Wase 4

Na Kaukauwa kei na Lewa ni Matabete Tabu

Na Kalou sa vakatikora na matabete vei ira na Nona tamata me ra kalougata ka bula vakalou kina.

Na Bula nei Wilford Woodruff

Ni se cauravou lailai, e dau gadreva tu o Wilford Woodruff me kunea e dua na lotu e tiko kina na lewa ni matabete dina—kei na kena “kaukauwa e kilai mai lomalagi kei vuravura.”¹ Ena dua na nona vosa ena 1889, e a kaya kina:

“Au dau lewena na Matawilivola ni Sigatabu ena gauna au a tubucake mai kina. … Ena matawilivola ni Sigatabu oqori au a wilika kina na Veiyalayalati Vou. Au a vulica na veitikina yadua kei na veiwase yadua. Na cava e a vakavulica vei au na Veiyalayalati? E a vakavulica vei au na Kosipeli ni bula kei na veivakabulai; e vakavulica vei au na Kosipeli ni kaukauwa e kilai mai lomalagi kei vuravura. E vakavulica vei au ni ituvatuva ni Lotu e okati kina o ira na Parofita, iApositolo, Dauvunau kei ira na iVakavuvuli, vata kei na kena veivukei kei na veiqaravi. Kena inaki? ‘Me ra vakavinakataki kina ko ira sa lotu, me ia na cakacaka ni italatala, me ra vakatataki cake na ivavakoso nei Karisito, me da yaco sara koi keda kecega me da lomavata ena vakabauta ka kila sara na Luve ni Kalou, me da tautauvata kei na ivakarau ni tamata dina, era sa sinai sara kei Karisito.’ [Raica 1 Korinica 12:28; Efeso 4:11–13.]

“Oqo na veika au a vulica, ka vakayavalati au sara. Au a vakabauta sara; ia au a sega ni rogoca me vakavulica e dua mada ga na italatala se dua na iliuliu vakalotu e vuravura. Niu sa uabula tiko mai au a dau voleka ni tiko ena nodra veisoqoni taucoko na veimatalotu kece sara. Ena dua na gauna au a laki vakarorogo ki na dua vei ira na soqoni levu vaka o ya ka dau vakayacori ena so na gauna e Connecticut, ka ra dau soqoni vata mai kina e vasagavulu se limasagavulu na italatala mai na veimatalotu. Era a masulaka na sovaraki mai ni Yalotabu ni penitiko kei na vuqa tale na veika vivinaka. Ena soqoni oqo e dau soli kina na galala vua ga e dua me vakaraitaka e dua na ka. Au a se cauravou gone sara. Au a tucake ka kalawa yani ki na maliwa ni idabedabe e loma, kau a kaya vei ira na ilawalawa italatala o ya: ‘Kemudou na wekaqu, e rawa beka ni dou tukuna vei au na vuna o dou sega kina ni maroroya na vakabauta a soli e liu vei ira na Yalododonu? E rawa beka ni dou tukuna vei au na vuna dou sega kina ni maroroya na Kosipeli e vakavulica o Jisu Karisito, kei na veika era vakavulica na Nona iApositolo? Na cava dou sega kina ni maroroya na lotu e solia vei kemudou na kaukauwa sa mai vua na Kalou, na kaukauwa ni vakabulai ira na tauvimate, me ra rai na mataboko, me ra lako na lokiloki, kei na kena soli vei kemudou na Yalo Tabu kei na isolisoli kei na loloma vakalou ka a vakatakilai tu mai na gauna a buli kina o vuravura? Na cava na vuna o ni sega ni vakavulica kina vei ira na tamata na ivakavuvuli era a vakavulica tiko na Peteriaki kei na Parofita taumada ena gauna era a vakasinaiti tu kina ena ivakatakila ni Kalou? E a tu vei ira na vuku ni agilosi; era dautadra ka raivotu, kei na ivakatakila ena veigauna me dusimaki ka tuberi ira ena salatu e dodonu me ra na lako kina.

“A qai kaya mai na italatala qase ka vakatulewa tiko: ‘Noqu cauravou lomani, ko na yaco mo dua na tamata vuku sara, ka yaga vakalevu e vuravura, kevaka o na sega ni vakabauta na veika lialia kece oqori. E a soli na veika oqori vei ira na luve ni tamata ena gauna butobuto sara kei vuravura, ka a soli me baleta walega na nodra vakararamataki na luve ni tamata ena itabagauna o ya, me rawa kina ni ra vakabauti Jisu Karisito. Nikua eda sa bula tiko ena iserau ni rarama ni kosipeli lagilagi, ka da sa sega ni gadreva na veika oqori.’ Au a qai kaya: ‘Ia mo solia vei au na gauna butobuto kei vuravura; solia mai vei au na veitabagauna oqori era a ciqoma kina na tamata na ivakavuvuli vakaoqori.’ ”²

Ena ika 29 ni Tiseba, 1833 e a qai mai rogoca kina o Wilford Woodruff na kosipeli mai vei ira na italai digitaki ni Kalou. A vakananuma lesu: “Sa qai bau vakadua ena noqu bula meu raica kina e dua na iTalatala Qase ni Lotu i Jisu Karisito ni Yalododonu Edaidai. O ya o Zera Pulsipher. E a kaya vei au o koya ni sa vakauqeti koya na Turaga. E a samu sila tiko ena nona volau ni iteitei ena gauna a voqa kina vua na domo ni Turaga ka tukuna vua me tu yani ka lako ki na vualiku, na Turaga sa vakarautaka tu mai kea e dua na nona ilesilesi. A laki kacivi Baraca [Ilaija] Cheney e dua eratou toka veitikivi ka lewe ni Lotu. Erau a taubaletaka e onosagavulu na maile … ena sala uca cevata vavaku, ka rau a vakauqeti me rau tukituki taumada ki na neirau vale kei tuakaqu. Erau a curu yani ki vale ka rau veivosaki sara kei noqu daku, ka vakatakilaitaki rau vua kei na nodrau cakacaka. Erau a kaya vua ni rau a vakauqeti me rau gole ki na vualiku, ka rau sega ni vakauqeti me rau tukituki ena dua tale na vanua me yacova ni rau sa yaco mai ena vale o ya. Ena gauna erau sa tukuna kina na nodrau ivakavuvuli, a kaya o noqu daku ni o watina kei tavalequ erau vakabauta na ivakavuvuli o ya, ka rau sa dau masulaka tu mai ena vica na yabaki. Erau a qai lokuca e dua na veivosaki me na vakayacori ena valenivuli ka tikoga ena neitou lomanibai.

“Au a yaco mai vale ena kena yakavi, ka tukuna sara vei au o noqu daku na veivosaki oqo. Au a dreti ira tiko mai na kau mai na bati ni drano o Ontario (au vakabisinisi ni musu kau), kau a sereki ira na ose me ra vakani, au a sega mada ga ni tu meu kana, ka lako yani ki na veivosaki. Au a raica yani ni sa sinai tu na vale kei na tautuba ena tamata. Au a rogoca kina ena imatai ni gauna ni noqu bula na vunautaki ni Kosipeli me vaka erau a vakavulica na iTalatala Qase ni Lotu. Sai koya o ya na veika au a vakasaqara tu mai na gauna au a se cauravou lailai kina. Au a qai sureti rau na tagane oqo ki na noqu vale. Au a kerea na iVola i Momani, ka wilika ena bogi taucoko o ya. Ena mataka ka tarava au a kaya vei Baraca Pulsipher niu sa vinakata meu papitaiso. Sa tiko na noqu ivakadinadina vakaiau ni sa ka dina na veivakavuvuli oqori. Keirau a qai lako yani vakaveitacini ka papitaisotaki— sai keirau na kena isevu ena vanua o ya.”³

E a qai papitaisotaki Wilford Woodruff o Elder Pulsipher ena dua na uciwai ena ika 31 ni Tiseba, 1833, ka vakadeitaki koya ena siga vata tikoga o ya. Ni oti e tolu na siga e a ciqoma o Wilford Woodruff na Matabete i Eroni ka a tabaki ki na ilesilesi ni ivakavuvuli. Sai koya sara ga oqori na kena tauyavu e dua na cakacaka levu ena veiqaravi ni Turaga. Ni raica lesu na siga o ya, e kaya kina, “Sa tekivu sara ga e kea na noqu ilesilesi.”⁴

iVakavuvuli nei Wilford Woodruff

Na Kalou e vakayacora na Nona cakacaka taucoko ena kaukauwa ni matabete.

Au sega ni kila e dua tale na yavu ena Lotu ka bibi cake mai na Matabete Tabu vei ira na lewe i vuravura ka vakakina vei keda.⁵

Mai na kaukauwa [ni] Matabete sa tuvanaka kina na Kalou, na Tamada Tawamudu, na veivuravura taucoko, ka vakabulai ira na veivuravura taucoko ka ra sa bau vakabulai. Ena Matabete vata ga oqori era sa veiqaravi tu kina na tamata e vuravura ena cakacaka tabu ni Kosipeli i Karisito.⁶

Na Matabete Tabu sai koya na salatu ena veitaratara kina na Kalou vei ira na tamata e vuravura; kei ira na italai vakalomalagi ka ra a sikova mai na vuravura ka veitaratara kei ira na tamata era lewena ka rokova na matabete ni ra se bula tiko; kei na veika kece sara sa vakatara na Kalou me yaco me ra vakabulai kina na tamata, mai na gauna era a tadu mai kina na tamata ki vuravura ki na gauna me vakabulai kina ko vuravura, e a vakayacori ka na vaka tu kina ena dodonu ni matabete tawamudu.⁷

E a sega ni bau dua na lotu ni Turaga e vuravura, mai na gauna e a tauyavutaki kina me yacova mai na siga nikua, vakavo ga ni a tauyavutaki na lotu o ya ena ivakatakila, ena parofita kei na iapositolo, dauvunau, ivakavuvuli, ira na lewena kei na veiqaravi era sa vakalougatataki ena Matabete Tabu—na kaukauwa ka solia mai na Kalou vei ira na tamata, ka vakadonui ira me ra matataka na Kalou; ni sega na Matabete oqo e sega ni dua na tamata, mai na siga a buli kina o vuravura, e tu vua na dodonu me veiqaravi ena dua ga na cakacaka tabu ni nona valetabu, se me dua na tamata e tiko vua na dodonu ki na Matabete o ya vakavo ga ena veikacivi ni Kalou me vakataki Eroni o koya, ni sa tukuni vei keda, e a kacivi ena ivakatakila [raica Iperiu 5:4]. Na cava na inaki ni Matabete oqo? Sai koya na kena qaravi na cakacaka tabu ni Kosipeli, o ya na Kosipeli ni Tamada mai Lomalagi, na Kalou tawamudu, o Iloimi na nodra Kalou na Jiu kei na nodra Kalou na kai Veimatanitu Tani.⁸

E sega ni dua na lewa ni Kalou e soli vua e dua na tamata me qaravi ira na luve ni tamata ena cakacaka tabu ni bula kei na veivakabulai [vakavo ga] ena kaukauwa ni Matabete Tabu. Na kaukauwa ni Matabete ka sa tiko vei ira na Yalododonu Edaidai.⁹

E dodonu me ra vakayagataka o ira na lewe ni Matabete na matabete ena veiqaravi kei na taraicake ni matanitu ni Kalou, ka sega ni nodra tarai ira cake.

Sa dua na ilesilesi cecere oqo ni kena tauri na Matabete vakalomalagi, tawamudu, ka tawayalani oqo! Eda na qai saumi taro kina. O ira na iApositolo, Vitusagavulu, Bete Levu, iTalatala Qase, kei na tagane taucoko era vakailesilesi ena Matabete oqo ka sa soli mai vei keda, eda na vola itukutuku kina.¹⁰

Sa vakataqari tu e vatuvatu ni tabada e dua na cakacaka. E a vakataqari vei Josefa Simici, vei Brigham Young, o iratou na iApositolo Le Tinikarua, kivei keda kece sara, ka da na cudruvi kevaka eda sega ni vakacavara. Eda na qai laki kila ni da sa lako yani ki na vuravura ka dua. … Ena vuqa na gauna au dau diva tu meu kila vakavinaka sara na noqu ilesilesi vua na Kalou, kei na nodra ilesilesi na tamata yadua era lewena na matabete ena itabagauna oqo. Ia meu tukuna vei kemuni, na taciqu, au vakabauta ni da sa rui domona na veika ni vuravura oqo. Eda sega ni taleitaka me da vakayacora vakaoqo oi keda eda lewena na Matabete Tabu ena itabagauna oqo, sa ka levu na noda itavi vua na Kalou kei na lomalagi e cake, ka vakakina ki na vuravura. Au vakabauta ni da sa yawa sara tikoga mai vua na Turaga.¹¹

Kevaka eda …, vakayagataka na matabete oqori oi keda eda lewena tiko na Matabete Tabu ena dua tale na inaki e ruku i lomalagi ka sega ena taraicake ni Matanitu ni Kalou, kevaka ena vakakina na noda kaukauwa taucoko ena rusa ga. … E vuqa sara na tamata vivinaka era a tovolea me ra cakava na ka oqo—o ira na vakaitutu cecere ena matabete, o ira talega na cakacaka vakai- Apositolo—me ra vakalevulevui ira ena kaukauwa ni matabete. Ia sa evei beka era sa gole kina? Sa rawa mo ni kaya ni sa oti e kea na nona kaukauwa kei na lewa. … Me da vakasamataka mada na veika oqo. Au sa vunauci au vakakina. Au sa vunauci ira talega na iApositolo, Vitusagavulu kei ira na Bete Levu. E sega ni dodonu mo vakayagataka na matabete ena dua tale na inaki ena ruku i lomalagi ia ena kena taraicake ga ni matanitu ka vakayacora na lewa ni Kalou; ia ena gauna mo saga mo vakatanitaka kina ena kau tani mai vei iko na nomu kaukauwa.¹²

Au a sa dau wilika ena noqu taleitaka na ivakatakila a soli vei Josefa Simici ena isau ni nona masu mai na valeniveivesu e Liberty [raica V&V 121:34–36]. Au dau vakananuma na ivakatakila ni Kalou vua na tamata o ya, vakasamataka ni vica walega na kena yatuvosa, ka umanaki tu kina e levu sara na ivakavuvuli me vaka na ivakatakila e dau solia na Kalou vei ira na tamata. E a solia vei Josefa me kila vakavinaka ni sa taura tu na matabete, sai koya na matabete sa mai vua na Kalou, sa mai vei Melikiseteki, na matabete vata ga a vakayacora kina na Kalou na nona cakacaka kece sara e lomalagi kei vuravura kei koya ena tiko vua na matabete o ya sa tu talega vua na kaukauwa. Na matabete o ya e veiwekani kei lomalagi, na kaukauwa me tosoya kina na lomalagi, na kaukauwa me vakayacora kina na cakacaka ni lomalagi, kei na gauna ga e gumatuataka kina e dua na veikacivi o ya, na Kalou ena vakaroti ira na nona agilosi ena itavi ena vukuna kei na nona veiqaravi ena kaukauwa kei na igu ena vuravura oqo kei na vuravura e se bera mai; ia laiva vua na tamata o ya me vakayagataka na matabete ena dua tani tale na inaki ka sega ena kena taraicake na matanitu ni Kalou, ena inaki a soli kina, sa na tasogo ko lomalagi, sa lako tani na kaukauwa ni matabete, ka na biu mai me lako ena butobuto ka segai ena rarama, ka sai koya oqori na idola ki na vukitani ni tamata kece ena itabagauna oqo se ena dua tale.¹³

Sa soli tu vei keda na matabete, kevaka eda na sega ni vakayagataka ena sala dodonu, eda na vakarusai. O koya gona, me da qaqaco sara ena noda ilesilesi ka vakayacora na cakacaka ni matanitu. Me da cakacaka me da rawata na Yalo Tabu—kei na kaukauwa ni kosipeli i Jisu Karisito—ka sa soli tu oqo ki na ligada, kei na noda gumatuataka na cakacaka oqo, ena umanaka na noda sasaga na veivakalougatataki ni Kalou.¹⁴

Ena tokona na Turaga e dua na tamata ka taura tu e dua na ilesilesi ni Matabete, se e Bete, e dua na iTalatala Qase, Vitusagavulu, se dua na iApositolo, kevaka e gumatuataka na nona veikacivi ka cakava na nona cakacaka.¹⁵

Ena dua na gauna au a taleitaka na noqu raica eso na Dikoni era a gumatuataka sara tiko na nodra ilesilesi. … Era lako yani ki na [nodra] siti ka kolata na nodra buka na yada taucoko e kea. O Baraca [George] Teasdale, na Peresitedi ni iTeki e a tiko vua e tolu se va beka na ivesu buka sitari, ena gauna a lesu yani kina ki vale ena dua na bogi ka raica ni ra sa yali. A vakasamataka se cava mada na ka sa yaco; ia ena gauna a wavoki yani kina a qai raica ni ra sa kola vinaka tu ena nona vale ni buka. Era a gumatuataka sara tikoga e kea na nodra ilesilesi.

Vei keda nikua, ena so na sala, eda sa dua tani mai. E dodonu me da vakabauta tiko na Turaga ka cakava ga na ka sa dodonu. Au kila ni Matabete e soli me ra vakabulai kina na tamata kei na qaravi ni cakacaka tabu me baleti ira na bula kei ira na mate. E udolu vakaudolu era sa vakabulai ena vuravura ni yalo mai vei ira na nodra kawa era bula tiko e vuravura ka taura tu na idola ni nodra vakabulai na nodra mate. Era sa vakatuburi cake me ra ivakabula ena Ulunivanua o Saioni, ka sa nona na Turaga na matanitu, me vaka e a kaya o Opetaia na Parofita ni ra na vakakina [raica Opetaia 1:21]. Sa ira oqo era sa cakava tiko na cakacaka nikua. Mo ni marau ni sa tiko vata kei kemuni vata kei ira na nomuni kawa ena vuravura ni yalo na Turaga. Me da yalodina tiko, ia ni da se tiko eke. Sa lesi keda na Kalou me da lewena na Matabete oqo. Mai na … milioni na lewe i vuravura sa digitaka na Turaga e dua na ilawalawa tagane me ra lewena; me ra veitabaki, tuvatuva, vakasalataki vuravura, ka vunautaka vei ira na Kosipeli. Au sa nuitaki kemuni na taciqu ko ni lewena tu na Matabete oqo mo ni nanuma sara tiko na kena bibi …

… Me da dina ka yalododonu tiko. Me kakua ni cawadru tani mai vei keda na Matabete, se na matanitu ni Kalou. Me da masu vuni vua na Turaga ka kaciva na yacana Tabu. E kea sara ga e tiko kina na noda kaukauwa.¹⁶

Kevaka eda dina tu ena noda veiyalayalati kei na ilesilesi, eda na ciqoma na veivakalougatataki ni matabete ena bula oqo kei na bula sa roro tiko mai.

Ena gauna e dau vakatikora kina na isolisoli na Turaga vei ira na luve ni tamata era semati ki na Matabete, o ira era taura na isolisoli oqo era na tarogi me baleta na kena ivakayagataki.¹⁷

Ena gauna e veiliutaki kina e dua na iapositolo se peresitedi, bisopi se dua tale na tamata e lewena na matabete, ena veiqaravi tiko o koya ena lewa ni Turaga o Jisu Karisito; ena qai mana kina na matabete o ya, kei na veivakalougatataki taucoko e vakatikora e dua na italai ni Kalou vei ira na luve ni tamata, ena yaco kece ena bula oqo kei na kena sa roro tiko mai. Kevaka e dua na veivakalougatataki e solia vei au na matabete tabu, se au ciqoma e dua na veivakalougatataki mai vua na peteriaki, na isolisoli kei na veivakalougatataki oqori ena laki mana talega ena vuravura ka dua; kevaka au na dina tiko ki na noqu veiyalayalati ena noqu bula oqo, sa rawa meu na taura na veivakalougatataki yadua ka a vakatikori vei au, me baleta na lewa o ya ka a veivakatikori kina sa lesi mai vua na Kalou, ka sai koya era a veiqaravi kina na luvena tagane o koya sa Cecere Sara vei ira na luve ni tamata na cakacaka tabu ni bula kei na veivakabulai, kei na cakacaka vakailesilesi oqori ena laki mana vei ira era sa mate ka vakakina vei ira ena bula oqo. Oqo na iyau dina; oqo na iyau ena yaga tikoga ki na tawamudu taucoko, sa na tu vei keda na kaukauwa mai na veivakalougatataki oqo, ka a vakatikora na kosipeli, me da na qai vakayago tale kina ka maroroi na noda ivakatakilakila ena bula tawamudu. Sa dina, sa rawa sara me da taura na ka oqo ena dodonu ni matabete tabu.¹⁸

Au dau vakasamataka vakawasoma na veiyalayalati e vakayacori me baleta na matabete. Ena dua na ivakatakila me baleta na ulutaga oqo, e kaya kina na Turaga, … “Ia ko ira sa gumatua ka yalodina ki na ilesilesi ruarua vakabete kau sa tukuna ka vakayacora vakakina na nodra itavi, ena vakasavasavataki ira na Yalotabu ka ra na vakavoui. … Ena soli vua na ka kecega sa tu vei Tamaqu. Ia, ko ira kece sa lesi ki na itutu vakabete, era sa vauci ki na bubului kei na veiyalayalati i Tamaqu; io na veiyalayalati ena sega ni voroka se yavalata ko Koya.” [Raica V&V 84:33–40.] Ia, ena so na gauna au dau tarogi au ga, Eda sa kila tiko beka na veika oqo? Eda sa kila tiko li ni kevaka eda muria na lawa ni Matabete eda na yaco me da vaka na Kalou ka vakataki Jisu Karisito? Au sa kidava rawa ni matada sa sega ni rai rawa, ka sega ni rogoca na daligada, ka sega talega ni curuma na lomada me kunekunetaka na lagilagi sa vakarautaki me nodra o ira sa yalodina [raica 1 Korinica 2:9].¹⁹

Ia a cava na ivalavala sa kilikili kei kemudou na tagane kei na yalewa, ko ni sa digitaki mo ni vakaitavi ena cakacaka vakaitamera ni iotioti ni gauna? E dodonu me da tagane kei na yalewa dau vakabauta, tutaka na dina me vaka sa vakatakilai ka vakatikori e ligada. E dodonu me da tagane kei na yalewa dodonu e mata ni Kalou kei na Nona Matabete tabu, dina ki Vua ka dina vei keda vakayadua. E sega ni dodonu me vakamatabokotaki keda na vale kei na qele, koula kei na siliva, se dua ga na iyau ni vuravura oqo me vakatikitikitaki keda mai na noda cakacakataka na inaki cecere sa talai keda mai kina na Kalou me da vakayacora. E cecere na noda inaki, e cecere na noda ilesilesi ka me da kakua ni vakalaboca na Tamada, se o ira na lewe ni ivavakoso vakalomalagi era sa wanonovi keda tiko. E sega ni dodonu me da vakalaboci ira na milioni ena vuravura ni yalo, ka ra sa wanonovi keda tale tikoga ena yalodina kei na vakanuinui ka da sega tu ni dau vakasamataka. Sai koya oqo na veika cecere ka kaukauwa e vinakata vei keda na Kalou. Eda na sega ni rawa ni taura ena kilikili na noda vakabulai, eda na sega ni kilikili ki na bula tawamudu ena matanitu ni noda Kalou, kevaka eda na vagolei tani mai na dina se mai na noda taleitaka.²⁰

Vakatutu ni Vuli kei na Veivakavulici

Taurivaka na veivakasama oqo ni ko ni vulica na kena iwase oqo se ni ko ni vakavakarau mo ni veivakavulici. Raica na tabana e vi–x, me ikuri ni veivuke.

Na veivakauqeti cava a muataka na cauravou gone o Wilford Woodruff me vakasaqara na Lotu dina? (Raica na tabana e 38–41.) E veiwekani vakacava na veivakauqeti oqo kei na matabete?
Raica lesu na tabana e 41–43 ka vakasaqara na veika e rawata na Turaga ena kaukauwa ni matabete. Era dau vakaitavi vakacava na lewe ni matabete ena cakacaka ni Turaga?
Na cava e bibi kina vei ira na tagane kei na yalewa me ra vulica na veika me baleta na matabete?
E sa vakalougatataka vakacava na nomuni bula na matabete?
Ena nomuni wilika na ivakavuvuli nei Peresitedi Woodruff me baleta na nodra ilesilesi na lewe ni matabete, na ivakavuvuli matata cava ko ni sa raica rawa? (Raica na tabana e 43–46.)
Me vaka e kaya o Peresitedi Woodruff, na itovo kei na ivalavala cava e vakavuna me sa tabogo kina ko lomalagi mai vua e dua na lewe ni matabete? Na cava e dravusakulukulu kina vua e dua na tamata me vakayagataka na matabete me rawa ka kina me baleti koya ga? (Raica na tabana e 43–46; raica talega V&V 121:34–40).) Me bula vakacava e dua na lewe ni matabete me rawa kina vua me taura na “kaukauwa me cakava kina na cakacaka ni lomalagi”? (Raica na tabana 44–46; raica talega V&V 121:41–46.)
Na cava na ibalebale me da gumatuataka na noda ilesilesi ena matabete? (Raica na tabana e 44–45.) Na ivakaraitaki cava o ni sa raica rawa vei ira na lewe ni matabete era gumatuataka na nodra ilesilesi ena matabete?
Raica lesu na iotioti na iwasewase ena iwase oqo (tabana e 46–48). Na sala cava e kauta mai kina na matabete na veivakalougatataki ena bula oqo kei na bula sa roro tiko mai?

iVolanikalou Veisemati: Joni 15:16; Iperiu 5:4–6; Alama 13:1–20; V&V 84:17–48; 107:18–20; Yavu ni Vakabauta 1:5

Peter and John — Erau vakabula rawa o Pita kei Joni e dua na tamata lokiloki (raica Cakacaka 3). E a vakasaqara na cauravou o Wilford Woodruff “na vakabauta sa soli e liu vei ira sa lotu”—e dua na lotu ka tiko kina na “kaukauwa mai vua na Kalou” ni nona Lotu na iVakabula ena veigauna sautu.

laying on of hands — E vakavulica o Peresitedi Wilford Woodruff ni matabete sai koya na “kaukauwa ka solia mai na Kalou vei ira na tamata ka solia vei ira na veivakadonui me ra matataka na Kalou.”

blessing the sacrament — Sa dua na ilesilesi cecere oqo ni kena tauri na Matabete vakalomalagi, tawamudu ka tawayalani!”