Lēsoni 5 Naunau ʻa e Faiakó

Ko ʻEtau Aʻusia Fakamatelié mo e Meʻaʻofa ʻo ha Sino Fakatuʻasinó

ʻI he maama fakalaumālié naʻa tau “tali ʻa [e palani ʻa e ʻOtuá ʻa ia] ʻe tuʻunga ai ha lava ʻa ʻEne fānaú ʻo maʻu ha sino fakamāmani pea mo ha taukei ʻi he māmaní ke fakalakalaka hake ki he haohaoá” (“Ko e Fāmilí: Ko ha Fanongonongo ki Māmani,” ChurchofJesusChrist.org). ʻE fakaafeʻi ʻa e kau akó ʻi he lēsoni ko ʻení ke nau fakamatalaʻi ʻa e taumuʻa ʻo ʻetau moʻui fakamatelié pea mo e founga ʻoku tokoniʻi ai kitautolu ʻe hotau sino fakatuʻasinó ke tau fakalakalaka ke hoko ʻo hangē ko e ʻOtuá. ʻE toe fakakaukauʻi foki ʻe he kau akó ʻa e meʻa te nau lava ʻo fai ke fakaleleiʻi ai honau ngaahi vā fetuʻutaki fakafāmilí ʻaki hono ikunaʻi e tangata fakakakanó pea hoko ʻo hangē ko Sīsū Kalaisí.

Ko Hono Fakatupulaki ʻEtau Founga Akoʻí mo e Akó

Poupouʻi e feinga ʻa e kau akó ke fakaʻaongaʻi e ngaahi moʻoni ʻo e ongoongoleleí ʻaki hano toe vakaiʻi. Ko e ngaahi taumuʻa taupotu taha ʻo hono ako ʻo e ongoongoleleí ko e ului ki he Tamai Hēvaní mo Sīsū Kalaisi pea hoko ʻo hangē ko Kinauá. ʻOku fie maʻu ʻi hono aʻusia e ngaahi taumuʻa ko ʻení ke tau fakaʻaongaʻi e meʻa ʻoku tau akó. ʻE lava ke tokoniʻi ʻe he kau faiakó ʻa e kau akó ʻi heʻenau feinga ke fakaʻaongaʻi ʻenau akó ʻaki hano muimuiʻi fakalelei e ngaahi fakaafe ʻoku ʻoatu ʻi he ngaahi lēsoní. ʻOku ʻikai totonu ke kole ki he kau akó ke vahevahe ha meʻa ʻoku fuʻu fakataautaha. Kapau he ʻikai ʻoatu ʻe he kau akó ha tali, ʻe lava ke fakaafeʻi ʻe he kau faiakó ʻa e kau akó ke nau fakakaukau ki he meʻa ne nau ongoʻi pe tohi ʻi he ngaahi lēsoni kimuʻá pea poupouʻi kinautolu ke nau ngāue. ʻOku totonu ke fakaʻaongaʻi ha ngaahi miniti siʻi pē ʻo e taimi kalasí ki hono toe vakaiʻi mo e kau akó.

Fakatokangaʻi ange: Kuo fakaafeʻi e kau akó ʻi he ngaahi lēsoni takitaha ke fakaʻaongaʻi ʻenau akó ʻi ha ngaahi founga kehekehe. Hangē ko ʻení, naʻe fakakaukau e kau akó ʻi he lēsoni 4 ki he founga te nau lava ai ʻo ʻai honau fāmilí ko e uho ʻo ʻenau moʻuí. Te ke lava ʻo kole ki he kau akó ke nau toe vakaiʻi ʻa e ngaahi ongo naʻa nau hikí pea fakakaukau ki heʻenau feinga ke ngāueʻi e meʻa ne nau ongoʻí. Hili iá pea fakakaukau ke fakaafeʻi ha toko taha pe toko ua ʻo e kau akó ʻa ia ʻoku ongoʻi fiemālie ke vahevahe ʻa e meʻa kuó na aʻusiá ʻi heʻena feinga ke moʻui lelei ange ʻaki ʻa e akonaki ko ʻení. Te ke lava ʻo fokotuʻu ia ko ha founga angamaheni ke toe vakaiʻi e ngaahi lēsoni ka hokó ʻi hoʻo ongoʻi ʻoku ueʻi koé.

Ngaahi Fokotuʻu ki Hono Akoʻí

ʻOku fie maʻu hotau sino fakatuʻasinó mo e ngaahi aʻusia fakamatelié ke tau maʻu ai ʻa e moʻui taʻengatá.

Fakaʻaliʻali ʻa e tūkunga ko ʻení (fakakaukau ke liliu ia ʻo ka fie maʻu ke felāveʻi ange ki hoʻo kau akó).

ʻOku anga fakakaumeʻa mo fakafiefia e feohi mo ho kaungā-ngāue ko Timītulií. ʻOkú ne tui ki he ʻi ai ha “taimi fakafiefiá.” ʻOkú ne tulifua ki he taimi fakafiefiá. ʻOkú ne konā he fakaʻosinga ʻo e uiké, ʻa ia ʻoku faʻa kau ai ha fakaʻaongaʻi e kavamālohí pe faitoʻo konatapú. ʻOku ʻikai ke ne mali ka ʻoku feohi fakasekisuale. ʻOkú ne faʻa lea ʻaki e ngaahi meʻa hangē ko e, “Kapau ʻoku ongo lelei, fakahoko ia” pe “ʻOku taha pē hoʻo moʻuí.” ʻOkú Ne fakakaukau ʻoku fakapōpula mo taʻeoli hoʻo moʻuí koeʻuhí ʻokú ke tauhi ʻa e ngaahi tuʻunga moʻui angamaʻa ʻo e Siasí. Naʻá ne toki fehuʻi atu kimuí ni, “Ko e hā ʻoku ʻikai ke ke fiefia ange ai ʻi he moʻuí?”

Fakaafeʻi e kau akó ke aleaʻi mo ha hoa pe fakakulupu iiki e founga te nau tali ʻaki e fehuʻi ʻa Timītulií. Poupouʻi e kau akó ke fakakaukau ki he founga ʻe lava ai ʻe he ngaahi moʻoni fekauʻaki mo hotau sino fakatuʻasinó mo e taumuʻa ʻo ʻetau moʻui fakamatelié ne akoʻi ʻi he konga 1 ʻo e naunau teuteú ʻo tokoniʻi ʻenau talí. Hili ha taimi feʻunga, fakaafeʻi ha kau ako ʻe niʻihi ke vahevahe ʻenau talí. Hiki leva e moʻoni ko ʻení ʻi he palakipoé: ʻOku teuteuʻi kitautolu ʻe hotau sino fakatuʻasinó mo e ngaahi tuʻunga ʻo e moʻui fakamatelié ke tau hoko ʻo hangē ko e ʻOtuá.

• ʻOku teuteuʻi fēfē kitautolu ʻe he maʻu ha sino fakasinó mo aʻusia e ngaahi tuʻunga ʻo e moʻui fakamatelié ke tau hoko ʻo hangē ko e ʻOtuá? (Fakakaukau ke fakaafeʻi e kau akó ke nau toe vakaiʻi e ngaahi fakamatala ʻa ʻEletā D. Toti Kulisitofasoni mo Tēvita A. Petinā ʻi he konga 1 ʻo e naunau teuteú. ʻI hono vahevahe ʻe he kau akó ʻa e ngaahi fakakaukaú, fai ha ngaahi fehuʻi vakaiʻi ke tokoni ke fakaloloto ʻenau mahinó.)

Te tau lava ʻo ikunaʻi ʻa e tangata fakakakanó ʻo fakafou ʻia Sīsū Kalaisi.

Tohi e kupuʻi lea ko ʻení he palakipoé: Ko e Tangata Fakakakanó. Fakaafeʻi ha ongo tamaiki ako ke na lau leʻolahi e ʻAlamā 41:11 mo e 1 Kolinitō 2:14. Kole ki he kalasí ke muimui ki ai, ʻo kumi e ngaahi lea pe kupuʻi lea ʻoku nau fakamatalaʻi e tangata fakakakanó. Hiki ʻa e tali ʻa e kau akó ʻi he palakipoé. Fakaafeʻi e kau akó ke toe vakaiʻi e fakamatala ʻa ʻEletā Petinā ʻi he konga 2 ʻo e naunau teuteú ke kumi ha ʻulungaanga lahi ange ke tānaki ki he lisi he palakipoé.

• Fili ha taha ʻo e ngaahi ʻulungaanga ʻo e tangata fakakakanó naʻe hiki ʻi he palakipoé. ʻE uesia fēfē ʻe he ʻulungaanga ko iá ha vā fetuʻutaki teiti pe fakafāmili?

Tohi e kupuʻi lea ko ʻení ʻi he palakipoé: Ko e Tangata pe Fefine Naʻe Liliu ʻe Sīsū Kalaisí. Fakaafeʻi e kau akó ke lau e Mōsaia 3:19 pea kumi e founga te tau lava ʻo ikunaʻi ai e tangata fakakakanó.

• ʻE tokoniʻi fēfē kitautolu ʻe he Laumālie Māʻoniʻoní mo e Fakamoʻuí ke tau ikunaʻi ʻa e tangata fakakakanó? (Mahalo ʻe vahevahe ʻe he kau akó ha ngaahi tali ʻoku faitatau mo e tefitoʻi moʻoni ko ʻení: ʻI heʻetau talangofua ki he ngaahi fakahinohino ʻa e Laumālie Māʻoniʻoní, ʻe tokoniʻi kitautolu ʻe Sīsū Kalaisi ke siʻaki ʻa e tangata fakakakanó pea hoko ʻo māʻoniʻoni ʻi Heʻene Fakaleleí. Te ke lava foki ʻo fakaʻaongaʻi e ngaahi fakamatala ʻa ʻEletā Petinā mo Pīsope Sēlati Kōsei ʻi he konga 3 ʻo e naunau teuteú ke tokoni ke mahino ki he kau akó e tefitoʻi moʻoni ko ʻení.)

Fakakaukau ke fakahoko ha taha pe lahi ange ʻo e ngaahi fehuʻi ko ʻení ke tokoni ke fakaloloto e mahino ʻa e kau akó:

• ʻE tokoni fēfē ʻa e tefitoʻi moʻoni ko ʻení ki ha taha ʻokú ne ongoʻi he ʻikai ke ne lava ʻo liliu pe puleʻi ʻa e ngaahi uʻa mo e ongo mālohi ʻo e tangata fakakakanó?

• Ko e hā ha ngaahi meʻa ʻoku mahino ki he Fakamoʻuí fekauʻaki mo e ngaahi pole ʻo ha sino fakatuʻasinó?

• Ko e hā kuó ke ako fekauʻaki mo e Fakamoʻuí mei he founga kuó Ne tokoniʻi ai koe ke ke “liʻaki” pe ikunaʻi ʻa e tangata fakakakanó pea hoko ʻo hangē ko Iá? Kuo tokoniʻi fēfē koe ʻe he Laumālie Māʻoniʻoní ʻi he ngaahi ngāue ko ʻení?

Ke tokoni ke fakaʻaongaʻi ʻe he kau akó ʻa e ngaahi moʻoni kuo nau ako ʻi he lēsoni ko ʻení, fakaʻaliʻali ha ngaahi fehuʻi hangē ko ʻení pea fakaafeʻi e kau akó ke lekooti ʻenau ngaahi fakakaukaú mo e ngaahi ongó. (Mahalo ʻe fie tānaki ʻe he kau akó ki heʻenau tali mei he ʻekitivitī “Lekooti Hoʻo Ngaahi Fakakaukaú” ʻi he fakaʻosinga ʻo e konga 3 ʻo e naunau teuteú.)

• Ko e fē ʻi he ngaahi ʻulungaanga faka-Kalaisi ʻoku fakamatalaʻi ʻi he Mōsaia 3:19 ʻoku fie maʻu ke u fakatupulaki kakato angé?

• Ko e hā te u fakahoko ke u falala kakato ange ai ki he Fakamoʻuí mo e ivi tākiekina ʻo e Laumālie Māʻoniʻoní ke tokoniʻi au ke liʻaki ʻa e tangata fakakakanó mo fakatupulaki ʻa e ʻulungaanga faka-Kalaisi ko ʻení?

• Ko e hā ha ola ʻo e liliu ko ʻení ʻi hoku ngaahi vā fetuʻutaki fakafāmilí?

Poupouʻi e kau akó ʻi heʻenau feinga ke ikunaʻi honau ngaahi vaivaí pea hoko ʻo hangē ange ko e Fakamoʻuí. Fakakaukau ke ke fakamoʻoniʻi ange ʻe tāpuakiʻi kinautolu ʻe he ʻEikí ʻaki ha mālohi ke fakatupulaki Hono ngaahi ʻulungāngá mo fakaleleiʻi honau ngaahi vā fetuʻutaki fakafāmilí.

Ki he Kalasi Hokó

Fakaafeʻi e kau akó ke nau fakakaukau ki he meʻa ʻoku nau ʻilo fekauʻaki mo e mahuʻinga fakatokāteline ʻo e mali ʻi he vahaʻa ʻo ha tangata mo ha fefine ʻi he palani ʻa e ʻOtuá. Poupouʻi e kau akó ʻi heʻenau ako e lēsoni 6 ke nau feinga ke fakaloloto ʻenau mahino ki he tokāteline ko ʻení pea mo hono ʻuhinga kiate kinautolu ʻi heʻenau hoko ko e kau ākonga ʻa Sīsū Kalaisí.