Kapitulo 5

Ang Korum sa Napulog Duha ka mga Apostoles

Pasiuna

Ang Simbahan natukod “ibabaw sa patukoranan nga mao ang mga apostoles ug mga propeta” (Mga Taga-Efeso 2:20). Niini nga kapitulo naghatag og mga oportunidad sa pagtabang sa mga estudyante nga makakita kon sa unsang paagi ang Korum sa Napulog Duha ka mga Apostoles mogiya sa Simbahan uban sa dinasig nga pagpangulo ug pagpamatuod. Kalabut niini nga pagpangulo, si Elder Jeffrey R. Holland sa Korum sa Napulog Duha ka mga Apostoles mipamatuod:

“Isip ang pinakagamay niadto nga inyong gipaluyohan sa pagsaksi sa giya niini nga Simbahan, ako moingon sa tumang kamadasigon sa akong kalag nga wala gayud sa akong personal o propesyonal nga kinabuhi nga ako nalambigit og bisan unsa nga grupo nga nasayud kaayo, nga nakahibalo pag-ayo sa mga isyu nga atong giatubang, nga natugkad pag-ayo ang nangagi, nagpabiling andam sa pagkonsiderar sa bag-ong mga butang, ug mikonsiderar pag-ayo, sa hunahuna, ug sa pag-ampo sa tanang mga butang” (Jeffrey R. Holland, “Mga Propeta Ania na Usab sa Yuta,” Ensign o Liahona, Nob. 2006, 105).

Sa pagtapos niini nga leksyon, ang imong mga estudyante kinahanglang makasabut nga gamit ang sagradong mga yawe sa awtoridad sa priesthood, ang mga Apostoles mopauswag sa gingharian sa Dios sa tibuok yuta.

Ang Korum sa Napulog Duha ka mga Apostoles sa gawas sa Salt Lake Temple niadtong 1931.

Pipila sa mga Doktrina ug mga Baruganan

• Ang mga Apostoles mga talagsaon nga saksi alang ni Jesukristo sa tibuok kalibutan.

• Ang mga Apostoles naghago sa pagpauswag sa gingharian sa Dios.

• Ang mga desisyon sa Korum sa Napulog Duha ka mga Apostoles gikauyunan nilang tanan.

Mga Ideya sa Pagtudlo

Nag-unang pagpangandam: Kon ang imong mga estudyante dili pamilyar sa mga sakop sa Korum sa Napulog Duha ka mga Apostoles, ang website sa Simbahan nga newsroom.lds.org adunay mga materyal nga makahatag og bililhong tabang. Maka-download ka og mga litrato, mugbo nga mga biographical sketch, o mas detalyadong biographical nga mga artikulo aron sa pagtabang sa mga estudyante nga mapamilyar ang atong kasamtangang mga Apostoles.

Ang mga Apostoles mga Talagsaon nga Saksi alang ni Jesukristo sa Tibuok Kalibutan

Dapita ang usa ka estudyante sa pagbasa sa Doktrina ug mga Pakigsaad 107:23 ug ang laing estudyante sa pagbasa sa Mga Buhat 4:33. Dayon ipangutana ang mosunod:

• Sumala niini nga mga bersikulo, unsa man ang katungdanan sa Korum sa Napulog Duha ka mga Apostoles?

• Unsa ang kinahanglan nilang isaksi?

• Asa man ang mga Apostoles mohatag niining “talagsaong” pagsaksi?

Basaha ang istorya nga gisugilon ni Presidente Harold B. Lee (1899–1973) sa seksyon 5.2 sa Manwal sa Estudyante sa mga Pagtulun-an sa Buhing mga Propeta. Hunong diha sa dapit sa kinutlo nga nag-ingon nga “Unsay atong itubag?” Pangutan-a ang mga estudyante:

• Unsa man ang imong itambag nga itubag sa mga misyonaryo?

Human sa pipila ka tubag sa mga estudyante, tiwasa og basa ang kinutlo. Dayon ipangutana:

• Sa unsang mga paagi nga ang tubag ni Presidente Lee nagpakita sa iyang calling nga usa ka “talagsaon nga saksi” ni Jesukristo?

Ipakigbahin ang mosunod nga pamahayag ni Presidente Joseph Fielding Smith (1876–1972):

“Usa kini ka seryuso kaayo nga responsibilidad [sa mga Apostoles], nga mahibalo nga si Jesukristo sa pagkatinuod mao ang Bugtong Anak sa Dios, ang Manunubos sa kalibutan” (Joseph Fielding Smith, Seek Ye Earnestly [1970], 213).

Dayon ipangutana:

• Unsa kaha ang gipasabut ni Presidente Smith sa dihang miingon siya nga “usa kini ka seryuso kaayo nga responsibilidad”?

Ipaambit sa imong mga estudyante ang pamahayag ni Presidente Howard W. Hunter (1907–1995) diha sa seksyon 5.2 sa manwal sa estudyante. Dayon pangutan-a ang mga estudyante sa mosunod:

• Unsa man ang gipamatud-an ni Presidente Hunter?

• Sa unsang paagi ang pagkadungog sa pagpamatuod sa usa ka Apostol makapalig-on sa atong pagpamatuod?

Dapita ang mga estudyante sa paghatag gayud og dakong pagtagad kon makadungog sila o makabasa sa pagpamatuod sa usa ka Apostol. Dapita ang mga estudyante sa paglig-on sa ilang mga pagpamatuod sa mga kamatuoran nga misaksi ang mga Apostoles.

Ang mga Apostoles Naghago sa Pagpauswag sa Gingharian sa Dios

Ipaambit sa imong mga estudyante ang nag-una sa duha ka mga pamahayag ni Presidente Gordon B. Hinckley (1910–2008) diha sa seksyon 5.5 sa manwal sa estudyante. Hangyoa ang mga estudyante sa pagpaminaw sa depinisyon sa usa ka Apostol. Dayon ipangutana:

• Unsa ang gisulti ni Presidente Hinckley nga maoy kahulugan sa pulong nga Apostol?

• Unsa man ang buhatunon sa mga Apostoles diin gihatagan sila og “piho nga awtoridad ug responsibilidad”?

Basaha ang Mateo 28:16–20 ug Doktrina ug mga Pakigsaad 65:5–6 uban sa imong klase ug ipangutana:

• Unsa nga sugo ang gihatag ni Jesukristo sa Iyang mga Apostoles niini nga mga bersikulo?

• Kon ang mga Apostoles kinahanglang motukod sa gingharian sa Dios sa tibuok yuta, unsa man ang gingharian sa Dios? (Ang gingharian sa Dios mao ang Simbahan dinhi sa yuta karon. Ang mga Apostoles motabang sa pagtukod sa gingharian sa Dios—ang Simbahan—dinhi sa yuta karon aron ang gingharian sa langit—ang milenyal nga Simbahan—moabut.)

Isip usa ka paghulagway kon sa unsang paagi ang mga Apostoles nagtuman niining balaanong sugo, ipaambit ang mosunod nga pamahayag ni Presidente Boyd K. Packer (1924–2015) sa Korum sa Napulog Duha ka mga Apostoles:

“Dili ako lahi sa mga Kaigsoonan sa Napulog Duha … kon moingon ko ninyo nga ang mga rekord nagpakita nga didto na ko sa Mexico ug Tunga-tunga ug Habagatang Amerika sobra na sa 75 ka mga higayon, sa Europa sobra sa 50 ka mga higayon, sa Canada 25 ka mga higayon, sa mga isla sa Pasipiko 10 ka mga higayon, sa Asia 10 ka mga higayon, ug sa Africa 4 ka mga higayon; kaduha usab sa China; sa Israel, Saudi Arabia, Bahrain, Dominican Republic, India, Pakistan, Egypt, Indonesia, ug daghan pa gayud nga mga dapit sa tibuok kalibutan. Ang uban nakabiyahe labaw pa niana” (Boyd K. Packer, “Ang Napulog Duha,” Ensign o Liahona, Mayo 2008, 86).

Dayon ipangutana:

• Unsa kaha nga kahibalo ang naangkon sa mga Apostoles sa ingon ka daghan nga pagbiyahe?

I-assign ang katunga sa klase sa pagbasa sa Doktrina ug mga Pakigsaad 107:33–35, 58 ug ang laing katunga sa pagbasa sa Doktrina ug mga Pakigsaad 18:27–32. Ipaila sa mga estudyante ang mga pulong nga naghulagway kon unsa ang buhat sa mga Apostoles diin sila “gipadala” karon. Diha sa pisara, isulat (o paghangyo og estudyante nga isulat) ang mga pulong nga nailhan sa mga estudyante. (Pipila sa mga pulong mahimong maglakip sa pagpangalagad, pagtukod sa Simbahan, pagdumala, pag-abli sa mga pultahan, pagsangyaw sa ebanghelyo, pag-orden, pagpahimutang diha sa kahusay, pagsangyaw ngadto sa matag linalang, pagbunyag, ug pagpahayag sa ebanghelyo sumala sa Espiritu Santo.) Dayon ipangutana:

• Unsa ang pipila ka mga paagi nga ang atong buhing mga Apostoles nagsangyaw sa ebanghelyo ug nagtukod sa Simbahan karon? (Mamulong sa kinatibuk-ang komperensya, mobisita sa lokal nga mga komperensya, mobisita sa mga misyon, mointerbyu sa lokal nga mga lider sa Simbahan, mopahigayon og mga worldwide leadership training broadcast, ug uban pa.)

Dapita ang usa ka estudyante sa pagbasa sa ikaduha sa duha ka mga pamahayag ni Presidente Gordon B. Hinckley sa seksyon 5.5 sa manwal sa estudyante (tan-awa ang katapusang paragraph sa seksyon). Dayon ipangutana ang mosunod:

• Sa unsang mga paagi nga nakakita o nakadungog ka sa mga Apostoles nga nangalagad sa paagi nga gihulagway ni Presidente Hinckley?

• Unsa ang impluwensya sa mga Apostoles diha kaninyo isip indibidwal?

Ang mga Desisyon sa Korum sa Napulog Duha ka mga Apostoles Gikauyunan Nilang Tanan

Basaha ang Doktrina ug mga Pakigsaad 107:27–31 ug pangutana:

• Unsa nga mga baruganan ang gisulti sa Ginoo nga maoy modumala sa mga desisyon nga gihimo sa Napulog Duha?

• Unsa nga saad ang gihatag diha sa bersikulo 31 kon ang mga desisyon gihimo sumala sa mga lagda nga gihatag diha sa mga bersikulo 27 ug 30? Unsa kaha ang gipasabut niana nga saad?

Ipaambit sa mga estudyante ang pamahayag ni Presidente Gordon B. Hinckley sa katapusan sa seksyon 5.7 sa manwal sa estudyante (diha sa katapusang paragraph, nga nagsugod sa “Apan wala gayud ako makabantay …”). Dayon ipangutana:

• Sa unsang paagi ang pagkahibalo nga ang mga desisyon sa mga Apostoles nga gikauyunan sa tanan makapalambo sa inyong pagtuo ug pagsalig niana nga mga desisyon?

Ipaambit sa klase ang pamahayag ni Presidente James E. Faust (1920–2007) nga sakop sa Unang Kapangulohan nga naa sa seksyon 5.7 sa manwal sa estudyante. Awhaga ang mga estudyante sa pagpaminaw kon unsay nakapahimo og panag-uyon tali sa mga Kaigsoonan. Dayon ipangutana ang mosunod:

• Sa unsang paagi kini nga proseso magsilbing usa ka “pugong” batok sa personal nga pagpihig [bias] o personal nga mga tinguha?

• Unsa ang gisugyot ni Presidente Faust nga gikinahanglan aron makab-ot ang panag-uyon?

Tapusa ang leksyon pinaagi sa pagpaambit sa imong pagpamatuod kabahin sa callling ug tahas sa Napulog Duha ka mga Apostoles. Hagita ang mga estudyante sa pagpaminaw pag-ayo sa mga pagpamatuod sa Napulog Duha ug sa mga hilisgutan nga ilang gipili alang sa ilang mga pakigpulong.