iVakamacala Taumada

Na Mataveiliutaki Taumada kei na Kuoramu ni iApositolo Le Tinikarua eratou sa tauyavutaka na Nodra iVakavuvuli na Peresitedi ni Lotu ena veivola eso me vukei kemuni me titobu kina na nomuni kila vakavinaka sara na kosipeli vakalesui mai ka toro voleka yani vua na Turaga ena nodra ivakavuvuli na parofita ena gauna oqo. Ni sa vakaikuritaka na Lotu na itukutuku ena ivola oqo, ko ni na vakasokumuna kina e dua na iyau ni ivola veidusimaki me baleta na nomuni vuvale. Sa tuvanaki na lewe ni ivola oqo me vakayagataki ki na vuli yadua ni tamata ka baleta talega na ivakaro ni Sigatabu. E rawa talega me vukei kemuni ena nomuni vakarautaka na veilesoni tale eso se vosa kei na isaunitaro me baleta na ivunau ni Lotu.

Na ivola oqo e vakaraitaka na ivakavuvuli nei Peresitedi George Albert Smith, ka a veiqaravi me Peresitedi ni Lotu i Jisu Karisito ni Yalododonu Edaidai mai na ika 21 ni Me, 1945, ki na ika 4 ni Epereli, 1951.

Vuli Yadua

Ena nomuni vulica tiko na ivakavuvuli nei Peresitedi George Albert Smith, mo ni vakasaqara ena masumasu na veivakauqeti ni Yalotabu. Na veitaro ena itinitini ni iwase yadua ena vukea nomuni kila vakavinaka ka bulataka na veivakavuvuli nei Peresitedi Smith. Ena nomuni vulica tiko na veivakavuvuli oqo, o ni na vinakata mo ni vakasamataka me baleta na kena vakavulici vakacava kivei ira na lewe ni matavuvale kei ira na itokani. Ena vakaukauwataka oqo na nomuni kila vakavinaka na veika o ni wilika.

iVakavuvuli mai na iVola Oqo

Sa rawa mo ni vakayagataka na ivola oqo ena veivakavulici e vale se e valenilotu. Era na vukei kemuni na idusidusi oqo.

Vakavakarau mo Veivakavulici

Vakasaqara na veidusimaki ni Yalo Tabu ena nomuni vakavakarau mo ni veivakavulici. Vulica ena masumasu na iwase me yaco me vakadeitaka na nomuni kila vakavinaka na ivakavuvuli nei Peresitedi Smith. O ni na veivakavulici ena yalodina cecere cake kei na kaukauwa ena kena vakayarayarataki kemuni vakayadua na nona vosa (raica na V&V 11:21).

Kevaka o ni vakavulica tiko e dua na lesoni ni Matabete Melikiseteki se iSoqosoqo ni Veivukei, e sega ni dodonu mo ni biuta vakatikitiki na ivola oqo se vakarautaka na veilesoni mai na veiyaya tale eso. Mo ni digia ena masumasu mai na iwase ni veivakavuvuli oqori na veika o ni vakila ni na veivuke sara vakalevu kivei ira o ni vakavulica. Eso na iwase e tu kina e levu cake sara na iyaya mai na kena e rawa mo ni veivosakitaka ga ena gauna ni kalasi. Vakatara me tomani na veiwasei vinaka ka kakua mai na kena tovolei tiko me tauri kece na ivakavuvuli.

Vakauqeti ira na vakaitavi me ra vulica na iwase ni bera na gauna ni lesoni ka kauta vata tiko mai na nodra ivola. Ni ra cakava oqori, era sa na vakavakarau vakavinaka cake sara me ra vakaitavi ena veiwasei ka veivakaqaqcotaki vakai ira.

Vakamacalataka na iWase

Ena nomuni vakamacalataka na iwase, vakakina ena gauna taucoko ni lesoni, mo ni tovolea mo ni bucina e dua na draki me rawa vua na Yalotabu me tara na lomadra kei na nodra vakasama o ira o ni vakavulica. Ni tekivutaki na lesoni, mo ni vukei ira o ni vakavulica me ra rai vakatabakidua ena ivakavuvuli ni iwase. Na kena caka oqo, e rawa mo ni:

Wilika ka veivosakitaka na iwase ka kena iulutaga “Na Bula nei George Albert Smith” na kena itekitekivu ni iwase.
Veivosakitaki e dua na iyaloyalo se ivolanikalou mai na iwase.
Lagati e dua na serenilotu me rau salavata.
Wasea vakalekaleka na ka e sotavi yadudua me baleta na iulutaga.

Liutaka na Veivosakitaki ni iVakavuvuli nei Peresitedi Smith

Ena nomuni veivakavulici mai na ivola oqo, sureta eso me ra wasea na nodra vakasama, tarogi na veitaro, ka veivakavulici vakaiira. Ena uasivi sara nodra vulica ena nodra vakaitavi vagumatua. Sa ikoya talega oqo e dua na kena sala vinaka me vukei ira me ra ciqoma na ivakatakila ki na tamata yadua. Me vakayaloqaqataka na veivosaki, vakayagataka na veitaro ena iotioti ni iwase. Na veitaro oqo e veidusimaki tiko ena vuqa na vanua ena iwase me vakaraitaka kina na iwasewase cava ni ivakavuvuli e dusimaki kina. E rawa talega mo ni vakalevutaka na nomuni taro vakabibi me baleti ira o ni vakavulica. Kena ivakaraitaki, e rawa mo ni tarogi ira na vakaitavi nodra rawa ni vakayagataka vakacava na ivakavuvuli nei Peresitedi Smith ena nodra itavi vakaitubutubu se dauveituberi ni matavuvale se dauveisiko.

Na veidigidigi oqo e rawa me vakaikuritaka na nomuni vakasama:

Mo ni kerei ira na vakaitavi me ra wasea na veika era vulica mai na nodra vuli yadua ena iwase. E rawa ni veivuke vakalevu sara me ia na veitaratara ena loma ni macawa vata kei na lewe vica era vakaitavi ka kerei ira me ra vakavakarau ena nodra lako mai ka mai wasea na veika era sa vulica.
Mo ni lesi ira na vakaitavi me ra wilika na veitaro digitaki mai na itinitini ni iwase (me ra wilika yadudua se vakailawalawa lalai). Mo ni tarogi ira me ra vakasaqara na ivakavuvuli ena iwase ka rau salavata kei na veitaro. Mo ni qai sureti ira me ra wasea na nodra vakasama kei na nodra rai vata kei ira na vo ni ilawalawa.
Me ra wilika vata e dua na itukutuku digitaki nei Peresitedi Smith mai na iwase. Mo ni kerei ira na vakaitavi me ra wasea na ivakaraitaki mai na ivolanikalou kei na veika era sotava vakaiira ka vakaraitaka na veika a vakavulica o Peresitedi Smith.
Mo ni kerei ira na vakaitavi me ra digitaka e dua na iwase era taleitaka ka wilika ena vakanomodi. Mo ni sureti ira me ra soqoni vata vakailawalawa me ya rua se ya tolu na tamata era digitaka na iwase vata ga ka veivosakitaka na veika era vulica.

Tinia na Veivosaki

Mo ni vakalekalekataka na lesoni se kerea e dua se rua na vakaitavi me ra cakava vakakina. Mo ni vakayaloqaqataki ira o ni vakavulica me ra wasea kivei ira eso tale na veika era sa vulica mai na ivakavuvuli nei Peresitedi Smith. Mo ni vakadinadinataka na ivakavuvuli o ni sa veivosakitaka. O ni na rawa talega ni sureta eso tale me ra wasea na nodra ivakadinadina.

iTukutuku me baleta na iVurevure era Cavuti ena iVola Oqo

Na ivakavuvuli nei Peresitedi Smith ena ivola oqo era lavetaki vakadodonu sara ga mai ena dua na mataqali ivurevure. Na veivosa cavuti oqo e tu kina na pagitueti, sipeli, matanivola vakalevutaki, kei na vakaparakaravutaki ni imatai ni kena ivurevure vakavo ga na veiveisau ni vakarau me tabaki se kena taipataki e gadrevi me vakatorocaketaka na kena rawa me wiliki. Oqo na vuna, e rawa mo ni raica kina ni lailai na kena sega ni salavata ena tiki ni vosa. Me kena ivakaraitaki, na vosa kosipeli e matanivola lalai ena so na vosa cavuti ka matanivola lelevu ena so tale na vanua.

E dau vakayagataka talega o Peresitedi Smith na vosa me vaka na turaga, tagane, se tamata me vakabalebaletaki kivei ira kecega na tamata, ruarua na tagane kei na yalewa. E dau vakayagataka wasoma na vosa koya, nona, kei na koya me vakabalebaletaki kivei rau ruarua na tagane kei na yalewa. E sa dau kena ivakarau tu oqo ena ivosavosa ni nona gauna. Veitalia ni duidui na kedra veimaliwai na itautau ni vosa kei na kena vakayagataki vakalevu cake ena gauna oqo, na ivakavuvuli nei Peresitedi Smith e vakayagataki ruarua kivei ira na marama kei na turaga.