vakabauta ni sa vakalou o Jisu Karisito kei na kena gadrevi me ra vakayagataka na cakacaka vakalotu ni kosipeli e vakavulica o koya.⁷ [Raica na vakatutu 2 ena tabana e 143.]

E vuqa na tamata era rawa ni ciqoma na dina kevaka e soli vei ira na madigi o ya.

Era sa maqusa dina tiko o ira na luvei Tamada ena veivanua kecega me ra kila na cava me ra cakava, ia ena vuku ga ni veivakayarayarataki butobuto sa tu e vuravura, era sa rawai kina; ka ra vakamatabokotaki o ira na tamata dokai e vuravura mai na ka dina. … Sa cakacaka tiko o meca, ia na kaukauwa duaduaga ka na vakasevataka na nona veivakayarayarataki o ya na kosipeli i Jisu Karisito.⁸

Era sa veikilakasamitaki tiko na tamata. Era sa sega ni vakabauta na veika era sa rogoca, ka ra sa sega ni gadreva me ra cakava na ka a vakayacora o Filipi, e dua vei ira na tisaipeli ni iVakabula, ka a vakarogoya vei Nacanieli ni laki raici koya. A kaya o Filipi, “Sa lako mai na Turaga.”

Ka sa vakamacalataki koya ka taroga kina o Nacanieli, “E lako mai vei o koya?”

A sauma o Filipi, “Oi, e lako mai Nasareci o koya.” Sa qai kaya o koya na tamata vinaka, “E tubu rawa beka mai Nasareci e dua na ka vinaka?” a kaya o Filipi, “Lako mai mo raica.” (Raica na Joni 1:43–46.)

Sa vakavulici tu mai o Nacanieli ni sega na ka vinaka ena tubu mai Nasareci, ia oqo na tamata a qai vakatoka vua na iVakabula ni o koya e dua na kai Isireli sa sega vua na cala—sa tamata vinaka, ia a rawai baleta na italanoa a rogoca taumada.

Ia ni sa mai kila rawa, ka sa mai ciqoma na nodratou veisureti na tisaipeli me “Lako mai mo raica,” a lako yani me raica.

Keitou sa marautaka vakalevu na veivakayarayarataki ni nona Yalotabu. Keitou sa gadreva na tamata kecega me ra rekitaka na veivakalougatataki o ya, ni gauna era na taroga kina, “Era tamata vakacava o ira oqo?” eda sa qai sauma yani, “Lako mai mo ni raica.”⁹

Sa kacivi au na Tamaqu Vakalomalagi … meu gole ki na vuqa na veiyasai vuravura, ka sa lakovi e sivia e milioni na maile vakatekivu mai na gauna au a kacivi ki na cakacaka vakalotu. Au sa lakova oti e vuqa na vanua kei na veiyasana, kei na vanua cava ga au a gole kina au sotavi ira kina na tamata vinaka, o ira na luvena tagane kei na yalewa na Kalou era sa waraka tiko na kosipeli i Jisu Karisito, ka na rawa vei ira e udolu, drau na udolu, ka milioni me ra ciqoma na dina kevaka me ra na kila mada ga na veika eda sa kila tu.¹⁰

Era tiko e vuqa na veimatalotu vinaka e vuravura, ka vuqa na turaga kei na marama yalodina era bula voli ena lewa ni Tamada Vakalomalagi ena kena era sa kila vakavinaka tiko. …

O ira taucoko era bulataka tiko na rarama sa solia mai na Turaga vei ira ka ra vakasaqarai koya ena masumasu yalodina ena tarai na yalodra, ena vakayarayarataki nodra vakasama, ka soli vei ira na madigi me ra kila kina ni sa vosa tale mai na Kalou.¹¹ [Raica na vakatutu 3 ena tabana e 137.]

Eda sa maqusa tiko meda wasea na kosipeli baleta ga ni da lomani ira na wekada.

Ena rairai toka beka vua e dua na daudidigo mai tautuba ni ra sa maqusa tiko vakatani o ira na Yalododonu Edaidai. E kaya kina vakaoqo e dua: “E ka duatani vei au niu raica na nomuni rekitaka yani ki liu na nomuni cakacaka. Seu na vosa vua e dua na itabagone se dua na tagane uabula, vua e dua na dauqaravi iteitei se dua na ovisa vei ira na nomuni tamata, era sa marau tiko ka vakacegu ka yalonuidei ni sa tiko vei ira na kosipeli i Jisu Karisito.” …

… E sega beka ni veivakurabuitaki ni da sa dau maqusa ena noda sokalou, ni sa noda ivakarau meda maqusataka na kena wasei yani na dina lagilagi oqo vei ira na wekada? Eda sa na kurabuitaka beka, ni yaco mai na gauna era sa kacivi yani na luveda tagane me ra laki kaulotu, se da kerei meda biuta tu na noda cakacaka ka gole yani vakaitalai ni Kalou sa bula tiko, ka vakatikori ena kaukauwa mai lomalagi, ka taukena na lewa sa soli mai ena iotioti ni gauna oqo, me rawa kina ni da wasea vei ira na tamata kecega na dina totoka oqo sa mai vakaiyautaka vakalevu na noda bula, … ni da sa gadreva ka marautaka na noda vakaio?¹²

Sa keda ivakaraitaki na Kosipeli i Jisu Karisito. Sa katakata tu e lomada na gagadre meda laki vakabula na yalodra na luve ni tamata. E sega ni baleta meda na tarai keda cake kina ka yaco meda tamata qaqa ena veika vakailavo; e sega ni baleta me vakalagilagi na yacada ena vuravura oqo ena veika eda rawata; ia sa baleta duadua ga ni vanua cava ga era tiko kina o ira na luvena tagane kei na yalewa na Kalou, se vanua cava ga era tiko kina, me ra na rogoca sara na Kosipeli oqo, ni sai koya oqo na kaukauwa ni Kalou ki na nodra vakabulai o ira taucoko era sa vakabauta ka talairawarawa ki na kena ivakavuvuli. Kei ira era sa vakabauta era na vakamuria na ivakarau sa solia mai na iVakabula ni a kaya vei iratou na Nona tisaipeli, “O koya sa vakabauta ka sa papitaisotaki ena bula; ia ena cudruvi ga ko koya sa sega ni vakabauta.” [Marika 16:16.]¹³

Mo ni vakasamataka na ilesilesi sa tu oqo vei keda, ni kevaka meda na vakaweleweletaka se duatani tiko na ituvaki ni noda bula, ka sega ni vakasaqara meda wasea na dina vei ira e lomani ira na Turaga me vaka ni sa lomani keda, ni ra sa ka talei e matana. Au vakabauta ni dodonu me dua na veivakayadrati vei ira eso na lewe ni Lotu oqo. Au vakabauta ni dodonu me vakayacori e dua na cakacaka levu me wasei yani vei ira na luvena na Tamada na dina taucoko sa vakatikori mai ki na Lotu oqo.¹⁴

Kevaka e dua sa tauvimate, kevaka e wekada o koya, meda laki qaravi koya ena marau; kevaka e dua e mate ena nona matavuvale, meda saga meda vakacegui koya. Ia ena veiyabaki yadua eda vakatara tiko me lako tiko o koya ena salatu ena vakarusa na nona madigi me laki bula tawamudu kina, eda lako siviti koya sara, me vaka ga ni ka wale.¹⁵

Eda sa kila tiko beka ni tamata yadua sa ibulibuli ni Kalou ka sa luvena tagane na Kalou, kei ira yadua na yalewa era sa luvena? Se vanua cava ga era tiko kina, era sa luvena, ka sa lomani ira o koya ka sa gadreva me ra vakabulai. Sa qai sega kina ni rawa vei keda na lewe ni Lotu meda dabe tiko ka vakasavu liga. Eda na sega ni ciqoma na veika vinaka ni iloloma mai vua na Tamada Vakalomalagi sa soli tu me noda, na kila-ka ni bula tawamudu, ka kocova toka ga, ena noda nanuma ni da na vakalougatataki kina. Na veika eda taukena ena sega ni vakabulabulataka na noda bula, na ka ga eda solia yani.¹⁶

Meda sa qai vinakata dina sara me ra vakabulai o ira na tamata meda sa qai maqusa ena cakacaka me ra saumaki mai: meda marautaka kina na nodra vakavinavinaka kei na loloma tawamudu, ka meda vakavinavinaka vua na Tamada Vakalomalagi, baleta ni da a taleitaki ira talega na Luvena.¹⁷

Na noda ilesilesi baleti ira na luvena na Tamada … sa ilesilesi ni sautu, kei na caka vinaka vei ira na tamata kecega. Oqo e dua na gagadre cecere ka marautaki meda wasea vei ira kecega na luvena na Tamada na veika vinaka sa vakatikora vei keda o koya ena loloma; ka da sa vakabauta ni sa rawa me ra kila vakavinaka, ni da dau tekiduru, ena veisiga yadua, ka masulaka me tarai na nodra bula, ka me sobuta na yalodra na yalo ni Kalou, ka me ra kila vakavinaka na dina ni sa soli vakakina vei ira.¹⁸

Au sa gadreva kina ena Lotu cecere oqo, ena kaukauwa sa solia mai kina na Kalou, me sa rawa ni kaburaka vakatotolo yani na ka dina, ka vakabulai ira na veimatanitu mai na rusa. Vakaisoqosoqo, eda sa tubu sara tiko vakatotolo, ia au sega ni marautaka na toso cake ni iwiliwili niu sa vakabauta tiko ni veivakayarayarataki eda veiserauni kina ka sa vakilai ni sa ka vinaka ni o ira na luvei Tamada, mai na vualiku ki na ceva, mai na tokalau ki na ra, era sa rogoca tiko na itukutuku ni bula kei na veivakabulai, ni sega oqo era na sega ni rawa me ra laki vakaitikotiko ena itikotiko ni Dauveivueti ni kawatamata.¹⁹ [Raica na vakatutu 4 ena tabana e 143.]

Sa lesi keda kina na Turaga ni da na soli itukutuku ena vuku ni noda cakacaka me wasei kina na isolisoli ni kosipeli.

Eda sa mai ciqoma e dua na isolisoli totoka, ia mai na isolisoli o ya e tiko kina na kena ilesilesi cecere. Eda sa vakalougatataki mai vua na Turaga ena dua na kila-ka e levu cake mai vei ira na wekada, ka sa tiko ena kila-ka oqo na itavi meda na wasea yani vei ira na Luvena ena vanua cava era tiko kina.²⁰

Ia oqo, au sega mada ni kila vakavinaka kevaka eda sa qarava dina tiko na Kalou ena noda kaukauwa taucoko kevaka eda guilecavi ira tiko na luvena, se kevaka eda taura na noda gauna taucoko ena kocokoco meda vakatorocaketaki keda tikoga, vakasokomuna na veika ni bula oqo, ka biuti ira tu na luvena ena butobuto, ni sa rawa ga vei keda meda kauti ira mai ki na rarama. Au kila ni ilesilesi bibi duadua ni noqu bula oqo o ya : imatai, meu maroroya tiko na ivakaro ni Kalou, me vaka au sa vakavulici kina; kena ikarua, meu vakavulica vei ira na luvei Tamaqu era sega tu ni kila vakavinaka.²¹

E sega ni tiko e dua tale na Kosipeli ni veivakabulai, o koya gona oi keda na veitacini eda lewena tiko na matabete tabu, sa noda ilesilesi meda kauta yani na itukutuku o ya, sega walega vei ira na veimatanitu kei vuravura, ia meda sa kena ivakaraitaki tiko ena noda bula ka vakavulica vei ira na wekada, era sega ni da vakabauta vata. Au sa vakaroti kemuni nikua ni sa lewa ni Turaga vei keda meda kacivi ira na Luvena me ra veivutuni ka tauyavutaki na Nona dina. Kevaka meda qai vakawalena na noda madigi oqo meda vakavulici ira na luvena tagane kei na yalewa na Kalou, era sega ni da vakabauta vata, ka ra tiko maliwai keda, na Kosipeli oqo ni noda Turaga, ena taroga vei keda ena yasa kadua ni ilati na veika eda a sega ni cakava rawa.²²

Ni oti vakalailai eda na sotava na itukutuku ni noda bula, kevaka meda a yalodina tiko, kau sa vakadeitaka ni o Tamada kecega na kai vuravura ena vakavinavinakataki keda ka vakalougatataki keda ena noda kauti ira mai vakalewelevu na luvena tagane kei na yalewa me ra kila vakavinaka kina na inaki ni bula oqo kei na sala me marautaki kina ena veivakayarayarataki ni yalona.²³

Ena gauna eda sa gadreva kina na yalo ni kosipeli meda rawa ni vakavulici ira kina e vuqa na luvena na Tamada vei ira eda yacovi ira rawa, na dina sa lagilagi sa ka yaga ki na nodra bula vakalou; ni qai yaco mai na gauna eda na tu ena mata ni Dauveivueti ni kawatamata, ka sa rawa meda kaya vua: “Ena kaukauwa ko ni a solia vei au, ena vuku kei na kila-ka ko ni sa solia vei au, au sa vakasaqaqara ena yalo e vinaka kei na loloma sega ni veivakaisini, ena gugumatua kei na yalovinaka meu kauti ira mai vakalewe levu na luvemuni me ra kila vakavinaka na kosipeli ena kena au rawata rawa meu cakava.”²⁴ [Raica na vakatutu 5 ena tabana e 144.]

Kevaka meda wasea na kosipeli vei ira na luve ni Kalou, sa keda isau na reki vakalevu vata kei ira ena matanitu vakasilesitieli.

E vuqa vei keda, eda vakayagataka e levu na gauna ena noda vakasaqara na veika ni bula oqo ni da na biuta dina tu mai ni da sa takali kina eke, ia era tiko vakavolivoliti keda tu na yalo tawa mate rawa, ni kevaka me rawa, meda vakavulica ka veivakauqeti ka vakadikeva na dina, ka vakatikora e yalodra e dua na kila-ka ni sa bula tiko na Kalou. Na iyau cava beka e vuravura taucoko me na vakamareqeti vei keda, ni sa rawa me ra vakavinavinakataki keda eke kei na nodra vakamuduo e sega ni oti rawa ka tawamudu ena vuravura sa roro tiko mai. Sa qai ilesilesi e bibi duadua.²⁵

Vakasamataka mada na ka ena yaco kevaka meda a sega ni kocokoco ka vakabula walega na noda matavuvale lailai, ena rawa meda na wilika na daseni kei na drau na turaga kei na marama eda na vakayarayarataka rawa me ra ciqoma na Kosipeli ni Turaga. Eda na qai vakalougatataki vakaidina ka marautaka na nodra loloma kei na vakavinavinaka me tawamudu.²⁶

Sa vakacava na marau ena yasa kadua ni ilati, ni ra sa raica ira na turaga kei na marama vinaka oqo era a bula cake tiko ena rarama sa tiko vei ira, ni ra saga tiko me ra cakava na nodra itavi vua na Kalou, ena vuku ga ni da a lako kina, ena vuku ga ni noda gugumatua kei na gagadre ni yaloda meda wasea yani vei ira, era na ciqoma na itukutuku tale eso baleta na kosipeli ni noda Turaga ka ciqoma na cakacaka vakalotu ni Nona Vale Savasava ka vakavakarau me ra lewe ni Matanitu Vakasilesitieli. Sa na ka levu kina na nomuni marau, kevaka me sa na yaco mai na gauna o ya, ni ko sa tucake tu e mata ni Daunilewa cecere o ya mo solia na itukutuku ni nomu yabaki e vica wale ena bula vakayago oqo, me ra qai tucake tu e yasada e kea o ira na luvena na Tamada sa lomani ira o Koya me vakataki keda talega, ka ra kaya, “Tamai keimami Vakalomalagi, oqo na turaga, oqo na marama a kauta mai vei au ena imatai ni gauna na itukutuku ni Nomuni dina lagilagi ka a vakayavalati au meu vakasaqarai Kemuni vakalevu cake mai na kena au sa cakava oti. Oqo na turaga se marama a cakava vei au na veivakalougatataki oqo.” Ia e sega ni o koya kece o ya.

Ni sa yaco mai na gauna o ya, ni ko sa lako sobu ki na veiitabayabaki ni gauna tawamudu, ni dua na gauna balavu oqori, ena yaco vei iko na nodra loloma kei na vakavinavinaka ni turaga, marama kei na gone yadua ko a cakacakataka na nodra marau tawamudu. Sa qai sega beka ni yaga o ya? Eda na mai bula voli tiko eke ka rawata na drau kei na udolu na dola, ka tu e vuqa na noda manumanu, vale, kei na qele, ia eda na sega ni kauta rawa oqo ki na yasana kadua. Era sega ni gadrevi ki na bula tawamudu, era sa yaga ga eke, ia kevaka meda rawa ni vakavinavinakataki ka lomani mai vei ira eso tale na luveni Kalou, ena drodro mai vei keda oqo me tawamudu. Vakasamataka mada na ibalebale ni ka oqo! Ena gauna ena yaco mai me sa savai ka vakasavasavataki ena bukawaqa ka yaco me matanitu vakasilesitieli, ka ra kau tani vakadua na veika tawa savasava kei na veika kecega e sega ni vinaka sa qai dua dina na ka marautaki meda raica ni da sa mai veitokani vata kei ira era veiqaravi tu mai ena bula vakayago, eda sa mai taukei vata, ka dusimaki mai vei Jisu Karisito na noda Turaga me tawamudu—sa qai sega beka ni yaga dina o ya? Sa qai sega beka ni dua na madigi rekitaki?²⁷ [Raica na vakatutu 6 ena tabana e 144.]

Vakatutu ni Vuli kei na Veivakavulici

Taurivaka na veivakasama oqo ni ko vulica na iwase oqo se ni ko vakavakarau mo veivakavulici. Me ikuri ni veivuke, raica na tabana e viii–x.

Raicalesuva “Na Bula nei George Albert Smith” (tabana 133–134). Na cava o nanuma e sa rui maqusa kina o Peresitedi Smith ena cakacaka ni kaulotu? Na cava na kena ibalebale vei iko mo “vakaliuci [iko] taumada tiko [mo] sa dua na daukaulotu ni Lotu”?
Na cava e solia na kosipeli vakalesuimai ki vuravura me ikuri ni “lesoni ni bula savasava ” e vakavulici tiko ena vuqa na matalotu? (Me kena ivakaraitaki, raica na tabana 134–135.)
Wilika na iwase ka tekivu ena tabana e 135 (raica talega na V&V 123:12). Na nodra ivakaraitaki cava na tamata o sa raica ena nodra sa valuta rawa na nodra nanuma cala baleta na Lotu ka ciqoma na veisureti “lako mai mo raica”? Na cava eso na sala mana me vakayacori kina na veisureti oqo?
Wilika na otioti ni parakaravu taucoko ena tabana 128. Na cava eso kina na gauna eda dau guce meda wasea na kosipeli vei ira na wekada? Ni ko vulica tiko na tabana 134–135, vakasamataka mada na ka meda cakava meda valuta rawa kina na noda guce oqo.
Ni o wilika na iwase ka tekivu ena tabana e 139, vakananuma mada ke o sa cakava tiko na ka sa namaka tiko vei iko na Turaga mo wasea kina na kosipeli. Ena masumasu mo raica mada na sala mo rawa ni taucoko kina na nomu muria na ivakaro oqo.
Raicalesu na iotioti ni iwasewase ni ivakavuvuli (tabana e 141) ka vakananumi koya mada na tamata a vakatakila taumada vei iko kei na nomu matavuvale na kosipeli vakalesuimai i Jisu Karisito. Na cava o rawa ni cakava mo vakaraitaka kina na nomu vakavinavinakataka na tamata o ya?

iVolanikalou Veisemati: Emosi 8:11–12; Mosaia 28:1–3; Alama 26:28–30; Vunau kei na Veiyalayalati 4:4; 18:10–16

Veivuke ni Veivakavulici: “E vinaka cake me tauri ga e vica na vakasama vinaka ka rawa kina na veivosaki vinaka —kei na vuli vinaka—ka kakua ga ni vakatotolotaki tu, me vakavulici kina na vosa yadudua ena ivolavakarau. … Sa ka yaga sara na tauri vakamalua ni gauna kevaka e tiko vata kei kemuni ena kalasi na Yalo ni Turaga” (Jeffrey R. Holland, “Teaching and Learning in the Church,” Ensign, June 2007, 91).

“Sa keda ivakaraitaki na Kosipeli i Jisu Karisito. Sa katakata tu e lomada na gagadre meda laki vakabula na yalodra na luve ni tamata.”

“Kei ira era sa vakabauta era na vakamuria na ivakarau sa solia mai na iVakabula ni a kaya vei iratou na Nona tisaipeli, “O koya sa vakabauta ka sa papitaisotaki ena bula.’”

“Ena gauna eda sa gadreva kina na yalo ni kosipeli meda rawa ni vakavulici ira kina e vuqa na luvena na Tamada vei ira eda yacovi ira rawa.”