Kapitulo 2: Ang Buhi nga Propeta: Ang Presidente sa Simbahan
Kapitulo 2
Ang Buhi nga Propeta: Ang Presidente sa Simbahan
Pasiuna
Ang mga yawe nga magamit sa Presidente sa Simbahan sa iyang tahas isip propeta, manalagna ug tigpadayag maoy nakapalahi kaniya ni bisan kinsa dinhi sa yuta. Ang dinasig nga tambag sa propeta kanunay nga nahiuyon sa mga mahangturong kamatuoran ug nakatutok sa mga panginahanglan ug kondisyon sa iyang panahon. Ang pagsunod sa iyang tambag adunay mga mahangturong sangputanan. Tabangi ang imong mga estudyante nga masayud nga kon mosalig sila sa tambag sa buhing propeta, magiyahan sila ngadto sa mga dalan nga luwas. Samtang nag-alagad isip sakop sa Korum sa Napulog Duha ka mga Apostoles, si Presidente Gordon B. Hinckley (1910–2008) mideklarar:
“Nalipay ko nga ang kalinaw ug kauswagan ug prosperidad niini nga katawhan anaa sa pagbuhat sa kabubut-on sa Ginoo sa paagi nga kana nga kabubut-on gipasabut sa [Presidente sa Simbahan]. Kon mapakyas kita sa pagsunod sa iyang tambag, gisalikway nato ang iyang sagradong calling. Kon mosunod kita sa iyang tambag, mapanalanginan kita” (Gordon B. Hinckley, “We Thank Thee, O God, for a Prophet,” Ensign, Ene. 1974, 125).
Imahe
Presidents Benson, Hinckley, Monson
Si Presidente Gordon B. Hinckley (wala), Presidente Ezra Taft Benson (tunga), ug Presidente Thomas S. Monson (tuo)
Pipila sa mga Doktrina ug mga Baruganan
Ang Presidente sa Simbahan naghupot ug nagdumala sa paggamit sa tanang mga yawe sa priesthood.
Ang mga pagtulun-an ug paggiya sa buhi nga propeta mas hatagan og prayoridad kay sa gisulti sa kanhing mga propeta.
Ang Ginoo dili gayud motugot sa buhi nga propeta nga mopahisalaag sa Simbahan.
Mga Ideya sa Pagtudlo
Ang Presidente sa Simbahan Naghupot ug Nagdumala sa Paggamit sa Tanan nga mga Yawe sa Priesthood
Dapita ang usa ka estudyante sa pagpakli ngadto sa seksyon 2.1 sa Manwal sa Estudyante sa mga Pagtulun-an sa mga Buhing Propeta, ug hangyoa siya sa pagbasa sa unang upat ka paragraph (hangtud sa “gigamit namo kini sa matag adlaw”) sa istorya ni Presidente Boyd K. Packer (1924–2015) sa Korum sa Napulog Duha ka mga Apostoles.
Dayon tun-i ang Mateo 16:15–19; 18:18 uban sa imong mga estudyante. Ipangutana:
Unsay giingon sa Manluluwas nga Iyang ihatag kang Pedro?
Unsay mahimo ni Pedro tungod niini nga mga yawe?
Kinsa pa ang nakadawat niini nga mga yawe? (Tan-awa sa Mateo 18:18; timan-i nga ang Mateo 18:1 nagpasabut nga gipamulong kini ni Jesus ngadto sa Iyang Napulog Duha ka mga Apostoles.)
Kinsa ang gihatagan niining sama nga mga yawe karon?
Hangyoa ang usa ka estudyante sa pagtapos sa pagbasa sa istorya ni Presidente Packer sa seksyon 2.1 sa manwal sa estudyante. Dayon ipangutana:
Unsay gipasabut sa mga termino nga mga yawe sa priesthood?
Ipaambit ang mosunod nga pamahayag gikan ni Elder Bruce R. McConkie (1915–85) sa Korum sa Napulog Duha ka mga Apostoles:
Imahe
Elder Bruce R. McConkie
“Ang mga yawe sa priesthood mao ang katungod ug gahum sa kapangulohan. Kini ang gahum sa paggiya, pagkontrolar, ug pagdumala. Kadtong naghupot niini gihatagan og gahum sa pagdumala sa paagi nga gamiton sa uban ang ilang priesthood” (Bruce R. McConkie, A New Witness for the Articles of Faith [1985], 309).
Hangyoa ang mga estudyante nga i-summarize, sa ilang kaugalingong mga pulong, ang depinisyon ni Elder McConkie sa mga yawe sa priesthood.
Basaha ang mosunod nga mga kasulatan uban sa imong klase ug ipalista sa mga estudyante diha sa pisara ang mga yawe sa priesthood nga gihulagway sa matag bersikulo:
Sa unsang paagi kini nga mga yawe makaapekto sa tinagsa nga mga miyembro sa Simbahan? (Ang tanang mga ordinansa sa ebanghelyo gipangalagad niadtong adunay mga yawe.)
Sa unsang paagi ang Presidente sa Simbahan mogamit niini nga mga yawe sa pagdumala sa buhat sa Ginoo dinhi sa yuta? (Nag-abli sa mga nasud alang sa ebanghelyo, nagtugot sa mga kahigayunan sa pag-seal, nagtukod og mga templo, nagpasabut sa mga misteryo sa ebanghelyo.)
Tabangi ang mga estudyante nga makasabut sa kalainan tali sa mga yawe ug awtoridad pinaagi sa pagpaambit sa mosunod nga mga ehemplo:
Ang usa ka priest adunay awtoridad sa priesthood sa pagbunyag (tan-awa sa D&P 20:46), apan ang iyang bishop—kinsa naghupot sa mga yawe sa pagdumala sa ward (tan-awa sa D&P 107:13–15)—kinahanglan unang mohatag sa pari og pagtugot sa pagpahigayon sa bunyag ug mosulti sa pari kanus-a, unsaon, asa, ug kinsa ang bunyagan.
Ang mga sakop sa Unang Kapangulohan sa Simbahan naghupot sa mga yawe sa mga gahum sa priesthood sa pagbugkos. Sila motawag ug mo-set apart og ubang takus nga mga tighupot sa priesthood, nagtugot kanila sa paglihok isip mga sealer aron sa pagpahigayon sa mga sealing sa templo.
Ipakigbahin ang mosunod nga pamahayag ni Presidente Gordon B. Hinckley (1910–2008):
Imahe
President Gordon B. Hinckley
“Kon ang usa ka tawo gi-orden sa pagka-apostol ug gi-set apart isip sakop sa Konseho sa Napulog Duha, siya gihatagan sa mga yawe sa priesthood sa Dios. Ang matag usa sa napulog lima ka buhi nga tawo nga gi-orden sa ingon naghupot niini nga mga yawe. Hinoon, ang Presidente sa Simbahan lamang ang adunay katungod sa paggamit niini sa kinatibuk-an. Mahimo niyang idelegar ang paggamit sa uban niini ngadto sa usa o sobra pa sa iyang mga Kaigsoonan. Ang matag usa adunay mga yawe apan gitugutan lamang sa paggamit niini kutob sa gitugot kaniya sa propeta sa Ginoo” (Gordon B. Hinckley, “The Church Is on Course,” Ensign, Nob. 1992, 54).
Pangutan-a ang mga estudyante:
Sa unsang paagi ang Presidente sa Simbahan modumala sa paggamit sa mga yawe sa priesthood sa Korum sa Napulog Duha ka mga Apostoles?
Nganong ang mga Apostoles kinahanglan man nga makabaton sa samang mga yawe sa Presidente sa Simbahan?
Ipamatuod nga ang matag usa sa mga Presidente sa Simbahan nakabaton sa tanang mga yawe sa priesthood. Kini nga mga yawe nakapahimo nga maanaa alang sa tanan ang mga panalangin sa kaluwasan pinaagi sa mga ordinansa sa ebanghelyo.
Ang mga Pagtulun-an ug Paggiya sa Buhi nga Propeta Mas Hatagan og Prayoridad kay sa Gisulti sa mga Propeta Kaniadto
Pangayoi ang mga estudyante og mga ehemplo sa mga buhat sa Simbahan nga nausab o nasugdan paglabay sa katuigan. Kon walay mahunahunaan ang mga estudyante, mahimo nimong isugyot ang pipila sa mosunod:
Iskedyul sa mga miting sa Dominggo (tulo ka oras nga miting imbis managlahi nga mga miting sa buntag ug gabii)
Mga pundo sa ikapulo maoy igasto sa kadaghanan sa mga panginahanglan sa ward budget (kaniadto ang mga ward kinahanglang mangita og ilang kaugalingong kwarta alang sa ilang budget)
Gi-standardize ang mga diskusyon sa misyonaryo (giusab sa pipila ka higayon sulod sa katapusang 30 ka tuig, ang pinakabag-o diha sa Isangyaw ang Akong Ebanghelyo [2004])
Mas gagmay nga mga templo (ang gagmay nga mga templo motubag sa mga panginahanglan sa gagmayng mga dapit)
Perpetual Education Fund (gipahibalo niadtong Abril 2001)
Mga Korum sa Seventy (dunay higayon nga ang matag stake adunay usa ka korum sa seventy; unya dihay usa lamang ka korum sa kinatibuk-an; karon duna kitay daghan)
Pangutan-a ang mga estudyante:
Sa unsang mga paagi kaha mapugngan ang paglambo sa Simbahan kon gibuhat lang nato ang tanan sa samang paagi sa nag-unang mga henerasyon?
Sa unsang paagi kini nga mga kausaban nakatabang sa paglambo sa Simbahan sa tibuok kalibutan?
Ipasabut nga agig dugang sa paggiya sa mga kalihokan ug pamaagi sa mga polisiya sa Simbahan, ang mga propeta usab nagklaro ug nagpalapad sa atong pagsabut sa doktrina sa Simbahan. Isulat sa katunga sa pisara ang mosunod nga mga pangutana:
Unsa ka sagad nga gisulti ni Presidente Spencer W. Kimball nga ang mga propeta nakadawat og pagpadayag sukad sa 1820?
Sa unsang paagi ang mga pagpadayag kasagarang moabut sa buhing mga propeta?
Unsa nga pasidaan ang gihatag ni Presidente Kimball kanato?
I-assign ang katunga sa imong klase sa pagbasa sa pamahayag ni Presidente Spencer W. Kimball (1895–1985) sa seksyon 2.3 sa manwal sa estudyante. Papangitaa ang mga estudyante og mga tubag sa mga pangutana sa ilang bahin sa pisara samtang magbasa sila.
Sa pikas katunga sa pisara, isulat ang mosunod nga mga pangutana:
Nganong mas ganahan man si Presidente Brigham Young sa mga pulong sa buhing propeta kay sa mga kasulatan?
Unsay gipasabut ni Presidente Ezra Taft Benson sa dihang misulti siya nga ang propeta adunay “gahum sa TNT”?
Unsay gisugyot ni Presidente Benson nga maoy labing importanting pagbasa nga atong mabuhat?
Unsa man ang gipasidaan ni Presidente Benson kanato nga angayang matngunan?
I-assign ang laing katunga sa klase sa pagbasa sa ikaduha ug ikatulong “mga butang nga sukaranan” gikan sa pakigpulong ni Presidente Ezra Taft Benson (1899–1994) sa “Enrichment Material” sa katapusan sa kapitulo 2 sa manwal sa estudyante. (Kini kabahin sa usa ka pakigpulong nga giulohan og “Katorse ka mga Sukaranan [Fundamentals] sa Pagsunod sa Propeta.”) Papangitaa ang mga estudyante og mga tubag sa mga pangutana sa ilang bahin sa pisara samtang magbasa sila.
Human ang mga estudyante makabaton og igong panahon sa pagbasa ug pagpamalandong sa materyal ug pagtubag sa mga pangutana, awhaga sila sa pagpaambit sa mga tubag ug mga panabut diha sa klase. Hangyoa ang pipila ka estudyante sa pagpakigbahin sa ilang pagpamatuod sa buhi nga propeta ug sa mga kaayohan nga ilang nakaplagan sa pagsunod sa propetikanhong tambag.
Ang Ginoo Dili Gayud Motugot sa Buhi nga Propeta nga Mopahisalaag sa Simbahan
Hangyoa ang usa ka estudyante sa pagbasa sa Numeros 12:6–8 ug ang laing estudyante sa pagbasa sa Exodo 33:11 ngadto sa klase. Hisguti kon unsay nakapahimo sa propeta nga masayud unsaon sa paggiya kanato.
Bahina ang imong klase ngadto sa gagmayng mga grupo. Hangyoa ang matag grupo sa pagbasa sa mga pamahayag diha sa seksyon 2.5 sa manwal sa estudyante. Pahisguti sa mga grupo ang mosunod nga mga pangutana samtang magtuon sila (mahimo nimong isulat ang mga pangutana diha sa pisara o ihatag kini isip handout):
Unsay gisulti ni Presidente Wilford Woodruff nga dili gayud mahitabo?
Unsay iyang gisulti nga buhaton sa Ginoo sa dili pa kana mahitabo?
Unsay gipasabut nga “kanunaya ang pagtuman” sa propeta? Sa unsang mga paagi nga epektibo nato kanang mabuhat?
Unsay gisulti ni Presidente Gordon B. Hinckley nga maoy bugtong tinguha sa mga lider sa Simbahan?
Sa unsang paagi buhaton ang importanteng mga desisyon sa Simbahan sumala sa iyang gisulti?
Sa unsang mga paagi ang pagsabut niini nga mga baruganan makaapekto sa atong pagtuo diha sa Simbahan ug sa buhi nga propeta?
Basaha ang Deuteronomio 18:18–22. Sa unsang paagi kini nga mga pulong ni Moises nagsuporta sa ideya nga ang Ginoo dili gayud motugot sa buhi nga propeta nga mopahisalaag sa Simbahan?
Dapita ang mga estudyante sa pagpaambit sa klase sa pipila sa ilang nahisgutan sa ilang mga grupo.