15. Jericho

Mfonyin yi kyerɛ nduadzewa na ndua a ofifir wɔ Jericho ndɛ da yi. Tsetseberdo no nna ɔyɛ kuropɔn a afasu abɔ ho aporɔw wɔ Esutsen Jordan bɔnsa no mu; ɔwɔ po ntaae ase meter 252. Ɔyɛ bea frɔmfrɔm, bea a ekuadze tse dɛ akyiresua na ekutu yɛ yie wɔ. N’ekyir hɔ nye bea a nkorɔfo agye atomu dɛ ɔyɛ Nsɔhwɛ Bepɔw no (Matt. 4:1–11).

Dza Osisii Tsitsir: Bea yi nkyɛn na Joshua nye Israelmba no dzii kan twaa Esutsen Jordan no, na wɔhɛɛn anohoba asaase no do (Josh. 2:1–3; 3:14–16). Nwanwa mu ara Ewuradze maa afasu no bui guu famu wɔ Israel dɔm no enyim (Josh. 6; hwɛ Heb. 11:30 so). Joshua dze ndom braa kuropɔn no (Josh. 6:26), a ɔyɛɛ hɔ (1 Ahem. 16:34). Elisha saa Jericho esu no yarba (2 Ahem. 2:18–22). Agyenkwa no faa ha wɔ No Jerusalem nserae a odzi ewiei no, Ɔsaa Bartimaeus onyifurafo no yarba na Ɔnye Zacchaeus, towgyenyi no tsenae (Mark 10:46–52; Luke 18:35–43; 19:1–10). Kwan a wɔfa do fi Jerusalem kɔ Jericho no na wɔkãa ho asɛm wɔ abɛbu a ɔfa Samarianyi ɔyamuyiefo ho no (Luke 10:30–37). (Hwɛ KK Jericho.)