Wase 3

Noda iVakadinadina Baleti Jisu Karisito

Na kosipeli vakalesui mai sa vakaikuritaka na nodra ivakadinadina na Yalododonu Edaidai ni o Jisu Karisito na Luve ni Kalou.

Na Bula nei George Albert Smith

Ena nona dau veilakoyaki voli me vaka e dua na Vakaitutu Raraba sa dau sotavi ira kina ena veigauna eso o George Albert Smith o ira era dau nanuma tu ni o keda na Yalododonu Edaidai eda sega ni vakabauti Jisu Karisito. Na vakasama cala oqo sa dau kurabui ka lomaleqa kina o Peresitedi Smith, ka dau tovolea me vakadodonutaka ena nona wasea na nona ivakadinadina me baleta na iVakabula.

Ena dua na gauna a vosa kina ena dua na soqoni vaka-Lotu e Cardston, Kenada, me baleta na bula kei na itavi ni Lotu. Ena mataka ka tarava a gole ki na siteseni ni sitimanivanua me volia e dua na tikite. Ni laini tu, a rogoca na nodrau veitalanoa e dua na marama kei koya na dau volitaki tikite. E tukuna tiko na marama oqo ni ena bogi a nanuma me lako ki na dua na sokalou ni Yalododonu Edaidai.

A kurabui na dau volitaki tikite. “Ae,” e kaya. “O sega ni kaya tiko ni o a lako ki lotu ki kea.”

“Io, au a lako kina,” e kaya na marama oqo. “Na cava me sega kina?”

E kaya na dau volitaki tikite, “Era sega mada ga ni vakabauti Jisu Karisito.”

A qai sauma na marama oqo ka kaya, “Ena bogi sara ga au a vakarorogo kina vua e dua na italatala qase ni Lotu ko ya ni tukuna tiko na bula nei Jisu mai Nasareci, kau se bera vakadua ni bau rogoca e dua me vakamacalataka vakamatata cake na nona kila ni o Jisu na Karisito, mai vei koya a vosa ena soqoni ko ya.”¹ [Raica na vakatutu 1 ena tabana e 33.]

A rawata o George Albert Smith na igu mai na nona ivakadinadina me baleti Jisu Karisito, ka dau marautaka me wasea vei ira na tani. Ni yabaki 44, ni oti na nona veiqaravi tiko ena nona ilesilesi vakaiapositolo me 11 na yabaki, a kaya vakaoqo:

“Au sa vakayaloqaqataki, me vaka, ni laveti tani mai vei au ka soli vei au na kaukauwa e sega ni noqu meu vakavulica na dina lagilagi ka a kacivaka na Dauveivueti ni vuravura. Au se bera ni raici Koya e matana votu ia au sa dau marautaka na veitokani ni Yalona ka vakila na Nona iserau ena dua na sala ka na sega ni vakacalai rawa. Au kila ni bula tiko na noqu Dauveivueti kau solia kina ena marau na noqu sasaga ni yalomalumalumu meu vakadeitaka na Nona ivakavuvuli. … E sautanini na veitiki ni yagoqu niu kila ni bula tiko o Koya ka na yaco mai na siga me kila kina na tamata kecega.

“A mate na iVakabula me rawa vei keda na bula. A vakadruka na mate kei na ibulubulu ka dodoka tu vei ira kece era na talairawarawa ki na Nona ivakavuvuli na inuinui ni tucaketale ena lagilagi. … au kila ni oqo na nona cakacaka na Turaga, ni o Jisu na noda iVakabula dina sara.”²

A mai takali o Peresitedi Smith ena ika 81 ni nona siganisucu, 4 ni Epereli, 1951. Ena iotioti ni gauna ena nona bula, ni ratou toka voleka na nona matavuvale, a taroga na luvena tagane, “Tata, e dua beka na ka o via tukuna vei keitou na matavuvale—e dua na ka talei?”

Ena matadredredre, a vakadeitaka tale na ivakadinadina sa dau wasea ena vuqa na gauna ena nona bula: “Io, o koya ga oqo: Au kila ni bula tiko na noqu Dauveivueti; au kila ni bula tiko na noqu Dauveivueti.”³

iVakavuvuli nei George Albert Smith

O Jisu Karisito na Luve ni Kalou, ka o Koya ka bula tiko nikua ni noda iVakabula sa tucake tale.

Au sa raica e vuqa e vuravura era sega tu ni kila ni da vakabauta na nona ilesilesi vakalou na noda Turaga, kau sa dusimaki meu tukuna ena vica na gauna ni sega tale ni dua na matatamata e vuravura era kila vakavinaka cake na nona ilesilesi vakalou o Jisu Karisito, ka ra vakabauta vakavinaka sara ni o koya na Luve ni Kalou, ka ra vakadeitaka e yalodra ni ena gauna oqo sa vakalagilagi tu kina ena liga imatau i Tamana, me vakataki ira na Yalododonu Edaidai.⁴

Au kila me vaka ga na noqu kila niu bula tiko ni o koya na luve ni Kalou, ena vukuna ia ena vukuna duadua ga eda na rawata kina na bula vakacerecerei ena matanitu vakasilesitieli kei ira kece era muria na we ni yavana ka bula me vaka na ivakavuvuli a solia ko koya, era na marau ena bula oqo ka ra na vakarautaka ena vukudra e dua na vale vakaturaga ena nona matanitu vakasilesitieli, era na tiko kina vata kei koya me tawamudu.⁵

Na Dauveivueti ni kawatamata e uasivi cake mai na dua na tamata vinaka ka lako mai ki vuravura me vakavuvulitaka vei keda na ivakavuvuli savasava. Na Dauveivueti ni kawatamata a taukena na vuku ka sega ni vuku vakatamata. O Koya dina na Luve ni Kalou, na le duabau ga ni Kalou ena yago. … A lako mai ko Koya me kacivi ira na tamata ki na veivutuni, me veisautaki ira mai na cala ni nodra ivalavala. A lako voli ena kedra maliwa ka matataka na Kalou na Tamada Tawamudu, ka tukuna tiko ni sa vaka na ivatuka kei Tamana, ia ko ira era sa raici Koya era sa raica na Tamana, ka tukuna vei ira ni sa talai mai me cakava na lomai Tamana, ka kacivi ira na tamata kecega me ra vuki tani mai na cala sa tekivu me curu yani ena kedra maliwa, me ra veivutunitaka na nodra ivalavala ca ka sobu yani ki na wai ni veipapitaisotaki.⁶

Ena nona gauna na iVakabula sa dau vakasolokakanataka tiko na meca vei ira na tamata, e sega ni Luve ni Kalou ko koya, io mo ni kakua ni ciqomi koya, o koya e tamata ga, o koya e luvedrau ga o Meri kei Josefa ka sega ni Luve ni Kalou me uasivi cake mai vei kemuni, era a rogoca na tamata na ivadi ca ko ya nei koya na vu ni ca ka vakamatea na Dauveivueti ni kawatamata ena kauveilatai.⁷

O koya dina na Luve ni Kalou. A cakacaka ena kedra maliwa [na tamata] ena loloma kei na yalovinaka; ia era viritaka laivi na Yacana me vaka ni ca. … O Koya na Luve ni Kalou, ka tu Vua na dodonu me vosa ena yaca i Tamana. Na dina e kauta mai ki vuravura e vu mai vei Tamana; ka dina ga ni ra vakoti Koya ki na kauveilatai, e dina ga ni ra daramaka ki Uluna na isala tali ena wa vakavotona, ka biuta ki Ligana na ititoko ni veivakasewasewani, ka dina ni ra a vakadavea na Nona dra mai na moto ni veivakararawataki, ia na vosa e cavuta vei ira e vosa ni Turaga, ka sai Koya dina na Luve ni Kalou.⁸

E sega walega ni da vakabauta ni a bula e vuravura o Jisu mai Nasareci, ia eda vakabauta ni se bula tikoga, e sega ni kena ivakamacala walega, e sega ni vaka e dua na ka eda sega ni rawa ni raica se tara, ia eda vakabauta ni o Koya e dua na tamata vakacerecerei, ni a vakaturi cake ena yago vata ga a vakadavori ena ibulubulu nei Josefa na kai Arimacea, na yago vata ga a kau ki kea mai vei ira era dau lomani Koya. Na Jisu Karisito vata ga ka a tucake mai na ibulubulu, sa kauta mai na yago sa savai ka vakasavasavataki, … ka kauta yani ena nona seyavu mai na mata vakatamata mai Jerusalemi ena gauna erau kaya kina na tamata vakaisulu vulavula: “Ena lako tale mai vakakina me vaka dou sa raici koya ni sa lako ki lomalagi.” [Raica na Cakacaka 1:10–11.]

Oqo na Jisu mai Nasareci era vakabauta na Yalododonu Edaidai. Eda vakabauta talega ni yalayala sa vakayacori me baleta na bula vakatamata ena vakataucokotaki, ena yaco mai na gauna, ni sa vunautaki oti ki vuravura raraba na kosipeli, ki na veimatanitu, na veimataqali, na duivosavosa kei na tamata, me sega kina na nona iulubale na tamata, eda vakabauta ena nona kaukauwa na Tamada Vakalomalagi eda na rawata na kawatamata na veivakalougatataki vakasakiti o ya ni tucake tale mai na mate, ka na lako mai na Dauveivueti ni kawatamata ena o ni lomalagi ena kaukauwa kei na lagilagi me mai tiko e vuravura. Eda vakabauta ni na lako mai o Jisu mai Nasareci me mai tiko vata kei ira era sa kilikili kaya na lagilagi vakasilesitieli.⁹ [Raica na vakatutu 2 ena tabana e 33.]

Eda duavata kei na ivakadinadina ni iVolatabu me baleta na nona itavi vakalou o Jisu Karisito.

A lako sobu ki wai ko Jisu mai Nasareci ka papitaisotaki mai vei Joni, ia ni sa mata cake mai wai, sa lako mai na Yalo Tabu me vaka na ruve ka mai ro vua. Ka sa kaya e dua na domo mai lomalagi, “O Koya oqo na noqu Gone ni toko, au sa dau vinakata vakalevu.” (Raica na Maciu 3:13–17.)

E rawa beka ni dua na ka e matata cake mai na kena oqori? Na noda iVolatabu vakasakiti e tu kece kina na itukutuku oqori kei na vuqa tale, ka dina taucoko. Ni ra kaya se nanuma na tamata ni da sega ni vakabauta na nona ilesilesi vakalou o Jisu Karisito, tukuna me ra kila ni da vakabauta na veika kece e vakavuvulitaka na iVolatabu me baleti Koya. Eda vakabauta na italanoa ni nona vakadeitaki ira na nona tamata ka vakavulici ira, kei na ivakarau, … a qai vakamatei kina e muri.¹⁰

Eda ciqoma ka sega ni dua na kena vakataratutu na nodra ivakadinadina na dauvunau kece ka tu ena Veiyalayalati Vou ka baleta na nona tucake tale na Dauveivueti ni kawatamata. E matata vakasigalevu ka vaka vei au ni sega ni dua na tamata dau vakasama vakamalua me na sega ni kila rawa. Na ka dina o ya ni oti na nona vakamatei ena kauveilatai na iVakabula ka vakotori ena ibulubulu, a tucake mai, ia ena vasagavulu na siga a tiko voli kina kei ira na nona tisaipeli, a kana ika kei na oni vata kei ira, era a vakila na we ni ivako e ligana kei na we ni moto e sarisarina. A tukuna vei ira ena nona tu ena kedra maliwa, “raica na ligaqu kei na yavaqu sai au dina ga: tarai au ka raica ni sa sega ni vakalewena se vakasuina na yalo, me vaka dou sa raica vei au.” [Raica na Luke 24:39–43.] E dina sara oqo na ivakadinadina e sega ni rawa ni veisautaki ka se vuqa ga vei ira na luvena na Tamada era sega ni ciqoma rawa.¹¹ [Raica na vakatutu 3 ena tabana e 33.]

Na iVola i Momani kei na ivakadinadina nei Josefa Simici e solia vei keda na ikuri ni ivakadinadina me baleta na nona vakalou o Jisu Karisito.

A tarogi na taro ena vuravura makawa ni sega ni vu mai vua na Kalou ko Jisu, baleta ni a sucu mai me vaka e dua na gonelailai, ka davo ena dua na vale ni manumanu, na Tinana ko Meri ka tamana o Josefa na mataisau. E vuqa era vakadonuya ni o Koya e dua na tamata cecere ka vinaka, ia era vinakata me ra butakoca tani mai Vua na vakalou ni Nona sucu.

E kalougata, vei keda na Yalododonu Edaidai, ni da sa rawata e dua na ivakadinadina bula ni dina na veika oqo; ia me kena ikuri oqori, eda sa ciqoma na ivakadinadina ni a lako mai ko Koya ki na ra ni vuravura, me vaka e volai ena iVola i Momani, ka mai veiqaravi vei ira na Nifai ena vanua oqo. A sega ni lako mai ena gauna oqo me vaka e dua na gonelailai, ia a lako mai ko Koya ena o ni lomalagi; a kacivaki na Nona lako mai ena dua na domo ka curuma na uto ni tamata kecega era tiko ena vanua ko ya. A lako mai ena gauna oqo ko Koya me vaka na tamata mai Lomalagi, ka ra raici Koya ni lako mai. Era kila ni o Koya na Karisito, ni sa parofisaitaki tu mai vei ira na nodra parofita na Nona lako mai. A solia vei ira na isoqosoqo vata ga a tu ena Lotu mai Jerusalemi. A vakavuvulitaka vei ira ni dodonu me ra papitaiso, me vakataki Koya, mai vei ira e tu vei ira na kena veivakadonui me ra vakaitavi ena cakacaka vakalotu ko ya. [Raica na 3 Nifai 11:1–27.] Oqo e sega ni nona vosa e dua na tamata walega; e nona vosa na Luve ni Kalou, o koya sa cabe cake vei Tamana, kei koya sa lesu tale mai, me rawa kina vei ira na luve ni tamata me dua tale na nodra ivakadinadina me vakuri kina na kena iwiliwili sa soli oti vei ira.¹²

Na ivakadinadina bula cava tale beka ni vakaturi cake tale mai na mate a rawa me yaco mai na nona, a lako sara ga mai o Koya [vei ira na Nifai] ena yagona sa tucake tale, ka mai vakavulica vei ira na Kosipeli vata ga a vakavuvulitaka e Jerusalemi? Ka sa vakataucokotaka kina o Koya na yalayala a vakayacori mai Jerusalemi ena nona kaya, “Eso tani tale na noqu sipi, era sa sega ni tiko ena bai oqo; sa kilikili meu kauti ira talega mai a ra na rogoca na domoqu; ena qai duabau na qele ni sipi ka duabau na ivakatawa.” [Joni 10:16] A lako mai ena yagona sa tucake tale me kauta mai vei ira na itukutuku sa parofisaitaka ni dodonu me soli vei ira sa veiqaravi tiko ena vukudra ena gauna oqo.

A dua na gauna vakasakiti vei ira na tamata oqo. Ni oti na nodra vakavulici tiko ena siga taucoko … a vakabulai ira na nodra tauvimate ka tomana na nona dusimaki ira tikoga ena totoka ni nona Kosipeli. Era sega ni lomalomaruataka ni sai Koya na iVakabula kei vuravura. Era raici Koya ni lako mai lomalagi ka vakadinadinataka na nona kaukauwa vakasakiti. … a lako mai ko Koya ena lagilagi. Era lako mai lomalagi na agilosi me vaka ena maliwa ni bukawaqa ka vakavolivoliti ira na gonelalai me ra wavoliti kina ena bukawaqa. Ka ra qai veiqaravi ena vukudra na agilosi. [Raica na 3 Nifai 17:6–24.]

Oqori era sega ni vakasama walega, ia na mataqali ka vakasakiti vakaoqori me na dau nanumi tu me tawamudu vei ira era sota kaya. Ni da Yalododonu Edaidai eda ciqoma na ivolatukutuku oqo me ivakadinadina ni nona tucake tale na noda Turaga o Jisu Karisito.¹³

Ia ena gauna kei na itabayabaki eda bula kina a tucake kina e dua na tamata. … [o Josefa Simici] e sega walega ni tu vua na ivakadinadina ni iVolatabu ni Karisito o Jisu, ia a raica na Kalou na Tamana ni tu ena o ni lomalagi, ka vakaisulu tu ena lagilagi, kei Jisu Karisito, na Dauveivueti ni vuravura, sa vakacerecerei ena Ligana imatau, ka rogoca na domo ni Turaga, ni kaya, “Oqo na Noqu Gone ni Toko au sa Daulomana, rogoci Koya.” [Raica na Josefa Simici—A iTukutuku 1:16–17.] A wasea o koya na ivakadinadina ni raivotu lagilagi oqo vei ira a tiko vata kaya. Eso tale era a ciqoma talega na ivakadinadina mai cake. Na nodra ivakadinadina ena vakalou ni nona itavi na iVakabula sa vakalevutaki ka vaqaqacotaki, ka sa sega kina ni ka ni gauna makawa ni bula na Kalou ka Karisito ko Jisu; era sa kila sara ga vakataki ira, baleta ni ra sa ciqoma sara ga vakai ira e dua na ivakadinadina.¹⁴

Ena noqu vakasama e dua na ivakadinadina kaukauwa duadua me baleta na nona vakalou kei na nona bula na iVakabula na ivakadinadina nei Josefa Simici o koya a solia na nona bula me ivakadinadina ni kena dina na kosipeli i Jisu Karisito.¹⁵ [Raica na vakatutu 3 ena tabana e 33.]

O keda yadua e rawa ni da rawata e dua na noda ivakadinadina ni o Jisu na Karisito.

E dua tale na noda ivakadinadina, e dua na ivakadinadina uasivi cake sara ka veivakadeitaki mai vei ira na kena vo, baleta ni oqori na ivakadinadina e yaco mai vua na tamata ni sa muria na veika e gadreva na Tamada mai Lomalagi. Oqori na ivakadinadina ka vakatakatara kina na yaloda na Yalo Tabu, ni da sa cakava na cakacaka e kaya na Turaga me caka kevaka eda na kila ni sa mai vua na Kalou na ivunau se ka vakatamata ga.¹⁶

O koya sara ga vakataki Koya e kaya, “Sa sega ni noqu na noqu ivakavuvuli, sa nona ga ka talai au mai. Kevaka e dua na tamata sa via cakava na loma i koya, ena kila se sa ka mai vua na Kalou na ivakavuvuli, seu vosa vakai au ga.” (Joni 7:16–17) Oqori na Nona yalayala sara ga. O keda ni da vakabauta Vakarisito e vuravura taucoko eda ciqoma na yalayala o ya ka dodonu meda vakadinadinataka meda raica se na cakacaka se sega. E vuqa era sa cakava oti oqo. Au kila ni levu era sa vakatovolea oti, e vuqa era kila ni bula tiko na Kalou ka ni Karisito o Jisu, ni sai Koya na iVakabula kei vuravura.¹⁷

O koya, sa sega walega ni tu vei keda na ivakadinadina ni ivolatukutuku … , sega walega ni tu vei keda na nodra ivakadinadina na tamata vinaka ka ra sa bula oti e vuravura ena noda gauna, ia kevaka eda sa cakava na veika e gadreva na Tamada Vakalomalagi, kevaka eda a vakabauta na Kalou, kevaka eda sa veivutunitaka na noda ivalavala ca, kevaka eda sa papitaisotaki ena tabadromuci, kevaka eda sa ciqoma na Yalo Tabu mai na ligadra na italai vakadonui ni Turaga, au kaya, kevaka eda sa cakava na veika kece oqo ka sa dui tu kina e yaloda e dua na kila tudei ka na sega ni rawa ni [cakitaki] ni bula na Kalou ka sa Dauveivueti ni kawatamata o Jisu Karisito. …

… Me vaka niu dua na lewena yalomalumalumu na Lotu oqo au wasea vei kemuni na noqu ivakadinadina bula niu kila ni bula tiko o koya me vaka ga na noqu kila niu bula tiko. … O Jisu na Karisito, kau kila ni dodonu me ra kila oqo na luve ni tamata, ni dodonu me ra ciqoma, ia ena nona ivosavosa o koya sa bula tiko mai lomalagi, ni na “tekiduru na duru vakayadua ga ka vakatusa na yame kecega ni sa Karisito ko Jisu.” [Raica na V&V 88:104.]¹⁸ [Raica na vakatutu 4 ena tabana e 33.]

Na noda ilesilesi meda wasea vei ira na tamata kecega na veika eda kila me baleti Jisu Karisito.

Au kaya vei kemuni na Yalododonu Edaidai, e sega tale ni dua na matatamata e vuravura taucoko me tu vei ira na itukutuku taucoko e tu vei keda me baleta na nona vakalou na iVakabula; ia kevaka eda sega ni vakabauti Koya eda na cudruvi vakalevu cake sara mai vei ira era se sega ni bau kila na itukutuku oqori. O koya eda sa rawa kina ni kaya ki vuravura ka sega ni lomalomarua kina ni da vakabauta na veika oqo. …

Au vakacaucautaki kemuni ni sa yaco mai ki na nomuni bula na galala kei na veivakalougatataki oqo. Ia oqo au sa vakatakekere kina vei kemuni me vaka niu dua na tacimuni, ka vakamasuti kemuni niu dua na ka malumalumu sara vei kemuni, mo ni kakua ni vunitaka na nomuni kadrala ena ruku ni ivakarau ni sila. Kakua ni vunitaka na kila sa solia vei kemuni na Kalou mai vei ira na wekamuni.

Kakua ni vakasosataki ira, ia kakua ni yalowai mo vunitaka vei ira na kosipeli i Jisu Karisito. Oqori duadua ga na kaukauwa ni Kalou me ia kina na veivakabulai ena matanitu vakasilesitieli.¹⁹

Na turaga mamarau duadua kei na marama mamarau duadua o kila e vuravura sai ira era sa veisautaka tiko na nodra bula ki na ivakavuvuli ni kosipeli i Jisu Karisito. Sai ira oqori ka tu vei ira na veivakadeitaki ni bula tawamudu; sai ira era kila na vu ni noda mai tiko oqo. … Niu veilakoyaki voli e vuravura ka kauta voli na itukutuku oqo, sa vakasinaiti na yaloqu ena marau, ka buwawa na mataqu ena kena wai, ena gauna au sa qai raica kina na kena rawa ni veisautaki sara vakavinaka mai na kosipeli i Jisu Karisito na bula ni tamata. Au sa raici ira era a vakayalolailaitaki, o ira era a tu voli ena butobuto, o ira era a vakataroga na inaki ni nodra mai tu oqo, kei na gauna sa vakavulici kina vei ira na dina lagilagi ni kosipeli i Jisu Karisito, era veisau, era sa vulica me ra dau marau, me ra dau vakavinavinaka, me ra dau vakacegui, me ra dau yalo vakanuinui ena nodra vakabauta ka vakavuvulitaka na kosipeli a vunautaka o Jisu Karisito ena nona bula voli e vuravura ka lako voli e Kalili.

Kemuni na taciqu kei na ganequ, e sega tu ni kila o vuravura na ka oqori, ia sa noda itavi meda vukei ira me ra kila, ka sega kina na tukutukuni koya, ka sega kina na dokadoka, ia ena loloma cecere vei ira na tamata kecega, ena loloma ni veikauwaitaki dina, sa vakau yani kina na itukutuku oqo. …

Me vaka niu dua na ka malumalumu sara ena kemuni maliwa, au vakavinavinaka vua mai vu ni yaloqu ena vuku ni veivakadeitaki sa yaco mai ki na noqu bula. … Mai na veika kece oqo, au vakavinavinaka vua me baleta na kila ka sa ragita na yaloqu; Au kila ni bula tiko na Tamada Vakalomalagi, au kila ni o Jisu Karisito na iVakabula ni kawatamata, ka ni sega tale ni dua na yaca ena rukui lomalagi me ra na vakalagilagi kina na turaga kei na marama, ia na yaca ga i Jisu Karisito, na noda Turaga. Au kila ni a lako mai ki vuravura ena gauna e muri oqo, ni a solia na veivakadonui vakalou vua e dua na gonetagane yalomalumalumu ka a vakasaqara voli na dina, ia mai na ka oqori a tauyavu kina na Lotu eda sa mai lewena; ka sa tu vata kaya na kaukauwa ni Kalou me ia kina na veivakabulai vei ira kece era vakabauta.²⁰

Au masuta meda bula meda ivakaraitaki kilikili kina ni Nona inaki. Au masuta meda bula ena kena ivakarau meda vakaraitaka kina ni tamata vakabauta dina na Turaga o Jisu Karisito.²¹ [Raica na vakatutu 5 ena tabana e 34.]

Vakatutu ni Vuli kei na Veivakavulici

Taurivaka na veivakasama oqo ni ko vulica na iwase oqo se ni ko vakavakarau mo veivakavulici. Me ikuri ni veivuke, raica na tabana e viii–x.

Wilika na italanoa ena tabana e 23. Na cava beka o na tukuna vua e dua ka tukuna ni o keda na Yalododonu Edaidai eda sega ni vakabauti Jisu Karisito?
E vakavuvulitaka o Peresitedi Smith, “E sega walega ni da vakabauta ni a bula e vuravura o Jisu mai Nasareci, ia eda vakabauta ni se bula tikoga” (tabana e 24). Na cava na nodra iulubale na Yalododonu Edaidai ena nodra vakabauta ni bula tiko nikua o Jisu Karisito? Na cava beka na nomu iulubale o iko ena nomu vakabauta na ka oqo?
Taleva vakacaca na tabana e 25–28. Na cava eso na italanoa se na malanivosa mai na ivolanikalou sa vaqaqacotaka na nomu ivakadinadina ni o Jisu Karisito na Luve ni Kalou? Wilika na1 Nifai 10:17 ka vakasamataka eso na sala e rawa ni o vakalevutaka cake kina na nomu kila na nona ilesilesi na iVakabula.
Ni o wilika na tabana e 30, vakasamataka na ivakarau sa vaqaqacotaka cake kina na nomu ivakadinadina kei Jisu Karisito na nomu talairawarawa ki na ivakavuvuli kei na cakacaka vakalotu ni kosipeli. Na cava e rawa ni ra cakava na itubutubu me ra vukei ira kina na luvedra me ra rawata na ivakadinadina oqo?
Na vakanananu cava e dau votu mai se na nanuma ni lomamu ni o wilika na ivakadinadina nei Peresitedi Smith ena tabana e 30–31? Vakasamataka mada na veigauna eso o raica kina na veisau ni nodra bula na tamata ena vuku ni kosipeli i Jisu Karisito. Sa veisautaka beka vakacava na nomu bula na kosipeli i Jisu Karisito?

iVolanikalou Veisemati: Maciu 16:15–17; 17:1–5; 2 Nifai 25:26; Alama 5:45–48; Vunau kei na Veiyalayalati 76:22–24; 110:1–4

Veivuke ni Veivakavulici: “[Dau levea] na veitemaki ni kena kovuti e dua na iwase levu ni lesoni …. Eda vakavulici ira tiko na tamata, e sega ni levu ni lesoni e rawa ni da vakavulica ena dua na gauna; kei na … ituvatuva yadua ni lesoni au sa raica oti e levu cake na ka e tu kina me vakavulici mai na kena e rawa ni da kovuta ena dua na gauna” (Jeffrey R. Holland, “Teaching and Learning in the Church,” Ensign, June 2007, 91).

“Au kila ni bula tiko na noqu Dauveivueti kau solia kina ena marau na noqu sasaga ni yalomalumalumu meu vakadeitaka na Nona ivakavuvuli.”

“Eda ciqoma ka sega ni dua na kena vakataratutu na nodra ivakadinadina … ena Veiyalayalati Vou ka baleta na nona tucake tale na Dauveivueti ni kawatamata.”

Ena nona sikovi ira na Nifai na iVakabula sa tucake tale, “era lako mai lomalagi na agilosi me vaka ena maliwa ni bukawaqa ka ra mai wavoliti ira na gonelalai.”