1 Mo i bin hapen se afta, mi, Nifae, Spirit i karem mi i go longwe, mo mi luk ol samting ia, mi gobak long tenet blong papa blong mi

2 Mo i bin hapen se mi luk ol brata blong mi, mo oli stap rao wan wetem narawan long saed blong ol samting we papa blong mi i talem long olgeta.

3 From i tru we hem i bin talem plante bigfala samting long olgeta, we i had blong andastanem, sapos nomo wan man i no askem Lod; mo from hat blong olgeta i strong, from hemia, oli no lukluk long Lod olsem we oli sapos blong mekem.

4 Mo nao mi, Nifae, mi harem nogud from hat blong olgeta i strong, mo tu, from ol samting we mi bin luk, mo mi save se oli mas kam blong hapen, from ol bigfala fasin nogud blong ol pikinini blong ol man.

5 Mo i bin hapen se ol hadtaem blong mi i mekem mi mi slak, from mi ting se ol hadtaem blong mi i bigwan bitim evriwan, from ol pipol blong mi oli bin foldaon, from mi bin luk foldaon blong olgeta.

6 Mo i bin hapen se afta we mi kasem paoa mi toktok long ol brata blong mi, mi wantem save long olgeta wanem i stamba tingting blong rao blong olgeta.

7 Mo oli talem: “Luk, mifala i no save andastanem ol toktok we papa blong yumi i talemaot long saed blong ol stret branj blong olif tri, mo tu, long saed blong Ol Jentael.”

8 Mo mi talem long olgeta: “?Yufala i bin askem Lod?”

9 Mo oli talem long mi: “Mifala i no bin askem Lod; from Lod i no mekem mifala i save long saed blong eni samting olsem.”

10 Luk, mi talem long olgeta: “?Weswe nao i hapen se yufala i no obei long ol komanmen blong Lod? ?Weswe nao i hapen se bae yufala i ded, from hat blong yufala i strong?

11 ?Yufala i no tingbaot ol samting we Lod i bin talemaot?—Sapos yufala i no mekem hat blong yufala i kam strong, mo askem mi wetem fet, mo stap bilivim se bae yufala i kasem, mo wokhad oltaem blong holem ol komanmen blong mi, i tru we bae olgeta samting ia oli mas kam long yufala.

12 Luk, mi talem long yufala, se laen blong Isrel oli skelem olsem wan olif tri, tru long Spirit blong Lod we i bin stap long papa blong yumi; mo luk, ?yumi no bin kamaot long laen blong Isrel, mo yumi no wan branj blong laen blong Isrel?

13 Mo nao, samting we papa blong yumi i minim long saed blong ol stret branj we oli joenem insaed long tri ia from evri Jentael i akseptem gospel, hem i we, long ol lata-dei, taem we bae laen blong yumi i kam slak from oli lusum bilif, yes, blong spes blong plante yia, mo plante jeneresen afta we Mesaea bae i soemaot hem long bodi long ol pikinini blong ol man, nao, gospel we i fulwan blong Mesaea bae i kam long Ol Jentael, mo aot long Ol Jentael bae i go long smol haf we i stap yet blong laen blong yumi—

14 Mo long dei ia bae smol haf we i stap yet blong laen blong yumi bae oli save se oli blong laen blong Isrel, mo we oli ol kavenan pipol blong Lod; mo afta, bae oli save mo kam blong save long saed blong ol papa blong olgeta blong bifo, mo tu, oli kam blong save long saed blong gospel blong Ridima blong olgeta, we hem i bin givhan long ol papa blong olgeta blong bifo; taswe, bae oli kam blong save Ridima blong olgeta, mo ol impoten pat blong doktrin blong hem, blong oli save gat save long olsem wanem blong kam long hem, mo nao, hem i save sevem olgeta.

15 Mo afta, long dei ia, ?bae oli no glad, mo presem God blong olgeta we i no gat en, strong ston blong olgeta, mo fasin blong sevem man blong olgeta? Yes, long dei ia, ?bae oli no kasem paoa mo gudfala kaekae long prapa rop? Yes, ?bae oli no kam long tru yad blong God?

16 Luk, mi talem long yufala: Yes; Lod bae i tingbaot olgeta bakegen long medel blong laen blong Isrel; Lod bae i joenem olgeta, from oli ol stret branj blong olif tri, long tru olif tri.

17 Mo hemia i wanem we papa blong yumi i minim; mo hem i minim se samting ia bae i no kam blong hapen, be kasem taem afta we Ol Jentael oli mekem olgeta oli seraot olbaot; mo hem i minim se bae i hapen tru long Ol Jentael, blong Lod i save soemaot paoa blong hem long Ol Jentael, from stamba tingting we Ol Jiu, o laen blong Isrel, bae oli sakemaot hem.

18 Taswe, papa blong yumi i no tokbaot ol pikinini blong yumi nomo, be tu, long saed blong laen blong Isrel, mo tokbaot gud kavenan we bae i hapen long lata dei; we kavenan ia, Lod i mekem wetem papa blong yumi Ebraham, we i talem se: ‘Tru long laen blong yu bae evri famli blong wol bae i kasem blesing.’”

19 Mo i bin hapen se mi, Nifae, mi talem plante samting long olgeta long saed blong olgeta samting ia; yes, mi bin toktok long olgeta long saed blong taem we Ol Jiu bae oli kambak long ol lata dei.

20 Mo mi talem wan moa taem long olgeta ol toktok blong Aesea, we i bin tokbaot taem we Ol Jiu bae oli kambak, o long saed blong laen blong Isrel; mo afta we oli kambak bae oli nomo save miks, mo tu, bae oli nomo seraot olbaot bakegen. Mo i bin hapen se mi talem plante toktok long ol brata blong mi, mekem se oli stap kwaet mo oli putum tingting blong olgeta i stap daon long fored blong Lod.

21 Mo i bin hapen se oli toktok long mi bakegen, oli talem se: “?Wanem mining blong samting ia we papa blong yumi i bin luk long wan drim? ?Wanem mining blong tri we hem i bin luk?”

22 Mo mi talem long olgeta: “Hemia i wan eksampol blong tri blong laef.”

23 Mo oli talem long mi: “?Wanem mining blong aean rel we papa blong yumi i bin luk, we i bin lidim hem i go long tri?”

24 Mo mi talem long olgeta se i toktok blong God; mo eni man we bae i lisin gud long toktok blong God, mo bae i hang strong long hem, bae i no save lus; mo tu, ol temtesen mo ol spia blong devel, we i gat faea long hem, i no save winim olgeta blong mekem oli kam blaen, blong lidim olgeta oli gowe blong lus.

25 Taswe, mi, Nifae, mi askem strong long olgeta blong mekem folem toktok blong Lod; yes, mi askem strong long olgeta wetem evri paoa blong sol blong mi, mo wetem evri paoa we mi bin gat, blong oli mas mekem folem toktok blong God, mo tingbaot blong holem ol komanmen blong hem evri taem long evri samting.

26 Mo oli talem long mi: “?Wanem mining blong reva blong wota we papa blong yumi i bin luk?”

27 Mo mi talem long olgeta se wota we papa blong mi i bin luk, hem i ol doti; mo from maen blong papa blong mifala i tingting tumas long ol narafala samting, hem i no bin luk bigfala doti blong wota ia.

28 Mo mi talem long olgeta se hemia i bin wan rabis hol, we i seperetem ol man nogud long tri blong laef, mo tu, long ol sent blong God.

29 Mo mi talem long olgeta se i wan eksampol blong rabis hel ia, we enjel i talem long mi se i rere i stap blong ol man nogud.

30 Mo mi talem long olgeta se papa blong mifala i bin luk tu se jastis blong God i bin seperetem tu ol man nogud long olgeta we oli stret mo gud; mo bigfala laet blong jastis ia i olsem bigfala laet blong wan faea we i stap laet, we i stap go antap i go long God blong oltaem mo oltaem, mo i no gat en.

31 Mo oli talem long mi: “?Samting ia i minim safa blong bodi long ol dei blong tes, o, hem i minim las ples blong sol afta ded blong bodi blong wol, o, hem i tokbaot ol samting we oli blong laef ia?”

32 Mo i bin hapen se mi talem long olgeta se hemia i wan eksampol blong evri samting we i blong laef ia tugeta wetem blong spirit, from dei bae i kam we oli mas kasem jajmen from ol wok blong olgeta, yes, ol wok we oli bin mekem wetem bodi blong wol long ol dei blong olgeta blong tes.

33 Taswe, sapos oli ded wetem fasin nogud blong olgeta, bae Lod i mas sakemaot olgeta tu, long saed blong ol samting we oli blong spirit, we oli blong saed blong stret mo gud fasin; taswe, Lod i mas karem olgeta blong stanap long fes blong God, blong kasem jajmen from ol wok blong olgeta; mo sapos ol wok blong olgeta oli bin doti, oli mas stap doti; mo sapos oli doti, i mas nid se oli no save stap long kingdom blong God; sapos i olsem, kingdom blong God i mas stap doti tu.

34 Be luk, mi talem long yufala: “Kingdom blong God i no doti, mo i no save gat wan samting we i no klin i go insaed long kingdom blong God; taswe, i mas gat wan ples blong ol doti i rere i stap blong ol samting we oli doti.

35 Mo i gat wan ples we i rere i stap, yes, hem i rabis hel ia we mi bin tokbaot, mo devel i man we i mekem rere ples ia; taswe, las ples blong sol blong ol man, i blong stap long kingdom blong God, o, Lod i mas sakemaot olgeta from jastis ia we mi bin tokbaot.

36 Taswe, Lod i mas sakem ol man nogud aot long olgeta we oli stret mo gud, mo tu, aot long tri ia blong laef, we frut blong hem i moa gudgudfala mo ol man i wantem moa bitim ol narafala frut; yes, mo hem i nambawan presen long evri presen blong God. Mo olsem ia nao mi toktok long ol brata blong mi. Amen.”