“Lēsoni 28 Naunau ʻa e Faiakó: Fakatuʻamelie ki Hano Faʻu ha Fāmili Taʻengatá,” Ko e Fāmili Taʻengatá - Naunau ʻa e Faiakó (2022)
“Lēsoni 28 Naunau ʻa e Faiakó,” Ko e Fāmili Taʻengatá - Naunau ʻa e Faiakó
Lēsoni 28 Naunau ʻa e Faiakó
Fakatuʻamelie ki Hano Faʻu ha Fāmili Taʻengatá
Te tau lava kotoa ʻo maʻu ha ʻamanaki lelei te tau lava ʻo faʻu ha fāmili taʻengata, ʻo tatau ai pē pe ko e hā e tūkunga hotau fāmilí. ʻE tokoni ʻa e lēsoni ko ʻení ke mahino lelei ange ki he kau akó ʻe lava ke tokoniʻi kinautolu ʻe he ʻEikí ke ola lelei ʻenau faʻu ha fāmili taʻengatá. ʻE maʻu foki ʻe he kau akó ʻa e faingamālie ke vahevahe mo fakapapauʻi ʻa e founga ke fakaʻaongaʻi lahi ange ai ʻa e meʻa kuo nau ako mo aʻusia ʻi he kalasi Ko e Fāmili Taʻengatá.
Ngaahi Fokotuʻu ki Hono Akoʻí
ʻOku finangalo ʻa e ʻEikí ke tokoniʻi kitautolu ke ola lelei ʻetau faʻu ha ngaahi fāmili taʻengatá.
Fakatokangaʻi ange: Fili fakalelei ʻa e founga fakafaiako ki he konga ʻuluaki ʻo e lēsoní ʻa ia ʻe tāpuekina lahi taha ai hoʻo kau akó. Fakapapauʻi ʻokú ke tuku ha miniti nai ʻe 20 ki he konga fakaʻosi ʻo e lēsoní.
Kamata e lēsoní ʻaki hono fakaafeʻi e kau akó ke nau fakalaulauloto mo hiki ʻenau ngaahi fakakaukau fekauʻaki mo e fehuʻi ko ʻení:
-
Ko e hā ha ngaahi ʻamanaki lelei ʻokú ke maʻu ki hono faʻu ha fāmili taʻengatá?
Hili ha taimi feʻunga, fakaafeʻi ha niʻihi ʻo e kau akó ke vahevahe ʻenau fakakaukaú ʻo kapau ʻoku nau fiemālie ki ai.
Fakaʻaliʻali e moʻoni ko ʻení mei he fakamatala ʻa ʻEletā Tēvita A. Petinā ʻi he konga 2 ʻo e naunau teuteú: “ʻI he tokoni ʻa e ʻEikí, te ke lava ʻo faʻu ha fāmili taʻengata” (“Ko ha Fehokotakiʻanga Mālohi” [fakataha lotu fakaemāmani lahi maʻá e kakai lalahi kei talavoú, 10 Sepitema 2017], broadcasts.ChurchofJesusChrist.org).
Fili ha taha ʻo e ngaahi ʻekitivitī ko ʻení ke tokoni ki he kau akó ke fakaloloto ʻenau mahino ki he moʻoni ko ʻení pea tuku ke nau vahevahe ʻa e meʻa ne nau ako lolotonga ʻenau teuteu ki he kalasí:
Fili 1
Fakamanatu ki he kau akó naʻe fakaafeʻi kinautolu ʻi he ʻekitivitī “Lekooti Hoʻo Ngaahi Fakakaukaú” ʻi he konga 1 ʻo e naunau teuteú ke nau ʻiloʻi ha sīpinga mei he folofolá pe ko e aʻusia honau fāmilí ki he founga ʻoku tokoniʻi ai ʻe he ʻEikí ʻa kinautolu ʻoku falala kiate Ia mo fekumi ki Heʻene tokoní. ʻOange ha ngaahi miniti siʻi ki he kau akó ke nau toe vakaiʻi ʻenau ngaahi sīpingá mo ʻenau tali ki he ngaahi fehuʻí.
Vahevahe ʻa e kau akó ke tautau toko ua pe fakakulupu iiki. ʻOange ha taimi feʻunga ki he kau akó ke vahevahe ʻenau ngaahi sīpingá mo ʻenau ngaahi talí.
ʻI he ʻosi ʻa e kau akó, hiki ʻa e sētesi taʻe kakato ko ʻení ʻi he palakipoé: Manatuʻi maʻu pē: . ʻOange ki he tokotaha ako takitaha ha laʻipepa siʻisiʻi mo ha meʻi tepi. Fakaafeʻi e kau akó ke nau hiki e founga te nau fakakakato ʻaki e sētesi ʻi he palakipoé ke faʻu ha foʻi moʻoni ʻo makatuʻunga ʻi he meʻa kuo nau ako ʻi heʻenau fealēleaʻaki fakakulupú ʻa ia ʻoku tokoni ke nau ongoʻi ʻamanaki lelei ange ai ki hono faʻu ha fāmili taʻengatá. Kole ange leva ki he kau akó ke fokotuʻutuʻu takatakai ʻenau laʻipepá ʻi he lokí. (Kapau ʻoku tokosiʻi hoʻo kalasí, mahalo te ke liliu e ʻekitivitī ko ʻení ʻaki hono fakaafeʻi e kau akó ke hiki ʻenau ngaahi talí ʻi he palakipoé.)
ʻOange ki he kau akó ha ngaahi miniti siʻi ke nau lue takai ai ʻi he lokí pea lau ʻa e fakamatala ʻa e tokotaha takitaha. ʻI he ʻosi ʻa e kau akó, poupouʻi kinautolu ke nau lekooti ha toe ngaahi moʻoni kehe ʻoku nau fie manatuʻi pe ngaahi ongo naʻa nau maʻu.
Fili 2
Fakamatalaʻi ange mahalo ʻe faingataʻa ki ha niʻihi ʻo kitautolu ke tau fakatuʻamelie ki hano faʻu ha fāmili taʻengata koeʻuhí kuo teʻeki ai ke tau aʻusia ha sīpinga fakafāmili angatonu ʻi hotau ngaahi fāmilí.
-
Ko e hā te tau lava ʻo ako mei he aʻusia ʻa e palōfita ko ʻĒpalahamé ʻe lava ke ne ʻomi ai ha ʻamanaki leleí? (Poupouʻi e kau akó ke nau fakamanatu e meʻa naʻa nau ako kau kia ʻĒpalahamé ʻi he konga 2 ʻo e naunau teuteú. Fakakaukau ke mou lau fakataha ʻa e ʻĒpalahame 1:2. Hili iá pea tokoni ke ʻiloʻi ʻe he kau akó ha moʻoni hangē ko ʻení: Te tau lava ʻo hoko ko e liliuʻanga ki hotau fāmilí pea fili ʻa e angamāʻoniʻoní neongo pe ko e hā e ngaahi tūkunga hotau fāmilí.)
-
Ko hai, kapau ʻoku ʻi ai ha taha, kuo hoko ko ha meʻangāue ʻi hono kamata (pe hokohoko atu) ʻa e ngaahi sīpinga fakafāmili angatonú ʻi ho fāmilí? Ko e hā ha meʻa makehe kuo fakahoko ʻe he fili ʻa e tokotahá ni ʻi hoʻo moʻuí?
Fakaafeʻi ha tokotaha ako ke ne lau leʻolahi e palakalafi tolu mo e nima ʻi he fakamatala ʻa ʻEletā Tēvita A. Petinā ʻi he konga 2 ʻo e naunau teuteú.
-
ʻE tokoniʻi fēfē koe ʻe he ʻEikí ke “fakamālohia ho fehokotakiʻangá pea mahalo te ke lava foki ʻo tokoni ke hoko ʻa e ngaahi fehokotakiʻanga ne motuhí”? (“Ko ha Fehokotakiʻanga Mālohi”). (Mahalo te ke fie fakaafeʻi e kau akó ke hiki ʻenau ngaahi tali ki he fehuʻi ko ʻení kae ʻikai aleaʻi fakakalasi kinautolu.)
Fakaafeʻi e kau akó ke nau fakakaukau ki he ngaahi fehuʻi naʻe fakaafeʻi ke nau fakalaulauloto ki ai fekauʻaki mo e ngaahi sīpinga fakafāmili ke kamata, hoko atu, pe taʻofí (vakai ki he konga 2 ʻo e naunau teuteú). Poupouʻi e kau akó ke lekooti ha faʻahinga fakakaukau pe ongo ʻoku nau maʻu.
ʻOku tāpuekina kitautolu ʻi heʻetau fakakaukau ki he meʻa kuo tau akó mo palani ha ngaahi founga ke fakaʻaongaʻi ai iá.
Ko Hono Fakatupulaki ʻEtau Founga Akoʻí mo e Akó
ʻOange ha taimi ki he kau akó ke nau fakakaukau. ʻE lava ke maʻu ʻe he kau akó ha taumuʻa mo ha ʻuhinga loloto ange ki heʻenau akó ʻi heʻenau fakaʻaongaʻi ha taimi ke fakakaukau ki he founga kuo tākiekina ai ʻe he ngaahi moʻoni ʻo e ongoongoleleí honau ʻatamaí, lotó, mo e moʻuí. ʻE lava ke tokoni hono poupouʻi e kau akó ke nau fakakaukau ki he founga te nau fakaʻaongaʻi ai e meʻa kuo nau ako mo ongoʻí ke fakaloloto ʻenau uluí.
Fakakaukau ke fakaʻaliʻali ha tatau ʻo e “Ko e Fāmilí: Ko ha Fanongonongo ki Māmani” (ChurchofJesusChrist.org). Fakamanatu ki he kau akó ʻa e faingamālie kuo nau maʻu ʻi he kalasi ko ʻení ke ako e ngaahi akonaki fekauʻaki mo e fāmilí ʻaki ha fakakaukau ʻoku taʻengatá.
Fakaʻaliʻali e hingoa ʻo e ngaahi lēsoni mei he kalasi ko ʻení, pe fakaafeʻi e kau akó ke nau vakai ki ai ʻi heʻenau meʻangāue fakaʻilekitulōniká. ʻOange ha taimi ki he kau akó ke nau toe vakaiʻi ai e hingoa ʻo e lēsoní ke tokoni ke nau fakakaukau ki he meʻa kuo nau ako, ongoʻi, mo aʻusia lolotonga e kalasi ko ʻení. Fakaafeʻi leva e kau akó ke vahevahe ʻenau fakakaukaú. Mahalo te ke fie fai ha ngaahi fehuʻi hangē ko ʻení ke fakalahi ange e fealeaʻakí:
-
Kuo takiekina fēfē ʻe he kalasi ko ʻení hoʻo mahinó mo hoʻo fakamoʻoni ki he ngaahi akonaki ʻa e ʻEikí ki he nofo-malí mo e fāmilí?
-
Ko e hā ha meʻa mahuʻinga taha kuó ke ako mei he kalasi ko ʻení?
-
Ko e hā kuó ke ako fekauʻaki mo e Tamai Hēvaní mo Sīsū Kalaisi ʻi he kalasi ko ʻení? Kuo fakamālohia fēfē ho vā fetuʻutaki mo Kinauá?
Ke fakaʻosi e lēsoni ko ʻení, te ke lava ʻo fakaafeʻi ha tokotaha ako ke lau leʻolahi e fakamatala ʻa Palesiteni M. Lāsolo Pālati ʻi he konga 3 ʻo e naunau teuteú. Mahalo ʻe tokoni ke fakaʻaliʻali ʻa e ngaahi fehuʻi ko ʻení pea ʻoange ki he kau akó ha ngaahi miniti siʻi ke lekooti ai ʻenau ngaahi fakakaukaú pe ngaahi ongo fekauʻaki mo kinautolú:
-
ʻE kehe fēfē hoʻo moʻuí koeʻuhí ko e meʻa kuó ke ako mo aʻusia ʻi he kalasi ko ʻení? Te ke lava fēfē ʻo hangē ange ko Sīsū Kalaisí?
Fakakaukau ke fakaafeʻi ha kau ako pē ʻoku nau fie vahevahe ʻenau fakamoʻoní fekauʻaki mo e mahuʻinga ʻo e fāmilí ʻi he palani ʻo e fiefia ʻa e Tamai Hēvaní ke nau fakahoko ia, ʻo ka ʻi ai ha taimi. Fakakaukau ke fakahoko foki hoʻo fakamoʻoní. Pea poupouʻi e kau akó ke hokohoko atu ʻenau lesisita ki he ʻinisititiutí.