1 Na gen: Harim, O yupela haus bilong Israel, yupela olgeta husat ol i bin bruk na i go aut bikos long pasin nogut bilong pasta bilong ol pipol bilong mi, ye, yupela olgeta husat ol i bin bruk, husat ol i bin go nabaut i go long narapela graun, em ol pipol bilong mi, O haus bilong Israel. Harim, long mi, O ol ailan bilong solwara, na harim yupela ol pipol i stap longwe, Bikpela i bin singautim mi long bel na em i bin toktok long nem bilong mi, taim mi i stap long bel bilong mama bilong mi.

2 Na em i bin mekim maus bilong mi kamap sap wankain olsem wanpela naip bilong pait, em i bin haitim mi insait long tewel bilong han bilong em, na sapim mi long kamap wankain olsem wanpela naispela spia tru bilong bunara, em i bin haitim mi insait long paus bilong spia bilong bunara bilong em.

3 Na tokim mi: Yu em wokman bilong mi, O Israel, long em mi bai glorifaim nem bilong mi.

4 Na mi tok, mi bin wok nating, mi bin yusim strong bilong mi nating, tru tumas, jasmen bilong mi i stap wantaim Bikpela, na wok bilong mi i stap wantaim God bilong mi.

5 Na nau, Bikpela i tok—Bikpela em i bin wokim mi long bel olsem mi bai kamap wokman bilong em, long bringim Jekop gen long em—Olsem Israel bai i no inap bung tasol glori bai kam long mi long ai bilong Bikpela, na God bilong mi bai kamap strong bilong mi.

6 Na em i tok: Em i liklik samting olsem yu bai kamap wokman bilong mi long kirapim hauslain bilong Jekop, na long bringim bek gen ol wanwan lain bilong Israel. Mi tu bai givim yu olsem wanpela lait long ol lain bilong Jentail olsem yu bai kamap selvesen bilong mi long olgeta hap bilong graun.

7 Olsem na Bikpela Ridima bilong Israel, Wanpela em Holi Tasol bilong em i tok, long em husat man i bagarapim, long em na ol nesen i les, long wokman bilong ol bosman; Ol king bai lukim yu na kirap, tu ol prins bai lotuim yu bikos long Bikpela em i gat strongpela bilip.

8 Olsem Bikpela i tok: Mi bin harim long yu long taim stret bilong em, O ol ailan long solwara, na mi bin halivim yu long de bilong selvesen, na mi bai lukautim yu na givim yu wokman bilong mi olsem wanpela pipol mi bin promisim, long kirapim graun, long mekim ol pipol long kisim graun i no gat ol pipol sindaun long em.

9 Olsem yu bai tok long kalabus lain: Go aut, long ol lain em ol i stap long ples tudak: Soim yupela yet. Ol bai kaikai namel long rot, na gras bilong ol enimol long kaikai bai i stap long olgeta ples antap.

10 Ol bai i no inap hangre o nek drai na tu tuhat o san bai i no inap kukim ol, bikos man em i gat marimari long ol bai lidim ol, tru tumas, em bai gaitim ol long ol hul wara.

11 Na mi bai mekim olgeta maunten bilong mi long kamap wanpela rot, na ol bik pela rot bilong mi bai i stap antap stret.

12 Na bihain long dispela, O haus bilong Israel, lukim ol dispela bai kam long longwe, na lukim, ol dispela lain bai kam long not na long wes, na long graun bilong Sainim.

13 Singim, O ol heven, na amamas, O graun, bikos lek bilong ol lain em ol i stap long is bai kamap strong, na kamaut wantaim singim, O ol maunten, bikos ol bai i no moa kisim pen, long wanem, Bikpela i bin givim bel isi long ol pipol bilong em, na bai marimari long ol pipol bilong ol i gat pen.

14 Tasol, lukim, Saion i bin tok: Bikpela bin lusim mi, na Bikpela bilong mi i bin lus tingting long mi—tasol Bikpela bai soim olsem em i no lusim mi na lus tingting long mi.

15 Long wanem, inap wanpela meri lus tingting long wanpela pikinini bilong em dring susu, yet, olsem em bai i no inap sore long pikinini man long bel bilong em? Ye, ol bai lus tingting, tasol, mi no inap lus tingting long yu, O haus bilong Israel.

16 Lukim, mi bin katim na raitim nem bilong yu insait long han bilong mi, ol banis bilong yu bai i stap long ai bilong mi olgeta taim.

17 Ol pikinini bilong yu bai hariap tru long bagarapim ol birua bilong yu, na ol lain husat bagarapim yu bai go aut long yu.

18 Litimapim ol ai bilong yu na lukluk raun na lukim, olgeta long ol dispela bung wantaim ol yet, na ol bai kam long yu. Na bikos mi i stap, Bikpela i tok, tru tumas yu bai bilasim yu yet wantaim olgeta, wankain olsem wantaim samting bilong bilas, na pasim ol wankain olsem nupela marit.

19 Long wanem, ol ples bilong yu, i bin lusim na ol ples bilong yu nogat man i stap na ol graun bilong yu, i bin bagarap bai kamap liklik tumas, bikos long ol manmeri em ol bai i stap long dispela graun, na ol lain husat save bagarapim yu bai i stap longwe.

20 Ol pikinini em yu bai karim, bihain long yu bin lusim ol nambawan pikinini, bai toktok gen long iyau bilong yu olsem: Dispela ples i liklik tumas long mi, givim mi ples long i stap.

21 Na bihain yu bai tok long bel bilong yu olsem: Husat bin karim ol dispela pikinini long me bikos mi bin lusim ol pikinini bilong mi na mi nogat pikinini, mi wanpela kalabus man na ol i bin raunim i go i kam? Na husat bin lukautim ol dispela lain pikinini? Lukim, ol i lusim mi tasol, ol dispela pikinini, ol i bin i stap we?

22 God, Bikpela i tok olsem: Lukim, mi bai litimapim han bilong mi long ol lain bilong Jentail na sanap strong long ol pipol, na ol bai bringim kam ol pikinini man bilong yu long han bilong ol, na ol bai karim kam ol pikinini meri bilong yu long solda bilong ol.

23 Na ol king bai kamap ol papa bilong yu long lukautim yu, na ol kwin bilong ol bai kamap ol mama bilong yu long lukautim yu, ol i bai nil daun long yu na putim pes bilong ol go daun long graun, na klinim das long ol lek bilong yu wantaim tang, na yu bai save olsem mi em Bikpela, long wanem, ol lain wetim mi bai ol i no inap sem.

24 Long wanem, ol samting ol i bin winim long bikpela pait bai inap long mi rausim long han bilong strongpela man, o ol kalabusman ol i bin kalabusim ol bai mi rausim?

25 Tasol, Bikpela i tok olsem, tru tumas, mi bai rausim ol kalabusman bilong strongpela man, na mi bai rausim ol samting bilong man nogut tru i bin winim long bikpela pait, long wanem, mi bai pait wantaim man em i pait wantaim yu, na mi bai seivim ol pikinini bilong yu.

26 Na mi bai givim long ol lain ol i givim pen long yu wantaim skin bilong ol yet na bai ol i kaikai, na ol bai spak wantaim blut bilong ol yet olsem ol i spak wantaim switpela wain, na olgeta manmeri bai save olsem mi, Bikpela, em Sevia na Ridima bilong yu, Mi wanpela Strongpela Tasol bilong Jekop.