Kapitulo 4
Ang Korum sa Unang Kapangulohan
Pasiuna
Ang Unang Kapangulohan naghupot sa “mga yawe sa gingharian” ug mao ang labing taas nga presiding council sa Simbahan (D&P 81:2; tan-awa usab sa section summary sa D&P 81; 107:80–81). Ang Ginoo mopahibalo sa Iyang kabubut-on ngadto sa Unang Kapangulohan. Isip presiding quorum sa Simbahan, ang Unang Kapangulohan mao ang hingpit nga awtoridad dinhi sa yuta alang sa doktrina sa Simbahan. Si Presidente Joseph Fielding Smith (1876–1972) mihimo sa mosunod nga saad niadtong nagsunod sa tambag sa Unang Kapangulohan:
“Sa akong hunahuna adunay usa ka butang nga kinahanglang klaro gyud sa atong hunahuna. Dili ang Presidente sa Simbahan, ni ang Unang Kapangulohan … mopahisalaag sa mga Santos o motambag sa mga tawo nga sukwahi sa hunahuna ug kabubut-on sa Ginoo. …
“Ako mopamatuod nga kon kita molantaw sa Unang Kapangulohan ug mosunod sa ilang tambag ug direksyon, walay gahum sa kalibutan ang makapahunong o makapausab sa atong padulngan isip simbahan, ug isip indibidwal kita makasinati og kalinaw niining kinabuhia ug mahimong makapanunod sa mahangturong himaya sa sunod nga kinabuhi” (Joseph Fielding Smith, “Eternal Keys and the Right to Preside,” Ensign, Hulyo 1972, 88).
Tabangi ang mga estudyante nga makasabut sa kaimportante sa pagsunod sa Unang Kapangulohan. Ribyuha ang mga saad nga gihatag niadtong mobuhat sa ingon. Isip resulta niini nga leksyon, ang mga estudyante kinahanglang mobati og mas dakong tinguha sa pag-sustain ug mahiuyon sa Unang Kapangulohan. Kinahanglang mobati sila sa pagtuaw, sama ni Presidente Boyd K. Packer sa Korum sa Napulog Duha ka mga Apostoles: “Salamat sa Dios alang sa kapangulohan. Sama sa mga tumoy [sa bukid], mobarug sila nga walay bisan unsa ibabaw kanila gawas sa kalangitan” (“The Spirit Beareth Record,” Ensign, Hunyo 1971, 87).
Ang Unang Kapangulohan niadtong 1894: George Q. Cannon, Unang Magtatambag (sa wala); Wilford Woodruff, Presidente (sa tunga); ug Joseph F. Smith, Ikaduhang Magtatambag (sa tuo).
Pipila sa mga Doktrina ug mga Baruganan
-
Ang Ginoo mipadayag og mga instruksyon kabahin sa Unang Kapangulohan ngadto ni Propeta Joseph Smith.
-
Ang Unang Kapangulohan naghupot sa mga yawe sa gingharian, nga naglakip sa awtoridad sa pagdumala sa buhat sa Ginoo dinhi sa yuta.
-
Samtang ang Presidente sa Simbahan gipaluyohan sa iyang mga magtatambag ug sa mga miyembro sa Simbahan, ang tibuok Simbahan mapanalanginan.
Mga Ideya sa Pagtudlo
Ang Ginoo Mipadayag og mga Instruksyon kabahin sa Unang Kapangulohan ngadto ni Propeta Joseph Smith
Isulat ang mosunod nga mga hitabo diha sa pisara, ug hangyoa ang mga estudyante sa paghan-ay niini sa hustong pagkasunod:
Organisasyon sa Simbahan
Unang Panan-awon ni Joseph Smith
Pagpahiuli sa Melchizedek Priesthood
Pagpahiuli sa Aaronic Priesthood
Tubag: (1) Unang Panan-awon ni Joseph Smith; (2) pagpahiuli sa Aaronic Priesthood; (3) pagpahiuli sa Melchizedek Priesthood; (4) pag-organisar sa Simbahan.
Pangutan-a ang mga estudyante:
-
Ngano kaha nga sa ingon niini nga han-ay nahitabo kini nga mga panghitabo? Nganong wala man kini mahitabo sa lahi nga han-ay?
Ipabasa sa usa ka estudyante ang Doktrina ug mga Pakigsaad 128:20–21. Dayon ipangutana:
-
Sa unsang paagi kini nga kasulatan nakatabang sa pagpasabut sa han-ay sa mga panghitabo sa Pagpahiuli? (timan-i ilabi na ang katapusang porsyon sa bersikulo 21).
Ipasabut nga ang Ginoo mipadayag usab sa pag-organisar sa Simbahan sa anam-anam nga paagi, lakip ang mga instruksyon kabahin sa Korum sa Unang Kapangulohan. Sa dihang ang Simbahan unang giorganisar, wala pay Unang Kapangulohan sama sa anaa kanato karon.
Hangyoa ang mga estudyante sa pagbasa sa tsart diha sa seksyon 4.2 sa Manwal sa Estudyante sa mga Pagtulun-an sa Buhing mga Propeta. Dayon ipangutana:
-
Unsa ang titulo [tawag] sa posisyon ni Joseph Smith sa dihang ang Simbahan unang giorganisar niadtong Abril 6, 1830?
-
Unsa ka dugay human sa pag-organisar sa Simbahan nga ang Unang Kapangulohan giestablisar?
-
Ngano kaha nga ang hingpit nga organisasyon sa pagpangulo sa Simbahan wala pa niadtong unang giorganisar ang Simbahan?
Ipakigbahin ang imong pagpamatuod nga gikan sa panahon ni Propeta Joseph Smith hangtud karon, ang Ginoo mitudlo kon unsaon sa pag-organisar ug paggiya sa Iyang Simbahan, nagpadayag og kahibalo sa panahon nga kini gikinahanglan, sa anam-anam nga paagi (tan-awa sa D&P 128:21). Sa dihang husto na ang panahon, ang Ginoo mipadayag og mga instruksyon kang Joseph Smith mahitungod sa pag-organisar sa Unang Kapangulohan.
Ang Unang Kapangulohan Naghupot sa mga Yawe sa Gingharian, Nga Naglakip sa Awtoridad sa Pagdumala sa Buhat sa Ginoo dinhi sa Yuta
Hangyoa ang mga estudyante sa pagpakli ngadto sa Doktrina ug mga Pakigsaad 90. Ipasabut nga ang ulohan sa seksyon naghisgot nga “kini nga pagpadayag usa ka nagpadayon nga lakang sa katukuran sa Unang Kapangulohan.” Hangyoa ang usa ka estudyante sa pagbasa sa Doktrina ug mga Pakigsaad 90:9. Ipasabut nga ang termino nga “imong pagdumala” nagpasabut ngadto sa Presidente sa Simbahan ug ang termino nga “ilang pagdumala” nagpasabut ngadto sa mga magtatambag sa Unang Kapangulohan. Ipangutana:
-
Niini nga bersikulo, unsay kalainan tali sa tahas sa Presidente ug sa tahas sa iyang mga magtatambag? (Ang Presidente ang modawat sa pulong; ang mga magtatambag motabang nga masangyaw ang pulong sa tibuok yuta.)
Isulat sa pisara: Ang Presidente nagdumala. (Mahimo nimong ipasabut nga ang tahas sa Presidente sa pagdawat og mga pagpadayag alang sa tibuok Simbahan gihisgutan usab sa D&P 90:4.)
Hangyoa ang usa ka estudyante sa pagbasa sa Doktrina ug mga Pakigsaad 90:6. Dayon ipangutana:
-
Kinsa man ang ginganlan sa Ginoo isip mga magtatambag ni Propeta Joseph Smith? (Si Sidney Rigdon ug Frederick G. Williams.)
-
Sumala niini nga bersikulo, sa unsang paagi nga ang mga magtatambag sa Unang Kapangulohan katumbas ngadto apan ubos sa direksyon sa Presidente? (Sa paghupot sa mga yawe.)
Isulat sa pisara: Ang mga magtatambag katumbas diha sa paghupot sa mga yawe.
Dapita ang usa ka estudyante sa pagbasa sa komentaryo ni Elder John A. Widstoe (1872–1952) sa Korum sa Napulog Duha ka mga Apostoles diha sa seksyon 4.4 sa manwal sa estudyante.
Nag-refer sa duha ka mga baruganan nga imong gisulat sa pisara, ipasabut nga ang pagsabut niining duha ka mga kamatuoran gikinahanglan aron makasabut kon sa unsang paagi nga ang Unang Kapangulohan naglihok sa paggiya sa Simbahan.
Isip usa ka ehemplo, ipabasa sa usa ka estudyante ang Doktrina ug mga Pakigsaad 102:9–11. Dayon ipangutana:
-
Kon ang Presidente sa Simbahan dili makahimo tungod sa sakit o uban pang mga kahimtang, unsa man ang paagi nga gihatag sa Ginoo aron magpadayon ang Iyang buhat?
Pahinumdom: Mahimo nimong hangyoon ang mga estudyante sa pagbasa sa nag-una sa duha ka mga pamahayag ni Presidente Gordon B. Hinckley (1910–2008) sa seksyon 4.7 sa manwal sa estudyante.
Isulat ang mosunod nga lista sa mga kasulatan diha sa pisara ug pag-assign og mga grupo sa estudyante sa pagbasa niini, nga mangita sa mga katungdanan sa Unang Kapangulohan. Hatagi og panahon sa pagsiksik ang mga estudyante, ug dayon dapita ang matag grupo sa pagreport sa ilang mga nakit-an ug sa paghimo og lista sa mga katungdanan sa Unang Kapangulohan diha sa pisara.
Mga kasulatan |
Mga Katungdanan sa Unang Kapangulohan |
---|---|
Ulohan sa seksyon ug bersikulo 1 sa D&P 120 | |
Ang inyong nahuman nga lista ingon niini tan-awon:
Mga kasulatan |
Mga Katungdanan sa Unang Kapangulohan |
---|---|
Motudlo og mga bishop | |
Mangulo [Mag-preside], motukod sa kahan-ayan sa tanan nga mga kalihokan sa Simbahan | |
Modumala sa tanan nga mga buhatan sa Simbahan | |
Modumala sa buhat sa Korum sa Napulog Duha ka mga Apostoles | |
Mohukom sa lisud nga mga kaso, mohusay sa mga espirituhanong panagsumpaki | |
Ulohan sa seksyon ug bersikulo 1 sa D&P 120 |
Mohimo og mga desisyon kabahin sa pagpahigayon (sa paggamit) sa ikapulo |
Modawat sa mga orakulo (pagpadayag) alang sa tibuok Simbahan |
I-assign ang matag grupo sa pagbasa og usa sa mosunod nga mga kinutlo gikan sa kapitulo 4 sa manwal sa estudyante, nga mangita alang sa dugang nga mga katungdanan sa Unang Kapangulohan. (Mahimo nimong ipadugang sa mga estudyante ang ilang nakit-an diha sa lista sa pisara.)
-
Presidente James E. Faust (1920–2007) sa Unang Kapangulohan (tan-awa sa seksyon 4.9 sa manwal sa estudyante).
-
Presidente Joseph Fielding Smith (1876–1972) (tan-awa ang ikaduha sa duha ka mga pamahayag ni Presidente Smith sa seksyon 4.5 sa manwal sa estudyante).
Pangutan-a ang mga estudyante:
-
Sa unsang paagi ang mga katungdanan sa Unang Kapangulohan nakaapekto sa inyong kinabuhi?
Samtang ang Presidente sa Simbahan Gi-sustain sa Iyang mga Magtatambag ug sa mga Miyembro sa Simbahan, ang Tibuok Simbahan Mapanalanginan
Ribyuha ang lista sa mga katungdanan sa Unang Kapangulohan diha sa pisara ug ang mga katungdanan sa Presidente sa Simbahan nga imong gitun-an sa kapitulo 2.
Hangyoa ang usa ka estudyante sa pagbasa sa Exodo 17:8–13. Ipasabut nga si Aaron ug Hur susama sa mga magtatambag sa Unang Kapangulohan. Dayon hisguti ang mosunod nga mga pangutana:
-
Sa katapusan, unsay nahitabo sa Israel tungod kay si Aaron ug Hur mitabang kang Moises pinaagi sa pagsangga sa iyang mga bukton?
-
Unsa unta ang angay nga nakat-unan sa Israel nianang adlawa samtang nagtan-aw sila sa padayon nga pakig-away ug nakakita kang Moises diha sa bungtod?
-
Unsa nga mga leksyon ang atong makuha gikan niini nga istorya nga magamit nato karon?
Dapita ang usa ka estudyante sa pagbasa sa pamahayag ni Elder William R. Walker sa Seventy diha sa seksyon 4.6 sa manwal sa estudyante. Ipangutana:
-
Sa unsang paagi ang mga magtatambag sa Unang Kapangulohan nagtabang sa pagdala sa palas-anon nga gidala sa propeta karon?
Pahinumdom: Mahimo usab nimong ipakigbahin ang mga komentaryo ni Presidente N. Eldon Tanner (1898–1982) sa Unang Kapangulohan diha sa seksyon 4.8 sa manwal sa estudyante. Dayon ipangutana:
-
Kinsa pa, uban sa iyang mga magtatambag, ang nagtabang sa propeta sa pagdala niana nga palas-anon?
Hangyoa ang mga estudyante sa pagbasa sa pamahayag ni Presidente Harold B. Lee (1899–1973) diha sa seksyon 4.11 sa manwal sa estudyante. Dayon ipangutana:
-
Unsay atong mabuhat karon isip mga miyembro sa Simbahan sa pag-sustain ug pagsuporta sa Unang Kapangulohan?
-
Sa unsang mga paagi kaha nga ang “pagsalig, hugot nga pagtuo, ug [mga] pag-ampo” (D&P 107: 22) sa mga miyembro sa Simbahan makatabang sa propeta ug sa iyang mga magtatambag sa pagdala sa ilang mga palas-anon?
Ipabasa sa mga estudyante ang Doktrina ug mga Pakigsaad 21:4–6, nga mangita kon unsay mahitabo kanato isip katawhan kon mopaluyo kita sa propeta ug sa iyang mga magtatambag. Dayon ipangutana ang mosunod nga mga pangutana:
-
Sumala niini nga mga bersikulo, unsa nga mga panalangin ang moabut sa mga miyembro sa Simbahan kon atong i-sustain ang propeta ug ang iyang mga magtatambag?
-
Sa unsang paagi kana susama sa unsay nahitabo sa mga Israelite sa dihang gisangga ni Aaron ug Hur ang mga bukton ni Moises?
-
Kanus-a kamo mibati nga nalig-on, napanalipdan, o napanalanginan pinaagi sa pag-sustain sa Presidente sa Simbahan ug sa iyang mga magtatambag?
Ipabasa sa usa ka estudyante ang mga pamahayag ni Propeta Joseph Smith (1805–1844) diha sa seksyon 4.12 sa manwal sa estudyante. Ipangutana:
-
Sa unsang mga paagi nga ang mga instruksyon nga gihatag sa mga sakop sa Unang Kapangulohan nahimong panalangin sa inyong kinabuhi?
Mahimo nimong dad-on ang atensyon sa mga estudyante ngadto sa pamplet nga Alang sa Kalig-on sa mga Kabatan-onan, nga giandam sa Unang Kapangulohan alang sa kabatan-onan sa Simbahan. Mahimo nimong hangyuon ang mga estudyante sa pagpakigbahin sa mga paagi nga napanalanginan sila pinaagi sa pagsunod sa mga sumbanan sa Simbahan.
Dapita ang usa ka estudyante sa pagbasa sa pamahayag ni Presidente Joseph Fielding Smith (1876–1972) diha sa seksyon 4.13 sa manwal sa estudyante. Dayon pagpamatuod kabahin niini ug sa ubang mga panalangin nga gisaad niadtong mosunod sa Unang Kapangulohan. Dapita ang mga estudyante sa pag-sustain ug pagsunod sa Unang Kapangulohan sa tibuok nilang kinabuhi.