Wase 2

“Lomana na Kai Nomu Me Vaka Ko sa Lomani iKo”

Dolele yani vei ira na tani ena loloma kei na yalololoma sa yaga sara ki na kosipeli i Jisu Karisito.

Na Bula nei George Albert Smith

A kilai o George Albert Smith ena nona dau rawata me lomani ira na tani. A tukuna me baleti koya o Peresitedi J. Reuben Clark Jr., e dua na nona daunivakasala ena Mataveliutaki Taumada: “Na yacana dina o Loloma. … E dau solia na nona loloma vei ira kecega e dau sotava. E dau solia na nona loloma vei ira kece e sega ni sotava.”¹

Na nona loloma o Peresitedi Smith me baleti ira na tani e kadre mai na nona vakabauta ena yalodina ni o keda kece eda veitacini ka veiganeni, ka da luvena ka dua vata ga na Tamada Vakalomalagi. Ni sa voleka me cava na nona bula, a kaya vakaoqo vei ira na Yalododonu:

“E sega na kequ meca meu kila mada, ka sega ni dua e vuravura me keirau veimecaki. Na turaga kei na marama kece era luvena na Tamaqu, kau sa dau segata ena noqu bula meu muria na nona veidusimaki yalomatua na Dauveivueti ni kawatamata—meu lomana na wekaqu me vakataki au. … O na sega ni kila na levu ni noqu lomani iko. E sega vei au na vosa meu vakamacalataka kina. Kau vinakata me vakakina na lomaqu vei ira yadua na luvena tagane kei na yalewa na Tamaqu Vakalomalagi.”²

Sa dau vakaraitaka o Peresitedi Smith na nona loloma vei ira na tani ena veivalavala sega ni wiliki rawa ni yalololoma. E kaya kina e dua e daudidigo voli: “Sa dau nona itovo o Peresitedi Smith me dau biuta na nona sala me kauta na vakacegu kei na veivakalougatataki vei ira na tauvimate, vei ira na kune rarawa, kei ira ena yaco vei ira na yalo vakavinavinaka ena nona dau veivakayaloqaqataki ka veivakamarautaki. E sega ni ka vou na nona dau laurai, ni oti na gauna ni cakacaka, me taubale voli ena loma ni veivalenibula, ka veisiko mai na dua na rumu ki na dua tale, veivakalougatataki, veivakayaloqaqataki, ka veivakamarautaki ena nona dau basika yani ni sega ni namaki ki na veivanua eso ka dau marautaki kina vakalevu na nona iserau veivakadeitaki. … Sa dau nona itovo me lako ki na vanua cava ga e nanuma ni rawa ni veivuke ka veivakayaloqaqataki kina.”³

A wasea o Peresitedi Thomas S. Monson e dua na ivakaraitaki ni nona a biuta na nona sala o Peresitedi Smith me vakaraitaka na nona loloma vua e dua e gadreva tu na veivuke:

“Ena dua na mataka ni vulaibatabata, era a samaka tiko na dau sasamaki e gaunisala na tikitiki ni waicevata lelevu mai na sala ni wai e gaunisala [e Salt Lake City]. Era vukei ira tiko na dausasamaki tudei o ira na daucakacaka vagauna ka ra gadreva vakalevu sara na cakacaka oqo. E dua vei ira e daramaka voli ga e dua na kote mamare ka sa vakasosataki koya sara tiko vakaca na batabata. A tu vakadua e yasadra na dau sasamaki e dua na turaga vakarauta na kena levu ka koti tu vakavinaka na kumina ka taroga na dau sasamaki, ‘O na gadreva e dua tale na ikuri ni kote mamare oqori ena dua na mataka vakaoqo. Evei na nomu kote?’ E sauma na turaga oqo ni sega ni dua na kote me daramaka. E luvata na nona kote na vulagi, solia vua na turaga oqori ka kaya, ‘sa nomu na kote oqo. Oqori na vutinisipi vavaku ka na vakatakatai iko. Au cakacaka tikoga ena tai kadua ni sala.’ Na gaunisala oqori na South Temple. Na kai Samaria dauloloma ka curu yani ki na Valenivolavola Liu ni Lotu ena nona cakacaka e veisiga ni sega tu na nona kote sai Peresitedi George Albert Smith mai na Lotu i Jisu Karisito ni Yalododonu Edaidai. Na nona ivalavala sega ni nanumi koya ni veikauwaitaki e vakatakila na yalona dauloloma. E dina sara o koya na ivakatawa kei tacina.”⁴ [Raica na vakatutu 1 ena tabana e 20.]

iVakavuvuli nei George Albert Smith

Na tamata kece era tacida ka ganeda, era luvena na Tamada Vakalomalagi.

Eda raici ira na turaga kecega me ra tacida, na marama kece me ra ganeda; eda raica na matadra na tamata kecega e vuravura me ra luvena na Tamada, ka vakabauta me vaka ni o ira kece era ucuya na Tamada, sa dui tu kina vei ira yadua e dua na tiki ni ka vakalou ia kevaka ena vakatorocaketaki ena vakarautaki keda meda lesu tale ki na Nona iserau. …

Oqori na veika eda kila me baleta na inaki ni noda mai tu e vuravura, ka vakamacalataka na noda itavi vei ira na wekada. E vuqa era nanuma ni da a dui bula tu ga vakataki keda, ka so era nanuma ni da a dui bula ga vakamatatamata. Na ka dina o ya, eda raici ira na gone kece era sucu mai ki na vuravura oqo, ni ra luvena tagane se yalewa na Kalou, ni ra tacida se ganeda, ka da vakila ni na sega ni taucoko na noda marau ena matanitu vakalomalagi vakavo kevaka eda na marautaka na veitokani ni noda matavuvale kei ira na noda itokani kei na noda ilawalawa eda sa veikilai ka da solia vakalevu na noda gauna ena vuravura oqo me baleta na noda itavi ena vukudra.⁵

Niu vakasamataka na noqu dau kauwai kei na noqu dau taleitaki ira na nona matavuvale na Tamaqu, na matavuvale ni kawatamata, au nanuma e dua na ka a tukuna na tamaqu vakavuravura, kau vakabauta niu a rawata mai vua e dua na tikina. A kaya vakaoqo o koya, “E se bera vakadua ni bau yaco vei au ena dua na gauna meu raica e dua na luvena na Kalou e tu ena dua na ituvaki ca sara ni bula me qai sega ni votu mai vei au meu siro sobu ka laveti koya cake ka biuti koya ki yavana ka tekivu me tosoi koya tale.” Au vinakata meu tukuna ni se bera vakadua ena noqu bula meu raica e dua na luvena na Tamaqu kau qai sega ni vakila ni taciqu ka ni lomani ira vakayadua na luvena na Kalou.⁶

Sa na dua na vuravura marautaki kevaka era raici ira ka kila na tamata e veivanua kecega na kai nona ni tacina ka ganena, ka qai talemuria oqori ena nona lomana na wekana me vakataki koya.⁷ [Raica na vakatutu 2 ena tabana e 20.]

Na kosipeli i Jisu Karisito e vakavulica vei keda meda lomani ira kece na luvena na Kalou.

E vakavuvulitaka vei keda na kosipeli me dau tu vei keda na loloma cecere me baleta na tamata kecega ka lomani ira na wekada. Sa kaya na iVakabula.

“Mo lomani Jiova na nomu Kalou ena lomamu taucoko, kei na yalomu taucoko, kei na nomu nanuma kecega, ai matai ni vunau oqo ka levu.

“A sa tautauvata na kenai karua, Mo lomana na kai nomu me vaka ko lomani iko.“Sa vu ni vunau taucoko kei ira na parofita na vunau e rua oqo.” [Maciu 22:37–40.]

Kemuni na taciqu kei na ganequ, kevaka e se bera ni teivaki e lomamuni na kosipeli i Jisu Karisito, me vaka na kena soli vei kemuni, na yalo ni loloma o ya ena vukudra na nomuni itokani, au vinakata meu tukuna ni o se bera ni rawata na taucoko ni vua ni isolisoli vakasakiti o ya ka a yaco mai ki vuravura ena gauna e tauyavutaki kina na Lotu oqo.⁸ [Raica na vakatutu 3 ena tabana e 20.]

Na noda ilesilesi e baleta na loloma. Na noda veiqaravi ena vakavutuniyautaki kina na noda bula. … Kevaka eda bula tiko me vaka na ivakarau ni bula e nakita na Kalou, kevaka eda sa veiqaravi tiko me vaka na kena ivakarau e nakita ko koya, sa na vakavutuniyautaki na veisiga yadua ni noda bula ena veivakayarayarataki ni Yalona, ena levu cake na noda lomani ira na kai noda ka vakalevutaki na yaloda me yacova ni da sa vakila ni rawa meda tarai ira kece na luvena na Kalou e ligada, ena gagadre meda vakalougatataki ira ka kauti ira mai me ra kila na dina.⁹

Me vaka ni da lewena na Lotu i Karisito, sa dodonu meda muria na Nona ivunau ka veilomani. Me qai tete yani na noda loloma ka sivita na iyalayala ni Lotu eda kilai kina, ka yacovi ira yani na luve ni tamata.¹⁰

Meda vakadinadinataka ena noda itovo, ena noda ivalavala malua, ena noda loloma, ena noda vakabauta, ni da sa muria tiko na ivunau cecere ko ya ka tukuna na iVakabula ni sa tautauvata kei na imatai ni ivunau cecere, “Mo lomana na wekamu me vaka ko lomani iko.”¹¹

Eda vakaraitaka na loloma cecere ena noda dolele yani vei ira era gadreva tu na veivuke kei na veivakayaloqaqataki.

Ena sega ni rawa ni vakarautaki na veika ena kauta mai ki vuravura na vua ni loloma kei na loloma cecere. Sa dau vakarautaki tu ena veitabana kei na tabanalevu kei na veibuturara ni kaulotu na sala me vakacilavi tikoga na rarama ni matanisiga, tarai cake na marau ka ra laveti cake o ira era yalolailai, ka soli yani na reki kei na vakacegu vei ira era kune rarawa.¹²

E kaya vakaoqo na Turaga:

“Dou veilomani vakai kemudou; dou kakua sara ni daukocokoco; dou veivukei vakai kemudou me vaka na vunau. …

“Ia me kena ilutua dou vakaisulu ena loloma, me vaka sa nomudou itutuvi, io sai koya na ivau vinaka sara kei na vakacegu.” [V&V 88:123, 125.] …

… O sa muria tiko beka na nona ivakasala me baleta na loloma cecere? Au vinakata meu tukuna ni ena gauna oqo ni noda bula eda na gadreva meda vakatovotovotaka na loloma cecere, sega walega ena noda solia na noda veika vei ira era vakaleqai tu, ia eda gadreva me tu talega vei keda na loloma cecere me baleta na malumalumu kei na guce kei na nodra cala na luvena na Tamada.¹³

Kevaka eda raica e dua na turaga se na marama ka sega ni rawa-ka tu ena nona bula, e dua sa malumalumu mai na nona vakabauta, meda kakua ni vakanadakui koya; meda raica meda sikovi koya, ka da lako yani vua ena yalovinaka kei na loloma, ka vakayaloqaqataki koya me vuki tani mai na cala ni nona ilakolako. Na madigi meda cakava na noda dui cakacaka yadua ena keda maliwa e tu ena veivanua kecega; ka vica wale na turaga kei na marama ena Lotu oqo era na sega ni rawata, kevaka walega, meda na dolele yani vakabalavu vakalailai mai na iwirini eda kilai kina, ka cavuta e dua na malanivosa ni yalovinaka, se vakavuvulitaka na dina vei ira eso na luvena na Tamada. … Oqo na nona cakacaka na Tamada. Oqo na ka bibi duadua eda na kilai kina ena bula oqo.¹⁴

E tu ga e yaloqu na vakanuinui vinaka me baleta na kawatamata. E sega ni dua na yalo ni veisaqasaqa e tu vei au me baleta e dua na tamata bula. Au kila tu eso au dau diva ke rawa me ra vakaitovotaki ira vakavinaka cake, ia oqori na nodra lusi, e sega ni noqu. Kevaka e rawa niu mokoti ira e ligaqu ka vukei ira lesu mai ki na gaunisala totolo ni marau ena noqu vakavuvulitaka vei ira na ivakavuvuli ni kosipeli i Jisu Karisito, ena levu cake kina na noqu marau. … Ena sega ni rawa ni o vakasaurarataki ira na tamata me ra caka dodonu, ia e rawa ni o lomani ira me ra cakava vakakina, kevaka e rawa ni ra raica mai na ivakarau ni nomu bula ni o kila na ka o tukuna tiko.¹⁵ [Raica na vakatutu 4 ena tabana e 20.]

Na marau dina e yaco mai ena nomu lomani ira ka qaravi ira na tani.

Kakua ni guilecava ni veitalia na levu ni ilavo o na solia, veitalia na levu ni nomu gadreva na veika ni vuravura oqo me vakamarautaki iko, na nomu marau ena veiraurau tikoga kei na nomu loloma cecere kei na nomu yalovinaka kei na nomu loloma ena vukudra o dau veimaliwai vata kaya e vuravura oqo. Sa kaya oti na Tamada Vakalomalagi ena veimalanivosa rawarawa sara ni o koya e tukuna ni lomana na Kalou ka sega ni lomana na wekana sa tamata lasulasu ko koya [raica na 1 Joni 4:20].¹⁶

E sega ni veika walega eda ciqoma ena vakamarautaki keda; sai koya na ka eda solia, kei na levu ga ni noda solia na veika e veilaveti ka veivakavutuniyautaki vei ira na luvena na Tamada, na kena levu e dodonu meda solia. Ena tubu me vaka e dua na ivurevure ni bula ka tovure cake tiko ki na marau tawamudu.¹⁷

Ni sa cava na noda bula eke ka da lesu tale ki vale, eda na raica ni na volai tu vei keda mai kea na veicakacaka vinaka kece eda a vakayacora, na ivalavala vakayalovinaka eda sa cakava, na sasaga kece eda sa biuta me ra vinaka kina na wekada. …

… Meda vakadinadinataka na noda vakavinavinakataka na veika sa solia vei keda na Turaga ena noda qaravi Koya, ia eda sa qaravi Koya tiko ena noda caka vinaka vei ira na Luvena. Eda sa ciqoma walega, ia meda solia walega [raica na Maciu 10:8]. Ni vakatakatai na yaloda ena loloma kei na yalovinaka ena vukudra na wekada, meda toso tikoga me yacova ni sa tabaki mai na iotioti ni keda samani, ka da sota kei na keda itukutuku. Kevaka eda sa vakavinakataka cake na noda taledi, kevaka eda sa yalododonu, yalodina, talairawarawa, lomasoli, ka dauloloma cecere, ka da dau segata meda laveta cake na yalo kecega eda veimaliwai kaya, kevaka eda sa bula me vaka na rarama eda sa ciqoma, ka vakarabailevutaka na rarama oqori ena veigauna e basika kina na kena madigi, eda na marau ka na sinai na yaloda ena vakavinavinaka ni da sa ciqoma mai vua na Dauniveibuli ni lomalagi kei vuravura na veivakacaucautaki ni veivakadonui: “E vinaka, a tamata vinaka ka dina; ko sa dina ena ka e vica ga; Au na lesi iko mo lewa na ka e vuqa; curu ki na marau ni nomu Turaga.” [Maciu 25:21.]¹⁸ [Raica na vakatutu 5 ena tabana e 20.]

Vakatutu ni Vuli kei na Veivakavulici

Taurivaka na veivakasama oqo ni ko vulica na iwase oqo se ni ko vakavakarau mo veivakavulici. Me ikuri ni veivuke, raica na tabana e viii–x.

Vakasamataka na sala eso e rawa ni o vakaraitaka kina na loloma me vaka e dau vakayacora o Peresitedi Smith (raica na tabana e 13–15). Me vakaoqo, e rawa ni da vakaraitaka vakacava na loloma ena noda qarava vakavinaka na noda ilesilesi ni veituberi kei na veisiko ni vuvale?
Ni ko vulica tiko na imatai ni iwase ni ivakavuvuli (tabana e 14–15), vakasamataka na sala ena vakavinakataka cake kina na kemu isema vei ira o tiko veivolekati kaya, o ira o cakacaka vata, lewe ni matavuvale, kei ira tale eso na nomu vakayagataka na ivakavuvuli oqo.
Wilika taucoko na iotioti ni parakaravu ena tabana e 15. Na cava beka eso na ivakavuvuli se italanoa mai na ivolanikalou e vakauqeti iko mo lomani ira ka qaravi ira na tani?
Vulica na iwase ka tekivu ena tabana e 16, vakabibi na iotioti ni rua na parakaravu. Vakasamataka mada e dua ena taudaku ni “iwirini o kilai kina.” Na cava beka e dua na ka e rawa ni o cakava mo tara yani kina e dua na tamata vakaoqori?
Vakasamataka mada na ivakavuvuli nei Peresitedi Smith ena tabana e 17–18. Na cava beka eso na ka o sa sotava ka vakavulica vei iko ni marau dina ena yaco mai ena nomu vakamarautaki ira na tani?

iVolanikalou Veisemati: Maciu 5:43–44; 25:34–40; Luke 10:25–37; Joni 13:34–35; 1 Joni 4:7–8; 1 Nifai 11:16–25; Moronai 7:44–48

Veivuke ni Veivakavulici: “Eso na veivakavulici e vakayacori ena Lotu e dau vakayacori toka vakaukauwa, e tukuni ga na ka me caka. Eda sega ni dau veitalanoa vakavinaka ena veivakavulici vakaoqori ena loma ni valenivuli. E rawa ena soqoni ni sakaramede kei na koniferedi, ia na veivakavulici me dau ruarua na yasana me rawa kina ni da taro. E dau rawarawa na taro ena kalasi” (Boyd K. Packer, “Principles of Teaching and Learning,” Ensign, June 2007, 87).

“E vakavuvulitaka vei keda na kosipeli me dau tu vei keda na loloma cecere me baleta na tamata kecega ka lomani ira na wekada.”

“Meda vakadinadinataka ena noda itovo … ni da sa muria tiko na ivunau cecere ko ya … , “Mo lomana na wekamu me vaka ko lomani iko.’”

“Me vakacilavi tikoga na rarama ni matanisiga, tarai cake na marau ka ra laveti cake o ira era yalolailai, ka soli yani na reki kei na vakacegu vei ira era kune rarawa.”