1 Na em i kamap we ensel i bin tokim mi olsem: Lukim! na mi lukim planti nesen na kingdom.

2 Na ensel i bin askim mi: Yu lukim wanem? Na mi bekim: Mi lukim planti nesen na kingdom.

3 Na em i tokim mi: Ol dispela i ol nesen na kingdom bilong ol lain bilong Jentail.

4 Na em i kamap we mi bin lukim wanpela bikpela sios tru i bin kirap namel long ol nesen bilong ol Jentail.

5 Na ensel i bin tokim mi: Lukim wanpela sios em bagarap nogut tru long olgeta narapela sios em bai kirap, em bai kilim ol seint bilong God, ye, na givim pen long ol na pasim ol i go daun, na pasim ol wantaim ain raun long nek bilong ol na bringim ol i go daun long kalabus.

6 Na em i kamap we, mi bin lukim dispela bikpela na nogut sios tru, na mi lukim tewel olsem em i papa bilong em.

7 Na tu mi lukim gol, na silva, na ol silka, na ol retpela bilas, na ol gutpela klos tru ol i bin samapim, wantaim olgeta kainkain dia tumas klos na mi bin lukim planti pamuk meri.

8 Na ensel i bin tokim mi, olsem: Lukim gol, na silva, na ol silka, na ol retpela bilas, na ol gutpela klos ol i bin samapim, na ol dia tumas klos wantaim ol pamuk meri, em ol pasin bilong dispela bikpela na nogut sios tru.

9 Na tu ol bai bagarapim ol seint bilong God, na bringim ol daun long kalabus, bikos long amamasim ol man bilong graun.

10 Na em i kamap we mi bin lukluk na lukim planti solwara, na ol solwara i stap namel na brukim ol lain bilong Jentail na ol tumbuna pikinini bilong ol brata bilong mi.

11 Na em i kamap we ensel i tokim mi: Lukim belhat bilong God i kamap long ol tumbuna pikinini bilong ol brata bilong yu.

12 Na mi lukluk na lukim wanpela man namel long ol lain bilong Jentail, em ol solwara i stap namel na brukim em long ol tumbuna pikinini bilong ol brata bilong mi, na mi lukim Spirit bilong God, olsem em i kamdaun na sikrapim em, na em i go aut long planti sol wara na kamap long ol tumbuna pikinini bilong ol brata bilong mi, em ol i stap long graun bilong promis.

13 Na em i kamap we mi lukim Spirit bilong God, olsem em sikrapim ol narapela lain bilong Jentail, na ol i go aut long kalabus na brukim planti solwara i go.

14 Na em i kamap we, mi lukim planti namba long ol lain bilong Jentail long graun promis, na mi lukim belhat bilong God, olsem em i kamap long ol tumbuna pikinini bilong ol brata bilong mi, na ol lain bilong Jentail ol i go nabaut na paitim ol.

15 Na mi lukim Spirit bilong Bikpela, olsem em i kam long ol lain bilong Jentail, na ol i kamap strongpela na kisim graun bilong ol yet, na mi lukim olsem ol i kamap waitpela, na naispela na gutpela, wankain olsem ol pipol bilong mi bipo ol bin kilim.

16 Na em i kamap we, mi, Nifai, lukim olsem ol lain bilong Jentail ol i go aut long kalabus i daunim ol yet long ai bilong Bikpela, na pawa bilong Bikpela i stap wantaim ol.

17 Na mi lukim olsem ol mama lain bilong Jentail, ol i bung wantaim long ol solwara na long graun tu, long pait wantaim ol.

18 Na mi lukim olsem pawa bilong God i stap wantaim ol, na tu olsem belhat bilong God i kamap long olgeta lain em i bungim long pait wantaim ol.

19 Na mi, Nifai, lukim olsem ol lain bilong Jentail ol i go aut long kalabus na go long graun promis ol i kamap fri long ol han bilong olgeta narapela nesen wantaim pawa bilong God.

20 Na em i kamap we, mi, Nifai, lukim olsem sindaun bilong ol i kamap gutpela long graun, na mi lukim wanpela buk na karim i go wantaim namel bilong ol.

21 Na ensel i bin askim mi: Yu save tok klia bilong dispela buk?

22 Na mi bekim em: Mi no save.

23 Na em i tok: Lukim, em i kamaut long maus long wanpela long ol lain bilong Juda. Na mi, Nifai, i bin lukim dispela buk, na ensel tokim mi: Buk yu lukim em rekot bilong ol lain bilong Juda, na ol i gat ol promis bilong Bikpela, em Bikpela i bin mekim wantaim ol haus bilong Israel, na em tu gat planti profesi bilong ol holi profet, na em i rekot wankain olsem rekot i bin katim na raitim long plet bras, tasol, ol i no planti, tasol, ol i gat ol promis bilong Bikpela, em i bin wokim wantaim ol haus bilong Israel, olsem na, ol rekot i dia tumas tru long ol lain bilong Jentail.

24 Na ensel bilong Bikpela em i tokim mi: Yu bin lukim olsem buk i kamaut long maus bilong wanpela long ol lain bilong Juda, na taim em i kamaut long maus bilong wanpela long ol, em i gat olgeta gutnius bilong Bikpela, long em ol wanpela ten tu aposel ol i witnesim, na ol i witnes olsem long trupela toktok i stap insait long Pikinini Sipsip bilong God.

25 Olsem na, ol dispela samting i go klin stret long ol lain bilong Jentail na long ol lain bilong Juda, olsem long trupela toktok i stap insait long God.

26 Na bihain ol i go aut long han bilong ol wanpela ten tu aposel bilong Pikinini Sipsip, long ol lain bilong Juda i go aut long ol lain bilong Jentail, yu lukim wanpela bikpela na nogut sios tru i bin kirap, em i wanpela bagarap na nogut sios tru long olgeta narapela sios, long wanem, lukim, ol lain bilong dispela bikpela na nogut sios tru i bin rausim planti klia na dia tumas ol gutnius bilong Pikinini Sipsip, wantaim planti promis bilong Bikpela.

27 Na ol i bin wokim olgeta long dispela samting olsem, ol bai paulim tru tru rot bilong Bikpela, inap long ol bai pasim ai na mekim bel bilong lain pikinini bilong ol man long kamap hat.

28 Long wanem, yu lukim olsem bihain dispela buk i bin go long han bilong bikpela na nogut sios tru, olsem planti klia na dia tumas samting ol i bin rausim long buk, em i buk bilong Pikinini Sipsip bilong God.

29 Na bihain long ol dispela klia na dia tumas samting ol i bin rausim, em i go aut long olgeta nesen long ol lain bilong Jentail, na bihain em i go aut long olgeta nesen bilong Jentail, ye, inap long brukim planti solwara i go long ol lain bilong Jentail em ol i bin go aut long kalabus, yu bin lukim—bikos long planti klia na dia tumas samting ol i bin rausim long buk, em i inap long ol lain pikinini bilong ol man long save olsem long klia pasin i stap insait long Pikinini Sipsip bilong God—bikos long ol dispela samting ol i bin rausim long gutnius bilong Pikinini Sipsip, planti bikpela namba tru long ol pipol save pundaun, ye, inap long Satan gat pawa long bosim ol.

30 Tasol, yu bin lukim olsem ol lain bilong Jentail ol i bin go aut long kalabus, na em God i bin apim ol wantaim pawa bilong em, long olgeta narapela nesen long pes bilong dispela graun em i nambawan tru long olgeta narapela graun, em graun God bin promisim wantaim papa bilong yu olsem ol pikinini bilong em bai kisim long ol yet, long dispela as, yu bin lukim olsem God Bikpela bai i no inap larim ol lain bilong Jentail long bagarapim olgeta ol lain hapkas tumbuna pikinini bilong yu, em ol bai i stap namel long ol tumbuna pikinini bilong ol brata bilong yu.

31 Na tu, God Bikpela bai i no inap larim ol lain bilong Jentail long bagarapim ol tumbuna pikinini bilong ol brata bilong yu.

32 Na tu, God Bikpela bai i no inap larim ol lain bilong Jentail long i stap oltaim long dispela nogut laip tru bilong ai pas, em yu lukim i bin kamap long ol, bikos long dispela nogut sios tru, i bin holim bek ol planti klia na dia tumas hap tok bilong gutnius bilong Pikinini Sipsip.

33 Olsem na, Pikinini Sipsip bilong God i bin tok: Mi bai marimari long ol lain bilong Jentail na visitim ol wanwan lain long haus bilong Israel long bikpela jasmen.

34 Na em i kamap we, ensel bilong Bikpela tokim mi, olsem: Lukim, Pikinini Sipsip bilong God i tok, bihain mi visitim ol wanwan haus bilong Israel—na dispela wanwan lain em mi toktok em ol tumbuna pikinini bilong papa bilong yu—long wanem, bihain mi visitim ol long jasmen, na paitim ol wantaim han bilong ol lain bilong Jentail, na bihain ol lain bilong Jentail bai ol i pundaun nogut tru, Pikinini Sipsip i tok, bikos nogut sios tru em i mama bilong ol pamuk, em i bin holim bek planti klia na dia tumas hap tok bilong gutnius bilong Pikinini Sipsip—mi bai marimari long ol lain bilong Jentail long dispela de, inap long mi bai givim long ol long pawa bilong mi yet, bikpela hap tok bilong gutnius bilong mi, em klia na dia tumas, Pikinini Sipsip i tok.

35 Long wanem, lukim, Pikinini Sipsip i tok: Mi bai soim mi yet long ol tumbuna pikinini bilong yu, na ol bai raitim planti samting mi minista long ol, em bai i klia na dia tumas, na bihain long ol tumbuna pikinini bilong yu ol i kisim bagarap na ol i no bilip na paul isi isi i go olgeta, na tu wankain i bin kamap long ol tumbuna pikinini bilong ol brata bilong yu, lukim, ol dispela samting bai hait long kamaut long bihain taim long ol lain bilong Jentail wantaim presen na pawa bilong Pikinini Sipsip.

36 Na ol i bai raitim gutnius bilong mi, na ston bilong mi wantaim selvesen bilong mi insait long ol, Pikinini Sipsip i tok.

37 Na blesin bai kam long ol lain em bai ol traim long kirapim Saion bilong mi long dispela de, long wanem, ol bai kisim presen wantaim pawa bilong Holi Spirit, na sapos ol i stap strong olgeta i go long arere, ol bai go antap long las de, na bai ol i kisim selvesen insait long kingdom oltaim bilong Pikinini Sipsip, na ol lain ol i autim bel isi, ye, nius bilong bikpela amamas, ol bai kamap naispela tru taim ol i sanap long maunten.

38 Na em i kamap we, mi bin lukim wanwan lain long tumbuna pikinini bilong ol brata bilong mi, wantaim buk bilong Pikinini Sipsip bilong God, em bin kamaut long maus bilong wanpela lain bilong Juda, olsem em i bin kamaut long ol lain bilong Jentail i go long wanwan lain long tumbuna pikinini bilong ol brata bilong mi.

39 Na bihain em i kamaut long ol, mi bin lukim ol narapela buk, em i bin kamaut wantaim pawa bilong Pikinini Sipsip, long ol lain bilong Jentail i go long ol, long mekim ol lain bilong Jentail wantaim wanwan lain long tumbuna pikinini bilong ol brata bilong mi long bilip, na tu long ol lain bilong Juda, em ol i bin go nabaut long olgeta pes bilong graun, olsem rekot bilong ol profet wantaim ol wanpela ten tu aposel bilong Pikinini Sipsip i tru.

40 Na ensel i bin tokim mi, olsem: Ol dispela laspela rekot, em yu lukim namel long ol lain bilong Jentail, em bai stretim trupela toktok bilong nambawan rekot em bin kam long ol wanpela ten tu aposel bilong Pikinini Sipsip, na bai soim klia na dia tumas samting ol i bin rausim long ol, na bai soim long olgeta hauslain, tok ples wantaim pipol, olsem Pikinini Sipsip bilong God i Pikinini bilong Papa Oltaim, na Sevia bilong graun, na olsem olgeta man mas kam long em, o ol bai i no inap kisim selvesen.

41 Na ol i bai kam olsem long ol toktok em Pikinini SipSip bai autim wantaim maus bilong em, na ol toktok bilong Pikinini Sipsip bai i stap insait long rekot bilong ol tumbuna pikinini bilong yu, wankain olsem ol bai i stap insait long rekot bilong wanpela ten tu aposel bilong Pikinini Sipsip, olsem na, ol tupela rekot bai kamap wanpela, bikos i gat wanpela God na wanpela Man bilong lukautim sipsip long bosim olgeta graun.

42 Na taim bai kam we em bai soim em yet long olgeta nesen, long ol lain bilong Juda wantaim ol lain bilong Jentail. Na pastaim long em soim em yet long ol lain bilong Juda na bihain long ol lain bilong Jentail, em bai soim em yet long ol lain bilong Jentail pastaim na bihain long ol lain bilong Juda, na las bai kamap nambawan, na nambawan bai kamap las.