Wase 17

Cakacaka ni Valetabu: Vagolea na Yaloda vei ira na Noda Matavuvale kei na Turaga

Ni da curuma ena bula kilikili na vale ni Turaga, eda na ciqoma na veicakacaka tabu ka na vukea na noda vakarautaki keda, o ira na tubuda, kei ira na noda kawa mai muri me ra tiko tawamudu ena nona iserau na Kalou.

Na Bula nei Wilford Woodruff

Ena gauna e a vakatabui kina na Valetabu e Kirtland ena ika 27 ni Maji, 1836, e a veiqaravi tiko o Wilford Woodruff ena dua na kaulotu ena ceva kei Amerika. Ena tolu na macawa e muri e a rogoca kina na itukutuku ni vakatatabu ka qai vola kina ena nona ivolaniveisiga ni “lagilagi ena kena ivakatagedegede duadua e cake” na kena itukutuku.¹ Ni sa vakacavara na nona kaulotu, e a lesu tale ki Kirtland, e a yaco yani “ena nona taubale ena dua na cava ni ucacevata.” A vola kina vakaoqo, “Keimami raica na valetabu ni Turaga ni bera ni keimami yacova yani na koro, au vakila na noqu rekitaka na ka au raica o ya, ni se qai matai ni gauna meu raica kina na vale ni Turaga ka a tara rawa ena ivakaro kei na ivakatakila.”²

E a sega vakadua ni bau malumalumu na nona taleitaka o Wilford Woodruff na cakacaka ni valetabu. E a vakaitavi ena itagede kece sara ni cakacaka—mai na tara vale ki na kena vakatabui, mai na cakacaka ni tuvakawa ki na cakacaka tabu me baleti ira na mate. E a reki talega o koya ena vuku ni cakacaka tabu ni valetabu era a ciqoma me baleti ira ga o koya kei ira na lewe ni nona matavuvale.

Sa dau tukuna vakawasoma o Peresitedi Woodruff na gauna e a ciqoma kina na edaumeni. Ena nona sa vakila na parofita o Josefa Simici ni sa voleka mai ni cava na nona cakacaka e vuravura, e a qarava na edaumeni vei iratou na Kuoramu ni iApositolo Le Tinikarua e Nauvoo, ni se bera mada ga ni vakacavari na valetabu. E a vakadinadinataka kina o Peresitedi Woodruff: “E a vakaraitaka taumada vei au o Josefa Simici na cakacaka tabu e dau soli vei ira na Yalododonu Edaidai ena nodra edaumeni. Au a ciqoma na noqu edaumeni ena veidusimaki nei Josefa Simici.”³

Ni lewena voli na Kuoramu ni iApositolo Le Tinikarua ka vakakina ni se qai mai Peresitedi ni Lotu e muri, e a vakaitavi o Peresitedi Wilford Woodruff ena dua na sasaga ni tara valetabu. E a veivuke ena cakacaka mai na valetabu e Nauvoo, Illinois, ka vakakina ena veivaletabu ena va na koro lelevu e Utah: Logan, St. George, Manti, kei na Koroturaga o Salt Lake. E a cabora na masu ni vakatatabu ni valetabu e Manti kei na kena ena Koroturaga o Salt Lake.

Sa dau vakabibitaka o Peresitedi Woodruff na Valetabu e Salt Lake ka a qai vakacavari ni oti e 40 na yabaki ni cakacaka ena yalodina mai vei ira na Yalododonu. E a raica taumada na valetabu ena dua na raivotu matata ni bera ni ra yacova yani na Yalododonu na Buca o Salt Lake.⁴ Ni oti e va na siga ena nodra yaco yani ki na bucabuca, e a tiko o koya ena gauna e a vakauqeti kina o Peresitedi Brigham Young me digitaka na vanua me tara kina na valetabu.⁵ Ni vo e vica na yabaki me qai vakacavari na valetabu, e a tadra kina ni sa soli vua na ki ni valetabu ka dusimaki kina mai vei Peresitedi Young me “vakacurumi ira kecega era segata me ra vakabulai ki na valetabu.”⁶ E dua o koya na dauveitokoni gugumatua me baleta na kena vakacavari na valetabu, ena gauna sara mada ga ni veivakatovolei kei na veivakacacani. Ia ni qai mai vakacavari na tara vale ena Epereli ni 1893, e a muria kina na veidusimaki nei Peresitedi Young ena tadra, ena nona tuvalaka e tolu na macawa ni lotu ni vakatatabu me rawa ni ra tiko kece kina na Yalododonu.

Ni oti na vakatabui ni Valetabu e Salt Lake, e a qai taleva tale o Peresitedi Woodruff na bibi ni matavuvale ena cakacaka ni valetabu. E kaya kina: “Eda vinakata me ra raica lesu na Yalododonu Edaidai na ituvatuva ni nodra kawa ena kena levu ga ki muri era rawata, ka me ra vauci vei ira na tamadra kei na tinadra. Me ra vauci na gone vei ira na nodra itubutubu, ka cakava na veisemasemati oqo ena kena levu ga era rawata”⁷ (Mo ni wilika na itukutuku makawa e koto ena ivakavuvuli oqo, raica na tabana e xxxiii–xxxvi ena ivakamacala taumada ni ivola oqo.)

Ena 1894, e a raica kina o Peresitedi Woodruff na tauyavu ni Genealogical Society of Utah, ka a vu mai kina na sasaga e vuravura raraba ni Lotu me ra vukei na tamata ena nodra vakasaqarai ira na nodra qase. Ni oti e dua na drau na yabaki, a qai mai dikeva toka kina o Elder Russell M. Nelson ena Kuoramu ni iApositolo Le Tinikarua, “Na veika mai na yabaki vakairogorogo o ya sa mai tauyavutaki kina na kena wili me dua na cakacaka ni Lotu oqo na dikevi ni itukutuku ni matavuvale kei na veiqaravi ena valetabu.⁸ Na veika e yaco oqo e tiki tikoga ni kena vakataucokotaki na parofisai ni na “vagolea na lomadra na gone vei ira na nodra qase” (V&V 2:2; raica talega Malakai 4:5–6).

Ena vuku ni kena levu tu na ivakavuvuli bibi nei Peresitedi Woodruff ena cakacaka ni valetabu, oqo na imatai ni iwase ena iulutaga oqo, ena ivola oqo. Na wase oqo e vakanamata vakatabakidua ena veivakalougatataki ni kena curumi na valetabu kei na ibalebale ni matavuvale, kei na wase 18 e vakanamata ena cakacaka me baleti ira na mate.

iVakavuvuli nei Wilford Woodruff

Eda vakaitavi ena cakacaka ni valetabu ena reki vakalomalagi, ena noda kila ni vakarautaki keda, o ira na noda kawa, kei ira na tubuda me da na laki tiko ena iserau ni Kalou.

E sega tale ni dua na cakacaka era taleitaka vakatitobu cake na Yalododonu Edaidai mai na kena tara kei na vakacavari ni valetabu.⁹

Niu vakananuma na kaukauwa sa tu vei keda me da vakaduri Valetabu me baleta na yacai koya na Kalou sa Cecere Sara … kei na galala e noda me da lako ki na Valetabu oqori ka vakayacora na cakacaka e gadrevi me baleta na noda dui vakabulai ka vakakina na nodra vueti na noda mate, au reki vakalevu, ka vakila ni da sa vakalougatataki kina vakalevu.¹⁰

Na itukutuku ni veivaletabu era sa tu oqori e matamuni. O ni kila ni rau a vakamatei na parofita [o Josefa kei Hyrum Smith], ka gadreva na Kalou na kena tara na Valetabu e [Nauvoo] mai na ligadra na Yalododonu ni bera ni ra qai vakasevi tani yani ki na lekutu. E a soli e dua na ivakatakila ka a vakauqeti ira sara vakalevu na iTalatala qase ni Lotu ni Kalou me ra qarava na cakacaka oqori [raica na V&V 124:25–41]. Era a cakacaka ena kaukauwa kece e tu vei ira, ka ra vakacavara na cakacaka oqori. Era curuma na valetabu oqori ka ciqoma na veicakacaka tabu kei na edaumeni ni bera ni ra qai cavutu me ra lako yani ki na lekutu. Na veivaletabu oqori eda a tara… era tu me ivakananumi vua na Kalou, agilosi kei ira na tamata me baleta na nodra vakabauta kei na nodra cakacaka na Yalododonu Edaidai.¹¹

E kune votu ni ra taleitaka na Yalododonu Edaidai na veivakalougatataki ena rawa mai na cakacaka ni Valetabu. … E vakasinaiti na yaloda ena marau ka sega ni rawa ni da sega ni vakacaucautaka na noda Kalou kei na Nona vinaka vei ira na Nona tamata ena nona vakatara vei ira, e dina ni tu na veisaqasaqa kei na veika dredre e vuqa me ra veivorati kaya, ena nodra tara na veivale vakaoqo ka ra vakatabuya me vaka na kena ivalavala sa solia ko Koya me baleta na veika bibi ena vakayagataki kina.

Ena sega ni dua na Yalododonu Edaidai ka tu vinaka tu na nona vakasama me na sega ni qoroqoro ena reki vakalomalagi ena veika sa vakayacora vei keda na Kalou ena noda itabatamata, ena nona solia vei keda me vaka sa vakayacora, na veika kece sara me vakarautaki keda kina, o ira na noda kawa kei ira na tubuda me baleta na vuravura tawamudu o ya ni sa oti na bula oqo. O ira na Yalododonu Edaidai era sa tamata totaki sara vakalevu, ka sa dodonu me vakacaucautaki na Kalou mai na yalo kecega kei na ka kecega sa tu ena nodra vanua me baleta na loloma cecere kei na vinaka sa vakaraitaka tiko vei keda ko Koya. Sa yalataka tu vei keda o Koya na ivakarau ni bula talei, ka sa vakataucokotaka tiko me yacova mai oqo. Eda na tamata sega ni dau vakavinavinaka ka sega ni bula kilikili duadua kevaka, eda sa ciqoma oti na veivakatakilakila vakaoqo ni Nona vinaka, eda qai vakawalena se sega ni rawata me da talairawarawa ka yalodina Vua kei na Nona inaki cecere.¹²

Eda vinakata me da na ia tikoga ena veivaletabu oqo. Eda vinakata me ra na vakatawani mai vei ira na Yalododonu Edaidai. Eda vinakata me ra dau lako tikoga kina na tacida kei na ganeda ka vueti ira na mate ka vakalougatataki ira na bula.¹³

Mai na masu ni kena vakatabui na Valetabu e Salt Lake: Oi kemuni na Turaga, keimami raica ena yalo e sega ni vakamacalataki rawa na kena sa vakacavari na vale tabu oqo. Ni ciqoma na ikava ni valetabu o ni sa vukei ira kina na luvemuni ni veiyalayalati ena kena tara ena veiulunivanua oqo. Ena veigauna sa oti o ni sa vakauqeti ira kina na nomuni italai, o ira na Parofita, me ra tukuna e dua na gauna ena veigauna mai muri me na tauyavutaki kina na vale ni Turaga ena dela ni ulunivanua, ka me ra vakacerecerei ena veidelana [raica Aisea 2:2; Maika 4:2]. Keimami vakavinavinaka vei kemuni ena gauna lagilagi oqo, me keimami cau kina ki na kena vakataucokotaki na raivotu oqo mai vei ira na nomuni daurairai, kei na nomuni siro sobu mai ka vakatara vei keimami me keimami vakaitavi ena cakacaka cecere oqo.¹⁴

Ena cakacaka ni itukutuku ni matavuvale kei na cakacaka tabu ni valetabu, eda sa vauci kina ki na noda matavuvale, ka tara cake kina e dua na isema kaukauwa ena maliwa ni veitabatamata.

Na ivakavuvuli ni kosipeli i Jisu Karisito e tu kina na kaukauwa ni oti na mate; era na kauti ira vata mai na tagane kei na watidra kei ira na luvedrau ena matavuvale ka vakaduavatataki ena veivuravura sega ni vakaiyalayala. … Sa vakatakilai vei ira na Yalododonu Edaidai na cakacaka tabu ni veivauci, ka ra na tudei tu ni sa oti na mate, ka vakakina, me vaka au sa tukuna oti, ena vakaduavatataki ira na tagane kei na yalewa me tawamudu ena nodra matavuvale. Oqo na vuna era tiki kina ni noda lotu na veivakavuvuli oqo, ia ena vukudra, era na vakaduavatataki kina na veiwatini, na itubutubu kei ira na luvedra me yacova ni ra sa laki sema tale yani na veisemasemati oqo vei na Qase o Atama. Eda na sega ni rawata na taucoko ni lagilagi vakasilesitieli kevaka e sega na cakacaka tabu ni veivauci.¹⁵

Kemuni na taciqu kei na ganequ, na lagilagi ni veika kece oqo sai koya, ni sa oti kece eda na tiko vata ga kei na noda dui matavuvale— o ira na tamada kei na tinada, o ira na tacida kei na ganeda, o ira na marama watida kei ira na luveda—ena mataka ni tucaketale, ena ituvatuva vakamatavuvale ena vuravura vakasilesitieli, me da na tiko kina me tawamudu ka tawamudu. Oqo ena rauta na veika kece e daru rawa ni sorovaka ena vica na yabaki e daru mai bula kina ena bula vakayago oqo.¹⁶

Me [vauci] na tamata kecega vua na tamana, ko ni na vakayacora kina na ka sara ga e tukuna na Kalou ena nona tukuna ni na talai Ilaija na parofita mai ena iotioti ni gauna [raica Malakai 4:5–6]. E a rairai mai ko Ilaija na parofita vei Josefa Simici ka tukuna vua ni sa yaco mai na gauna me na vakayacori kina na ivakavuvuli oqo [raica V&V 110:13–16]. E a sega ni mani dede na bula tiko nei Josefa Simici me tomani kina na nona raica na veika oqo. E a sa tauvuloni sara na yalona ena cakacaka oqo ni bera ni qai vakamatei ena vuku ni vosa ni Kalou kei na ivakadinadina kei Jisu Karisito. E tukuna vei keda ni dodonu me dua na isema kaukauwa ni veitabagauna kecega kei na cakacaka ni Kalou mai na dua na itabatamata ki na dua tale [raica V&V 128:18]. E a vakatawana tu vakabalavu sara na nona vakasama na ka oqo mai na veiulutaga kece tale eso a soli vua.

Ena noqu masu e a vakatakila kina vei au na Turaga ni sa noqu itavi meu tukuna vei ira kecega na Isireli me ra vakayacora na ivakavuvuli oqo, me vakataucokotaki kina na ivakatakila o ya, au a mani vakotora kina e matadra na tamata oqo. … Eda vinakati ira kina na Yalododonu Edaidai mai na gauna oqo me ra dikeva lesu na itukutuku ni nodra kawa ena kena balavu ga ki muri era rawata, ka me ra vauci vata vei ira na tamadra kei na tinadra. Me ra vauci na gone vei ira na nodra itubutubu, ka cicivaka na veisemasemati oqo ena kena levu ga o ni rawata.¹⁷

Mai na masu ni kena vakatabui na Valetabu e Salt Lake: Oi kemuni na Tamai Keimami mai Lomalagi, keimami cabora vei kemuni na icabocabo ni soro keimami sa vakarautaka me baleti ira na nomuni italai kei ira na nomuni yada me ra ciqoma kina na veivakalougatataki ni nodra vauci vata. Keimami sa vakatabuya ena yaca ni Turaga ko Jisu Karisito, ki na yacamuni savasava duadua, ka keimami kerei kemuni mo ni vakasavasavataka na icabocabo ni isoro oqo, me rawa kina vei ira era na lako mai kina me ra vakila na kaukauwa ni Yalo Tabu ni tikori ira, ka vakila na tabu ni veiyalayalati era sa mai vakayacora, o ira era na lako mai kina. Ka keimami sa masuta talega me na veiliutaki tiko mai na Yalo Tabu na neimami veiyalayalati kei na kena konitaraki keimami sa cakava vata kei kemuni ka vakakina vei keimami sara ga, me keimami na vakatabuya ka mo ni vakadonuya, ka me ra na kila na yalododonu kece sara era na lako mai ki na icabocabo ni soro oqo na veivakalougatataki kece sara sa cavuti kina, ena mataka ni nodra tucaketale na bula dodonu. …

Oi kemuni na nodra Kalou na neimami qase, o Eparaama, Aisake, kei Jekope, me vaka ko ni dau vinakata mo ni kacivi ni ko ni nodratou Kalou, keimami vakavinavinaka vei kemuni ena kaukauwa taucoko mai yaloi keimami kei na vakamolimoli e vuabale ni ko ni sa vakatakila mai na kaukauwa ena vagolei kina na yalodra na gone vei ira na nodra qase kei na yalodra na qase vei ira na gone, me rawa kina vei ira na luve ni tamata, ena nodra veitabatamata kece sara me ra vakaivotavota ena lagilagi kei na reki ni matanitu vakalomalagi. Ni vakadeitaka vei keimami na yaloi Ilaija, keimami kerea vei kemuni, me rawa kina vei keimami me keimami vueti ira na neimami mate ka semati keimami vata kei ira na neimami qase era sa toki yani ki na tai kadua ni ilati, ka vakakina me kena ikuri me ra vauci vata na neimami mate me ra tucake ena imatai ni tucaketale me rawa kina ni keimami vauci vata kina na tiko e vuravura vei ira na tiko mai lomalagi. Keimami vakavinavinaka vei kemuni ena vukudra o ira era sa qarava oti na nodra cakacaka ena bula oqo, ka vakakina koi keimami, ni sa tadola tu na katuba ni valeniveivesu, ka sa kacivaki na veisereki vei ira era vesuki, ka sa sereki na ivesu mai vei ira era a vesu tu. Keimami vakacaucautaki kemuni ena vukudra na neimami qase, mai vei koya na kena iotioti ki vua na imatai, mai na gauna oqo, mai na iotioti ki na kena itekivu, ni rawa ni keimami vauci vata ena dua na isema sega ni waicala rawa, ka dregati vata ena Matabete Tabu, ia me vaka ni dua na matavuvale cecere me keimami na tucake vata e matamuni, ena kaukauwa ni nona dra ni veisorovaki na Luvemuni, me keimami sereki kina mai na veika ca kecega, me keimami vakabulai ka vakasavasavataki, vakacerecerei ka vakalagilagi.¹⁸

E dodonu me da vakarautaki keda vakayalo me da na ciqoma na veivakalougatataki ni veiqaravi ena valetabu.

Ni se bera ni ko lako ki na valetabu … tovolea mo masu mada vakataki iko. Talaucaka vua na Turaga na lomamu ena masu, ka kerea me kakua walega ni bokoci na nomu ivalavakla ca, ia me tiko ga kei iko na Yalo ni Kalou kei na ivakadinadina ni Turaga o Jisu Karisito; ni Yalo ni Kalou ena rawa ni tiko vei ira era na vakasoqoni vata ena valetabu. …

E tiko vei au na gagadre me ra cakava na Yalododonu na ka oqo niu gadreva me ra lako ko ira na lako ki na valetabu ena yalosavasava ka me tiko vata kei ira na Yalo ni Kalou, me ra na marautaka, me ra na vakila kece sara na kaukauwa o ya.¹⁹

E sega ni dua na lewe ni Lotu ka bula dodonu me na curuma na valetabu me tukuni ni sega soti ni kila na ivakavuvuli ni Kosipeli. Ena sega soti ni ka levu kevaka me nanumi ni tamata taucoko e kila tiko na nona itavi vua na Kalou ka vakakina vua na tamata. E sega ni dua me na guilecava na veituberi ni dodonu me sinai tu vei keda na veilomani kei na loloma uasivi vei ira kece na wekada. Sa ikoya o ya ena sega kina ni rawa me lomalomarua na tamata ena bibi ni lewe ni lotu yadua ena ivavakoso me ra vakacegui vata kei ira na tacina kei na ganena, ka veivinakati kei na Kalou. Eda na qai rawata tale vakaevei na veivakalougatataki ka sa yalataka tu mai o Koya, ni sa dodonu ga me da vakamuria na veika e vinakati mai me na qai rawa kina na kena veivakalougatataki!

Ena rawa li ki na tagane kei na yalewa me veitaliataka tiko na lawa ni Kalou, se o ira na luluqa voli ki na nona ivakaro ni talairawarawa me ra na rawa ni bula kilikili ka rawata na Nona veivakalougatataki … ena nodra na lako ki na Nona valetabu?

Era nanuma li ni veivutuni kei na lako tani mai na ivalavala ca ni na rawarawa na kena wali?

Era na douvaka li, ena nodra vakasama, me ra na beitaka na Tamada ni sega ni lewa vakadodonu ka veitotaki, ka beitaki Koya ni sega ni qarauni vinaka na kena vakavotukanataki na Nona vosa?

Ena dina taucoko ni sega sara ni dua e tukuna tiko ni wili vata kei ira na Nona tamata me na cakava na ka vaka ko ya.

Sa na sega kina ni rawa vei ira era sega ni bula dodonu me ra namaka na veivakalougatataki ena nodra lako yani ki na Valetabu, ni se vakaboicataka tiko na nodra bula na ivalavala ca, ka ni se buebue tiko ga e lomadra na yalo ca, kei na sega ni veivosoti vei ira na tacina kei na ganena.

Me na vakamatatataki vakalevu sara na veika e tukuni oqo e muri. Ena kena tovolei me vakamuri na veika bibi me baleta na lawa, ena rawa ni vakamamadataki na kena dodonu me vakabibitaki na yalo ni loloma kei na veilomani vakakina na loloma cecere.

… Ni se bera ni da curu ki na Valetabu me da sa veiqaravi kei na Turaga … sa dodonu me da vagalalataki keda mai na yalo veicati kei ira na wekada, sega walega ni na oti na yalo veivuvutaki, ia na kena itekitekivu sara ga me tagutuvi, kei na veika lalai e dau vakavuna mai ka mai bika toka, me sa kau tani sara ga; me da sa veisorosorovi sara ga vakataki keda, me da sa kerekere sara ga vua na Turaga me da vosoti, ni sa soli mai, me vakamuri na veivakayarayarataki, baleta ni noda vakayalomalumalumutaki keda ka kere veivosoti mai vei ira na wekada, eda sa na qai solia na yalo ni loloma cecere kei na yalololoma dina, vei ira era kerea na noda veivosoti eda dau kerea ka namaka tu mai lomalagi.

Sa ikoya o ya na vuna ni da sa lako cake ki na vanua tabu oqo me galala na yaloda mai na veivakaisini kei na yaloda me vakarau ki na veivakauqeti ka sa yalataki tu! Sa na qai rawa kina na noda kerekere me rogo yani ki na daligai Jiova ka sovaraka sobu mai na ka ni veivakalougatataki ni Kalou mai Lomalagi! …

… Keitou sureti kemuni na [lewe ni Lotu yadua] me vaqarai na veitokani ni veitacini kei na veiganeni, kei na kena ka cecere duadua me ra sasagataka na veitokani ni Yalo Tabu. Me sa vakasaqarai ka vakamareqeti sara ga na Yalotabu oqo. Ena loma ni isoqosoqo lailai duadua me vaka e dua na matavuvale ki na mataisoqosoqo se kuoramu. Laiva me tara na yalodra na veitacini kei na veiganeni, itubutubu kei ira na gone ena veivuvale, vakatalega kina na yalodra na Mataveiliutaki Taumada kei na Le Tinikarua. Laiva me tara na yalodra na Mataveiliutaki ni iTeki kei na Matabose e Cake, vakakina na mataveiwekani ka ra bula vata tiko ena dua na tabanalevu. Laiva me semata na qase kei na gone, tagane kei na yalewa, qele ni manumanu kei na kena ivakatawa, tamata bula kei na Matabete ena veisemati ni yalo e vakavinavinaka ka veivosoti kei na loloma, me rawa kina ni da vakadonui mai vua na Turaga ka me rawa talega ni da tucake e matana ka sega vei keda na yalo e rere se taqaya e matadra na tamata. Sa na qai sega kina na yalo ca ena ka e baleta na kalougata ka yalataki vei ira era sa vakalou Vua. Na vakasolokakana kamikamica ni Yalo Tabu ena soli vei ira, vakatalega kina na iyau ni lomalagi, na veitokani ni agilosi, ena dau soli mai ena veigauna e so, ka ni Nona Yalayala e sa lako oti ka na sega ni tale wale!²⁰

Mai na masu ni kena vakatabui na Valetabu e Salt Lake: Tamai Keimami mai Lomalagi, koi kemuni ko ni a bulia na lomalagi kei na vuravura, kei na veika kece sa tu kina; koi kemuni Duadua mo ni vakalagilagi, sa vinaka sara ena loloma vakalou, ena loloma, kei na dina, koi keimami, na luvemuni, keimami lako mai kivei kemuni ena siga nikua ena loma ni vale oqo ka keimami sa tara me baleti kemuni, keimami kerea na veivakaduvatataki ni dra ni Luvemuni e Duabauga, me kakua tale ni lesuvi keimami tale mai na neimami ivalavala ca, ia me sa cabe yani ki vei kemuni na neimami masu ka curu vakadoudou kina nomuni iserau ka me rawa ni keimami rogoci mai na nomuni itikotiko tabu. Me sa ka e vakaturaga na nomuni na rogoca ka sauma na neimami vakacacabo, mo ni sauma mai ena nomuni vakatulewa vakayalomatua ka yalololoma ka solia na veivakalougatataki ka keimami gadreva tiko me sa neimami ka me vuaidrau, me vaka ni keimami sa gadrevi kemuni ena yalo sa savasava kei na yalo ni duavata me qaravi na veika sa vaka na lomamuni ka vakalagilagia na yacamuni …

Keimami lako mai vei kemuni ena yalomarau kei na vakavinavinaka, ena yalo ni qaqa kei na yalo sa sinai ena veivakacerecerei, ena nomuni vakadonuya me keimami cabeta bula mai na siga nikua, mai na vasagavulu na yabaki, keimami vakanuinui tu mai kina, ka cakacaka kina, ka ia na veimasulaki, ni na rawa me keimami vakacabora yani kivei kemuni na vale oqo ka keimami sa mai tara me baleta na yacamuni lagilagi. Keimami a kacivaka ena dua na yabaki sa oti na Osana vua na Kalou kei na Lami. Ia nikua keimami sa vakacabora taucoko vei kemuni, kei na veika kece sara sa tu e loma, ka me rawa ni ka tabu e matamuni; ka me sa vale ni masumasu, vale ni veivakalagilagi ka sokalou; kei na nomuni lagilagi me sa mai vakacegu no kina, ka mo ni sa na dau tiko wasoma eke; me sa ivakavakacegu ni Luvemuni lomani, na neimami iVakabula, kei ira na agilosi ka ra tu ena kemuni iserau me ra dau sikova talega mai, me ra na dau kauta mai vei keimami na nomuni ivakasala kei na ivakaro; ka me sa vakatabui ka vakalougatataki ena kena veitikina kece sara me vakatabui vei kemuni na Kalou kei Isireli, na Dauvakatulewa Qaqa ni kawatamata. Keimami sa masulaka ni ko ira kece era na curuma mai na loma ni nomuni vale oqo, me ra na vakila na nomuni kaukauwa, ka me ra na qai vakauqeti ka kila ni ko ni sa vakatabuya oti, ka sa nomuni na vale. Na vanua ni vakatatabu.²¹

Vakatutu ni Vuli kei na veivakavulici

Taurivaka na veivakasama oqo ni ko ni vulica na kena iwase oqo se ko ni vakavakarau mo ni veivakavulici. Raica na tabana e vi–x, me ikuri ni veivuke.

Na cava e tukuna o Elder Wilford Woodruff ni sa rogoca na vakatabui kei na nona raica na valetabu e Kirtland ena imatai ni gauna? (Raica na tabana e 195.) E sa yaco beka vei kemuni e so na ka vaka o ya ka na ganita mo ni wasea?
Era vakaraitaka vakacava na Yalododonu Edaidai ena veiyabaki sa oti na nodra taleitaka na valetabu? (Raica na tabana e 198–200.) Na cava meda sa rui “vakaitavitaki keda kina vakalevu” ena cakacaka ni valetabu?
Raica lesu na iotioti ni parakaravu ena tabana e 194. Ko ni raica rawa vakacava ni veiqaravi ena valetabu kei na vakasaqaqara ivolatukutuku ni matavuvale e “dua ga na cakacaka” (Raica na tabana e 200–03.) E sa vukei kemuni vakacava na cakacaka oqo me vagolei na yalomuni vei ira na nomuni qase kei ira na nomuni kawa?
Na cava e gadrevi kina na cakacaka tabu ni veivauci me “rawa kina na taucoko ni lagilagi ena matanitu vakasilesitieli”? (Raica na tabana e 200-03; raica talega V&V 131:1–4.)
Vakaraica na iwase ni ivola taucoko mo ni kunea na iyatuvosa e baleta tiko na veiwekani vakamatavuvale Na cava e rawa ni da vulica mai na ivakavuvuli oqo? Ena rawa vakacava me vukea na noda kila na vale ni turaga na veika eda vakila me baleta na noda veimatavuvale
E sa vakalougatataka vaka cava na Kalou na nomuni bula kei na nomuni matavuvale mai na nomuni dau lako ki na valetabu? Era na vakavulici ira vakacava beka na luvedra o ira na itubutubu me ra dau rokova na valetabu ka vakarautaki ira me ra laki ciqoma na cakacaka tabu ni valetabu?
Tabana e 203–06 e tiko kina e so na ivakasala nei Peresitedi Woodruff me vukei ira na Yalododonu me ra vakarau ki na kena vakatabui na Valetabu e Salt Lake. Ena vukei keda vakacava na ivakasala oqo ena veigauna kece eda dau curuma kina na valetabu?
Na cava soti e so na ivakavuvuli ka a vakatavulici ena kena vakatabui na Valetabu e Salt Lake? (Raica na tabana 201, 203–04, 206–07.) Dikeva se veitalanoataka se na vukei keda vakacava na masu. Ena vukei keda vakacava me da cakava na noda ivola ni kawa ni matavuvale ?

iVolanikalou Veisemati: Same 24:3–5; Maciu 16:18–19; V&V 27:9; 97:10–17; 109; 110; 138:46–48

family heirlooms — “Keitou gadreva na Yalododonu Edaidai … me ra vakasaqara na nodra ivolatuktutuku ni kawa me yacova na gauna ga era rawata, ka me ra sa vauci vei ira na tamadra kei ira na tinadra.”

Salt Lake Temple dedication ticket — Na mataqali ivolatara vakaoqo e dau soli vei ira na lewe ni Lotu ka ra sa bula dodonu me ra na tiko ena soqo ni kena vakatabui na Valetabu e Salt Lake.