Pasiuna

Si Elder Robert D. Hales sa Korum sa Napulog Duha ka mga Apostoles mideklarar:

Elder Robert D. Hales

“Ang buhing mga propeta nangulo niini nga simbahan karon. Sa labing dako nga kasiguroan sa mga miyembro sa Simbahan ni Jesukristo sa mga Santos sa Ulahing mga Adlaw naggikan sa pagkat-on nga maminaw ug mosunod sa mga pulong ug mga sugo nga gihatag sa Ginoo pinaagi sa buhing mga propeta. Manghinaut ko nga ang kalibutan makasabut sa kaimportante sa pagkaadunay usa ka buhi nga propeta dinhi sa yuta karon” (Robert D. Hales, “Hear the Prophet’s Voice and Obey,” Ensign, Mayo 1995, 17).

Isip magtutudlo niini nga kurso, ikaw adunay oportunidad sa pagtabang sa imong mga estudyante nga makaila sa panalangin nga magpuyo sa panahon nga adunay buhing mga propeta dinhi sa yuta. Makatabang ka aron mahibaloan nila nga ang Langitnong Amahan namulong karon sama sa Iyang gibuhat sa tanang dispensasyon. Kon ang buhing mga propeta mamulong sa awtorisado nga kapasidad ngadto sa mga miyembro sa Simbahan, ang ilang isulti mao ang “hunahuna sa Ginoo, … tingog sa Ginoo, ug ang gahum sa Dios ngadto sa kaluwasan” (D&P 68:4).

Pagmainampuon sa pagtuon sa mga kasulatan ug mga pakigpulong sa kinatibuk-ang komperensya. Tinguhaa ang Balaang Eespiritu samtang mopili ka og mga kalihokan sa pagkat-on nga makatabang sa mga estudyante nga molambo sa espirituhanong paagi. Tabangi ang mga estudyante sa pagdiskubre, pagsabut, ug pagsunod sa mga kamatuoran nga gipresentar diha sa mga komperensya sa Simbahan.

Kini nga manwal nagdugang sa imong pagpangandam pinaagi sa paghatag og pasiunang impormasyon sa mga kapitulo, pag-ila sa mga kasulatan ug mga baruganan sa ebanghelyo, ug pagsugyot og mga paagi nga makatabang ka sa mga estudyante nga makasabut sa doktrina ug mogamit niini diha sa ilang mga kinabuhi.

Giunsa Pag-organisar Kini nga Manwal

Ang Religion 333 gidesinyo nga itudlo sa usa ka semester. Kini nga manwal naglangkob og pito ka mga kapitulo:

1. Leksyon 1: Ang Atong Panginahanglan sa Buhing mga Propeta

2. Ang Buhi nga Propeta: Ang Presidente sa Simbahan

3. Pagpuli sa Kapangulohan

4. Ang Korum sa Unang Kapangulohan

5. Ang Korum sa Napulog Duha ka mga Apostoles

6. Kinatibuk-ang Komperensya

7. Pagtuon sa mga Pakigpulong sa Kinatibuk-ang Komperensya

Ang unang unom ka mga kapitulo naglakip sa sulod ug mga panabut nga imong magamit isip kapanguhaan samtang magtudlo ka sa mga doktrinal nga pundasyon alang niini nga klase. Isip magtutudlo makahimo ka sa pagtudlo niini nga mga leksyon sa unang unom ka mga class period sa semester o ipalugway kini sa tibuok semester. Ang kapitulo 7 naghatag og mga ideya kabahin sa daghang mga pamaagi sa pagtudlo sa mga pulong sa mga General Authority gikan sa pinakabag-o nga isyu sa komperensya sa Ensign o Liahona nga magasin. Ang nahabiling mga class period kinahanglang tudloan gikan sa isyu sa komperensya.

Ang mga leksyon niini nga manwal gidesinyo nga molungtad og 50 minutos. Kon ang inyong klase mag-abut kaduha sa matag semana, ang matag leksyon kinahanglang molungtad og mga 50 minutos. Kon mag-abut kamo kausa lang matag semana, ang matag leksyon kinahanglang molungtad og mga 90 minutos. Alang sa 90 minutos nga klase mahimo ka nga motudlo og usa sa mga leksyon gikan niini nga manwal ingon man sa materyal gikan sa Ensign o Liahona. Kinahanglan nimong ipahiangay ang course material ngadto sa indibidwal nga mga kahimtang sa pagtudlo. Atol sa usa ka tipikal nga semester, ang pagtudlo gikan sa Ensign o Liahona molangkob sa gibana-bana nga 75 porsyento sa panahon sa klase.

Ang matag kapitulo niini nga manwal adunay tulo ka mga seksyon:

• Pasiuna

• Pipila ka mga Doktrina ug mga Baruganan

• Mga Ideya sa Pagtudlo

Pasiuna

Ang “Pasiuna” nga seksyon nag-highlight sa kinatibuk-ang mga tema nga anaa sa kapitulo ug motabang kanimo nga makaangkon og dali nga panglantaw sa kinatibuk-ang hilisgutan.

Pipila ka mga Doktrina ug mga Baruganan

Ang seksyon nga gitawag og “Pipila ka mga Doktrina ug mga Baruganan” naglangkob og lista sa importanting mga doktrina ug mga baruganan nga may kalabutan niana nga hilisgutan sa leksyon. Agig dugang sa mga doktrina ug mga baruganan nga nahibaloan diha sa manwal, makakita ka og ubang importante nga mga kamatuoran diha sa mga kasulatan o sa mga isyu sa komperensya sa Ensign o Liahona nga sa imong hunahuna haum sa mga panginahanglan sa imong mga estudyante. Imo kining katungod isip magtutudlo. Bisan pa niana, mahimo nimong i-survey ang ubang kapitulo sa manwal sa dili pa motudlo og dugang nga mga baruganan. Kon ang usa ka baruganan o doktrina wala hisguti sa gisugyot nga materyal sa leksyon, tingali ipresentar kini sa laing kapitulo nga mas hingpit nga nagsuporta sa hilisgutan.

Mga Ideya sa Pagtudlo

Ang seksyon nga “Mga Ideya alang sa Pagtudlo” naghatag og piho nga ideya sa pagtudlo alang sa matag item nga giila ubos sa “Pipila ka mga Doktrina ug mga Baruganan.” Kini nga seksyon mahimong maglakip usab og mga sugyot sa pagtudlo alang sa mahinungdanon nga mga ideya nga wala ilista ubos sa “Pipila ka mga Doktrina ug mga Baruganan.” Kini nga “Mga Ideya alang sa Pagtudlo” makatabang kanimo sa pag-andam sa materyal sa leksyon ug mga kalihokan sa pagkat-on. Ipahiangay ang mga sugyot sa leksyon aron mohaum sa palibut sa klasrom, mga panginahanglan sa mga estudyante, ug mga limitasyon sa panahon.

Uban nga mga Tabang sa Pagtudlo

Komentaryo sa manwal sa estudyante. Ang Manwal sa Estudyante sa mga Pagtulun-an sa Buhing mga Propeta (Religion 333) naglangkob og mga bililhong komentaryo sa mga General Authority ug mga Kinatibuk-ang Opisyales sa Simbahan. Ang pipila ka mga ideya sa pagtudlo diha sa manwal sa magtutudlo mo-refer kanimo ngadto sa komentaryo nga makita sa manwal sa estudyante. Awhaga ang mga estudyante sa paggamit niini nga kapanguhaan sa sulod ug gawas sa klase. Dugang pa, ang matag kapitulo sa manwal sa estudyante motapos uban sa “Mga Punto nga Pamalandungan” ug “Gisugyot nga mga Assignment” nga seksyon. Ang mga pangutana ubos sa “Mga Punto nga Pamalandungan” ug ang mga kalihokan sa “Gisugyot nga mga Assignment” makatabang sa mga estudyante nga mas mainampingong mokonsiderar sa dugang nga mga basahunon. Daghan niini nga mga pangutana ug mga kalihokan mapahiangay usab ngadto sa mga ideya sa pagtudlo nga magamit sa klase.

Mga pulong sa buhing mga propeta, mga General Authority, ug mga Kinatibuk-ang Opisyales sa Simbahan. Samtang magtuon ka sa bag-ong mga pakigpulong nga gihatag sa kinatibuk-ang komperensya ug mga artikulo sa mga magasin sa Simbahan, pangita og mga materyal nga makadugang sa mga leksyon niini nga manwal.

Website sa Seminaries and Institutes of Religion. Ang Seminaries and Institutes of Religion adunay website usab, institute.lds.org, nga adunay daghang mga kapanguhaan nga makatabang kanimo.

Unsaon sa Paggamit Niini nga Manwal

Gamita og maayo ang mga pakigpulong sa Unang Kapangulohan ug Korum sa Napulog Duha ka mga Apostoles sa kinatibuk-ang komperensya aron madugangan kini nga manwal samtang mag-andam ka sa mga leksyon ug mopresentar og impormasyon diha sa klase. Ang mga mensahe sa mga sakop sa Unang Kapangulohan ug Korum sa Napulog Duha ka mga Apostoles nga makita sa mga magasin sa Simbahan, mga pakigpulong nga gihatag sa ubang mga okasyon, o opisyal nga mga komunikasyon nga ipadala sa mga Kaigsoonan matag karon ug unya mahimo usab nga ikonsiderar.

Ang manwal mahimong magamit sa pipila ka mga paagi, lakip sa mosunod:

1. Mahimo nimong sundon og maayo ang mga sugyot sa pagtudlo sumala sa gi-outline.

2. Mahimo nimong gamiton kini nga manwal isip giya sa pagtuon aron sa pag-ila sa mga baruganan ug mga tema nga gusto nimong ugmaron diha sa imong leksyon.

Hunahunaa kon Unsay Imong Itudlo

Pilia ang mga doktrina, mga baruganan, ug mga application nga importante kaayong mahibaloan ug buhaton sa imong mga estudyante. Kadaghanan sa imong itudlo maggikan niini nga manwal ug sa manwal sa estudyante; hinoon, siguroa nga ikonsiderar ang paggamit sa mga kasulatan aron sa pagdugang sa mga baruganan gikan sa mga manwal. Himoa nga ang mga pag-aghat sa Espiritu Santo ug ang mga panginahanglan sa imong mga estudyante mogiya kanimo samtang modesisyon ka kon unsay itudlo. (Alang sa dugang impormasyon kabahin sa unsa ang itudlo, tan-awa sa Gospel Teaching and Learning: A Handbook for Teachers and Leaders in Seminaries and Institutes of Religion [2012], nga seksyon 4.3.3.)

Dili ka obligado nga motudlo sa tanang gisugyot nga doktrina ug mga baruganan sa matag kapitulo, ug malagmit imong masayran nga ikaw walay panahon sa pagbuhat sa ingon. Si Elder Richard G. Scott (1928–2015) sa Korum sa Napulog Duha ka mga Apostoles mitambag:

Elder Richard G. Scott

“Hinumdumi, ang inyong labing taas nga prayoridad dili ang paghurot sa tanang materyal kon nagpasabut kini nga wala kini masabti pag-ayo. Buhata ang unsay mahimo nimong buhaton uban sa pagsabut” (Richard G. Scott, “To Understand and Live Truth” [pakigpulong ngadto sa mga CES religious educator, Peb. 4, 2005], 2).

Hunahunaa kon Unsaon Nimo sa Pagtudlo

Hinumdumi ang tahas sa estudyante samtang mopili ka og lain-laing mga pamaagi sa pagtudlo sa leksyon. Namulong ngadto sa mga religious educator, si Presidente J. Reuben Clark Jr. (1871–1961) namahayag, “Dili kinahanglang moliput kamo sa luyo niining sinati sa espiritwal nga batan-on ug mohunghong kaniya og relihiyon” (“The Charted Course of the Church in Education” [pakigpulong ngadto sa mga lider sa seminary and institute of religion, Ago. 8, 1938], 6). Makalaum ka sa mga estudyante nga hingkod sa espirituhanong paagi ug seryusohon ang ilang tahas isip mga tigkat-on. Sa pag-organisar sa imong leksyon, tabangi ang imong mga estudyante nga akuon ang responsibilidad sa ilang pagkat-on. Ang mosunod nga mga sugyot tingali makatabang:

• Awhaga ang mga estudyante sa pagbasa sa gi-assign nga mga seksyon sa manwal sa estudyante o mga pakigpulong sa kinatibuk-ang komperensya ug sa katukma nga mga kasulatan sa dili pa ang matag leksyon.

• Hatagi ang mga estudyante og oportunidad sa pagpangutana ug pagtubag sa mga pangutana. Ang maayo nga mga pangutana usa ka bililhong himan sa pagtabang sa mga estudyante nga akuon ang responsibilidad sa ilang pagkat-on. Mahimo ka nga modapit usahay sa mga estudyante nga motambong sa klase nga magdala og sinulat nga pangutana. Tabangi ang mga estudyante nga makakita nga ang ilang mga pangutana diha sa klase tingali mapamatud-an nga mas importante sa proseso sa pagkat-on kay sa mga gipangutana sa magtutudlo. Samtang magtuon sila sa mga pagtulun-an sa buhing mga propeta, awhaga ang mga estudyante sa pag-ila sa mga baruganan, pagpasabut sa mga kahulugan, pagpakigbahin og mga panabut, ug pagpamatuod sa mga kamatuoran nga ilang nakat-unan. Paghimo og kahimtang diin ang mga estudyante mobati sa Espiritu sa Ginoo ug adunay pribilehiyo ug responsibilidad sa pagpaminaw ug pagpamulong aron sa paglig-on sa usag usa (tan-awa sa D&P 88:122).

• Pangita og mga oportunidad sa paggamit sa mga importanting tudling sa kasulatan isip ikaduha ug ikatulo nga saksi sa mga baruganan nga imong gitudlo gikan sa kurikulum. Hatagi og panahon ang mga estudyante sa pag-ila sa mga bersikulo sa kasulatan nga nagdugang sa panabut o pagsaksi sa mga baruganan nga gitudlo.

• Likayan ang pag-lecture isip bugtong paagi sa pagtudlo. Hinoon, tuguti ang mga estudyante nga makadiskubre og mga kamatuoran pinaagi sa paggiya kanila ngadto sa mga kamatuoran nga nakaplagan nimo ug sa uban. Si Elder David A. Bednar sa Korum sa Napulog Duha ka mga Apostoles mitudlo nga ang mga epektibong magtutudlo motabang sa mga estudyante nga makaplagan ang mga tubag sa ilang kaugalingon:

  Elder David A. Bednar

  “Nakaobserbar ko og komon nga kinaiya sa mga magtutudlo kinsa dunay dakong impluwensya sa akong kinabuhi. Mitabang sila kanako sa pagpaningkamot nga makat-on pinaagi sa hugot nga pagtuo. Nagdumili sila sa paghatag kanako og sayon nga tubag sa mga pangutana nga lisud. Gani, wala gayud sila mohatag kanako og tubag. Hinoon, ilang gitudlo ang paagi ug mitabang kanako sa paghimo sa mga lakang aron makit-an ang kaugalingon nakong mga tubag. Sa tinuod lang wala kaayo ko ganahi niini nga pamaagi, apan ang kasinatian nakapahimo nako sa pagsabut nga ang tubag nga gihatag sa laing tawo sa kasagaran dili mahinumduman og dugay, kon mahinumduman man ugaling. Apan ang tubag nga atong nadiskubrihan o naangkon pinaagi sa paggamit sa hugot nga pagtuo, sa kasagaran, mahinumduman sa tibuok kinabuhi” (David A. Bednar, “Paningkamot sa Pagkat-on pinaagi sa Hugot nga Pagtuo,” Ensign, Sept. 2007, 23).

  Kay sa itudlo ang impormasyon pinaagi lamang sa pag-lecture, pangita og mga pamaagi sa pagtudlo nga makatabang sa mga estudyante nga makabaton og mas aktibong tahas sa proseso sa pagkat-on. (Alang sa dugang nga impormasyon kon unsaon sa pagtudlo, tan-awa sa Gospel Teaching and Learning: A Handbook for Teachers and Leaders in Seminaries and Institutes of Religion [2012], seksyon 4.3.4.)

• Dapita ang mga estudyante sa pagsunod sa tambag sa mga propeta. Tabangi sila nga mahimong mga disipulo ni Jesukristo ug dili lamang mga eskolar sa ebanghelyo. Si Elder David A. Bednar dugang nga mitambag kanato sa pagtabang sa mga estudyante nga mosangpot sa “mas labaw pa sa mental nga panabut ug sa paghinumdom sa impormasyon” aron sa pagtabang kanila nga “isalikway ang kinaiyanhon nga tawo (tan-awa sa Mosiah 3:19) sa pag -usab sa [ilang] mga kasingkasing (tan-awa sa Mosiah 5:2)” (“Paningkamot sa Pagkat-on pinaagi sa Hugot nga Pagtuo,”64).

Pagpahiangay sa Manwal ngadto Niadtong dunay mga Kakulian sa Panglawas

Kon magtudlo og mga estudyante nga dunay mga kakulian sa panglawas, ipahiangay ang mga leksyon aron matubag ang ilang mga panginahanglan. Sama pananglit, daghan sa mga leksyon nagkinahanglan sa mga estudyante sa pagbasa og kusog o hilom nga paagi ug sa pagsulat sa mga tubag diha sa papel. Aron mapahiangay ngadto sa mga estudyante nga dili makabasa, mahimo nimong ikonsiderar nga basahon nimo kini og kusog, ipabasa sa kaubang mga estudyante, o mogamit og girekord nang daan nga mga materyal nga nagsaysay sa mga kasulatan (sama sa usa ka audiotape, CD, o mp3). Kon ang mga leksyon magkinahanglan og sinulat nga mga tubag, mahimong moawhag ka nga isulti na lang ang mga tubag.

Alang sa dugang nga mga ideya ug mga kapanguhaan, adto sa disabilities.lds.org ug sa seksyon diha sa Seminaries and Institutes of Religion Policy Manual nga “Adapting Classes and Programs for Students with Disabilities [Pagpahiangay sa mga Klase ug mga Programa alang sa mga Estudyante nga adunay Kakulian sa Panglawas].”