Kapitulo 3

Pagpuli sa Kapangulohan

Pasiuna

Ang Presidente sa Simbahan gi-orden nang daan didto sa premortal nga kinabuhi ug gitawag sa mortalidad human sa dugay, matinud-anong pagserbisyo sa Korum sa Napulog Duha ka mga Apostoles. I-set apart siya aron makagamit sa mga yawe sa gingharian sa langit dinhi sa yuta ug pormal nga i-sustain sa mga miyembro sa Simbahan.

Tabangi ang imong mga estudyante nga makasabut kon unsa ka importante ang tahas sa pagpadayag gikan sa Ginoo ngadto sa Iyang propeta diha sa proseso sa pagtawag og mga Apostoles. Samtang ang Espiritu mokumpirmar sa balaang han-ay sa pagpuli, pagpamatuod ug dapita ang imong mga estudyante sa pagpamatuod sa awtoridad ug kayano sa proseso sa pagpuli.

Tungod kay adunay daghang mga kinutlo nga gisugyot niini nga kapitulo, mahimo ka nga mohimo og handout alang sa imong mga estudyante nga naglakip sa tanang mga kinutlo nga giplano nimong gamiton. Mahimo usab nimong ipamilyar ang imong kaugalingon sa kasaysayan sa pagpuli sa Kapangulohan sa Simbahan gikan sa panahon ni Joseph Smith. Kini nga kasaysayan gi-summarize diha sa kapitulo 3 sa Manwal sa Estudyante sa mga Pagtulun-an sa Buhing mga Propeta diha sa seksyon 3.1, 3.2, ug 3.3.

Ang maligdong nga katiguman sa pangbukas nga sesyon sa kinatibuk-ang komperensya niadtong Oktubre, 1972. Niini nga miting, ang mga miyembro sa Simbahan mi-sustain og bag-ong Unang Kapangulohan nga gilangkuban ni Harold B. Lee (Presidente), Marion G. Romney (Unang Magtatambag), ug N. Eldon Tanner (Ikaduhang Magtatambag).

Pipila sa mga Doktrina ug mga Baruganan

Ang Ginoo miestablisar sa han-ay sa pagpuli sa Kapangulohan sa Simbahan.
Ang Korum sa Napulog Duha ka mga Apostoles maoy mangulo sa Simbahan kon mamatay ang Presidente.
Ang seniority sa Korum sa Napulog Duha ka mga Apostoles maoy modeterminar kon si kinsa ang mangulo.
Ang mga miyembro sa Simbahan mo-sustain sa bag-ong gitawag nga Presidente sa Simbahan.

Mga Ideya sa Pagtudlo

Ang Ginoo Miestablisar sa Han-ay sa Pagpuli sa Kapangulohan sa Simbahan

Dapita ang mga estudyante sa paghisgot kon sa unsang paagi ang mga lider o mga presidente gipili sa nagkalain-laing mga organisasyon. Sama pananglit:

Unsaon pagpili ang presidente sa kompaniya?
Unsaon pagpili og bag-ong lider sa demokratikanhong gobyerno?
Unsaon pagpili og bag-ong lider sa usa ka monarkiya?
Sa unsang paagi ang usa ka tawo mahimong Presidente sa Simbahan? Sa unsang paagi kini nga proseso lahi kay sa paagi sa pagpili og mga lider sa ubang mga organisasyon?

Pahibaloa ang mga estudyante nga ang Ginoo Mismo modeterminar kon kinsay mangulo sa Simbahan. Pinaagi sa balaang instruksyon, ang Apostol nga pinaka-senior (ang tawo nga nahimong Apostol sa labing taas nga panahon) mahimong tigdumala nga high priest sa Simbahan. Ang mga miyembro sa Simbahan makabaton og hingpit nga pagtuo nga siya ang indibidwal nga gusto sa Ginoo ug gibutang sa katungdanan nga mahimong Presidente sa Simbahan (tan-awa sa item 3 sa seksyon 3.4 sa manwal sa estudyante). Tungod niini, ang paagi sa pagpuli sa Presidente sa Ang Simbahan ni Jesukristo sa mga Santos sa Ulahing mga Adlaw talagsaon.

Basaha ang kinutlo gikan ni Presidente Spencer W. Kimball (1895–1985) diha sa seksyon 3.5 sa manwal sa estudyante. Dapita ang mga estudyante sa paghisgot sa mosunod nga mga pangutana:

Sa unsang paagi nga ang pattern sa pagpuli sa Presidente sa Simbahan makawagtang sa mga sayop, panagbangi, mga ambisyon, ug mga tinaguang motibo?
Sa unsang paagi ang pagkahibalo nga ang bag-ong Presidente sa Simbahan gitawag ngadto sa iyang katungdanan pinaagi sa Dios, imbes nga sumala sa mga kalibutanong sistema, makapalambo sa inyong pagtuo ug makapalig-on sa inyong pagpamatuod?

Bahina ang klase ngadto sa tulo ka grupo. Isulat sa pisara ang mosunod nga mga pakisayran sa kasulatan: Jeremias 1:5; Abraham 3:22–23; Doktrina ug mga Pakigsaad 138:53–56; Alma 13:1–9. Dapita ang matag grupo sa pagtuon og usa sa unang tulo ka pakisayran ingon man ang Alma 13:1–9. Hatagi ang matag grupo og kopya sa mosunod nga pamahayag ni Propeta Joseph Smith (1805–44):

“Ang matag tawo nga adunay buluhaton sa pagpangalagad sa mga lumulupyo sa kalibutan gi-orden niana gayud nga katuyoan didto sa Dakong Konseho sa langit sa wala pa ang kalibutan. Ako moingon nga ako gi-orden niini gayud nga katungdanan niadto nga Dakong Konseho” (Mga Pagtulun-an sa mga Presidente sa Simbahan: Joseph Smith [2007], 619).

Hangyoa ang mga grupo sa pagpangita og mga tubag sa mosunod nga mga pangutana samtang magtuon sila sa ilang mga tudling sa kasulatan ug sa kinutlo:

Kanus-a man gipili sa Ginoo ang mga tawo nga mahimong mga Presidente, mga propeta, ug mga lider sa Simbahan?
Sa unsang paagi ang mga propeta mipaila sa ilang mga kaugalingon sa premortal nga kalibutan?
Gawas sa mga propeta, kinsa pa ang gi-orden nang daan didto sa premortal nga kinabuhi?
Sa unsang paagi kini nga kahibalo makaapekto sa inyong pagsalig diha sa tawo nga gipili sa Ginoo nga mahimong propeta?

Pagpili og usa ka tigpama-ba gikan sa matag grupo. Dapita ang tigpama-ba nga ipaambit sa klase ang mga tubag nga nakit-an sa iyang grupo sa mga pangutana ug uban pang anaa kanila nga mga panabut.

Ang Korum sa Napulog Duha ka mga Apostoles maoy Mangulo sa Simbahan kon Mamatay ang Presidente

Isulat ang equation nga 3 = 12 sa pisara. Hangyoa ang mga estudyante sa pagbasa sa Doktrina ug mga Pakigsaad 107:23–24 ug sa pagpasabut kon sa unsang paagi nga sakto ang equation. (Sa paagi nga ang Korum sa Unang Kapangulohan ug ang Korum sa Napulog Duha ka mga Apostoles magkatumbas sa awtoridad.)

Ipakigbahin ang mosunod nga pamahayag ni Presidente Joseph Fielding Smith (1876–1972):

“Naghunahuna ko nga kinahanglang dawaton nga ang mga apostoles dili mahimo nga katumbas og awtoridad sa Kapangulohan kon ang Unang Kapangulohan hingpit ug tukma nga naorganisar. Dili mahimo nga duha ang mangulo—o tulo ang mangulo—nga magkatumbas og awtoridad sa samang higayon, kay ang ingon niana moresulta sa kalibug. Busa ang mga apostoles magkatumbas, sumala sa gipahayag, sa paagi nga sila adunay gahum sa pagkontrolar sa mga kalihokan sa Simbahan kon ang Kapangulohan mawala tungod sa pagkamatay sa Presidente” (Joseph Fielding Smith, Doctrines of Salvation, comp. Bruce R. McConkie, 3 vols. [1954–56], 1:255).

Sumala ni Presidente Smith, kanus-a man nga ang Korum sa Napulog Duha ka mga Apostoles “katumbas sa awtoridad ug gahum” ngadto sa Unang Kapangulohan?
Ngano nga ang mga pulong “katumbas apan ubos” haum sa paghulagway sa relasyon sa Korum sa Napulog Duha ka mga Apostoles ug sa Unang Kapangulohan?

Aron sa paghulagway nga ang Korum sa Napulog Duha ka mga Apostoles mahimong hiniusa nga pagpangulo sa Simbahan ug nga ang Simbahan dili gyud mawad-an sa balaanong gitudlo nga pagpangulo, dapita ang usa ka estudyante sa pagbasa sa pamahayag ni Presidente Spencer W. Kimball (1895–1985) sa seksyon 3.7 sa manwal sa estudyante.

Basaha ang pamahayag ni Presidente Gordon B. Hinckley (1910–2008) sa seksyon 3.6 sa manwal sa estudyante. Dayon ipangutana:

Kanus-a man madawat sa Presidente sa Simbahan ang mga yawe sa iyang katungdanan?
Unsay kalainan sa paagi nga ang mga sakop sa Korum sa Napulog Duha ka mga Apostoles naghupot sa tanang mga yawe sa priesthood ug sa paagi nga ang Presidente sa Simbahan naghupot sa samang mga yawe?
Kanus-a mahimong awtorisado ang senior nga sakop sa Korum sa Napulog Duha ka mga Apostoles sa paggamit sa mga yawe sa priesthood diin siya gi-orden?

Ipasabut sa mga estudyante nga human sa kamatayon ni Propeta Joseph Smith, si Presidente Brigham Young nangulo sa Simbahan isip Presidente sa Korum sa Napulog Duha ka mga Apostoles sa sobra tulo ka tuig sa wala pa maorganisar pag-usab ang Unang Kapangulohan sa Disyembre 1847. Ipangutana:

Pinaagi sa unsang katungod nga si Presidente Brigham Young nangulo sa Simbahan human sa pagkamartir ni Propeta Joseph?

Tabangi ang imong mga estudyante nga makasabut nga katungod sa senior nga Apostol ang pagdesisyon kon kanus-a i-organisar pag-usab ang Korum sa Unang Kapangulohan ug nga ang senior nga Apostol mahimong modumala sa tibuok Simbahan isip Presidente sa Napulog Duha hangtud nga bation niya ang panginahanglan nga i-organisar pag-usab ang Unang Kapangulohan. Ang tibuok Korum sa Napulog Duha ka mga Apostoles mo-sustain dayon sa iyang desisyon.

Ang Seniority diha sa Korum sa Napulog Duha ka mga Apostoles maoy Modeterminar kon si Kinsa ang Mangulo

Nag-unang pagpangandam: Sa dili pa magklase, mahimo nimong ilista ang mga ngalan sa Unang Kapangulohan ug Korum sa Napulog Duha ka mga Apostoles nga dili magsunod diha sa pisara o sa usa ka handout, o mahimo nimong i-display ang ilang mga litrato (kon anaa) nga dili magsunod diha sa pisara. Paggamit og bag-ong isyu sa komperensya nga Ensign o Liahona isip pakisayran.

Ribyuha ang baruganan nga kon ang Presidente sa Simbahan mamatay, ang Korum sa Unang Kapangulohan mawala ug ang mga magtatambag sa Unang Kapangulohan mobalik ngadto sa ilang han-ay base sa seniority diha sa Korum sa Napulog Duha ka mga Apostoles. Ipangutana:

Unsa man ang apostolikanhong seniority sa mga magtatambag karon sa Unang Kapangulohan?

Pakit-a ang mga estudyante og lista sa mga ngalan, o pakit-a og mga litrato, sa mga sakop sa Unang Kapangulohan ug Korum sa Napulog Duha ka mga Apostoles nga dili magsunod. Hangyoa ang klase sa paghan-ay sa mga ngalan o mga litrato sa husto nga pagkasunod base sa seniority. Human sa mubong panahon, tabangi sila sa pagkompleto sa assignment sa hustong paagi.

Awhaga ang mga estudyante sa pagsag-ulo sa mga ngalan sa mga sakop sa Unang Kapangulohan ug sa Korum sa Napulog Duha ka mga Apostoles base sa han-ay sa ilang seniority.

Tabangi ang mga estudyante nga makasabut nga ang mga sakop sa Korum sa Napulog Duha ka mga Apostoles kanunay nga gihan-ay sumala sa seniority. Sa dihang ang Korum sa Napulog Duha ka mga Apostoles una nga giorganisar niini nga dispensasyon, ang seniority gideterminar base sa edad (tan-awa sa History of the Church, 2:219–20). Sukad nianang panahona, ang seniority ideterminar sumala sa petsa sa pagka-orden sa matag sakop sa Korum sa Napulog Duha ka mga Apostoles. Kini nga seniority dili lamang modeterminar sa han-ay sa pagpuli sa Kapangulohan apan usab sa han-ay sa pagpangulo sulod sa korum. Si Presidente Russell M. Nelson sa Korum sa Napulog Duha ka mga Apostoles mipasabut:

“Ang seniority gitahud taliwala sa gi-orden nga mga Apostoles—bisan sa pagsulod o pagbiya og kwarto. …

“Ang samang matahurong pagtagad gikan sa junior ngadto sa senior nga Apostol narekord diha sa Bag-ong Tugon. Dihang si Simon Pedro ug Juan ang Hinigugma midagan aron sa pagsusi sa report nga ang lawas sa gilansang nga Ginoo gikuha gikan sa lubnganan, si Juan, nga mas batan-on ug mas paspas, unang miabut, apan wala siya mosulod. Gihulat niya ang senior nga Apostol, kinsa unang misulod sa lubnganan. (Tan-awa sa Juan 20:2–6.)” (Russell M. Nelson, “Honoring the Priesthood,” Ensign, Mayo 1993, 40).

Pahinumdom: Kon itugot sa panahon, mahimo nimong ipabasa sa mga estudyante ang pamahayag ni Presidente N. Eldon Tanner (1898–1982) sa Unang Kapangulohan diha sa seksyon 3.8 sa manwal sa estudyante. Naghulagway kini sa mga sirkumstansya sa dihang si Presidente Marion G. Romney sa Unang Kapangulohan ug Presidente Spencer W. Kimball, Presidente sa Korum sa Napulog Duha ka mga Apostoles, mitubag sa balita sa kamatayon ni Presidente Harold B. Lee, kinsa nagserbisyo isip Presidente sa Simbahan.

Ipaambit ang mosunod nga pamahayag ni Presidente Boyd K. Packer (1924–2015) sa Korum sa Napulog Duha ka mga Apostoles, nga nagpasabut sa bintaha sa sumbanan sa seniority nga pagpangulo:

“Nahibulong ka ba ngano ang Ginoo miorganisar sa Unang Kapangulohan ug sa Korum sa Napulog Duha ka mga Apostoles aron ang nag-unang pagpangulo sa Simbahan kanunay gyud nga edaran nga mga lalaki? Kini nga sundanan sa pagkamagulang [seniority] naghatag og kaalam ug kasinatian ngadto sa batan-on ug pisikal nga kalagsik” (Boyd K. Packer, “Ang Bulawanon nga mga Katuigan,” Ensign o Liahona, Mayo 2003, 84).

Pangutan-a ang mga estudyante:

Ngano kaha nga ang kaalam ug kasinatian mas importante man sa pagpangulo sa Simbahan kay sa pagkabatan-on ug pisikal nga kalagsik?

Ang mga Miyembro sa Simbahan Mo-sustain sa Bag-ong Gitawag nga Presidente sa Simbahan

Pahinumdom: Kon ang imong mga estudyante wala makasabut sa kahulugan sa “maligdong nga katiguman”, i-refer sila ngadto sa impormasyon sa seksyon 3.9 sa manwal sa estudyante.

Ipasabut ngadto sa imong mga estudyante nga usa sa labing sagrado nga mga miting sa Simbahan mao ang maligdong nga katiguman, diin ang mga miyembro sa Simbahan mopaluyo sa bag-ong gitawag nga Presidente sa Simbahan. Ang mga miyembro sa Simbahan sa tibuok kalibutan giawhag sa pag-apil, sa personal o pinaagi sa radyo, telebisyon, satellite, o sa internet. Ang mga korum ug mga organisasyon sa Simbahan independente nga mobarug ug mobotar sa pag-sustain sa Presidente sa Simbahan.

Hangyoa ang usa ka estudyante sa pagbasa sa pamahayag ni Elder David B. Haight (1906–2004) sa Korum sa Napulog Duha ka mga Apostoles diha sa seksyon 3.9 sa manwal sa estudyante. Kini nga pamahayag nagpasabut sa protocol sa maligdong nga katiguman.

Pangutan-a ang mga estudyante:

Ngano kaha nga ang Simbahan nagsunod sa ingon ka pormal nga pamaagi sa pagpaluyo sa usa ka bag-ong gitawag nga Presidente sa Simbahan?
Unsa nga mga pribilehiyo ang gitanyag ngadto sa mga miyembro sa Simbahan pinaagi niining pormal nga presentasyon sa usa ka bag-ong Presidente sa Simbahan?
Unsa nga mga responsibilidad ang anaa sa mga miyembro sa Simbahan human sila mipaluyo og bag-ong Presidente?

Pangutan-a ang imong mga estudyante kon aduna bay usa kanila nga dunay oportunidad sa pagtambong og maligdong nga katiguman ug nakaapil sa pag-sustain og bag-o nga propeta. Dapita ang pipila ka mga estudyante sa pagpakigbahin sa mga pagbati nga ilang nasinati samtang nagtambong ug nag-apil niining sagrado nga miting.

Pahinumdumi ang imong mga estudyante nga sa matag komperensya sa Simbahan, ang mga miyembro gidapit sa pagpaluyo sa Unang Kapangulohan ug sa Korum sa Napulog Duha ka mga Apostoles. Ang pag-sustain sa mga lider sa Simbahan nagpasabut “sa pagsaad og pagbulig niadto nga nag-alagad sa kinatibuk-an ug lokal nga pagpangulo sa Simbahan” (Giya ngadto sa mga Kasulatan, “Pag-uyon sa mga Pangulo sa Simbahan,” scriptures.lds.org; tan-awa usab sa Mga Hebreohanon 13:17; 3 Nephi 12:1; D&P 1:38; 112: 20).

Dapita ang mga estudyante sa pagbasa sa Doktrina ug mga Pakigsaad 107:22; dayon ipangutana ang mosunod:

Sumala niini nga bersikulo, unsaon sa mga miyembro sa Simbahan sa pag-sustain sa Unang Kapangulohan?
Unsay gipasabut sa pagsuporta sa Presidente sa Simbahan uban sa atong pagsalig?

Hagita ang mga estudyante sa pag-sustain sa Presidente sa Simbahan pinaagi sa pagpakita og pagsalig sa iyang mga pagtulun-an ug hugot nga pagtuo diha sa iyang pagpangulo, pinaagi sa pag-ampo alang kaniya, ug pinaagi sa pagsunod sa iyang tambag.

Ipakigbahin ang imong pagpamatuod kon unsa ka talagsaon nga panalangin ang pag-sustain ug pagdawat og tambag gikan sa tawo nga gipili sa Ginoo nga mahimong Presidente sa Iyang Simbahan.