Kapitulo 7

Pagtuon sa mga Pakigpulong sa Kinatibuk-ang Komperensya

Pasiuna

Ang mga kapitulo 1–6 naghatag og doktrinal nga panabut sa tahas sa buhing mga propeta, manalagna ug tigpadayag. Ang kapitulo 7 naghisgot sa pagtudlo gikan sa komperensya nga isyu sa Ensign o Liahona. Sama sa gipahayag diha sa pasiuna sa kurso, dili tuyo nga ang magtutudlo mogahin sa tibuok semester sa pagtudlo sa nag-unang unom ka mga kapitulo. Hinoon, kini nga kurso gidesinyo aron ang kadaghanan sa panahon sa klase igahin sa paghisgot ug pagkat-on gikan sa pinakabag-o nga kinatibuk-ang komperensya. Ang mga magtutudlo mahimong mogahin sa panahon sa klase sa pagtuon sa usa ka tibuok nga pakigpulong o mga bahin sa pipila ka mga pakigpulong.

Usa ka nag-unang tumong niini nga kurso mao ang pagtabang sa mga estudyante nga makat-on gikan sa mga pulong sa buhing mga propeta. Si Elder David A. Bednar sa Korum sa Napulog Duha ka mga Apostoles mitudlo sa mga religous educator nga kinahanglan nilang motabang sa mga estudyante nga makabarug sa kaugalingon sa espirituhanong paagi:

“Kitang tanan sinati sa panultihon nga kon ang tawo hatagan og isda siya makakaon og usa ka kan-anan. Ang pagtudlo sa tawo sa pagpangisda, sa laing bahin, siya makakaon sa tibuok kinabuhi. Isip mga magtutudlo sa ebanghelyo, kamo ug ako wala magnegosyo og isda, hinoon, ang atong trabaho mao ang pagtabang sa mga indibidwal nga makat-on sa ‘pagpangisda’ ug espirituhanong makabarug sa kaugalingon. …

“Nakaobserbar ko og komon nga kinaiya sa mga magtutudlo kinsa dunay dakong impluwensya sa akong kinabuhi. Mitabang sila kanako sa pagpaningkamot nga makat-on pinaagi sa hugot nga pagtuo. Nagdumili sila sa paghatag kanako og sayon nga tubag sa mga pangutana nga lisud. Gani, wala gayud sila mohatag kanako og tubag. Hinoon, ilang gitudlo ang paagi ug mitabang kanako sa paghimo sa mga lakang aron makit-an ang kaugalingon nakong mga tubag. Sa tinuod lang wala kaayo ko ganahi niini nga pamaagi, apan ang kasinatian nakapahimo nako sa pagsabut nga ang tubag nga gihatag sa laing tawo sa kasagaran dili mahinumduman og dugay, kon mahinumduman man ugaling. Apan ang tubag nga atong nadiskobrehan o naangkon pinaagi sa paggamit sa hugot nga pagtuo, sa kasagaran, mahinumduman sa tibuok kinabuhi. Ang labing importanting mga pagkat-on sa kinabuhi mao ang gikaplagan—dili kay gitudloan” (David A. Bednar, “Paningkamot sa Pagkat-on pinaagi sa Hugot nga Pagtuo,” Liahona, Sept. 2007, 23).

Pahinumdom: Ang mga estudyante kinahanglang awhagon ug lauman nga magdala sa klase og personal nga kopya sa pinakabag-o nga isyu sa komperensya sa Ensign o Liahona matag higayon nga mag-abut kamo.

Nag-unang Pagpangandam: Gilakip sa katapusan sa leksyon ang duha ka kopya sa pakigpulong ni Presidente Dieter F. Uchtdorf “Kita Nagbuhat og Dako nga Buhat ug Dili Makaanha” gikan sa Abril 2009 nga kinatibuk-ang komperensya (tan-awa sa Ensign o Liahona, Mayo 2009, 59–62)—ang nag-una nga kopya alang sa mga magtutudlo ug ang ikaduha alang sa mga estudyante. Paghimo og kopya sa estudyante nga pakigpulong alang sa matag usa sa imong mga estudyante.

Mga Sugyot alang sa Pagtudlo

Mga Kahanas sa Pagtuon sa Kasulatan Nga Magamit sa Pagtuon sa mga Pakigpulong sa Komperensya

Pangutan-a ang imong mga estudyante:

Sa unsang paagi ang pagtuon ug pagsiksik lahi kay sa pagbasa?

Ipataas ang usa ka kopya sa usa ka libro sa eskwelahan atubangan sa imong mga estudyante ug pangutana:

Unsa nga piho nga mga paagi ang inyong gigamit aron mapalambo ang panabut ug panumduman sa materyal nga anaa sa mga libro sa eskwelahan? (Ilista ang mga tubag sa mga estudyante diha sa pisara, sama sa pagsag-ulo, pagbasa og usab, pagmarka sa importanteng mga materyal, ug paghimo og mga gagmayng sulat.)

Pahinumdom: Dili kinahanglan nga mogahin og dakong panahon nga magpasabut ang mga estudyante niining mga paagiha. Ang mugbo, yano nga mga tubag igo na.

Ipataas ang usa ka kopya sa pinakabag-ong isyu sa komperensya sa Ensign o Liahona ug pangutana:

Gawas sa mga sinulat nga teksto sa mga pakigpulong sa komperensya, unsa pa ang ubang mga bahin sa magasin nga makatabang sa pagpalambo sa inyong pagtuon? (Ang mga tubag mahimong maglakip sa “Mga Sulod” ug “Indeks sa Hilisgutan” sa atubangan sa magasin ug sa “Sila Namulong Kanato” ug “Indeks sa mga Istorya sa Komperensya” sa luyo sa magasin.)

Ipasabut sa imong klase nga ang mga pakigpulong sa kinatibuk-ang komperensya matun-an gamit ang daghan sa samang mga kahanas nga gamiton sa pagtuon sa mga libro sa eskwelahan ug, mas importante, mga kahanas nga gamiton sa pagtuon sa kasulatan. Ipangutana:

Unsa ang pipila ka mga kahanas sa pagtuon sa kasulatan nga imong gigamit aron mas makasabut sa mga kasulatan? (Idugang ang mga tubag sa mga estudyante diha sa lista sa pisara; mahimo kining maglakip sa pag-ampo, pagpamalandong, pagbasa og kusog, ug sa pagcross-reference.)

Samtang motubag ang mga estudyante, awhaga sila nga ipasabut sa daklit kon sa unsang paagi kana nga kahanas sa pagtuon sa kasulatan nakatabang kanila sa pagsabut sa kahulugan sa mga kasulatan.

Ipapakli sa mga estudyante ang seksyon 7.2 sa Manwal sa Estudyante sa mga Pagtulun-an sa Buhing mga Propeta. Bahina sa mga estudyante ang lista sa 17 ka kahanas sa pagtuon nga gihulagway niini nga seksyon. Dapita ang mga estudyante sa paggahin og duha o tulo ka minuto aron tun-an ang kahanas sa pagtuon nga gi-assign kanila. Human sa pipila ka minuto, hangyoa ang mga estudyante sa paghulagway niana nga mga kahanas sa pagtuon ngadto sa tibuok klase. Samtang ang mga estudyante mohimo sa ilang mga presentasyon, idugang sa pisara ang bisan unsang dugang nga kahanas sa pagtuon nga wala pa mahisguti.

Hatagi ang matag estudyante og kopya sa pakigpulong nga “Kita Nagbuhat og Dako nga Buhat ug Dili Makaanha” ni Presidente Dieter F. Uchtdorf sa Unang Kapangulohan (nga makita sa katapusan niini nga kapitulo). Bahina ang imong klase ngadto sa upat ka grupo. I-assign ang matag grupo sa pagbasa ug pagpangita sa mosunod nga mga item:

Mga cross-reference ngadto sa mga kasulatan
Mga pag-awhag o mga pagdapit
Mga halandumon nga pulong
Pagbalik-balik

Pahinumdom: Usa ka walay marka nga kopya sa pakigpulong ni Presidente Uchtdorf gihatag aron iapud-apod sa mga estudyante, ingon man usab ang laing kopya alang sa magtutudlo diin ang mga ehemplo niining upat ka mga item gi-highlight (kining duha ka kopya sa pakigpulong anaa nahimutang sa katapusan niini nga kapitulo—una ang kopya sa magtutudlo). Ang kopya sa magtutudlo nagpakita og pipila lang sa mga item nga gihulagway sa ibabaw. Sa ilang pagtuon sa pakigpulong, ang mga estudyante mahimong makakita og pipila ka mga ehemplo nga dili makita sa kopya sa magtutudlo.

Human mahatagan og igong panahon ang mga estudyante sa pagtuon sa pakigpulong, hangyoa ang matag grupo sa pagreport sa ilang mga nasayran ug sa paghulagway kon sa unsang paagi ang paggamit niana nga kahanas sa pagtuon nakapalig-on sa ilang pagsabut sa mensahe ni Presidente Uchtdorf.

Awhaga ang mga estudyante nga gamiton ang mga kahanas sa pagtuon nga gihulagway diha sa kapitulo 7 sa ilang mga manwal sa estudyante alang sa nahabilin sa kurso aron mapalambo ang ilang pagtuon sa isyu sa komperensya sa Ensign o Liahona. Kini nga mga kahanas epektibo usab nga magamit sa pagtuon sa mga pakigpulong nga gihatag sa Kaigsoonan sa mga higayon gawas sa kinatibuk-ang komperensya o sa pagtuon sa uban pang mga artikulo nga ilang gisulat alang sa mga magasin sa Simbahan. Ipaambit sa imong mga estudyante kon sa unsang paagi ka nakabenepisyo pinaagi sa paggamit sa pipila niini nga mga kahanas sa imong pagtuon sa mga mensahe sa kinatibuk-ang komperensya.

Mga Pamaagi sa Pagtudlo sa mga Pakigpulong sa Kinatibuk-ang Komperensya

Siguroa nga ang mga estudyante masayud daan kon unsa nga mga pakigpulong ang hisgutan diha sa klase. Mahimong mohatag ka og outline sa klase nga naglista kon unsa nga mga pakigpulong ang hisgutan sa matag class period. Siguroa nga ang matag estudyante adunay kopya sa pakigpulong, ug awhaga sila sa pagbasa ug pagtuon sa pakigpulong sa dili pa magklase. Makapahimo kini sa mga estudyante nga mas hingpit nga moapil sa mga diskusyon sa klase.

Sama sa bisan unsang kurso, ang paggamit og lain-laing mga pamaagi sa pagtudlo makatabang nga mapadayon ang interes sa estudyante ug ang iyang paglambo sa ebanghelyo. Ang mosunod mao ang pipila ka mga sugyot alang sa pagtudlo sa mga pakigpulong sa kinatibuk-ang komperensya:

Pagpakita og mga bahin sa kinatibuk-ang komperensya. Samtang nagpasalida og video recording sa usa ka pakigpulong, pasunda ang mga estudyante diha sa sinulat nga kopya sa pakigpulong. Dapita ang mga estudyante sa pagmarka sa mga bahin nga makahuluganon kanila. Mahimo nimong awhagon ang mga estudyante sa pag-isa sa ilang kamot kon gusto nilang hunungon kadali ang video ug hisgutan kana nga bahin sa pakigpulong. Mahimo nimong dapiton ang mga estudyante sa pagpangita og usa ka piho nga detalye o ang tubag sa usa ka pangutana. Kon walay mga video clip, ang mga pakigpulong sa komperensya mahimong basahon sa klase.
I-assign ang mga report sa mga estudyante. Ang mga estudyante mahimong mo-sign up (o i-assign) daan aron mangulo og diskusyon kabahin sa partikular nga pakigpulong. Mahimo usab nga i-assign ang mga estudyante sa pagtudlo og biographical nga impormasyon sa mga Kaigsoonan.
Pagpaambit og personal nga mga istorya. Pagpakita og mga video clip sa mga Kaigsoonan nga nagpaambit og personal nga mga kasinatian. Kon walay mga video clip, kini nga mga kasinatian mahimong basahon diha sa klase.
Paggamit og group work diha sa klase. Pahisguta ang mga estudyante, nga magpares o sa ginagmay nga grupo, sa piho nga mga aspeto sa usa ka pakigpulong o piho nga mga pangutana kalabut niini. Pagdapit og mga grupo nga mopaambit sa ilang diskusyon nganha sa tibuok klase.
Gamita ang mga assignment nga “pangitaa” sa pagtuon sa mga pakigpulong diha sa panimalay. Samtang ang mga estudyante magtuon sa mga pakigpulong sa komperensya diha sa panimalay, ipapangita nila ang mga importanting doktrina ug mga baruganan, nagsuportang mga tudling sa kasulatan, ug mahinungdanong mga pulong o sentence. Mahimo nimo silang i-assign sa paghimo og mubo nga sinulat nga mag-summarize gamit ang ilang kaugalingong mga pulong sa mga ideya nga ilang nakit-an.
Patipiga ang mga estudyante og study journal. Awhaga ang mga estudyante sa pagrekord sa mga impresyon nga espiritwal sa dili pa magklase, o paggahin og panahon alang niini sa katapusan sa klase.
Pasulata ang mga estudyante og mga summary sa hilisgutan. I-assign ang mga estudyante sa pagsulat og mugbo nga komposisyon nga motingub sa mga pagtulun-an sa daghang mga mamumulong kabahin sa usa ka hilisgutan.
Hisguti ang tubag sa mga Kaigsoonan sa bag-ong mga panghitabo. Dapita ang mga estudyante sa pagkonsiderar ug paghisgot kon sa unsang paagi motubag ang mga Kaigsoonan sa mga panghitabo sa kalibutan karon pinaagi sa ilang mga pagtulun-an sa kinatibuk-ang komperensya.
Pagbasa og mga pakigpulong diha sa klase. Mahimo nimong pabasahon ang mga estudyante og mga pakigpulong nga maghilum, nga kusgon, nga magpares, o sa ginagmay nga grupo. Usahay, mahimo ka usab nga mobasa og parte sa usa ka pakigpulong diha sa imong klase kon gusto nimong ipasabut og maayo ang usa ka pagtulun-an.
Pagpaambit og mga istorya. Ribyuha ang mga istorya nga gipaambit sa kinatibuk-ang komperensya gikan sa “Indeks sa mga Istorya sa Komperensya” nga nahimutang duol sa luyo sa matag isyu sa komperensya sa Ensign o Liahona. Mahimo ka nga mopasulti og mga estudyante nganong ang usa ka partikular nga istorya makahuluganon kanila. Tabangi ang mga estudyante sa pag-ila sa mga doktrina ug mga baruganan luyo sa istorya ug i-cross-reference ang matag usa ngadto sa ilang mga kasulatan.

Mga Biyograpiya sa mga Apostoles

Si Apostol Pablo mitambag, “Mangamuyo kami kaninyo, mga igsoon, nga unta inyong pasidunggan sila nga mga nagapangabudlay diha kaninyo ug nagapangulo kaninyo diha sa Ginoo ug nagatambag kaninyo” (1 Mga Taga-Tesalonica 5:12). Makatabang ka sa paglig-on sa mga pagpamatuod sa mga estudyante bahin sa mga propeta, manalagna, ug tigpadayag pinaagi sa pagpaambit og mubo nga biyograpikanhong impormasyon mahitungod kanila. Makakita ka og biyograpikanhong impormasyon sa newsroom.lds.org ug sa mga almanac sa Simbahan. Ang mga litrato sa mga General Authority, nga anaa sa distribution center, naglakip usab og biyograpikanhong impormasyon sa luyo.

Kita Nagbuhat og Dako nga Buhat ug Dili Makaanha (Kopya sa Magtutudlo)

Presidente Dieter F. Uchtdorf

Ikaduhang Magtatambag sa Unang Kapangulohan

Ensign o Liahona, Mayo 2009, 59–62; italics gidugang.

Akong minahal nga mga kaigsoonan, nahibalo na ako pila pa lang ka bulan kon unsa nga mensahe ang gusto nakong ihatag kaninyo karon. Nianang panahona, nangita ako og istorya nga makahulagway sa unsay gusto nakong isulti. Gitan-aw nako ang istorya bahin sa pagpanguma. Gitan-aw nako ang istorya kabahin sa mga kahayupan. Agig pasidungog kang Elder Scott, gitan-aw nako ang istorya bahin sa nuclear engineering, ug agig pasidungog kang Presidente Monson, kabahin sa pagpamuhi og mga pati.

Sa katapusan, usa ka istorya ang kanunay nga magbalik-balik kanako—usa ka istorya nga napatik sa akong panumduman sulod sa daghan na kaayong katuigan. Dili kini kabahin sa pagpanguma, mga kahayupan, nuclear engineering, o sa mga pati. Ingon sa natag-anan na ninyo bahin kini sa—pang-eroplano. Gitawag ko kini og “Ang Istorya kabahin sa Bombilya.”

Ang Istorya kabahin sa Bombilya, o ang Wala Pagtan-aw sa Unsay Labing Importante

Sa usa ka ngiub nga gabii sa Disyembre, 36 ka tuig na ang milabay, usa ka Lockheed 1011 nga jumbo jet ang nahagsa didto sa Florida Everglades, mipatay og kapin sa 100 ka mga tawo. Kining grabe nga aksidente mao ang usa sa labing grabe nga pagkahagsa sa kasaysayan sa Estados Unidos.

Usa ka katingalahan nga butang kabahin niini nga aksidente mao nga ang tanang importante kaayong mga gamit ug kinatibuk-an sa eroplano maayo man ang tanan—ang eroplano luwas ra gayud unta kaayong makatugpa sa iyang destinasyon sa Miami, mga 20 ka milya na lang ang gilay-on.

Sa hapit na gayud motugpa, hinoon, ang crew nakamatikod nga ang usa ka green nga suga wala mosiga—usa ka suga nga nagtimaan nga ang gear para tugpa andam na gayud. Wala idayon sa mga piloto ang pagpatugpa, gipatuyok-tuyok una ang eroplano ibabaw sa ngitngit kaayo nga Everglades, ug dayon ilang gipangita ang problema.

Nabalaka kaayo sila sa problema nga wala na hinoon sila kamatngon nga ang eroplano nagkaduol na diay padulong sa ngiub nga lamakan sa ubos. Dihang adunay nakamatngon niini, ulahi na kaayo ang paglikay sa hitabo.

Human sa aksidente, ang mga nag-imbistigar misulay og suta sa hinungdan. Ang gear nga para pangtugpa andam na gayud diay unta alang sa maayong pagtugpa. Ang eroplano anaa sa perpektong mekanikal nga kondisyon. Walay problema sa tanang gamit—gawas lang sa usa: ang napunder nga bombilya. Kadtong gamay nga bombilya—nga 20 sentimos ra ang kantidad—ang sinugdanan sa nagsunod-sunod nga mga panghitabo nga sa katapusan misangput ngadto sa makalilisang nga kamatayon sa kapin sa 100 ka mga tawo.

Siyempre, ang napunder nga bombilya dili maoy hinungdan sa aksidente; nahitabo kadto tungod kay ang mga crew naka-focus sa butang sa daw importante niadtong higayuna samtang wala magtan-aw sa labing importante.

Ipahiluna ang Inyong mga Kasingkasing ngadto sa mga Butang nga Labing Importante

Ang kalagmitan sa pagpokus ngadto sa dili kaayo importante nga ipuli sa pinakaimportante mahitabo dili lamang sa mga piloto apan sa tanan. [Halandumon nga mga pulong] Kitang tanan nameligro. Ang drayber nga magtan-aw gayud sa karsada mas dakog purohan nga moabut sa iyang destinasyon nga walay aksidente kay sa drayber nga nagpokus sa pagtext-text sa iyang cellphone.

Kita nasayud unsay labing importante sa kinabuhi—ang Kahayag ni Kristo nagtudlo niini ngadto sa tanan. Kita isip matinud-anong mga Santos sa Ulahing mga Adlaw adunay Espiritu Santo isip usa ka “kanunay nga kauban”¹ aron motudlo kanato sa mga butang nga adunay mahangturong bili. Akong gihunahuna nga bisan kinsa nga naghupot sa priesthood nga namati sa akong tingog karon, kon hangyoon nga mamulong mahitungod sa hilisgutan nga “unsay labing importante,” makahimo gayud og nindot kaayo. Ang atong kahuyang anaa sa kapakyas sa pagpahiuyon sa atong mga lihok uban sa atong konsensya. [Mga Pulong nga Halandumon]

Hunong og kadiyot ug sutaa kon asa nakabutang ang inyong kaugalingong kasingkasing ug mga hunahuna. Nakapokus ba kamo sa mga butang nga labing importante? Kon giunsa ninyo sa paggamit ang inyong mingaw nga mga oras mao ang makahatag og ebidensya. Asa man nakabutang ang inyong mga hunahuna kon ang gihatag nga dinaliang mga tagal sa mga buluhaton wala na? Ang inyong mga hunahuna ug kasingkasing nakapokus ba sa mga butang nga lumalabay lamang o sa mga butang nga labing importante? [Pagdapit]

Unsa man nga kaligutgut ang anaa kaninyo? Unsa man nga mga pangatarungan ang inyong gihuptan nga nakapugong kaninyo sa pagkahimong bana, amahan, anak, ug naghupot sa priesthood nga nahibaloan ninyong angay unta nga inyong maabut? Unsa man nga mga butang ang nakabalda kaninyo sa inyong mga katungdanan o nakababag kaninyo sa pagtuman sa inyong calling sa mas makugihon nga paagi?

Likayi ang Pagkabalda

Usahay ang mga butang nga mobalda kanato dili makadaut, diha ug mismo sa ilang kaugalingon; sa kasagaran makahatag gani kini kanato og maayong pagbati.

Posible nga bisan ang paghimo og maayong mga butang mosobra ra kaayo. [Mga pulong nga halandumon] Usa ka sanglitanan makita diha sa usa ka amahan o apohan kinsa mogahin og mga oras sa pagsiksik sa iyang mga kaliwatan o nag-atubang sa internet samtang napasagdan og gilikayan ang makahuluganon nga panahon sa pakig-uban sa kaugalingon niyang mga anak ug mga apo. Laing sanglitanan mao ang usa ka hardinero nga migahin sa iyang mga adlaw sa pagpangibut og mga sagbut gikan sa yuta samtang wala matagad ang mga espirituhanong sagbut nga mihulga sa pagtuok sa iyang kalag.

Bisan gani ang uban nga programa sa Simbahan mahimong makabalda kon kini atong pasobrahan ug tugutan kini nga modumala sa atong panahon ug sa atong atensyon puli sa mga butang nga labing importante. Gikinahanglan nato ang pagbalanse sa kinabuhi. [Mga pulong nga halandumon]

Kon tinud-anay kitang nahigugma sa atong Langitnong Amahan ug sa Iyang mga anak, ipakita nato kana nga gugma pinaagi sa atong mga buhat. Mopasaylo kita sa usag usa ug maningkamot sa paghimo og maayo, kay ang “atong karaang [kaugalingon] gilansang na uban ni [Kristo].”² [Cross-reference] Kita “mobisita sa mga ilo ug mga babayeng balo sa ilang mga pagkaguol,” ug atong ampingan ang atong kaugalingon nga “dili mahugawan sa kalibutan.”³ [Cross-reference]

Akong minahal nga mga kaigsoonan sa priesthood, nagpuyo kita sa ulahing mga adlaw. Ang ebanghelyo ni Jesukristo gipahiuli dinhi sa yuta. Ang mga yawe sa priesthood sa Dios gihatag na og balik ngadto sa tawo. Nagpuyo kita sa kapanahonan sa pagpaabut ug pagpangandam, nga gisaligan sa Dios sa pag-andam sa atong kaugalingon, sa atong mga pamilya, sa atong kalibutan alang sa nagpadulong nga kabuntagon—ang adlaw diin ang Anak sa Dios “manaug gikan sa langit inubanan og singgit sa pagsugo, ug sa tawag sa punoan sa mga manolunda, ug sa tingog sa trumpeta sa Dios”⁴ ug mopasiuna sa Iyang milenyal nga paghari.

Gisaligan kita sa balaan nga priesthood ug gisangunan og responsibilidad, gahum, ug katungod sa paglihok isip mga tinugyanan sa atong Langitnong Hari.

Mao kini ang mga butang nga labing importante. Kini ang mga butang nga may mahangturong bili nga angayan sa atong pagtagad.

Dili ug dili gayud kita motugot sa atong kaugalingon nga mabalda gikan sa sagrado natong katungdanan. Dili ug dili gayud nato wad-on ang pagpokus ngadto sa mga butang nga labing importante. [Mga pulong nga halandumon]

Nehemias

Si Nehemias sa Daang Tugon usa ka talagsaong ehemplo sa pagpabiling nakapokus ug andam mobuhat og importante nga tahas. Si Nehemias usa ka Israelite kinsa gihinginlan nga nagpuyo sa Babelonia ug nag-alagad isip tighatag og bino sa hari. Usa ka adlaw ang hari nangutana kang Nehemias nganong ingon og masulub-on kaayo siya. Si Nehemias mitubag, “Nganong dili magmasulub-on ang akong nawong, nga ang siyudad, ang dapit sa mga [gilubngan] sa akong amahan, nahimong kamingawan, ug ang mga ganghaan niana nangaut-ut sa kalayo?”⁵ [Cross-reference]

Sa pagkadungog niini sa hari, ang iyang kasingkasing natandog, ug mihatag siya kang Nehemias sa katungod nga mobalik ngadto sa Jerusalem ug motukod pag-usab sa siyudad. Hinoon, dili tanan ang nalipay niini nga plano. Gani, daghan sa mga magmamando nga nagpuyo sa Jerusalem naglagot kaayo “nga may usa ka tawo nga nangita sa kaayohan sa mga anak sa Israel.”⁶ Kini nga mga tawo “naligutgut sa hilabihan, ug ilang gitamay ang mga Judeo.”⁷ [Cross-reference]

Sa walay kahadlok, si Nehemias wala motugot sa mga mibatok nga mobalda kaniya. Hinoon, iyang gipalihok ang iyang mga kapanguhaan ug kasundalohan ug milihok sa pagtukod og balik sa siyudad, “kay ang mga katawhan may tinguha sa pagbuhat.”⁸ [Cross-reference]

Apan sa dihang ang mga kuta [paril] sa siyudad nagsugod sa pagtaas, nagkagrabe ang panagbatok. Ang mga kaaway ni Nehemias mihulga, nagkunsabo, ug mibiay-biay. Ang mga panghulga tininuod gayud, ug misamot sila ka makalilisang nga si Nehemias mitug-an, “Nakapahadlok silang tanan kanamo.”⁹ [Cross-reference] Bisan sa peligro ug sa kanunayng pagpanghulga sa pag-atake, ang buhat milambo. Usa kadto ka panahon sa kakapoy, kay ang matag tigtukod “nagtakin og pinuti sa ilang hawak, ug nagtukod sa maong buluhaton.”¹⁰ [Cross-reference]

Samtang nagpadayon ang buhat, ang mga kaaway ni Nehemias nangabugnaw. Upat ka higayon nga sila mihangyo kaniya nga biyaan nga luwas ang siyudad ug makigkita kanila ubos sa laang nga sulbaron ang kasungian, apan si Nehemias nasayud nga ang ilang tuyo mao ang pagpasakit kaniya. Sa matag higayon nga sila mohangyo kaniya, gitubag niya sa sama nga tubag: “Ako nagbuhat og dako nga buhat, mao nga ako dili makaanha.”¹¹ [Cross-reference]

Pagkanindot sa tubag! Uban nianang tin-aw ug dili mausab nga katuyoan sa kasingkasing ug hunahuna, uban nianang dako nga tinguha, ang mga kuta [paril] sa Jerusalem mituybo hangtud kini natukod sulod sa makapatingala nga 52 ka adlaw.¹²

Si Nehemias wala motugot sa mga makabalda nga makapugong kaniya sa pagbuhat unsa ang gustong ipabuhat sa Ginoo kaniya. [Cross-reference]

Dili Kami Moanha

Naaghat ako ug nadasig tungod sa daghang matinud-anon nga mga naghupot sa priesthood karon kinsa adunay susama nga kasingkasing ug hunahuna. Sama ni Nehemias, gihigugma ninyo ang Ginoo ug nagtinguha sa pagpalambo sa priesthood nga inyong gihuptan. Ang Ginoo nahigugma kaninyo ug mahunahunaon sa kaputli sa inyong mga kasingkasing ug sa pagkamakanunayon sa inyong katuyoan. Siya mopanalangin kaninyo sa inyong pagkamaunungon, mogiya sa inyong dalan, ug mogamit sa inyong mga gasa ug mga talento sa pagtukod sa Iyang gingharian dinhi sa yuta.

Bisan pa man niana, dili tanan susama kang Nehemias. Adunay lawak alang sa kalamboan.

Naghunahuna ako, mga kaigsoonan sa priesthood, unsa man kaha ang atong makab-ot kon kitang tanan, sama sa katawhan ni Nehemias, “adunay tinguha sa buluhaton.” Naghunahuna ako kon unsa man kaha ang atong makab-ot kon atong “ihikling ang mga paaging binata”¹³ ug itugyan ang atong kaugalingon, kasingkasing ug kalag, sa pagkahimong angayan nga mga tighupot sa priesthood ug mga tinuod nga representante ni Ginoong Jesukristo. [Pagdapit]

Hunahunaa sa makadiyot kon unsa ang mahimong makab-ot sa personal natong kinabuhi, sa propesyonal natong kinabuhi, sa atong mga pamilya, sa atong mga ward ug branch. Hunahunaa kon sa unsang paagi nga ang gingharian sa Dios molambo sa tibuok yuta. Hunahunaa kon sa unsang paagi nga ang kalibutan mausab ngadto sa kaayohan kon ang matag lalaki nga naghupot sa priesthood sa Dios magbakos sa ilang mga bat-ang ug magpuyo subay sa matuod niyang potensyal, nakabig ngadto sa kinahiladman sa iyang kalag, usa ka matuod ug matinud-anon nga priesthood, andam sa pagtukod sa gingharian sa Dios. [Pagdapit]

Dali ra kaayo nga mabalda—ang pagpokus ngadto sa usa ka napunder nga bombilya o ang binagis nga lihok sa dili mabination nga mga tawo, [bisan unsa pa man ang ilang motibo]. Apan hunahunaa ang gahum nga atong mabatunan isip mga indibidwal ug isip usa ka pundok sa priesthood kon, agig tubag sa mga pagsulay nga mapawala kanato sa pokus o mopaubos sa atong mga sumbanan—ang mga sumbanan sa Dios—kita motubag og, “Ako nagbuhat og dako nga buhat, mao nga ako dili makaanha.” [Pagbalik-balik]

Nagpuyo kita sa mga panahon sa dagkong mga hagit ug dagkong mga oportunidad. Ang Ginoo nagpangita og mga tawo nga sama kang Nehemias—matinud-anong mga kaigsoonan kinsa mituman sa panumpa ug pakigsaad sa priesthood. Nangita Siya aron ilakip ang mga kalag nga dili mapaling kinsa makugihon nga mobuhat sa mga buluhaton sa pagtukod sa gingharian sa Dios—kadtong kinsa, kon nag-atubang og mga [oposisyon ug] tintasyon, moingon sa ilang mga kasingkasing, “Ako nagbuhat og dako nga buhat, mao nga ako dili makaanha.” [Pagbalik-balik]

Kon nag-atubang og pagsulay ug pag-antus, sila motubag, “Ako nagbuhat og dako nga buhat, mao nga ako dili makaanha.” [Pagbalik-balik]

Kon nag-atubang og pagbiay-biay ug pagbugalbugal, sila mopahayag nga, “Ako nagbuhat og dako nga buhat, mao nga ako dili makaanha.” [Pagbalik-balik]

Ang atong Langitnong Amahan nangita niadtong dili motugot nga ang mga butang nga walay hinungdan mobabag kanila sa ilang pagpangita sa kahangturan. Nangita Siya niadtong kinsa dili motugot nga ang pangdani sa kasayon o ang mga laang sa kaaway mobalda kanila sa buluhaton nga Iyang gihatag kanila nga buhaton. Nangita Siya niadtong kansang mga buhat mohaum sa ilang mga pulong—niadtong kinsa moingon uban sa pagsalig, “Ako nagbuhat og usa ka dakong buhat, mao nga ako dili makaanha.” [Pagbalik-balik]

Usa ka Importante nga Buhat nga Buhaton

Ako mohatag og sagradong pagpamatuod nga ang Dios buhi ug naghunahuna sa matag usa kanato. Iyang itunol ang Iyang mga kamot ug ituboy kadtong kinsa nagbarug ug naghupot sa priesthood uban sa pagtahud, kay niining ulahing mga adlaw Siya adunay dako nga buhat alang kanato nga angay buhaton.

Kini nga ebanghelyo wala maggikan sa tawo. Ang doktrina sa Simbahan dili ang pinakamaayo nga tag-an tag-an sa usa ka tawo kon unsay ipasabut sa karaang kasulatan. Kini ang kamatuoran gikan sa langit nga gipadayag pinaagi sa Dios Mismo. Ako mopamatuod nga si Joseph Smith nakakita sa unsay iyang gisulti nga iyang nakita. Siya sa pagkatinuod mihangad sa kalangitan ug nakigsulti sa Dios nga Amahan ug sa Iyang Anak, ug sa mga anghel.

Ako mosaksi nga ang Langitnong Amahan makigsulti niadtong kinsa mangita Kaniya diha sa espiritu ug sa kamatuoran. Akong nasaksihan sa kaugalingon nakong mga mata ug malipayong mopamatuod nga sa atong panahon, ang Dios namulong pinaagi sa Iyang propeta, manalagna ug tigpadayag, nga mao si Thomas S. Monson.

Akong mga kaigsoonan, sama ni Nehemias, kita adunay dakong buluhaton. Nagbarug kita nga naglantaw sa kapunawpunawan sa atong panahon. Mainiton nakong pag-ampo nga bisan sa mga tintasyon, dili gayud nato paubsan ang atong sumbanan; nga bisan sa mga makabalda, bisan asa pa man kini naggikan, dili nato wad-on ang atong pagpokus ngadto sa unsay labing importante; nga kita unta mobarug nga matinguhaon ug maghiusa, magtinabangay og pas-an, samtang kita maisugong modala sa bandila ni Ginoong Jesukristo.

Akong iampo nga kita unta angayan sa balaang priesthood sa Makagagahum nga Dios ug, ngadto sa usa ka tawo, mopataas sa atong mga ulo uban sa dili mapaling-paling nga tingog nga mopahayag ngadto sa kalibutan nga, “Kami nagbuhat og dako nga buhat, ug kami dili moanha.” [Pagbalik-balik] Sa sagradong pangalan ni Jesukristo, amen.

Mubo nga mga sulat

Kita Nagbuhat og Dako nga Buhat ug Dili Makaanha (Kopya sa Estudyante)

Presidente Dieter F. Uchtdorf

Ikaduhang Magtatambag sa Unang Kapangulohan

Ensign o Liahona, Mayo 2009, 59–62.

Ang Istorya kabahin sa Bombilya, o ang Wala Pagtan-aw sa Unsay Labing Importante

Sa usa ka ngiub nga gabii sa Disyembre 36 ka tuig na ang milabay, usa ka Lockheed 1011 nga jumbo jet ang nahagsa didto sa Florida Everglades, mipatay og kapin sa 100 ka mga tawo. Kining grabe nga aksidente mao ang usa sa labing grabe nga pagkahagsa sa kasaysayan sa Estados Unidos.

Siyempre, ang napunder nga bombilya dili maoy hinungdan sa aksidente; nahitabo kadto tungod kay ang mga crew mibaling sa ilang atensyon ngadto sa daw importante niadtong higayuna samtang wala magtan-aw sa labing importante.

Ipahiluna ang Inyong mga Kasingkasing ngadto sa mga Butang nga Labing Importante

Ang kalagmitan sa pag-focus ngadto sa dili kaayo importante nga ipuli sa pinakaimportante mahitabo dili lamang sa mga piloto apan sa tanan. Kitang tanan namiligro. Ang drayber nga magtan-aw gayud sa karsada mas dakog purohan nga moabut sa iyang destinasyon nga walay aksidente kay sa drayber nga nagpokus sa pagtext-text sa iyang cellphone.

Kita nasayud unsay labing importante sa kinabuhi—ang Kahayag ni Kristo nagtudlo niini ngadto sa tanan. Kita isip matinud-anong mga Santos sa Ulahing mga Adlaw adunay Espiritu Santo isip usa ka “kanunay nga kauban”¹ aron motudlo kanato sa mga butang nga adunay mahangturong bili. Akong gihunahuna nga bisan kinsa nga naghupot sa priesthood nga namati sa akong tingog karon, kon hangyoon nga mamulong mahitungod sa hilisgutan nga “unsay labing importante,” makahimo gayud og nindot kaayo. Ang atong kahuyang anaa sa kapakyas sa pagpahiuyon sa atong mga lihok uban sa atong konsensya.

Likayi ang Pagkabalda

Usahay ang mga butang nga mobalda kanato dili makadaut, diha ug mismo sa ilang kaugalingon; sa kasagaran makahatag gani kini kanato og maayong pagbati.

Posible nga bisan ang paghimo og maayong mga butang mosobra ra kaayo. Usa ka sanglitanan makita diha sa usa ka amahan o apohan kinsa mogahin og mga oras sa pagsiksik sa iyang mga kaliwatan o nag-atubang sa internet samtang napasagdan og gilikayan ang makahulaganon nga panahon sa pakig-uban sa kaugalingon niyang mga anak ug mga apo. Laing sanglitanan mao ang usa ka hardinero nga migahin sa iyang mga adlaw sa pagpangibut og mga sagbut gikan sa yuta samtang wala matagad ang mga espirituhanong sagbut nga mihulga sa pagtuok sa iyang kalag.

Kon tinud-anay kitang nahigugma sa atong Langitnong Amahan ug sa Iyang mga anak, ipakita nato kana nga gugma pinaagi sa atong mga buhat. Mopasaylo kita sa usag usa ug maningkamot sa paghimo og maayo, kay ang “atong karaang [kaugalingon] gilansang na uban ni [Kristo].”² Kita “mobisita sa mga ilo ug mga babayeng balo sa ilang mga pagkaguol,” ug atong ampingan ang atong kaugalingon nga “dili mahugawan sa kalibutan.”³

Gisaligan kita sa balaan nga priesthood ug gisangunan og responsibilidad, gahum, ug katungod sa paglihok isip mga tinugyanan sa atong Langitnong Hari.

Mao kini ang mga butang nga labing importante. Kini ang mga butang nga may mahangturong bili nga angayan sa atong pagtagad.

Dili ug dili gayud kita motugot sa atong kaugalingon nga mabalda gikan sa sagrado natong katungdanan. Dili ug dili gayud nato wad-on ang pagpokus ngadto sa mga butang nga labing importante.

Nehemias

Si Nehemias sa Daang Tugon usa ka talagsaong ehemplo sa pagpabiling nakapokus ug andam mobuhat og importante nga tahas. Si Nehemias usa ka Israelite kinsa gihinginlan nga nagpuyo sa Babelonia ug nag-alagad isip tighatag og bino sa hari. Usa ka adlaw ang hari nangutana kang Nehemias nganong ingon og masulub-on kaayo siya. Si Nehemias mitubag, “Nganong dili magmasulub-on ang akong nawong, nga ang siyudad, ang dapit sa mga [gilubngan] sa akong amahan, nahimong kamingawan, ug ang mga ganghaan niana nangaut-ut sa kalayo?”⁵

Sa pagkadungog niini sa hari, ang iyang kasingkasing natandog, ug mihatag siya kang Nehemias sa katungod nga mobalik ngadto sa Jerusalem ug motukod pag-usab sa siyudad. Hinoon, dili tanan ang nalipay niini nga plano. Gani, daghan sa mga magmamando nga nagpuyo sa Jerusalem naglagot kaayo “nga may usa ka tawo nga nangita sa kaayohan sa mga anak sa Israel.”⁶ Kini nga mga tawo “naligutgut sa hilabihan, ug ilang gitamay ang mga Judeo.”⁷

Sa walay kahadlok, si Nehemias wala motugot sa mga mibatok nga mobalda kaniya. Hinoon, iyang gipalihok ang iyang mga kapanguhaan ug kasundalohan ug milihok sa pagtukod og balik sa siyudad, “kay ang mga katawhan may tinguha sa pagbuhat.”⁸

Apan sa dihang ang mga kuta [paril] sa siyudad nagsugod sa pagtaas, nagkagrabe ang panagbatok. Ang mga kaaway ni Nehemias mihulga, nagkunsabo, ug mibiay-biay. Ang mga panghulga tininuod gayud, ug misamot sila ka makalilisang nga si Nehemias mitug-an, “Nakapahadlok silang tanan kanamo.”⁹ Bisan sa peligro ug sa kanunayng pagpanghulga sa pag-atake, ang buhat milambo. Usa kadto ka panahon sa kakapoy, kay ang matag tigtukod “nagtakin og pinuti sa ilang hawak, ug nagtukod sa maong buluhaton.”¹⁰

Samtang nagpadayon ang buhat, ang mga kaaway ni Nehemias nangabugnaw. Upat ka higayon nga sila mihangyo kaniya nga biyaan nga luwas ang siyudad ug makigkita kanila ubos sa laang nga sulbaron ang kasungian, apan si Nehemias nasayud nga ang ilang tuyo mao ang pagpasakit kaniya. Sa matag higayon nga sila mohangyo kaniya, gitubag niya sa sama nga tubag: “Ako nagbuhat og dako nga buhat, mao nga ako dili makaanha.”¹¹

Si Nehemias wala motugot sa mga makabalda nga makapugong kaniya sa pagbuhat unsa ang gustong ipabuhat sa Ginoo kaniya.

Dili Kami Moanha

Bisan pa man niana, dili tanan susama kang Nehemias. Adunay lawak alang sa kalamboan.

Naghunahuna ako, mga kaigsoonan sa priesthood, unsa man kaha ang atong makab-ot kon kitang tanan, sama sa katawhan ni Nehemias, “adunay tinguha sa buluhaton.” Naghunahuna ako kon unsa man kaha ang atong makab-ot kon atong “ihikling ang mga paaging binata”¹³ ug itugyan ang atong kaugalingon, kasingkasing ug kalag, sa pagkahimong angayan nga mga tighupot sa priesthood ug mga tinuod nga representante ni Ginoong Jesukristo.

Dali ra kaayo nga mabalda—ang pagpokus ngadto sa usa ka napunder nga bombilya o ang binagis nga lihok sa dili mabination nga mga tawo, [bisan unsa pa man ang ilang motibo]. Apan hunahunaa ang gahum nga atong mabatunan isip mga indibidwal ug isip usa ka pundok sa priesthood kon, agig tubag sa mga pagsulay nga makapawala kanato sa pokus o mopaubos sa atong mga sumbanan—ang mga sumbanan sa Dios—kita motubag og, “Ako nagbuhat og dako nga buhat, mao nga ako dili makaanha.”

Nagpuyo kita sa mga panahon sa dagkong mga hagit ug dagkong mga oportunidad. Ang Ginoo nagpangita og mga tawo nga sama kang Nehemias—matinud-anong mga kaigsoonan kinsa mituman sa panumpa ug pakigsaad sa priesthood. Nangita Siya aron ilakip ang mga kalag nga dili mapaling kinsa makugihon nga mobuhat sa mga buluhaton sa pagtukod sa gingharian sa Dios—kadtong kinsa, kon nag-atubang og mga [oposisyon ug] tintasyon, moingon sa ilang mga kasingkasing, “Ako nagbuhat og dako nga buhat, mao nga ako dili makaanha.”

Kon nag-atubang og pagsulay ug pag-antus, sila motubag, “Ako nagbuhat og dako nga buhat, mao nga ako dili makaanha.”

Kon nag-atubang og pagbiay-biay ug pagbugalbugal, sila mopahayag nga, “Ako nagbuhat og dako nga buhat, mao nga ako dili makaanha.”

Ang atong Langitnong Amahan nangita niadtong dili motugot nga ang mga butang nga walay hinungdan mobabag kanila sa ilang pagpangita sa kahangturan. Nangita Siya niadtong kinsa dili motugot nga ang pangdani sa kasayon o ang mga laang sa kaaway mobalda kanila sa buluhaton nga Iyang gihatag kanila nga buhaton. Nangita Siya niadtong kansang mga buhat mohaum sa ilang mga pulong—niadtong kinsa moingon uban sa pagsalig, “Ako nagbuhat og usa ka dakong buhat, mao nga ako dili makaanha.”

Usa ka Importante nga Buhat nga Buhaton

Akong iampo nga kita unta angayan sa balaang priesthood sa Makagagahum nga Dios ug, ngadto sa usa ka tawo, mopataas sa atong mga ulo uban sa dili mapaling-paling nga tingog nga mopahayag ngadto sa kalibutan nga, “Kami nagbuhat og dako nga buhat, ug kami dili moanha.” Sa sagradong pangalan ni Jesukristo, amen.

Mubo nga mga sulat