1 Na papa bilong mi i bin lukim, harim na autim olgeta dispela samting taim em i stap long haus sel, long ples daun bilong Lemuel, na tu planti bikpela samting tru em mi no inap raitim long ol dispela plet.

2 Na nau, olsem mi bin toktok long ol dispela plet, lukim, ol i no plet we mi raitim olgeta stori long histri long ol pipol bilong mi, long wanem, ol plet we mi raitim olgeta stori bilong ol pipol bilong mi, em mi bin givim nem Nifai, olsem na, ol i bin kolim ol plet bilong Nifai, wan nem bilong mi, na tu ol dispela plet ol i bin kolim ol plet bilong Nifai.

3 Tasol, mi bin kisim wanpela lo long Bikpela, olsem mi mas wokim ol dispela plet, long wanpela as tingting olsem, mi mas katim na raitim wanpela stori long ministri bilong ol pipol bilong mi.

4 Antap long ol narapela plet mi mas katim na raitim stori long rul bilong ol king, na ol bikpela pait na tok pait bilong ol pipol bilong mi, olsem na, dispela plet bai i gat moa stori long ministri na ol narapela plet bai gat moa stori long rul bilong ol king, na ol bikpela pait na tok pait bilong ol pipol bilong mi.

5 Olsem na, Bikpela i bin tokim mi long mekim ol dispela plet long bikpela as tingting bilong em, na dispela as tingting mi no save.

6 Tasol, Bikpela i save olgeta samting long stat tru, olsem na, em i bin redim rot long pinisim olgeta wok bilong em namel long ol lain pikinini bilong ol man, long wanem, lukim, em i gat olgeta pawa long mekim olgeta toktok bilong em mas kamap tru. Na em olsem. Amen.