“Lēsoni 1 Naunau ʻa e Faiakó: Ko Hono Ako e Tokāteline ʻo e Fāmili Taʻengatá,” Ko e Fāmili Taʻengatá - Naunau ʻa e Faiakó (2022)
“Lēsoni 1 Naunau ʻa e Faiakó,” Ko e Fāmili Taʻengatá - Naunau ʻa e Faiakó
Lēsoni 1 Naunau ʻa e Faiakó
Ko Hono Ako e Tokāteline ʻo e Fāmili Taʻengatá
ʻOku kaunga e tokāteline ʻo e fāmilí kiate kitautolu kotoa. ʻE fakaafeʻi e kau akó ʻi he lēsoni ko ʻení ke nau vakavakaiʻi ʻenau falala ki he poto ʻa e Tamai Hēvaní mo ʻEne palani maʻá e ngaahi fāmilí. ʻE toe fakakaukau foki e kau akó ki he meʻa te nau lava ʻo fai ke tokoni ki hono fokotuʻu ha ʻātakai ʻo e ʻofa faka-Kalaisí, ongoʻingofuá, mo e fakaʻapaʻapá ʻi he taimi ʻoku aleaʻi ai e tokāteline ʻo e fāmilí.
Fakatokangaʻi ange: Kapau ʻe lava, fetuʻutaki ki he fānau ako ʻoku nau lesisita ki he kalasi ko ʻení kimuʻa ʻi honau fuofua ʻaho ʻi he kalasí, pea fakaafeʻi kinautolu ke nau ako ʻa e naunau teuteu ki he kalasí ki he ʻuluaki lēsoni ko ʻení. Fakapapauʻi ʻoku maʻu ʻe he toenga kotoa ʻo e kau akó ha tatau ʻo e naunau teuteú ʻi hoʻo kamata e kalasí. Lolotonga hoʻomou fealēleaʻaki fakakalasí, fakaʻaongaʻi e naunau teuteú ke lava e kau akó ʻo sio ki he founga ʻe tokoni ai kiate kinautolu ke nau teuteu mo fakatupulaki ʻenau aʻusia fakaakó. Ongoʻi fiemālie ke fakaʻaongaʻi ha miniti ʻe 5 ki he 10 ʻi he kamataʻanga ʻo e lēsoni ko ʻení ke fakafeʻiloʻaki mo talitali lelei e kau akó ki he kalasí.
Ngaahi Fokotuʻu ki Hono Akoʻí
Te tau lava ʻo falala ki he ʻofa haohaoa mo e poto ʻa e Tamai Hēvaní mo Sīsū Kalaisí.
Mahalo te ke lava ʻo fakaʻaliʻali ki he kau akó ʻa e fakahokohoko ʻo e tohí pe silapa ki he konga ʻuluaki ʻo e kalasí, ko e fakafeʻiloaki e kalasi ko ʻení. Ke maheni ange mo e ngaahi fiemaʻu hoʻo kau akó, fakaafeʻi kinautolu ke nau fai atu ha kiʻi tohi nounou ʻo ʻikai hā ai honau hingoá fekauʻaki mo e ngaahi tefito ʻoku nau saiʻia taha aí pe fie maʻu ke mahino lelei angé. Te ke lava foki ʻo fakaafeʻi kinautolu ke nau hiki ha faʻahinga fehuʻi pē ʻoku nau ʻamanaki ʻe tokoni ʻa e kalasi ko ʻení ke tali maʻanautolu. Tānaki ʻenau ngaahi talí pea fakakaukau ki ai ʻi hoʻo teuteu ki he ngaahi lēsoni he kahaʻú.
Fakakaukau ke fehuʻi ange ʻa e ngaahi fehuʻi ko ʻení:
-
Ko hai ha kakai ʻokú ke falala ki ai, pea ko e hā hono ʻuhingá?
-
Ko e hā ha meʻa te ke falala ai ki he kakaí ni?
Vahevahe ʻa e kau akó ki ha ngaahi kulupu tautau toko tolu. ʻOange ki he kulupu takitaha ha tatau ʻo e laʻipepa tufa ko ʻení, pea kole ange ke nau muimui ki he ngaahi fakahinohinó.
Fakamatalaʻi ange ko e taha ʻo e ngaahi fakamoʻoni maʻongoʻonga taha ʻo e ʻofa mo e poto ʻa e Tamai Hēvaní mo Sīsū Kalaisí ko e tokāteline ko ia ʻo e fāmili taʻengatá. ʻE lava ʻe heʻetau falala kiate Kinauá mo e palani ʻa e Tamaí ʻo tokoni ke tau fehangahangai mo e ngaahi fakakaukau kehekehe ʻa e māmaní ki he ngaahi meʻa fakafāmilí.
ʻOange ki he kau akó ha tatau ʻo e “Ko e Fāmilí: Ko ha Fanongonongo ki Māmani” (ChurchofJesusChrist.org), pe kole ange ke nau vakai ki he tatau fakakomipiutá. Fakaafeʻi e kau akó ke nau fili ha ngaahi palakalafi ʻe niʻihi ke lau pea fakaʻilongaʻi ʻa e ngaahi kupuʻi lea ʻoku nau fakamatalaʻi ʻa e ngaahi tāpuaki mo e fiefia ʻoku finangalo ʻa e Tamai Hēvaní ke nau maʻu mo honau ngaahi fāmilí. Hili ha taimi feʻunga, fakaafeʻi e kau akó ke vahevahe ʻa e meʻa ne nau fakaʻilongaʻí pea mo e ʻuhingá.
-
ʻOku fenāpasi fēfē hoʻo ngaahi holi ki ho fāmilí mo e finangalo ʻa e Tamai Hēvaní ki ho fāmilí?
-
Ko e hā e mahuʻinga ʻo e falala ki he poto mo e fakakaukau taʻengata ʻa e Tamai Hēvaní mo Sīsū Kalaisí kae ʻikai ko e poto mo e fakakaukau ʻa e māmaní?
Fakamoʻoni pe fakaafeʻi e kau akó ke nau fakamoʻoni ki he poto mo e finangalo ʻa e Tamai Hēvaní mo Sīsū Kalaisi ki hotau fāmili lolotongá mo e kahaʻú.
Te tau lava ʻo fokotuʻu ha ʻātakai ako ʻo e ʻofá mo e fakaʻapaʻapá.
Fakaʻaliʻali ha tā ho fāmilí. Vahevahe ha ngaahi meʻa ʻokú ke ʻofa ai fekauʻaki mo ho fāmilí mo ha niʻihi ʻo e ngaahi founga ʻoku makehe ai e tūkunga ho fāmilí.
Fakaafeʻi ha tokotaha ako ke ne lau leʻolahi e fakamatala ʻa ʻEletā Niila L. ʻEnitaseni ʻi he konga 2 ʻo e naunau teuteú.
-
Ko e hā ʻoku makehe kiate koe fekauʻaki mo e meʻa naʻe akoʻi ʻe ʻEletā ʻEnitasení? (Mahalo te ke lava ʻo tokoniʻi e kau akó ke nau ʻiloʻi e moʻoni ko ʻení: Koeʻuhí ʻoku kehekehe e ngaahi fāmili kotoa pē, ʻoku fiemaʻu ke tau aleaʻi e sīpinga ʻa e ʻEikí maʻá e ngaahi fāmilí ʻi ha founga mohu fakakaukau mo ongoʻingofua.)
Mahalo te ke lava ʻo fakaafeʻi e kau akó ke vahevahe e meʻa te tau lava ʻo ako mei he sīpinga ʻo e ʻofa, ongoʻingofua, mo e manavaʻofa ʻa e Fakamoʻuí ki he niʻihi kehe ʻoku nau foua ha ngaahi tūkunga faingataʻa fakataautaha pe fakafāmilí. (ʻE lava ʻo maʻu ha ngaahi sīpinga ʻi he konga “Fie Ako Lahi Ange?” ʻo e naunau teuteú.)
Fakakaukau ke ʻoange ha ngaahi miniti siʻi ki he kau akó ke lekooti ai ʻenau ngaahi fakakaukaú ki he fehuʻi ko ʻení:
-
Ko e hā te u lava ʻo fai ke tokoniʻi e niʻihi kehé ke nau ongoʻi ʻoku ʻofaʻi mo fakaʻapaʻapaʻi kinautolu lolotonga hono aleaʻi e ngaahi tefito ki he fāmilí mo e ngaahi tefito pelepelengesi kehé? (Kapau naʻe ako ʻe he kau akó ʻa e konga 2 ʻo e naunau teuteú, mahalo kuo nau ʻosi hiki ha ngaahi fakakaukau fekauʻaki mo e fehuʻi ko ʻení. Te ke lava ʻo ʻoange ha taimi ke nau vakaiʻi ai e meʻa ne nau tohí.)
Fakaafeʻi ha kau ako ʻe niʻihi ke vahevahe ha niʻihi ʻo e ngaahi fakakaukau ne nau lekōtí.
Mahalo te ke lava ʻo fakamatalaʻi ange ʻi hoʻo lea pē ʻaʻau, ʻe aleaʻi ʻe he kau akó ʻi he kalasi ko ʻení ha ngaahi moʻoni lahi ʻoku fie maʻu e tokoni ʻa e Laumālie Māʻoniʻoní ke mahino kiate kinautolu. Koeʻuhí ko e makehe ʻa e ngaahi tūkunga fakafoʻituituí mo fakafāmilí, ʻe fiemaʻu ʻe he kau akó ha fakahā fakataautaha ke mahino kiate kinautolu ʻa e founga ke fakaʻaongaʻi ai e ngaahi akonakí. Koeʻuhí ko e niʻihi ʻo ʻetau ngaahi ongo mālohi tahá ‘oku fekauʻaki ia mo hotau ngaahi fāmilí, ʻoku fie maʻu ki heʻetau malava ke feakoʻaki ʻiate kitautolu pea mo e Laumālié ha ʻātakai ʻo e ʻofa faka-Kalaisí, ongoʻingofuá, mo e fakaʻapaʻapá. Fakaafeʻi e kau akó ke fakahoko honau fatongiá ke tokoni ki ha ʻātakai pehē.
Te ke lava ʻo fakaʻosi e kalasí ʻaki hono fakaʻaliʻali ki he kau akó e founga ke maʻu ai e naunau teuteú. Kole ange ke nau fakakaukau ki he founga ʻe lava ke tokoni ai ʻenau ako fakafoʻituitui e naunau teuteú kimuʻa e kalasí ke ako lahi ange ʻe he kalasí e tokāteline ʻo e fāmilí. Fakaafeʻi kinautolu ke nau teuteu faivelenga ki he kalasi takitaha.
Ki he Kalasi Hokó
Poupouʻi e kau akó ʻi heʻenau ako ki he kalasi hokó ke nau fekumi ki he ʻuhinga ʻoku pikitai ai e kau taki ʻo e Siasi ʻo e ʻEikí ki he tokāteline ʻo e fāmilí naʻe ʻomai ʻi he fanongonongo ki he fāmilí, ʻo aʻu pē ki he taimi ʻe fehangahangai ai ʻa e ngaahi fakakaukau manakoá mo e tokāteline ko ʻení.