Kapitulo 1

Leksyon 1: Ang Atong Panginahanglan sa Buhing mga Propeta

Pasiuna

Nagpuyo kita sa panahon sa talagsaong mga oportunidad, mga pagsulay, ug mga tintasyon. Bisan tuod dako nga tabang ang makita diha sa mga pulong sa mga nangaging propeta, nagkinahanglan kita sa padayon nga giya sa Ginoo nga haum sa mga kahimtang nga atong gipuy-an. Si Presidente John Taylor (1808–87) mitudlo:

“Kita nagkinahanglan og buhing kahoy—usa ka buhing tuburan—buhing kahibalo, nga nagagikan sa buhing priesthood sa langit, pinaagi sa buhing priesthood sa yuta. … Kini sa kanunay nagkinahanglan og bag-o nga mga pagpadayag, gisagop sa mga talagsaon nga mga kahimtang diin ang mga simbahan o mga tawo nahimutang.

“Ang pagpadayag ni Adan wala magtudlo ni Noe sa paghimo og arka; ni ang kang Noe nga pagpadayag misulti ni Lot sa pagbiya sa Sodom; ni walay usa kanila ang naghisgot sa pagbiya sa mga anak sa Isarel gikan sa Ehipto. Kining tanan adunay mga pagpadayag alang sa ilang mga kaugalingon. … Ug kita kinahanglan mao usab” (Mga Pagtulun-an sa mga Presidente sa Simbahan: John Taylor [2001], 193).

Kini nga kapitulo gidesinyo sa pagtabang sa imong mga estudyante nga makasabut sa ilang panginahanglan sa buhing mga propeta ug mga panalangin nga atong madawat pinaagi sa pagsunod sa ilang tambag.

Pipila sa mga Doktrina ug mga Baruganan

Ang Ginoo mopadayag sa Iyang kabubut-on ngadto sa buhing mga propeta karon sama sa Iyang gibuhat kaniadto.
Ang Simbahan sa Ginoo gitukod sa pundasyon sa mga propeta ug mga apostoles.
Ang mga sakop sa Unang Kapangulohan ug Korum sa Napulog Duha ka mga Apostoles mga propeta, mga manalagna, ug mga tigpadayag.
Ang mga propeta nagtabang kanato sa pagpalambo og pagtuo kang Jesukristo.
Ang kasiguroan nagagikan sa pagkahibalo ug paggamit sa mga pagtulun-an sa buhing mga propeta.

Mga Ideya sa Pagtudlo

Ang Ginoo Nagpadayag sa Iyang Kabubut-on sa Buhing mga Propeta Karon sama sa Iyang Gibuhat Kaniadto

Ipakigbahin sa imong klase ang pamahayag ni President Hugh B. Brown (1883–1975) sa Unang Kapangulohan kabahin sa panginahanglan alang sa buhing mga propeta gikan sa seksyon 1.1 sa Manwal sa Estudyante sa mga Pagtulun-an sa Buhing mga Propeta.

Basaha ang Amos 3:47 isip tibuok klase ug ipangutana:

Sa unsang paagi ang Amos 3:7 naglig-on sa unsay gitudlo ni Presidente Brown?

Isulat sa pisara ang mosunod nga mga pakisayran: 1 Nephi 2:1–3; chapter summary sa Exodo 3. Dapita ang mga estudyante sa pagbasa sa usa sa mga pakisayran ug hibaloan kon unsay gipabuhat sa Ginoo sa katawhan ug kinsa ang nakadawat sa pagpadayag. Hisguti sa daklit ang ilang mga nakit-an.

Dapita ang usa ka estudyante sa pagbasa sa pamahayag ni Presidente John Taylor (1808–87) diha sa seksyon 2.4 sa manwal sa estudyante. Dayon hisguti ang mga rason nga gihatag ni Presidente Taylor nganong gikinahanglan ang buhing mga propeta.

Aron mapasabut og maayo nga ang Ginoo mopadayag ngadto sa buhing mga propeta sa tambag ug instruksyon nga gikinahanglan nato sa atong panahon, isulat sa pisara ang pulong nga pornograpiya. Ipakigbahin sa mga estudyante nga ang pulong nga pornograpiya gigamit sa unang higayon sa kinatibuk-ang komperensya niadtong Oktubre 1959. Sulod sa 10 ka tuig, sukad 1959 hangtud 1969, kini gihisgutan og 8 ka beses sa komperensya. Hinoon, sulod sa 10 ka tuig gikan 1999 hangtud 2009 kini gihisgutan og 81 ka beses sa kinatibuk-ang komperensya. Ipangutana sa mga estudyante ang mosunod:

Ngano kaha nga dunay ingon ka dakong kausaban sa gidaghanon sa mga paghisgut sa mga Kaigsoonan kabahin sa pornograpiya? (Pagbantay nga dili kini mahimong detalyado nga panaghisgut sa pornograpiya; usa lang kini ka yanong ehemplo sa panginahanglan alang sa buhing mga propeta sa nagkausab nga mga sirkumstansya.)
Unsa ang ubang mga ehemplo kabahin sa importanting mga kamatuoran o tambag nga nadawat sa atong panahon pinaagi sa mga buhing propeta nga tingali wala kaayo mapasabut sa mga karaang propeta? (Isulat ang tubag sa mga estudyante sa pisara aron mahisgutan unya sa leksyon. Ang mga tubag mahimong maglakip sa family home evening o mga pasidaan batok sa pag-abuso sa druga, aborsyon, ug homosekswalidad.)

Ipaambit ang mosunod nga pamahayag ni Presidente Henry B. Eyring sa Unang Kapangulohan:

“Ang pagpadayag ug inspirasyon miabut [kang Presidente Thomas S. Monson] diha sa akong presensya. … Usa ako ka saksi” (Henry B. Eyring, “Ang Tinuod ug Buhi nga Simbahan,” Ensign o Liahona, Mayo 2008, 24).

Ipangutana:

Nganong importante man nga masayud nga ang Ginoo nagpadayon sa pagpadayag sa Iyang hunahuna ug kabubut-on pinaagi sa buhing mga propeta?

Ipamatuod ang panginahanglan alang sa buhing mga propeta sa kalibutan karon ug nga ang Ginoo nagpadayon sa pagpadayag sa Iyang hunahuna ug kabubut-on pinaagi sa Iyang mga pinili nga propeta.

Ang Simbahan sa Ginoo Gitukod sa Pundasyon sa mga Propeta ug mga Apostoles

Drowinga ang kauban nga diagram sa pisara ug pangutan-a ang mga estudyante sa mosunod:

Nasayud sa bili sa usa ka lig-on nga pundasyon, unsay kalainan ang mahimo sa matang sa materyales nga gamiton diha sa pundasyon?

Dapita ang mga estudyante sa pagbasa sa Mateo 7:24–27.

Ipakigbahin ang mosunod nga pamahayag ni Presidente Russell M. Nelson sa Korum sa Napulog Duha ka mga Apostoles:

“Mga duha ka dekada ang milabay sa dihang usa ka templo ang tukuron diha sa Siyudad sa Mexico, ang mga architect nag-atubang og dakong hagit. Tungod kay ang Siyudad sa Mexico nahimutang sa usa ka dal-as, ang pipila sa mga building niini mous-us ug mohandag paglabay sa panahon. Ang pagtukod og templo didto nagkinahanglan og espesyal nga pundasyon. Dos syentos baynte uno ka dagko, gipalig-unan nga mga sementong kolumna [ang matag kolumna 18 ka pulgada ang gibag-on] giugbok og sobra sa 100 ka tiil ilawom sa yuta. … Tungod niining dili makita apan siguradong pundasyon, ang templo nagbarug karon nga lig-on ug tul-id.

“Ang usa ka lig-ong pundasyon gikinahanglan aron ang bisan unsa nga building, institusyon, o tawo makalahutay. Maghunahuna niana, atong ikonsiderar ang pundasyon sa Simbahan ni Jesukristo sa mga Santos sa Ulahing mga Adlaw. Dayon atong tan-awon kon sa unsang paagi ang lig-ong pundasyon sa Simbahan nagsuporta sa atong pundasyon sa hugot nga pagtuo isip indibidwal nga mga miyembro sa Simbahan” (Russell M. Nelson, “How Firm Our Foundation,” Ensign, Mayo 2002, 75).

Basaha og kusog ang Mga Taga-Efeso 2:19–21 uban sa klase ug gamita ang mosunod nga mga pangutana aron sa pagtabang sa mga estudyante nga matandi ang pundasyon sa Mexico City Temple ngadto sa pundasyon sa Simbahan nga mga propeta ug mga apostoles:

Sa unsang paagi ang pundasyon nga mga propeta ug apostoles nahisama sa dagkong mga haligi nga gigamit sa pagsiguro sa Mexico City Temple?
Unsay mabuhat sa usa ka tawo sa pagsiguro nga nagtukod siya og lig-on nga pundasyon?

Ipasabut nga si Apostol Pablo mihatag og pipila ka rason alang sa pundasyon nga mga propeta ug apostoles. Hangyoa ang usa ka estudyante sa pagbasa sa Mga Taga-Efeso 4:11–14. Papangitaa ang mga estudyante sa mga rason nganong ang Ginoo mihatag og mga propeta ug mga apostoles isip atong pundasyon. Hisguti ang mga nakaplagan sa mga estudyante.

Dapita ang usa ka estudyante sa pagbasa sa pamahayag ni Elder Jeffrey R. Holland sa Korum sa Napulog Duha ka mga Apostoles gikan sa seksyon 1.4 sa manwal sa estudyante. Ipangutana sa mga estudyante ang mosunod :

Sumala ni Elder Holland, nganong importante man kaayo ang pundasyon nga mga propeta ug mga apostoles karon?
Unsa ang usa ka ehemplo sa pagtulun-an gikan sa usa sa mga propeta ug mga apostoles gikan sa pinakabag-o nga kinatibuk-ang komperensya nga nakatabang sa paglig-on sa pundasyon sa inyong pagtuo?
Sa unsang paagi ang pagsunod niana nga pagtulun-an o uban pang mga pagtulun-an nga inyong mahinumduman gikan sa komperensya nakatabang sa pagpugong kaninyo nga “igatuyatuya … sa tanang hangin sa tuloohan” (Mga Taga-Efeso 4:14) sa kalibutan karon?

Ang mga Sakop sa Unang Kapangulohan ug Korum sa Napulog Duha ka mga Apostoles Mga Propeta, Mga Manalagna, ug Mga Tigpadayag

Pagpakita og hulagway sa Presidente sa Simbahan.

Pahinumdumi ang mga estudyante nga atol sa atong ward, stake, ug kinatibuk-ang komperensya atong ipataas ang atong tuong kamot nga magporma og eskwala sa pagpakita nga atong gi-sustain ang mga General Authority. Ipangutana sa mga estudyante ang mosunod :

Unsa nga mga pulong ang gigamit kon mo-sustain kita sa Presidente sa Simbahan? (Propeta, manalagna, ug tigpadayag.)
Aduna pa bay uban nga atong gi-sustain nianang sama nga pinulongan?
Unsa ang bintaha nga dunay sobra sa usa ka tawo nga aduna niana nga awtoridad?

Dapita ang usa ka estudyante sa pagbasa sa pamahayag ni Presidente Harold B. Lee (1899–1973) gikan sa seksyon 1.5 sa manwal sa estudyante. Ipangutana:

Kon mamatay ang propeta, kinsa ang adunay awtoridad nga moserbisyo isip sunod nga Presidente sa Simbahan?

Isulat ang pulong nga propeta diha sa pisara. Hangyoa ang mga estudyante sa pagbasa sa nakasulat diha sa Giya ngadto sa mga Kasulatan alang sa pulong nga propeta. Dayon hangyoa sila nga makigtambayayong og laing tawo diha sa klase aron makahimo og mubo nga depinisyon alang sa pulong. Dapita ang pipila ka mga estudyante sa pagpakigbahin sa ilang mga depinisyon.

Ipapakli sa mga estudyante ang seksyon 1.6 sa manwal sa estudyante ug ipabasa ang impormasyon ubos sa subheading nga “Propeta” (seksyon 1.6.1). Dapita ang mga estudyante nga itudlo ang bisan unsang mga pulong nga dugang nagpasabut kon unsa ang propeta ug unsay iyang buhat.

Bahina ang klase ngadto sa duha ka grupo, ug sultihi sila nga ablihan ang ilang mga manwal sa estudyante diha sa seksyon 1.6. I-assign ang usa ka grupo sa pagribyu sa impormasyon ubos sa subheading nga “Manalagna” (seksyon 1.6.2) ug ang laing grupo sa pagribyu sa impormasyon ubos sa subheading nga “Tigpadayag” (seksyon 1.6.3).

Human sa igong panahon sa pagribyu ug pagtuon, hangyoa ang matag grupo sa pagpili og usa ka tigpama-ba. Dapita kini nga tigpama-ba sa pagtudlo sa tibuok klase kon sa unsang paagi ang manalagna o tigpadayag lahi sa propeta. Awhaga sila sa pagpakigbahin sa ilang mga pagbati ug pagpamatuod kon nganong ang manalagna ug tigpadayag importante karon. Kon adunay mga estudyante nga personal nga nakahimamat og usa ka Apostol (usa ka propeta, manalagna ug tigpadayag) o nakatambong og miting diin ang usa ka Apostol personal nga namulong, awhaga sila sa pagsaysay niana nga kasinatian ug sa bisan unsa nga ilang gibati.

Ang mga Propeta Makatabang Kanato sa Pag-ugmad og Hugot nga Pagtuo kang Jesukristo

Basaha ang Doktrina ug mga Pakigsaad 1:17 uban sa imong klase ug ipangutana:

Unsay gisulti sa Ginoo nga rason sa pagtawag kang Propeta Joseph Smith?

Basaha ang Doktrina ug mga Pakigsaad 1:21 uban sa imong klase ug ipangutana:

Unsa ang dugang rason nga gisulti sa Ginoo nga gikinahanglan si Joseph Smith sa katapusang mga adlaw?
Sa unsang paagi ang inyong kahibalo sa kinabuhi ug mga pagtulun-an ni Joseph Smith nakapalambo sa inyong pagtuo?
Sa unsang paagi ang inyong kahibalo sa kinabuhi ug mga pagtulun-an sa ubang mga propeta sa Simbahan nakapalambo sa inyong pagtuo?

Ang Kasiguroan Naggikan sa Pagkahibalo ug Paggamit sa mga Pagtulun-an sa Buhing mga Propeta

Aron matabangan ang mga estudyante sa pagkonsiderar kon sa unsang paagi ang kasiguroan moabut pinaagi sa pagpatalinghug sa buhing mga propeta, mahimo nimong ipakita sa mga estudyante ang video nga “Watchman on the Tower [Magbalantay diha sa Tore]” (4:17), nga makita sa Doctrine and Covenants and Church History Visual Resource DVDs [Mga Visual Resource DVD sa Doktrina ug mga Pakigsaad ug Kasaysayan sa Simbahan] ug sa LDS.org. Kini nga video naghisgot kon sa unsang paagi ang kasiguroan moabut pinaagi sa pagpatalinghug sa buhing mga propeta.

Pagdala og usa ka container nga cleaning liquid (o bisan unsang item nga adunay pasidaan sa label) ug basaha ang pasidaan sa label ngadto sa klase. Ipangutana:

Unsa kaha ang mahitabo kon ang container walay pasidaan nga label o kon ang usa ka tawo dili mopatalinghug sa pasidaan sa label?
Unsa man nga pagkasusama ang inyong makita tali sa label diha sa botelya sa panglimpyo ug sa mga pagtulun-an sa propeta?

Ipasabut nga ang ubang tawo tingali mogamit sa cleaning liquid sa sayop nga paagi ug mapasakitan ang ilang kaugalingon tungod kay wala sila masayud mahitungod sa pasidaan, samtang ang uban nga nasayud kabahin sa pasidaan, apan wala mogamit sa ilang nahibaloan, makasinati sa sama nga kasakit.

Sa unsang paagi ang sitwasyon sa ibabaw, sa sayop nga paggamit sa cleaning liquid magamit sa atong mga propeta karon?

Dapita ang usa ka estudyante sa pagbasa sa Doktrina ug mga Pakigsaad 1:2–4. Hangyoa ang imong mga estudyante sa pagtino kon sa unsang paagi ang Ginoo mopasidaan kanato sa ulahing mga adlaw. Dayon ipangutana ang mosunod:

Kinsa man ang mga “tinun-an” sa Ginoo sa atong panahon?
Sa unsang paagi kini nga pasidaan ikakumpara sa pasidaan sa cleaning liquid?

Dapita ang usa ka estudyante sa pagbasa sa pamahayag ni Presidente Harold B. Lee (1899–1973) sa seksyon 1.10 sa manwal sa estudyante. Pangutana:

Sumala ni Presidente Lee, unsa ang yawe sa luwas nga pagsagubang sa mga hagit sa kinabuhi?
Unsay atong mabuhat aron sa pagsiguro nga makakita kita sa “mga pasidaan nga label” nga gihatag sa mga Apostoles sa ulahing mga adlaw diha sa mga hagit sa kinabuhi karon?

Basaha ngadto sa mga estudyante ang mosunod nga pamahayag gikan ni Presidente Henry B. Eyring sa Unang Kapangulohan:

“Tungod kay ang Dios mabination, nagtawag Siya og mga sulugoon aron mapasidan-an ang katawhan sa peligro. Kana nga tawag sa pagpasidaan nahimong mas kusog ug mas importante tungod sa kamatuoran nga ang labing bililhon nga mga pasidaan mao ang kabahin sa mga peligro nga wala pa mahunahuna sa katawhan nga tinuod” (Henry B. Eyring, “A Voice of Warning,” Ensign, Nob. 1998, 32).

Pangutan-a ang mga estudyante:

Sa unsang paagi ang mga propeta makabantay sa mga peligro nga wala mabantayi sa uban? (Kon dili hisgutan sa mga estudyante, tingali haum kini nga panahon nga mopamatuod sa tahas sa mga manalagna—makakita sila sa mga butang pinaagi sa pagpadayag nga dili makita sa uban.)

Basaha ang mosunod nga pamahayag ni Elder M. Russell Ballard sa Korum sa Napulog Duha ka mga Apostoles:

“Kon kita maminaw sa tambag sa Ginoo nga gipahayag pinaagi sa mga pulong sa Presidente sa Simbahan, ang atong pagsanong kinahanglan nga positibo ug dili langayon. Ang kasaysayan nagpakita nga adunay kasiguroan, kalinaw, kauswagan, ug kalipay sa pagsanong sa propetikanhong tambag” (M. Russell Ballard, “His Word Ye Shall Receive,” Ensign, Mayo 2001, 65).

Pangutan-a ang mga estudyante sa mosunod:

Unsa ang mga rason nga ibaliwala sa ubang tawo ang mga pasidaan nga atong nadawat gikan sa mga Kaigsoonan?
Unsay mahimo nga kalainan kon tubagon ang mga pahimangno ug mga tambag sa mga propeta ug apostoles sa paagi nga gihulagway ni Elder Ballard?

Hangyoa ang imong mga estudyante sa pagtan-aw sa lista diha sa pisara nga gihimo na sa klase kabahin sa mga importanting kamatuoran nga gipadayag sa atong buhing mga propeta. Ang Kaigsoonan migahin og dakong panahon, paningkamot, ug kwarta aron mahimo ang kinatibuk-ang komperensya; ang ilang tuyo mao nga ang mga mensahe, mga pag-ampo, ug musika makatabang kanato sa pagpalambo sa atong kinabuhi. Pangutan-a ang klase:

Unsay kinahanglang buhaton sa mga Kaigsoonan aron sa pagsiguro nga mahitabo kini? (Ang mga tubag mahimong maglakip sa pagpangandam og maayo, madasig kon unsa nga mga hilisgutan ang ipamulong, ug pagpamulong ubos sa impluwensya sa Espiritu Santo.)
Unsa ang akong responsibilidad niini nga proseso? (Ang mga tubag mahimong maglakip sa pagpaminaw, pag-ampo alang sa Kaigsoonan nga namulong, pag-ampo arong mahimong mas madawaton, pagsulat, dili magpabalda atol sa komperensya, ug magpahiangay sa Espiritu Santo.)

Hatagi og igong panahon ang mga estudyante sa paghunahuna mahitungod sa ilang mga tubag ug sa paghimo og mga tumong.

Ipares-pares ang mga estudyante. Patun-a ang matag pares sa Doktrina ug mga Pakigsaad 21:4–6 ug dayon hisguti ang mosunod nga mga pangutana (mahimo nimong isulat kini nga mga pangutana diha sa pisara sa dili pa magklase):

Unsa nga doktrina ang gitudlo niini nga mga bersikulo?
Nganong magkinahanglan man usahay og hugot nga pagtuo ug pailub ang pagsunod sa tambag sa propeta?
Unsa nga mga saad ang gihimo ngadto sa mga nagpatalinghug sa mga pulong ug mga sugo sa propeta?

Ipaambit sa imong klase ang mosunod nga pamahayag ni President Henry B. Eyring sa Unang Kapangulohan:

“Ang pagpangita sa dalan sa kasiguroan diha sa tambag sa mga propeta importante niadtong adunay lig-on nga pagtuo. Kon ang propeta mamulong, kadtong gamay ra og pagtuo maghunahuna nga nakadungog sila og maalamon nga tawo nga naghatag og tambag. …

“… Apan ang pagpili nga dili modawat sa mapanagnaon nga tambag nag-usab sa mismong dapit nga atong gibarugan. Nahimo kining mas delikado. Ang kapakyas sa pagdawat og mapanagnaong tambag nagkunhod sa atong gahum sa pagdawat og dinasig nga tambag sa umaabut” (Henry B. Eyring, “Finding Safety in Counsel,” Ensign, Mayo 1997, 25).

Pangutan-a ang mga estudyante sa mosunod:

Ngano nga ang “mismong dapit nga atong gibarugan” mahimong “mas delikado” kon atong isalikway ang tambag sa propeta?
Unsa ang pipila ka mga ehemplo sa tambag nga gihatag sa propeta sa inyong tibuok kinabuhi ang nagtubag sa mga moderno nga kabalaka? (Ilista sa pisara ang tubag sa mga estudyante. Ang mga tubag mahimong maglakip sa pornograpiya, sugal, diborsyo, pagpasaylo sa uban, garbo, pagbasa sa Basahon ni Mormon, o uban pang tambag.)

Hatagi ang matag estudyante og usa ka pirasong papel. Dapita sila sa pagpili og usa sa mga tubag nga gilista sa pisara ug sa pagsulat og usa ka paragraph nga naghulagway kon sa unsang paagi ang pagsunod niini nga tambag makahatag og espirituhanong kasiguroan ug “mopatibulaag sa mga gahum sa kangitngit” (D&P 21:6) sa ilang kinabuhi. Dapita ang pipila ka estudyante sa pagpakigbahin sa unsay ilang gisulat. Alang sa mga estudyante nga mopakigbahin sa ilang mga tubag, ikonsiderar ang pagpangutana kanila og follow-up nga pangutana sama sa:

Kanus-a ninyo nabatyagan ang kamatuoran niini nga pagtulun-an diha sa inyong kinabuhi?
Unsaon ninyo sa pagtudlo ug pagpamatuod kabahin niini nga baruganan ngadto sa usa ka sakop sa pamilya o higala?

Tabangi ang mga estudyante nga makasabut nga sa higayon nga makaamgo kita sa importansya sa buhing mga propeta sa atong kinabuhi, kinahanglang desidido dayon kitang mogamit sa ilang mga pagtulun-an sa atong kinabuhi. Ang Ginoo mipadala og mga propeta aron sa pagtabang kanato nga luwas kita sa espirituhanong paagi.