Kapitulo 6

Kinatibuk-ang Komperensya

Pasiuna

Si Elder Jeffrey R. Holland sa Korum sa Napulog Duha ka mga Apostoles mipasabut sa pipila ka mga katuyoan sa kinatibuk-ang komperensya:

“Ang kinatibuk-ang komperensya sa Simbahan mao ang deklarasyon ngadto sa tibuok kalibutan nga si Jesus mao ang Kristo, nga Siya ug ang Iyang Amahan, ang Dios ug ang Amahan natong tanan, nagpakita ngadto sa batang propeta nga si Joseph Smith agig katumanan nianang karaang saad nga ang nabanhaw nga si Jesus ang Nazaretnon mopahiuli sa Iyang Simbahan dinhi sa yuta. … [Kini nga mga komperensya mopahayag] ngadto sa matag nasud, kaliwatan, pinulongan, ug katawhan sa mahigugmaong saad sa Mesiyas nga ‘ang iyang kalooy mohangtud sa kahangturan’ [Salmo 136:1; 1 Mga Cronicas 16:34]” (Jeffrey R. Holland, “Mga Propeta Ania na Usab sa Yuta,” Ensign o Liahona, Nob. 2006, 106).

Ang kinatibuk-ang komperensya naghatag og oportunidad sa mga miyembro sa Simbahan nga maminaw ug makat-on gikan niadtong atong gipaluyohan isip mga propeta, mga manalagna, ug mga tigpadayag. Tabangi ang imong mga estudyante nga makasabut sa kaimportante sa pagpangandam alang sa kinatibuk-ang komperensya ug sa paggamit sa mga pulong sa buhing mga propeta. Dugang pa, tabangi sila nga makasabut sa panginahanglan sa regular nga pagtuon sa Ensign o Liahona nga mga isyu sa komperensya. Ang tinguha sa mga estudyante nga makagamit sa mga pulong sa modernong mga propeta diha sa ilang kinabuhi molambo samtang ilang mailhan ang mga panalangin nga moabut gumikan sa pagsunod sa mga propetikanhong pasidaan ug tambag. Awhaga ang mga estudyante sa pagpangita usab sa mga pagtulun-an sa buhing mga propeta nga anaa sa ubang mga publikasyon sa Simbahan o gihatag sa mga higayon gawas sa kinatibuk-ang komperensya.

general conference — Ang assembly hall sa Conference Center atol sa usa ka sesyon sa kinatibuk-ang komperensya.

Pipila ka mga Doktrina ug mga Baruganan

Ang kinatibuk-ang komperensya naghatag og mga oportunidad alang sa espirituhanong pagbag-o.
Mopasalig kita nga mopatalinghug ug mosuporta niadtong atong gipaluyohan sa kinatibuk-ang komperensya.
Ang atong pagpangandam makaapekto sa unsay atong makuha gikan sa kinatibuk-ang komperensya.
Ang paggamit sa mga pagtulun-an sa kinatibuk-ang komperensya makapalambo sa atong kinabuhi.

Mga Sugyot alang sa Pagtudlo

Ang Kinatibuk-ang Komperensya Naghatag og mga Oportunidad alang sa Espirituhanong Pagbag-o

Sa dili pa magklase, isulat sa pisara ang upat ka “Mga Doktrina ug mga Baruganan” nga gilista sa ibabaw. Ipangutana:

Unsa nga mga pulong niini nga mga pamahayag ang nagpasabut og responsibilidad sa atong bahin?
Nganong ang ubang mga tawo makaangkon man og dugang espirituhanong kalig-on gikan sa mga kahimoan sa kinatibuk-ang komperensya kay sa uban?
Unsay inyong mahimo aron makaangkon og labing dakong kaayohan gikan sa kinatibuk-ang komperensya?

Isulat sa pisara: Ang panahon sa komperensya maoy panahon sa …

Pangutan-a ang mga estudyante kon unsaon nila pagkompleto kini nga pamahayag. Irekord sa pisara ang ilang mga tubag. Dapita ang usa ka estudyante sa pagbasa sa kinutlo gikan ni Presidente Howard W. Hunter (1907–1995) sa seksyon 6.2 sa Manwal sa Estudyante sa mga Pagtulun-an sa Buhing mga Propeta. Hangyoa ang klase sa pagpaminaw kon giunsa pagkompleto ni Presidente Hunter ang mga pulong nga gisulat diha sa pisara. Dayon ipangutana:

Sa unsang mga paagi nga imong nasinati ang katumanan sa pamahayag ni Presidente Hunter?

Ipasiksik sa mga estudyante ang Doktrina ug mga Pakigsaad 43:8–9; 124:144 ug ipatubag ang mosunod nga mga pangutana:

Unsa ang pipila sa mga katuyoan sa kinatibuk-ang komperensya?
Unsa ang gipasabut sa mga pulong nga maghatag og kaayohan?

Ipakigbahin ang mosunod nga kahulugan kon unsay gipasabut sa paghatag og kaayohan, nga gihimo ni Elder Robert L. Backman sa Seventy:

“Ang paghatag og kaayohan nagpasabut sa paglig-on, sa pagdugang og pagtuo, sa pagpalambo sa moralidad. Kon maghunahuna kamo niini, kini ang paagi sa pagtukod sa Ginoo sa iyang gingharian. Hunahunaa lang kon unsay gipasabut niini kanato nga mobati sa pakig-igsoon ni Jesukristo sa atong mga panagtigum. ‘Busa, pagmatinud-anon; barug diha sa buhatan nga Ako mitudlo nganha kanimo; tabang sa maluyahon, ipataas ang mga kamot sa nawad-an og paglaum, ug lig-una ang mga tuhod nga mahuyang.’ (D&P 81:5.)” (Robert L. Backman, sa “Giving Spiritual Nourishment to the Less Active: A Panel Discussion,” Ensign, Abr. 1987, 16).

Dayon ipangutana:

Sa unsang mga paagi nga ang kinatibuk-ang komperensya nahimong usa ka “makapalig-on” nga kasinatian alang kaninyo?

Ipamatuod nga ang kinatibuk-ang komperensya, kon hatagan nato kini og tukma nga pagtagad ug kinaiya, makahatag og espirituhanong pagbag-o ug makatabang kanato nga molambo ug mahimong mas sama sa Manluluwas.

Mopasalig Kita nga Mopatalinghug ug Mosuporta Niadtong Atong Gi-sustain sa Kinatibuk-ang Komperensya

I-assign ang katunga sa klase sa pagbasa sa pamahayag ni Presidente Gordon B. Hinckley (1910–2008) sa seksyon 6.5 sa manwal sa estudyante. I-assign ang laing katunga sa pagbasa sa pamahayag ni Elder David B. Haight (1906–2004) sa Korum sa Napulog Duha ka mga Apostoles diha sa seksyon 6.5 sa manwal sa estudyante. Kon mahuman na sila, ipangutana ang mosunod:

Unsay gipasabut sa atong pagpataas sa atong kamot aron sa pag-sustain sa atong mga lider?
Unsay atong mabuhat aron mapakita nga atong gi-sustain ang atong mga lider?

Ipares-pares ang mga estudyante ug hatagi ang matag paris og usa ka piraso nga papel. Ipabasa nila ang mosunod nga mga kasulatan. Dapita ang matag pares sa pagsulat og mubo nga pamahayag nga pagpasabut sa doktrina nga gihatag sa matag usa niini nga mga kasulatan:

Human sa igong panahon, hangyoa ang mga estudyante sa pagpaambit sa klase sa pipila sa ilang gisulat.

I-assign ang katunga sa imong klase sa pagbasa sa pamahayag ni Presidente Henry B. Eyring sa Unang Kapangulohan gikan sa seksyon 6.5 sa manwal sa estudyante. Hangyoa ang mga estudyante nga mangandam sa paghisgot sa mosunod nga mga pangutana:

Unsay angay natong buhaton human kita mopataas sa atong kamot sa pag-sustain nga boto diha sa kinatibuk-ang komperensya?
Unsa ang epekto sa atong mga lihok diha sa atong mga lider?
Unsa ang epekto sa atong mga lihok diri kanato?

I-assign ang laing katunga sa klase sa pagbasa sa pamahayag ni Presidente Joseph F. Smith (1838–1918) gikan sa seksyon 6.5 sa manwal sa estudyante. Hangyoa ang mga estudyante nga mangandam sa paghisgot sa mosunod nga mga pangutana:

Unsay gibati ni Joseph F. Smith mahitungod ni Brigham Young?
Unsa ang epekto sa pagpatalinghug sa panawagan sa usa ka propeta diha kang Presidente Smith?

Dapita ang mga estudyante sa paghisgot sa ilang mga nakaplagan ngadto sa laing katunga sa klase.

Awhaga ang mga estudyante sa paghisgot mahitungod sa mga panalangin nga nadawat nila o sa ilang mga pamilya tungod sa pagpatalinghug ug pagsuporta sa mga sulugoon sa Ginoo. Ipahayag ang imong kaugalingong mga pagbati kabahin sa pagsunod sa mga sulugoon sa Ginoo.

Ang Atong Pagpangandam Makaapekto sa Unsay Atong Makuha gikan sa Kinatibuk-ang Komperensya

Pasabta ang mga estudyante nga ang paagi sa ilang pagpangandam alang sa kinatibuk-ang komperensya mag-agad kon sa unsang paagi ang mga kahimoan available para nila. Tabangi ang mga estudyante nga makasabut nga bisan tuod managlahi ang mga kahimtang diin ilang madawat ug mapaminaw ang kinatibuk-ang komperensya, ang paagi sa ilang paghatag og prayoridad ug pagpangandam alang sa kinatibuk-ang komperensya mao gayud ang modeterminar kon unsay ilang makuha gikan niini. Ipangutana:

Unsa ang pipila ka inadlaw, sinemana, ug binulan nga mga prayoridad sa inyong kinabuhi nga gigahinan ninyo og panahon sa pagpangandam?
Unsa ang makapadasig kaninyo nga mangandam alang sa usa ka piho nga kalihokan kay sa laing kalihokan? (Mahimo nimong ilista ang mga tubag sa mga estudyante diha sa pisara.)

Ipaambit sa mga estudyante ang pamahayag ni Presidente Boyd K. Packer (1924–2015) sa Korum sa Napulog Duha ka mga Apostoles diha sa seksyon 6.6 sa manwal sa estudyante. Dayon pangutan-a ang mga estudyante:

Ngano kaha nga unsay atong makuha gikan sa komperensya mas mag-agad man sa atong pagpangandam kay sa pagpangandam sa mga mamumulong?

Ipapakli sa mga estudyante ang seksyon 6.6 sa manwal sa estudyante ug ipabasa ang kasinatian nga giistorya ni Elder Paul V. Johnson sa Seventy. Dayon pangutan-a ang mga estudyante sa mosunod:

Sa inyong pagbati unsang paagiha kaha kita makapalambo og gugma alang sa mga pulong sa mga propeta ug apostoles sama ni Elder Johnson?
Unsa ang giawhag ni Elder Johnson nga atong desisyunan?
Sa higayon nga ang kinatibuk-ang komperensya mahimong prayoridad sa atong kinabuhi, unsa nga mga binuhatan ang makatabang kanato nga maandam alang sa tambag nga gihatag didto?

Pangutan-a ang mga estudyante kon unsay ilang nakaplagan nga makatabang sa pag-andam sa ilang mga kaugalingon alang sa kinatibuk-ang komperensya. Human makasugyot ang mga estudyante sa ilang mga ideya, mahimo nimong ipabasa sa klase ang lista sa upat ka mga ideya sa pagpangandam sa seksyon 6.6 sa manwal sa estudyante.

Ipasabut sa mga estudyante nga ang lista diha sa manwal sa estudyante dili tuyo nga makompleto; naghatag lamang kini og mga ideya ug mga sugyot. Human makagahin ang mga estudyante og panahon sa pagbasa sa lista, dapita sila sa pagpaambit og mga panahon sa dihang ilang gigamit ang usa ka piho nga sugyot ug nasinati ang mas dako nga personal nga kalamboan. Dapita ang mga estudyante sa pagpamatuod kabahin sa mga malampusong binuhatan nga ilang nakaplagan.

Ipamatuod ngadto sa imong mga estudyante nga kon ang kinatibuk-ang komperensya usa ka prayoridad sa atong kinabuhi, ang atong tinguha nga mangandam alang niini motubo. Agig dugang, dapita ang mga estudyante sa pagpaambit sa pamilya ug mga higala sa ilang mga hunahuna ug mga ideya kon unsaon sa pagpangandam sa pagdawat sa pulong sa Ginoo pinaagi sa Iyang mga sulugoon.

Ang Paggamit sa mga Pagtulun-an sa Kinatibuk-ang Komperensya Makapalambo sa Atong Kinabuhi

Isaysay ang mosunod nga istorya nga gipaambit ni Elder Jeffrey R. Holland sa Korum sa Napulog Duha ka mga Apostoles:

“Si Presidente Boyd K. Packer … adunay pangutana nga kasagaran niyang ipangutana human kami mihimo og presentasyon o mihatag og mga panudlo sa usag usa diha sa Napulog Duha. Mohangad siya nga daw moingon, ‘Human na ka?’ Ug dayon mosulti ngadto sa mamumulong … , ‘Busa, unsa man?’

“‘Busa, unsa man?’ Naghunahuna ko nga mao kana ang gitubag sa Manluluwas sa matag adlaw isip dili mabulag nga elemento sa Iyang pagtudlo ug pagsangyaw. … Kini nga mga wali ug mga pag-awhag walay kapuslanan kon ang aktwal nga kinabuhi sa Iyang mga disipulo wala mausab” (Jeffrey R. Holland, “Busa, Unsa Man?” [CES conference kabahin sa Bag-ong Tugon, Ago. 8, 2000], 4–5).

Ipangutana ang mosunod:

Ngano kaha nga nangutana si Presidente Packer og, “Busa, unsa man?”
Sa unsang mga paagi ang atong kinabuhi mausab tungod sa unsay atong masinati atol sa kinatibuk-ang komperensya?

Dapita ang usa ka estudyante sa pagbasa sa Doktrina ug mga Pakigsaad 43:8–10. Dayon pangutan-a ang mga estudyante sa mosunod:

Sumala sa bersikulo 8, unsa kaha ang mga tumong sa mga lider sa Simbahan samtang mangandam sila sa pagpamulong ngadto sa mga Santos sa kinatibuk-ang komperensya?
Sumala sa bersikulo 9, unsay atong buhaton isip mga miyembro sa Simbahan agig tubag sa unsay atong nadungog gikan sa atong mga lider sa kinatibuk-ang komperensya?
Sumala sa bersikulo 10, unsa ang mga resulta sa pagsunod o dili pagsunod sa unsay atong nadungog sa kinatibuk-ang komperensya?

Dapita ang mga estudyante sa pagbasa sa duha ka pamahayag ni Presidente Spencer W. Kimball (1895–1985) diha sa seksyon 6.8 sa manwal sa estudyante. Dayon ipangutana ang mosunod nga mga pangutana:

Unsa ang bili nga gihatag ni Presidente Kimball diha sa komperensya nga isyu sa Liahona?
Unsa ang gisulti ni Presidente Kimball nga kinahanglan natong buhaton sa komperensya nga isyu sa Liahona?
Unsay mosulod sa inyong hunahuna kon madungog ninyo kini nga mga pamahayag ni Presidente Kimball?
Unsay gipabati kaninyo niini nga mga pamahayag nga angay ninyong buhaton?

Pagdapit og duha ka estudyante nga mopakli ngadto sa seksyon 6.8 sa manwal sa estudyante. Hangyoa ang usa ka estudyante sa pagbasa sa pamahayag ni Presidente Ezra Taft Benson (1899–1994), ug hangyoa ang laing estudyante sa pagbasa sa pamahayag ni Presidente Gordon B. Hinckley (1910–2008). Dayon hisguti ang mosunod nga mga pangutana:

Unsa ang pipila ka mga paagi nga ang kinatibuk-ang komperensya makagiya sa atong “pagbuhat ug pagpakigsulti”?
Unsa man ang “pagsulay” nga gihulagway ni Presidente Hinckley aron sa pagtino kon malampuson ba ang kinatibuk-ang komperensya?
Sa unsang paagi si Presidente Hinckley nagsugyot nga sukdon nato ang kalamboan sa atong kinabuhi? (Ipasulat sa usa ka estudyante ang mga tubag niini nga pangutana diha sa pisara.)
Unsa nga mga pihong sugyot ang gihatag ni Presidente Hinckley aron matabangan kita sa paggamit sa mga pagtulun-an nga atong nakat-unan sa kinatibuk-ang komperensya?
Unsa nga mga kaayohan kaha ang moabut ngadto sa mga pamilya kinsa naggamit sa mga isyu sa komperensya sa Ensign o Liahona alang sa ilang mga family home evening ug sa ilang tibuok pamilya nga pagtuon sa kasulatan?

Samtang magribyu sila sa mga pakigpulong sa komperensya, awhaga ang mga estudyante sa pag-ila ug pagrekord sa mga panalangin nga ilang nadawat. Dugang pa, mahimo nimong dapiton ang imong mga estudyante sa pagrekord diha sa notebook, journal, o sa ilang mga kasulatan sa espirituhanong kalamboan nga ilang nakita sa ilang kinabuhi samtang ilang gigamit ang mga pagtulun-an sa buhing mga propeta.

Tapusa pinaagi sa pagpasabut nga ang nahabilin niini nga kurso makatabang sa mga estudyante nga mas makasabut sa pinakabag-o nga mga tambag nga gihatag sa mga propeta, manalagna, ug tigpadayag. Dugang pa, mopakita kini kon sa unsang paagi mas magamit nila sa ilang kinabuhi ang mga baruganan nga gitudlo diha sa kinatibuk-ang komperensya ug mapaambit kini sa uban. Ipaambit ang imong mga pagbati mahitungod sa kaimportante sa kinatibuk-ang komperensya ug ipamatuod nga ang komperensya usa ka panahon nga ang pulong ug kabubut-on sa Ginoo ihatag ngadto sa Iyang mga anak pinaagi sa Iyang mga sulugoon, ang mga propeta.