Lēsoni 8 Naunau ʻa e Faiakó

Feinga ke Mahino ʻa e Femanakoʻaki ʻa e Tangata mo e Tangata pe Fefine mo e Fefiné mo e ʻOfa ʻi Hotau Kāinga LGBT

ʻI heʻetau hoko ko e kau ākonga ʻa Sīsū Kalaisí, ʻoku fakaafeʻi kitautolu ke tau “takimuʻa ʻi hono fakahaaʻi ʻo e ʻofá, manavaʻofá, mo e tokoní” kiate kinautolu ʻoku nau aʻusia ʻa e femanakoʻaki ʻa e tangata mo e tangata pe fefine mo e fefiné pe fakahā ʻoku nau fakatangata, fakafefine, pe fakafāfine/fakatangatá (Quentin L. Cook, “Let Us Be at the Forefront” [vitiō], ChurchofJesusChrist.org). ʻE maʻu ʻe he kau akó ʻi he lēsoni ko ʻení, ha faingamālie ke ʻiloʻi, aleaʻi, mo fakaʻaongaʻi ai e ngaahi moʻoni ʻo e ongoongoleleí ʻe lava ʻo tokoni ke nau tali ʻi he ʻofa, fakakau, mo fakaʻapaʻapa kiate kinautolu ʻoku nau aʻusia ʻa e femanakoʻaki ʻa e tangata mo e tangata pe fefine mo e fefiné pe ʻoku LGBT.

Ngaahi Fokotuʻu ki hono Akoʻí

Ko Hono Fakatupulaki ʻEtau Founga Akoʻí mo e Akó

Faiako ʻi he loto mahino mo e manavaʻofa. ʻI hoʻo teuteu ki he kalasí, tuku ha taimi ke ke fakakaukau ai ki hoʻo mahino ki he femanakoʻaki ʻa e tangata mo e tangata pe fefine mo e fefiné pea mo hoʻo tōʻonga fakakaukau kiate kinautolu ʻoku pehē ʻoku fakatangata, fakafefine, pe fakafāfine/fakatangatá. Te ke tokoniʻi fēfē ʻa e kau akó ke nau aʻusia ʻa e ngaahi ongo ʻo e ʻofá, fakakau maí, mo e fakaʻapaʻapá ki he fānau kotoa ʻa e ʻOtuá?    

ʻOku fekauʻi ʻe Sīsū Kalaisi ʻEne kau ākongá ke nau feʻofaʻaki ʻo hangē ko ʻEne ʻofa ʻiate kitautolú.

Fakaafeʻi e kau akó ke fakakaukauloto ko e fuofua taimi ʻeni ke kau atu ai ha tokotaha lahi kei talavou ko Sini ki he kalasi ʻinisititiuti ko ʻení. ʻI hono ʻilo ʻe Sini ʻe aleaʻi e tefito ʻo e femanakoʻaki ʻa e tangata mo e tangata pe fefine mo e fefiné ʻi he kalasi ʻo e ʻaho ní, ʻokú ne hohaʻa leva mo loto ke mavahe, koeʻuhí he ʻokú ne fakahā ʻoku fakafefine. Aleaʻi ʻa e ʻuhinga ʻe ongoʻi hohaʻa ai ʻa Siní mo e meʻa ʻe lava ke fai ʻe he kau mēmipa ʻo e kalasí ke tokoniʻi ia mo e niʻihi kehé ke nau ongoʻi malu ʻi he fealēleaʻaki ko ʻení.

Fakaafeʻi e kau akó ke nau lau ʻa e Mātiu 22:37–39 mo e Sione 13:34–35, ʻo vakai ki hono fakamahuʻingaʻi ʻe he Tamai Hēvaní mo Sīsū Kalaisi ʻa e ʻofa ki he niʻihi kehé. Hiki ʻa e moʻoni ko ʻení ʻi he palakipoé: ʻOku fekauʻi kitautolu ke tau feʻofaʻaki ʻo hangē ko e ʻofa ʻa Sīsū Kalaisi ʻiate kitautolú.

• Ko e hā ʻoku mahuʻinga ai ki he kau ākonga ʻa Sīsū Kalaisí ke nau ʻofa ki he niʻihi kehé ʻo hangē ko ʻEne ʻofá?

• Ko e hā ha ngaahi founga ne fakahaaʻi ai ʻe Sīsū Kalaisi e ʻofa haohaoá lolotonga ʻEne ngāue ʻi he matelié? (Fakamanatu ki he kau akó ko e konga ʻo e fealēleaʻakí, ʻoku ʻikai ʻuhinga ʻa e ʻofa ki he niʻihi kehé kuo pau ke tau tui tatau pe poupouʻi ʻa e ngaahi ʻulungaanga ʻoku fehangahangai mo e ngaahi fekau ʻa e ʻOtuá. Naʻe akoʻi loto-toʻa mo mahino ʻe he Fakamoʻuí ʻa e tokāteline ʻa ʻEne Tamaí ʻi he ʻofa.)

• ʻE tataki fēfē kitautolu ʻe he sīpinga ʻo e ʻofa ʻa e Fakamoʻuí lolotonga ʻetau fealeaʻaki fekauʻaki mo e femanakoʻaki ʻa e tangata mo e tangata pe fefine mo e fefiné?

Te tau lava ʻo tali kiate kinautolu ʻoku nau aʻusia ʻa e femanakoʻaki ʻa e tangata mo e tangata pe fefine mo e fefiné ʻaki ʻa e angaʻofá, fakakau maí, mo e fakaʻapaʻapá.

Vahevahe ʻa e kalasí ki he ngaahi kulupu iiki. Fakamatalaʻi ange ʻe aleaʻi ʻe he kulupu takitaha ʻi ha ngaahi miniti siʻi ha tūkunga fekauʻaki mo ha taha ʻokú ne aʻusia ʻa e femanakoʻaki ʻa e tangata mo e tangata pe fefine mo e fefiné. Fakamahinoʻi ange ʻoku faitatau ʻa e tūkunga ko ʻení mo e ngaahi aʻusia moʻoni ʻa ha niʻihi ʻo e kāingalotu ʻo e Siasí ʻi he moʻuí. Ke tokoni ke fakatefito e fealēleaʻaki ʻa e kau akó ʻi he ngaahi tefitoʻi moʻoni ʻo e ongoongoleleí, te ke lava ʻo fakaafeʻi e mēmipa takitaha ʻo e kulupú ke nau ʻuluaki fakamanatu ha taha ʻo e ngaahi konga ʻi he naunau teuteú.

Hili hono maʻu ʻe he kau akó ha taimi ke toe vakaiʻi ʻenau ngaahi kongá, ʻoange ki he tokotaha ako takitaha ha tatau ʻo e laʻipepa tufa ʻoku maʻu ʻi he fakaʻosinga ʻo e lēsoni ko ʻení. Fakahinohinoʻi e kau akó ke nau lau fakalongolongo ʻa e tūkungá pea aleaʻi fakakulupu leva ʻa e ngaahi fehuʻi ʻoku hoko mai aí.

Hili hono maʻu ʻe he kau akó ha taimi lahi ke aleaʻi e tūkungá mo e ngaahi fehuʻí, fakaafeʻi ha niʻihi ʻo kinautolu ke vahevahe e meʻa ne nau ako pe ongoʻi lolotonga ʻenau fealēleaʻakí. ʻI hono vahevahe ʻe he kau akó ʻenau ngaahi fakakaukaú, fakakaukau ke fai ha ngaahi fehuʻi vakaiʻi ʻe tokoni ke fakalahi ʻenau mahino ki he tefito ko ʻení. Ko ha ngaahi sīpinga ʻeni ʻe niʻihi ʻo e ngaahi founga ke fokotuʻutuʻu ʻaki e ngaahi fehuʻi vakaiʻí:

• Kuo takiekina fēfē ʻe he fakakaukau/moʻoni/tefitoʻi moʻoni ko iá …

• Ko e fē ha taimi kuó ke ongoʻi/sio/aʻusia ai …

• Ko e hā ha sīpinga ʻo e …

• Te ke lava fēfē ʻo ngāue ʻi he tuí ke …

Hili e fealeaʻakí, ʻeke ki he kau akó pe ʻoku ʻi ai haʻanau ngaahi fehuʻi pe hohaʻa fekauʻaki mo e femanakoʻaki ʻa e tangata mo e tangata pe fefine mo e fefiné kuo teʻeki ke aleaʻi.

Ke tokoni ke fakaʻaongaʻi ʻe he kau akó e meʻa kuo nau akó, fakakaukau ke fakaʻaliʻali e ngaahi fehuʻi ko ʻení pea fakaafeʻi e kau akó ke fili ha fehuʻi ʻe taha pe lahi ange ʻoku felāveʻi mo kinautolú. Poupouʻi e kau akó ke fakalaulauloto ki heʻenau fehuʻí (pe ngaahi fehuʻí) pea lekooti ha faʻahinga ongo ʻoku nau maʻu.

• Ko e hā ʻoku fie maʻu ke u liliu fekauʻaki mo e anga ʻeku fakakaukaú mo e tōʻongá koeʻuhí ke u fakahoko ki he kakai kotoa pē, kau ai ʻa kinautolu ʻoku nau aʻusia ʻa e femanakoʻaki e tangata mo e tangata pe fefine mo e fefiné, ha ʻofa, fakakau mai, mo e fakaʻapaʻapa lahi angé? Te u falala fēfē ki he Fakamoʻuí ʻi heʻeku fai e ngaahi liliu ko ʻení?

• ʻI heʻeku hoko ko ha tokotaha kuo aʻusia ʻa e femanakoʻaki ʻa e tangata mo e tangata pe fefine mo e fefiné, ʻe tokoniʻi fēfē au ʻe he tokanga taha ki he Fakamoʻuí mo ʻEne ongoongoleleí ke u moʻui ʻi he ʻamanaki lelei mo e fiefia lahi angé? Kapau kuo teʻeki ke u vahevahe ʻeku aʻusiá mo ha taha, ko hai te u lava ʻo kole tokoni ki aí? (Fakatokangaʻi ange: Kapau ʻokú ke fili ke fakahaaʻi hoʻo ongoʻi femanakoʻaki ʻa e fefine mo e fefine pe tangata mo e tangatá, fakakaukauʻi ʻi he faʻa lotu ʻa e niʻihi ʻokú ke fie fakahā ki aí mo e founga ke vahevahe ai ʻa e tafaʻaki ko ʻeni ʻo hoʻo aʻusia fakamatelié.)

Talanoa ʻo Siakisoní

Ko e Fāmili Taʻengatá - Naunau ʻa e Faiakó—Lēsoni 8

Naʻe ohi hake ʻa Siakisoni ʻi ha fāmili ko e kāingalotu faivelenga ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ʻi ai ʻene ongomātuʻa ʻofa pea ʻokú ne vāofi tautautefito mo hono tuofefine ko Seliná.

ʻOku ʻofa ʻa Siakisoni ʻi he ongoongoleleí pea maʻu ha fakamoʻoni kia Sīsū Kalaisi mo hono Fakafoki Mai ʻo e Ongoongoleleí. ʻOku ʻiloa ia ʻi heʻene natula fiefia mo fakamaheni ngofuá. Ka kimuí ni mai, kuo fetongi ʻene fiefiá ʻe he mamahí, pea kuo fakautuutu ʻene nofo tokotahá. ʻOku ʻi ai ha fakapulipuli ʻa Siakisoni pea ʻoku ʻikai ke ne ʻilo e meʻa ke fai ki aí.

ʻI he fuoloa taha ʻo e manatu ʻa Siakisoní, naʻe lahi ange ʻa ʻene manako he kakai tangatá ʻi he houʻeiki fafiné. Naʻá ne feinga ʻi ha ngaahi taʻu lahi ke tukunoaʻi e ngaahi ongo ko ʻení pe fakangalingali pē naʻe ʻikai ha ongo pehē. Koeʻuhí naʻe ʻikai teitei talanoaʻi ʻa e kaveingá ni ʻi hono ʻapí, naʻá ne ongoʻi ai ko ha fepōtalanoaʻaki tapuhā ia. Naʻe faʻa fai ʻe hono ngaahi kaungāmeʻá he taimi ʻe niʻihi ha ngaahi fakamatala tukuhifo fekauʻaki mo e kakai fakatangatá. Ko e meʻa pē ʻokú ne manatuʻí ko e fanongo mei he kau faiako mo e kau taki ʻi he siasí ko e tōʻonga fakahomosekisualé ko ha angahala mamafa ia.

Kimuʻa pea ngāue fakafaifekau ʻa Siakisoní, naʻá ne toutou tautapa ki he ʻOtuá ke toʻo ʻene manako ʻi he kakai tangatá. Naʻá ne ongoʻi falala kapau te ne ʻalu ʻo ngāue fakafaifekau, ʻe liliu ʻene ngaahi ongó. Ka neongo ia, talu mei he ʻosi e ngāue fakafaifekau ʻa Siakisoní, mo e kei vilivili pē ʻene manako ʻi he kakai tangatá. ʻOku loto moʻoni ʻa Siakisoni ke talanoa mo ha taha, ka naʻá ne fakalongolongo koeʻuhí ko ʻene manavasiʻí.

Kuo fakatokangaʻi ʻe Selina ʻene mamaʻo mei honau fāmilí. ʻOkú ne lava ʻo sio ki he mamahi ʻi hono fofongá. Kuó ne lotua ʻa Siakisoni mo lotua ke ʻilo e founga ke tokoniʻi ai iá.

Naʻe kole ange ʻe Selina ʻi he pongipongi ko ʻení kia Siakisoni pe ʻe lava ke na lue fakataha. Naʻá ne tali momou pē. ʻI heʻena lué, naʻá na talanoa ki he ngaahi meʻa fakaʻahó. Naʻe aʻu ʻo ʻai ʻe Selina ʻa Siakisoni ke malimali. Ne faifai pea pehē ange ʻe Selena, “Siakisoni, ʻoku ou ʻiloʻi ʻoku ʻi ai e meʻa ʻoku fehalaaki. ʻOku ou lava pē ʻo tala ʻi ho fofongá. Kātaki ʻo talamai. ʻOku ou hohaʻa ʻaupito kiate koe.”

Naʻe tuʻu maʻu ʻa Siakisoni ʻi ha taimi lōloa. Naʻe kamata ke tafe hifo e loʻimatá ʻi hono fofongá. Fāifai, ne ʻikai ke ne lava kukuta e ngaahi ongo hono lotó, peá ne lea ange mo e tetetete hono leʻó, “Selina, ʻoku ou manako tangata pea kuo pehē maʻu pē ia talu mei fuoloa. ‘Oku ‘ikai ke u ‘ilo e meʻa ‘ke faí. ʻOku ou ilifia ki he meʻa ʻe lea ʻaki ʻe Mami mo Tetí ʻo kapau te na ʻilo. ʻE mā nai e toenga hotau fāmilí ʻiate au? ʻE kei loto nai hoku ngaahi kaungāmeʻá ke mau feohi kapau ʻoku nau ʻiloʻi ʻoku ou manako tangata? Ko e hā ʻe hoko ki hoku mēmipasipi ʻi he Siasí kapau te u talaange ki he pīsopé? ʻOku ʻikai ke u ʻilo pe ʻe anga fēfē haʻaku fiefia mo maʻu ha fāmilí. ʻOku ou ongoʻi hangē kuo liʻaki au ʻe he ʻOtuá.”

Naʻe punou pē ʻa Siakisoni ʻo sio fakamamaʻu ki he kelekelé. Hili haʻane kiʻi longo fuoloa, naʻá ne lea leʻo siʻi ange, “Selina, fakamolemole kapau kuó u fakamamahiʻi koe. Kātaki ʻoua naʻá ke tala ki ha taha. ʻOku ou ongoʻi hē mo puputuʻu ʻaupito.”

Ngaahi Fehuʻi Ke Aleaʻí

1. Ko e hā ha ngaahi ongo ʻokú ke maʻu ʻi hoʻo fakakaukau ki he aʻusia ʻa Siakisoní? Ko e hā ʻe ala faingataʻa ai ke talanoa fekauʻaki mo e femanakoʻaki ʻa e tangata mo e tangata pe fefine mo e fefiné mo ha mēmipa ʻo e fāmilí, kaungāmeʻa ofi, pe taki ʻo e Siasí?

2. Te ke ongoʻi fēfē nai kapau ko Selina koe? Ko e hā ʻe lava ke fai ʻe Selina ke tali ʻaki ʻi he loto mahino mo e manavaʻofá?

3. ʻE tokoni fēfē ha mahino totonu ki he ngaahi akonaki ʻa e ʻEikí ʻi he femanakoʻaki ʻa e tangata mo e tangata pe fefine mo e fefiné kia Selina mo Siakisoni fakatouʻosi? Ko e hā ʻe ala faingataʻa ai he taimi ʻe niʻihi ke tali ʻa e ngaahi akonaki ko ʻení?

4. ʻE founga fēfē ha vakai ʻa Siakisoni mo Selina ki he femanakoʻaki ʻa e tangata mo e tangata pe fefine mo e fefiné ʻaki ha fakakaukau ʻoku taʻengatá?

5. Ko e fē ha feituʻu ʻe lava ke vakai ki ai ʻa Siakisoni ke maʻu ha fakahinohino, fakalotolahi, mo ha tokoni lahi angé?

© 2022 ʻe he Intellectual Reserve, Inc. All rights reserved.

Talanoa ʻo Siakisoní

Ki he Kalasi Hokó

Fakaafeʻi e kau akó ʻi heʻenau ako ʻa e naunau teuteu ki he lēsoni 9 ke fakaʻaongaʻi ha kiʻi taimi ke ako fekauʻaki mo ʻenau ngaahi kuí ʻi he FamilySearch.org pe ko e polokalama ʻAkau Fakafāmilí. Poupouʻi kinautolu ke fakakaukau ki he ngaahi tāpuaki kuo talaʻofa kiate kinautolu ʻoku nau tokoniʻi ʻenau ngaahi kuí ke nau maʻu ʻa e ngaahi ouau fakamoʻuí ʻi he temipalé.