Wase 10

Vakararavi vua na Kalou ena Yalomalumalumu

Na kaukauwa dina ena yaco mai ena noda vakararavi vua na Kalou ena yalomalumalumu.

Na Bula nei Wilford Woodruff

“Na ka veivakurabuitaki duadua ga ena noqu bula taucoko,” e kaya ko Peresitedi Wilford Woodruff, “sai koya na nona bau digitaki au ki na dua na ka na Kalou, vakauasivi meu dua na iapositolo ka vakakina meu Peresitedi. Ia o ya na nona bisinisi ga o Koya; e sega ni noqu”¹

E dina ni kurabui o Peresitedi Woodruff ena vuku ni veitavi e kacivi kina ena Lotu, ia e kila tu na vuna e kacivi koya kina na Turaga. E vakadikeva o koya: “Na cava na vuna e digitaka kina na Turaga e dua na tamata malumalumu me vakataki Wilford Woodruff me vakatulewataka na Nona Lotu? Na cava na vuna e digitaki Josefa Simici kina —e dua na gonetagane tawavuli, me vaka e dau kilai kina? Na cava na vuna e digitaka kina na mataqali tamata vaka o ya? Baleta ni rawa ni lewai ira. E digitaka na tamata ena dau vakadinadinataka tikoga na liga ni Kalou.”²

E dau vakadinadinataka tikoga o Peresitedi Woodruff na liga ni Kalou, ena nona rawa ka vakaikoya ga ka vakakina ena toso ni Lotu. Ena dua na itukutuku a solia ena Valecavu e Salt Lake, e kaya kina: “Au vakavinavinaka vua na Turaga ena noqu bula. Au vakavinavinaka Vua ena vuku ni Nona veivakalougatataki kei na Nona loloma vei au. E tiko na vuna meu rekitaka kina na veika oqo, ka sa noqu itavi meu vakalagilagia na Kalou ena vuku ni veika kece sara au ciqoma. Kevaka e dua na ka vinaka au sa cakava; kevaka e a rawa meu vunautaka na Kosipeli ka segata e dua na sala meu laveta cake kina e dua na kai noqu, ena noqu vanua se ena dua na vanua tani, e a rawa ga oqori ena kaukauwa ni Kalou. … Sa tu vata kei keda na kaukauwa oqo. Oqori na vuna eda tiko kina eke nikua. Oqori na vuna e tu kina eke nikua na Valecavu oqo, me vakayacori kina na nodra parofisai na parofita ni Kalou ena veigauna makawa. Oqori na vuna e mai tauyavu kina ena bucabuca ni veiulunivanua oqo na Saioni ni Kalou. Na veika kece oqori e rawa ena kaukauwa ni Kalou ka sega ena kaukauwa ni tamata.”³

iVakavuvuli nei Wilford Woodruff

Eda vakararavi vua na Kalou me baleta na veivakalougatataki kece sara vakayalo ka vakayago.

Au sa vakararavi ga vakatabakidua vua na Turaga. Sa dau vaka tu ga kina ena noqu bula, kei na noqu veilakoyaki kei na cakacaka, ena noqu vunautaka na kosipeli i Karisito vei ira na kai noqu.⁴

Sa dodonu me da kila ni sa uasivi cake sara na nona sala na Kalou mai na noda, ka vakakina na Nona ivakasala, e dina ni na gadrevi kina na solibula, era sa gaunisala vinaka ka taqomaki vinaka duadua me da muria ka cakacakataka. E udolu vei keda eda rawa ni vakadinadinataka na tikina oqo mai na veika eda sa sotava sara ga. … Sa dodonu talega vakakina me da vulica na dina cecere oqo, sa Nona Kalou na lagilagi kecega kei na rokovi ni kena tauyavutaki na Nona Lotu kei na Nona matanitu e vuravura. Ena sega ni rawa vua na tamata ena itabagauna oqo se ena dua tale na itabagauna ni vuravura me kaya ni nona. E sega tale ni dua na ka, ia na kaukauwa duadua ga ni Kalou e rawa kina ni kau mai na taucoko ni Kosipeli, tauyavutaka na Lotu, vakasoqoni ira vata na Nona tamata ki Saioni me vakayacori kina na ivakatakila kei na cakacaka sa vakacavari rawa.⁵

Ena vinaka me da nanuma tiko ni noda igu, na noda inuinui kei na noda kaukauwa sa koto ga e ligana na Kalou, ka sega vua na tamata. Sa dodoka mai na ligana na Turaga sara ga vakataki Koya me tauyavutaka na Nona Lotu, Nona matanitu, Nona cakacaka. … E sega ni dua na kaukauwa e tu vei keda. E a sega ni tu vei keda ena kena dusimaki ka tuberi na matanitu oqo, ia ena veivuke ga ni Kalou sa Cecere Sara.⁶

Na dina ni tu na noda tamata, ni tu na noda Saioni, ni tiko e dua na noda matanitu, ni tiko e dua na noda lotu kei na matabete ka semati ki lomalagi, ka tu kina na kaukauwa me yavalata na lomalagi, ka vakakina ni da kila ni veitaratara tiko vata kei keda na lomalagi, ka dusimaka tiko na toso ni cakacaka ni gauna oqo ka ra vakaitavi tiko kina na Yalododonu Edaidai, na dina ga oqori e dodonu me na vakasinaiti keda ena yalomalua vua na Turaga na noda Kalou, ka dodonu me na dau talevi lesu tiko vei keda e veigauna ena noda vakanananu kei na lomada me baleta na itavi eda sa vauci kina ki Vua ka vakakina vei keda vakataki keda, kei na noda vakararavi vua me baleta na veivakalougatataki kece sara vakayago ka vakayalo talega.⁷

Na noqu nanuma kei na rai ni a sega na tamata ni Kalou mai vei Tamada o Atama me yacova na gauna era sa qai kacivi kina me ra tara cake na Nona Matanitu ka tauyavutaka na Nona Saioni e vuravura, se me ra vunautaka na kosipeli ni veivutuni ki vei ira na luve ni tamata, ia era a vakararavi vakatabakidua ki vua na Kalou ni lomalagi ena veika me ra bula kina.⁸

Eda kila sara tu ga vakavinaka ni noda icavacava, na noda itutu, kei na noda veivakalougatataki sa koto ga e ligana.⁹

Au kaya kina ki na tamata kece sara—na Jiu kei na kai Matanitu Tani, cecere kei na lolovira, vutuniyau kei na dravudravua—ni sa tu vua na Turaga sa Cecere Sara na kaukauwa, ka sega ni vakararavi vua e dua na tamata, me tosoya kina na nona cakacaka; ia ena gauna ga e kaciva kina na tamata me ra cakava na nona cakacaka sa dodonu me ra vakabauti koya.¹⁰

Sa dau digitaki ira na yalomalumalumu na Kalou me ra cakava na Nona cakacaka.

Sa dau digitaka na Turaga na veika malumalumu ni vuravura oqo me cakava na Nona cakacaka. Ia, e a rawa vua me vakavulici au, se dua vei ira na wekaqu, me vaka ena veitabagauna kecega ni vuravura. Sa dau digitaka o koya na veika malumalumu ena veigauna. Tauri Mosese mada ena nona liutaki ira na kawa i Isireli. E kaya o Mosese ni sega ni kila na vosa, ka nanuma ni sega ni rawa ni cakava e dua na ka. Ia e kaya vua na Turaga ni na vakatubura vua e dua na gusu ni vosa. Ni vinakata na Turaga e dua na tui kei Isireli, e a digitaki Tevita, na luvei Jese, o koya ka dau vakatawani ira na sipi. Era a kau kece mai vua na Parofita na luvei Jese, ka vakavo ga ko Tevita; ia e a sega ni via lumuta [e dua] vei ira ko Samuela. E a tarogi Jese se tiko tale e dua na luvena. E kaya ko Jese, Io; e tiko tale e dua na tamata lailai ka dau vakatawani ira na sipi. E vinakata na Parofita me raici koya. Ni sa lako mai, sa lumuti koya ko Samuela me tui Isireli. Sa vakakina ena nodra gauna na iApositolo. O cei o ira? O ira na gonedau [Sega ni vuli]. Sa vakakina nikua. Tekivu mai vei Josefa Simici ka raici keimami kece. O cei o keimami? Keimami baca ni qele dravudravua. Ia sa digitaki keimami na Turaga me baleta ni kila o Koya ni rawa ni cakava e dua na ka vata kei keimami. Au nuitaka ni na rawa.

Au vakabauta niu sa taura voli mai na itutu vaka-iApositolo, vakabalavu duadua mai vei ira kece na tamata e vuravura ena iotioti ni gauna oqo. Au tukutukuni au beka eke seu marautaka ka vakacerecerei me baleta ni sa balavu sara na noqu taura tu mai na Matabete? Kevaka au vakayacora vakakina, au sa tamata lialia sara. Sa noda itavi me da vakarokorokotaka na Kalou, sa noda itavi me da vakadinadinataka na liga ni Kalou. Sa dau segata na tevoro me vakarusai au me tekivu mai na gauna au sucu kina me yacova mai na siga oqo. Ia sa dau tikoga na Turaga ena yasaqu imatau ka sa vakabulai au. E rua na kaukauwa erau cakacaka tiko—e dua me vakarusai au, na kena ikarua me vakabulai au. Kau sa tu oqo nikua, e dua na iyaya ni cakacaka malumalumu ena liga ni Kalou. Ia, me vaka ni bula na Kalou, kevaka ena tukuna vei au na noqu itavi, au na cakava!

… Au masuta na Kalou me solia vei keda na yalomatua, ka me vukei keda me da yalomalumalumu, yalodina, yalomalua ka yalo raramusumusu.¹¹

Sa vakavica vata na noqu rogoca ena noqu dau veilakoyaki na nodra kaya na tamata—na cava e digitaki Josefa Simici kina na Kalou, na cava e digitaka kina na cauravou lailai o ya me dolava na itabagauna oqo ka vakotora na yavu ni Lotu? na cava e sega ni digitaka kina eso na tamata cecere … ? E dua ga na isau ni taro oqo au raica rawa ena noqu bula taucoko, o ya, ni na sega ni cakava rawa e dua na ka vata kei ira na Turaga sa Cecere Sara, ena sega ni rawa ni vakayalomalumalumutaki ira. Era sega ni mataqali tamata me ra a sa bau digitaki ena mataqali cakacaka vakaoqo ena dua na itabagauna ni vuravura. Sa dau digitaka na Turaga sa Cecere Sara na veika malumalumu ni vuravura oqo. E rawa ni lewai ira. O koya sa digitaki Josefa Simici kina ni malumalumu, ka sa kidava e vuqa na ka me kila kina.¹²

Ni ra sa qaciqacia na tamata, era sa lutu.

E se bera vakadua ni ko raica e dua na siga, o na sega ni na raica rawa e dua na siga, ena gauna oqo se ena tawamudu, mo na sega ni gadreva kina na veitaqomaki kei na veikauwaitaki ni Kalou. O na gadreva tiko ena gauna taucoko ni nomu bula. Ena gauna era yacova mai kina o ira na noda cauravou, se o ira na noda qase, se o ira na noda goneyalewa, e dua na vanua era sa nanuma kina ni ra sa tu vakataki ira ga mai vua na Turaga, era na raica ni ra sa cala sara vakalevu.¹³

Kevaka e nanuma e yalona o koya na Peresitedi ni Lotu se dua vei rau na nona daunivakasala se dua ga na tamata ni na sega ni rawa ni toso na Kalou kevaka e sega o koya, ka ni sa bibi sara o koya ena kena tosoi na cakacaka ni Turaga, sa na tu kina ena dua na vanua titidara sara. Au a rogoca ni tukuna o Josefa Simici ni a tukuna vua o Oliver Cowdery, o koya na ikarua ni iapositolo ni Lotu oqo, “Kevaka au biuta na Lotu oqo ena kasura.”

E a qai kaya vakaoqo o Josefa, “Oliver, tovolea mada.” E a tovolea ko Oliver. E a kasura o koya; ia e a sega ni kasura na matanitu ni Kalou. Au veikilai kei ira eso na iapositolo ena noqu gauna ka ra nanuma ni na sega ni rawa ni toso na Turaga kevaka era sega o ira; ia e a toso ga na Nona cakacaka na Turaga ka ra sega o ira.¹⁴

Au a raici Oliver Cowdery ni vaka me dau sakure kina na vuravura e rukuruku ni yavana. Au sega ni se bau rogoca e dua na tamata me wasea e dua na ivakadinadina kaukauwa cake mai vei koya ena gauna e tiko kina vua na veivakauqeti ni Yalo Tabu. Ia ena gauna e biuta kina na matanitu ni Kalou, ena gauna vata oqori e a kasura kina na nona kaukauwa. … E a kau tani mai vua na nona kaukauwa, me vakataki Samisoni e sagai Dilaila. E kau tani mai vua na kaukauwa kei na ivakadinadina a dau rekitaka voli, ka sega ni qai rawata tale vakadua na kena taucoko ena bula oqo, e dina ni a qai mate ni sa [lewena tale tu] na Lotu.¹⁵

E dua na ikatolu ni lewei lomalagi era a vakasavi tani ena vuku ni nodra veisaqasaqa. … Era sa tu ena veikoro kei na veitikotiko era tu kina na lewei vuravura, ka vakabibi ena vanua era tiko kina na Yalododonu Edaidai. … O nanuma beka ni ra tu wavoliti keda na tevoro oqo ka sega ni tovolea tiko me ra cakava e dua na ka? Era moce tu beka? E sega beka ni dua na cakacaka me ra cakava? Au kaya vei ira na noqu itokani Matabete, e dua na ivalu kaukauwa eda cakava tiko vata kei ira na yalo oqo. Eda sega ni rawa ni drotaka. Na cava era na cakava vei iko? Era na tovolea me da cakava na veika kecega e sega ni dodonu. Era na marautaka sara na tevoro oqo me ra vakavurea vei au kei ira na wekaqu na vakasama ni keimami tamata cecere, keimami vuku cake mai vei ira na tamata kecega; me ra vakavuna na duidui ena keimami maliwa, ka ra na vakavuna me keimami vakatusa na nodra ivalavala ca na wekai keimami ka segai na neimami. O koya sa dodonu kina me da qarauni keda vakavinaka. E dodonu meu vakayacora oqo; me rau vakayacora talega vakakina na noqu daunivakasala kei ira na iApositolo; e dodonu me da vakayacora kece sara vakakina. … Ia kevaka sa dolavi na matada me da kila na veika ni Kalou, sa rawa ni da kila kina na noda itavi; sa rawa ni da kila na kaukauwa ni Matabete Tabu kei na noda veiwekani kei na Kalou. Sa dodonu kina me da vakamalumalumutaki keda vua na Turaga.¹⁶

Mo ni yalomalumalumu, mo ni vakatawa, mo ni dau masu. Qarauna na qaciqacia, de o ni na kasura me vakataki ira na kena vo.¹⁷

Ni da vakararavi vua na Turaga ena yalomalumalumu, ena maroroi keda ka vakaukauwataki keda.

E rua na ivakarau ni bula cecere … solia vua e dua na tamata na kaukauwa kei na lomalagi—na dokai kei na savasava ni bula. Me tu vua e dua na tamata na veika oqo, me dina na yalona ka sega ni rawai vakarawarawa, me savasava na nona bula, ka, kevaka eda vakuria yani kina na yalomalumalumu, sa na taqomaki ena veimalumalumu e vuqa ka rawa ni vorata e vuqa na veitemaki. E dui tu kece na noda malumalumu; e vakatara na Turaga me rawa ni vakavulici kina vei keda na yalomalumalumu ka da qai yalololoma vei ira na tani.

E sega ni dua vei keda e sa taucoko tu na nona bula ena bula vakayago oqo; ia na tamata sa vakararavi vua na Kalou ena yalomalumalumu ena sega ni guce ena tutaka na veika e dodonu, ena sega ni yavalati ena nona tokona na dina, ka na maroroya matua na nona veiyalayalati, e dua eda na dau taleitaka, ka segata, ena veivuke vakalomalagi me da vakamurimuria.¹⁸

Au gadreva meu tukuna vei ira na Yalododonu Edaidai, na ka ga me da cakava me da yalodina, me da muria na Nona ivakaro, me da yalomalumalumu, me da vakasaqarai Koya ena masu vagumatua, eda na vinaka kina.¹⁹

Na Kalou sa tiko vata kei ira na tamata oqo. Ia e gadrevi me da vakarorogo ki na Domona, muria na Nona ivakaro, ka vakamalumalumutaki keda ki Vua. … Sa tiko na sautu vei ira na Momani— me vaka eda kilai kina— oqori e ka veivakurabuitaki ka veivakasakiti e vuravura. … Na vu ni noda sautu sai koya ni—noda itokani na Kalou, na noda vunilawa, na noda dauveisereki. Kevaka e sega ni rawa ni tutaka na Nona cakacaka na Turaga, eda na sega talega ni rawata. Ia e rawata o Koya. Sa dau vakayacora tiko vakakina, ka na vakayacora tiko vakakina ki na ivakataotioti. O koya au sa kaya kina vei ira na Yalododonu, ni kakua ni rere. Nuitaka na Kalou. Dou kakua ni yalolailai. Me rogoca na Turaga ni Siga ni Vakacecegu ena veisiga kei na veibogi na nomudou masu. Kerea na ka ko vinakata. Ni o vakayacora oqori, ena sauma na Turaga na nomu masu, kevaka e dodonu na ka o kerea. Oqori na vanua e koto kina na noda kaukauwa. Sa tiko Vua na Kalou.²⁰

Vakatutu ni Vuli kei na Veivakavulici

Taurivaka na veivakasama oqo ni ko ni vulica na kena iwase oqo se ni ko ni vakavakarau mo ni veivakavulici. Raica na tabana e vi–x, me ikuri ni veivuke,

Na cava na vuna e bibi kina me da vakadinadinataka na noda vakararavi vua na Kalou? (Raica na tabana e 113–14.) Na sala cava ena vakauqeta kina na noda raica na bula na ivakadinadina oqo?
O cei e tukuna tiko o Peresitedi Woodruff ni ra “ka malumalumu ni vuravura ”? (Raica na tabana e 114–15; raica talega na 1 Korinica 1:25–28.) Na cava na vuna e digitaki ira kina na tamata vakaoqo na Turaga me ra cakava na Nona cakacaka? Na gauna cava o ni sa bau raica kina na Turaga me cakacaka mai na “veika malumalumu ni vuravura ”?
Wilika taucoko na ikatolu ni parakaravu ena tabana e 116, ka vakasamataka se veivosakitaka se na vakacava na bula kevaka e sega na nona veitaqomaki kei na nona veikauwaitaki na Kalou. Na cava e vakavulica vei kemuni oqo me baleta na qaciqacia? Na cava eso na isau ni qaciqacia?
Na cava e rawa ni da vulica mai na italanoa me baleti Oliver Cowdery ena tabana e 116–17?
Wilika taucoko na ikarua ni parakaravu ena tabana e 117. Na cava na vuna e vinakata kina o Setani kei ira na nona ilawalawa me da “nanuma ni da cecere ka vuku cake mai vei ira na kena vo ”? Na cava na vuna era vinakata kina me da “vakatusa na nona ivalavala ca na wekada ka segai na noda ”? Eda na vorata rawa vakacava na veitemaki oqo?
Raica lesu na iotioti ni va na parakaravu ni iwase, ka vola toka na vosa se na malanivosa e vakaibalebale vei kemuni (tabana 117–18). Na veivakalougatataki cava eda ciqoma ni da vakararavi vua na Turaga?

iVolanikalou Veisemati: Vosa Vakaibalebale 3:5–7; Luke 18:9–14; Jekope 2:13–21; Alama 36:3; Ilamani 3:35; V&V 112:10; 121:34–40

President Wilford Woodruff — E kaya o Peresitedi Wilford Woodruff: “Sa noqu itavi meu vakalagilagia na Kalou ena vuku ni veika kece sara au rawata. Kevaka e dua na ka vinaka au sa cakava. …, e a rawa ga oqori ena kaukauwa ni Kalou.”