Adzesua Mboa horow

Bible Mu Mfonyin Horow

Bible Mu Mfonyin Horow

Bible Mu Mfonyin Horow

Mbueienyi
Bea a ho hia mfonyin yinom no kyerɛ nsaase a Jesus nantsewee, mbea a Bible mu nkɔnhyɛfo tsenae na wɔkyerɛkyerɛe, na mbea a kyerɛwsɛm mu nsɛm pii sisii.
Hwɛbew
Map a odzi do yi kyerɛ bea a mfonyin a ɔwɔ ɔfã yi mu no wɔ. Nkrataafa odzi do yinom mu no, nkyerɛkyerɛmu tsiabaa bi kã mfonyin nkanee biara ho a ɔkyerɛ mber no. Kyerɛwsɛm mu dza osisii wɔ dɛm apaamu no do tsitsir no wɔakyerɛw, dze akã kyerɛwsɛm ntõtõho no ho ama eetum ehu mbea a ɔwɔ dɛ ekenkan dze hu nsɛm pii a ɔfa dza osisii no ho.
1. Esutsen Nile na Egypt
Nduadzewa na ndua a ofifir wɔ Esutsen Nile n’esuegya. Bea a ɔtse dɛm no na Moses ne nã dze n’abodomaba banyimba no sumae no. N’ekyir hɔ no yɛ sar mbea a ɔkata Egypt ne kɛse do.
2. Bepɔw Sinai (Horeb) na Sinai Sar do
Mbea pii na obotum ayɛ Bepɔw Sinai ne bea. Mbea no no mu kor a nkorɔfo gye to mu papaapa no nye Jebel Musa (Moses ne Bepɔw) a, no mfonyin wɔ ha yi.
3. Judea Sar do
Judea sar no da Jerusalem no boka na osian kɔ Po Wui no mu.
4. Kadesh-barnea
Iyi yɛ sar kɛse bɔnsa n’etsifiboka afamu a Kadesh-barnea wɔ no. Esuba a ɔpem ha nsutɔber mu no ma ha yɛ nsutae bea a ɔma ekuadze fifir yie wɔ Zin sar do.
5. Patriarchfo hɔn Nda
Dan yi, yɛ dza ɔayɛ atsenkã kɛse mu kor a ɔwɔ Asaase Krɔnkrɔn no do no, Ɔhen Herod na osii no wɔ Hebron wɔ bea a fi tsetseberdo nyina wonyim dɛ ɔyɛ Machpelah ɔbo-tu no ne sibea, dza Abraham tɔe dze yɛɛ ebusua efunsiebea no (Gen. 23).
6. Judea Koko Man
Judea koko kurow no ne tsentsen yɛ kilomita 56 na ne tɛtɛr kilomita 27. Asaase no ne kɛse yɛ abo-abo na ɔyɛ dzen dɛ wɔbɛyɛ kua wɔ do. Mbɔnsa akyekyɛ akoko no mu, a no mu asaase no ye kakra ma kuayɛ. Tsetseberdo no Israelfo no tsenaa akoko yinom mu, dze bɔɔ hɔnho ban fii etuabɔfo nsa.
7. Bethlehem
Mfonyin yi kyerɛ akoko abo-abo na nguanhwɛfo kwã wɔ enyim afamu, a ndɛ mber yi Bethlehem kuropɔn no wɔ ekyir afamu.
8. Jerusalem
Erohwɛ Jerusalem etsifi afamu. Muslim som bea a ɔwɔ korkorba fã a woebutuw no a wɔdze sika egu ho no wɔ mfonyin no ne finimfim, a wɔfrɛ no Dome of the Rock (Ɔbotan Korkorba Fã a Woebutuw no). Tsetseberdo no Jewfo sɔɔr wɔ temple no a ɔwɔ ha mu. Afasu a ɔbɛn Dome of the Rock no twa Jerusalem kuropɔn no ho hyia. Afasu no ne nyimfa nye Kidron Bɔnsa. Ɔdze kɔ nyimfa ekyir no ho a onnyi mfonyin yi mu nye Ngo Bepɔw no. Ɔdze kɔ etsifi no, dze tra Dome of the Rock no, nye bea a annhwɛ a ɔyɛ Golgotha no, anaa Calvary no.
9. Herod ne Temple
Mfonyin yi kyerɛ Herod ne temple no ne saso (1:50 nhwɛdo saso kakraba) dɛ ma abemfo nyim dɛ ɔtse wɔ Christ N’Awoo Ekyir afe 67 mu. Afasu a ɔbɔ temple nye adan a ɔwɔ hɔ nyina ho aporɔw no na ɔkã krɔnkrɔn-bea no a ɔyɛ Krɔnkrɔn-mu-Krɔnkrɔn, bea krɔnkrɔn no, na adampan akɛse ebiasa no hyɛmu.
10. Ntwerba a wɔdze kɔ Temple no
Temple hɔ no wɔakyekyɛ mu dampan dampan, na abowano adampan no woesisi no famu koraa. Asomfo no duaa mbobow horow mu, dza ɔkã ho nye ntwerba a wɔfow dze kɔ abowano adampan no mu na nkyii wɔdze kɔ fie afamu adampan no mu no. Nkorɔfo mpempem na wɔfoow dɛm ntwerba yi mbertsentsen, a Nyankopɔn ne Ba no kã ho. Ber a Titus no nsordaafo sɛɛ temple no Christ N’Awoo Ekyir afe 70 mu no, dan no mbubui dɛtse no kataa ntwerba no do. Woyiyii fii do mfe 1970 ber mu ber a archaelogyfo rututu Jerusalem kuropɔn dadaw no ne fã beebi no.
11. Ngo Bepɔw
Bea yi n’enyi hwɛ Ngo Bepɔw no wɔ boka. Dan no a ɔwɔ enyim no botum ayɛ bea nna ɔyɛ Gethsemane Ture no. Ɔbɛsɛ 24, 1841 mu no, Elder Orson Hyde a ɔkã Asomafo Duebien no hɔn Quorum ho no nantsewee foow Ngo Bepɔw no na ɔbɔɔ nkɔnhyɛ mpaabɔ dze tuu hɔ hyɛɛ Ewuradze nsa dɛ Abraham ne mba nsan mbra hɔn nkyir na wonsi temple.
12. Gethsemane Ture
Mfonyin yi yɛ ngodua a enyin bi a wotwae wɔ Gethsemane Ture no ne tsetsebea bi do. Agyenkwa no bɔɔ mpaa wɔ nkyɛn ha ber a ofii sor dan no mu ekyir no, anafua no a woribeyi No ama no.
13. Golgotha
Botan afowee yi ne tsebea tse dɛ tsidwerba na ɔwɔ Jerusalem n’ekyir dze kɔ Damascus Abobow ano hɔ. (John 19:17, 20), no botum ayɛ bea a wɔbɔɔ Jesus Christ mbeamudua mu no wɔ.
14. Ture mu Nda
Iyi botum ayɛ Joseph a ofi Arimathea no ne nda. Ndɛ mber yi mu nkɔnhyɛfo enya atsenkã dɛ wɔdze Agyenkwa no fun too ture nda yi a ɔwɔ mfonyin yi mu no.
15. Jericho
Mfonyin yi kyerɛ nduadzewa na ndua a ofifir wɔ Jericho ndɛ da yi. Tsetseberdo no nna ɔyɛ kuropɔn a afasu abɔ ho aporɔw wɔ Esutsen Jordan bɔnsa no mu; ɔwɔ po ntaae ase meter 252. Ɔyɛ bea frɔmfrɔm, bea a ekuadze tse dɛ akyiresua na ekutu yɛ yie wɔ. N’ekyir hɔ nye bea a nkorɔfo agye atomu dɛ ɔyɛ Nsɔhwɛ Bepɔw no (Matt. 4:1–11).
16. Shiloh
Anee afamu bea yi, tsetseberdo Shiloh kuropɔn a woedwuruw egu yi wɔ bankum kakra wɔ mfonyin no finimfin hɔ.
17. Shechem
Tsetse kuropɔn Shechem ne bea. Bepɔw Gerizim na ɔwɔ enyim ha ara yi na n’ekyir, nye Bepɔw Ebal. Shechem da mbepɔw ebien yinom ntamu.
18. Dothan a ɔwɔ Samaria
Dothan ha yi mbepɔw ntseatseaba na mbɔnsa wɔ ha pii. Ɔyɛ edzidzibea pa. Ber a Israelfo tsenaa asaase yi do no, mantɔw yi na wɔdze maa Manasseh.
19. Caesarea na Sharon Petee no a ɔtserɛw dze kɔ Carmel
Erohwɛ etsifi afamu dze fa Caesarea tsetse nsuhɛn gyinabea na Sharon Petee afamu. Ihu Carmel bepɔw no so dɛ ɔtsen wɔ mfonyin no sor hɔ.
20. Joppa
Erohwɛ etsifi-boka afamu wɔ Joppa nsuhɛn gyinabea kuropɔn hɔ.
21. Bɔnsa Jezreel
Erohwɛ anaafo-anee fi Bepɔw Tabor n’etsifi ho dze kɔ Bɔnsa Jezreel, a wɔfrɛ hɔ so dɛ Esdraelon Petee no n’afamu beebi hɔ. Ɔwɔ mu dɛ mpɛn pii no nkorɔfo dween dɛ Bɔnsa Jezreel yɛ bɔnsa kɛse kor, mbom ɔyɛ mbɔnsa pii a wɔtoa Acco Petee na Bɔnsa Jordan na Galilee Po nkwaado no mu. Megiddo bɔnsa dɛm, ehwɛ a ɔwɔ bɔnsa yi n’anee afamu beebi. Nna Bɔnsa Jezreel no nye kwan tsitsir a otwa mu wɔ Asaase Krɔnkrɔn no no mu na ɔwɔ Mediterranean Po a ɔda anee na Jordan Bɔnsa a ɔda boka no ntamu.
22. Bepɔw Tabor
Erohwɛ etsifi-anee dze rokɔ Bepɔw Tabor afamu. Asaase a ɔda famu no a otwa Bepɔw Tabor ho hyia no kã Bɔnsa Jezreel ho. Nazareth da akoko a wɔbɛn Bepɔw Tabor no.
23. Galilee Po na Nhyira Bepɔw no
Erohwɛ anaafo-anee afamu dze kɔ Galilee Po, nsupa nsutaae bi n’etsifi anee nkyɛn hɔ. Koko a ɔwɔ finimfin hɔ n’enyim no na wonyim tsetseberdo nyina dɛ ɔyɛ Nhyira Bepɔw. Capernaum wɔ ɔdze kɔ bankum hɔ, onnyi mfonyin no mu. Tiberia wɔ anaafo ekyir kakra a ɔda anee mpoano afamu.
24. Capernaum
Capernaum, wɔ Galilee Po no mpoano etsifi, hɔ yɛ Jesus ne Galilee ɔsomdwuma bea no ne finimfin (Matt. 9:1–2; Mark 2:1–5). Hɔ yɛ bea a no ho hia na woyi nam ara yie wɔ na ɔyɛ guadzibea, hɔ yɛ Amanamamfo nye Jewfo so fie. Mfe ɔha a odzi kan wɔ Christ N’Awoo Ekyir no dɔm a wɔtse hɔ no ammbor nyimpa 1,000. Capernaum da eguadzifo hɔn akwan no nkwanta do, a asaase a etwa ho ehyia no yɛ asaaseber. Romefo nsordaafo sisii eguaree na mbea a wɔdze ndzɛmba sie wɔ ha. Etumdze pii a ɔyɛɛ wɔ ha nyina ekyir no, nkorɔfo no poow Agyenkwa no somdwuma no. Dɛm ntsi, Jesus paa kuropɔn no (Matt. 11:20, 23–24). Mber guu mu no, Capernaum dwuruwii guu famu na obesi aber yi nyimpa nntse do.
25. Esutsen Jordan
Esutsen Jordan hyɛ ase fi Galilee Po etsifi, pem ba mu, na nkyii ɔtoa do fi anaafo dze kɔ Po Wui mu. Wotwaa mfonyin wɔ bea a ɔbɛn esutsen yi n’ano fi Galilee Po afamu.
26. Caesarea Philippi
Caesarea Philippi da Bepɔw Hermon n’ase. Nsunyiwa yi yɛ Esutsen Jordan n’esutsir no mu kor. Herod Philip a, odzii hen wɔ apaamu ha, kyekyeer kuropɔn bi wɔ ha dze hyɛɛ Caesar (ne hempanyin) na nankasa noho enyimnyam; kuropɔn no nna nkyɛ wɔfrɛ no Panias na ndɛ wɔfrɛ no Banias na Caesarea Philippi so.
27. Nazareth
Nazareth ne nkyirmba kuropɔn yi n’anaafo afamu hwɛbea. Nna Nazareth yɛ ekuraase kakraba bi wɔ Bible aber do.
28. Dan
Tsetse kuropɔn Dan no nna wɔfrɛ no Leshem (Josh. 19:47) anaa Laish (Atsɛ. 18:7, 14) ansaana Israelfo no dzii asaase no do konyim. Esunyiwa a ɔwɔ bea yi do, nye nsunyiwa a ɔwɔ Caesarea Philippi, nye Esutsen Jordan n’etsir tsitsir. Jeroboam ne Temple bea no wɔ mfonyin yi mu.
29. Athens
Mfonyin yi wotwaa fi Areopagus (Koko Mars) a ɔkyerɛ Athens Acropolis no, bea a abosonsɔr enyame horow hɔn krɔnkrɔn-mbea wɔ no. Athens yɛ Attica ne tsetse Greek ahenkurow na Ahyɛmu Fofor mber do no nna ɔwɔ Romefo Achaia mansin mu. Wɔtoo dɛm dzin no dze hyɛɛ Greek abosonsɔrfo no hɔn nyamebaa Athena enyimnyam. Ahyɛmu Fofor mber do no nna Athens ayew ne kɛseyɛ na enyimnyam dadaw, mbom nna enyame mbanyin na mbaa pii nye “Nyame a Wonnyim no” no so hɔn ehonyi na nkaadze da ho sisi hɔ (Ndwu. 17:23).
30. Corinth
Nna Corinth yɛ kurow tsitsir a ɔwɔ Romefo hɔn Achaia mansin mu. Ɔwɔ asaase tseabaa a ɔkã Peloponnesus na Greece asaase toa mu, na ɔwɔ nsuhɛn gyinabea wɔ no boka na anee afa nyina. Nna ɔyɛ kuropɔn a nsuhɛn gyina hɔ na ɔwɔ ahonyadze na nhyɛdo.
31. Ephesus
Greek ɔyɛkyerɛbea a ɔwɔ Ephesus a wodwuruwii guu famu no, bea a Ɔsomafo Paul kãa asɛmpa wɔ. Ahyɛmu Fofor mber do no, Ephesus bɛyɛɛ atsenkã wɔ wiadze nyina mu osian ne temple fɛfɛw a wosii dze hyɛɛ Romefo hɔn nyamebaa Artemis enyimnyam ntsi. Sesei oedwuruw egu famu, nna nkyɛ Ephesus yɛ Romefo hɔn Asia mansin mu no ahenkurow na eguadzibea kɛse. Dwetɛ-edwimfo no a wɔwɔ kuropɔn no mu no tɔɔn Artemis no honyin na iyi maa eguadzi no bɛyɛɛ prɔmprɔm.
32. Patmos Supruw
Patmos, supruw bi a ɔwɔ Aegean Po mu, bea a wɔpaam John kɔr do no (Nyi. 1:9). Dɛ mbrɛ tsetsesɛm kyerɛ no, ɔyɛɛ edwuma wɔ abopae edwuma mu hɔ.