1 Chelecha tara klebesei, e ngak el Nephi er a bochakmerek el mengedecheduch er a rubekuk, e tedilure ngak el kmo: aikael tekoi el molkoi, a kmal mo meringel er kemam el diak rolel e kimotekangel.

2 Mitiang ak dula er tir el kmo, ak medengei el kmo ak mla dmu meringel tekoi el mo er a redengerenger loltirakl er a klemerang; ea remekedung a bla duledaes er tir, e ouchais el kmo, tir a mo mengai el moer bab ruriul klebesei; seia uchul ma rengara mekngit a meringel er tir a rengesii a klemerang le ngii el kmal di mo meliud er tir er a belngel.

3 Me elechang e rodam, er ngak, alsekum e komlara llemalt, eng mlo somiu a klemrang, e mlo oltirakl, eng mlo sebechiu el dechor er a medal a Dios, e diak mongiremrum el kirel a klemerang emdu, a ikal molekoi el tekoi a kmal meringel er kemam.

4 Mitia eng ngak el Nephi a kmal mlo mengedechuul e mengususeu er a rubekuk me bo loltirakel a llechul a Rubak.

5 Mitia tengilai a rengrir moriou er medal a Rubak; meng mlo klou a renguk el kmo telocha mo merael er a rael er a llemalt.

6 Elecha ikael rokui el tekoi el mildung, a mleketmokl er a demak er a le kiei er a tento er a delongelel a tebloel ked el lulmekedong er ngii el kmo Lemuel.

7 A uriul er tiang e ngak el Nephi a ngiluu a tara ngelekel a Ishmael mo bechik, me a rudam me te dirrek el mlo becherir a rengelekel a Ishmael, me a Zoram a mlo bechil ngikel kot el klou el ngelekel a Ishmael.

8 Elcha demak a mla otirakl aikel rokui tekingel a Dios le diluer ngii. Ngak me ak dirrek el kmal mlo ngeltengat er a Dios.

9 A tara klebesei ea ngerel a Rubak a mle er a demak er a ta el kesus, e diluer ngii el kmo: a klukuk e kemerael el mo er a chelsel oreomel.

10 Tia el tutau ea demak a mlekiis e mirrael mo er a medal a tentoerngii, e mlo mechas a rengul er a losa chaibibeob el klalo el ngodech a rellel el ngara chutem; tia mirruul er a ikel meduch el sintsyu. Ea chelsel tiael mechibeob a mlar ngii cherung el techetechel; ea chimong a millutk el bedul tiael kiram el merael mo er ngii er a chereomel.

11 Elcha kimocha odekedak a rokui el klalo el kiram lolab el merael mo er chereomel, meng dimlak a mo medechel er a ikel lle bilskemam a Dios; ng mlar ngii a betok el bedngel a tane el kimngilai el mo er a chereomel.

12 Me a kimocha ngmai a tento rekemam e morolael mo imuul er a omoachel el ngklel a Laman, el mo bedul chelsel oreomel.

13 Elcha kimirrael leual klebesei, el mo bedul a dimes el mo er a dims ungos, e mocha o mekedechor a tento erkemam, e ulemekedo er tiael basio el kmo, Shazer.

14 Elcha tara klebesei ea kimngilai a belecham me a medal a belecham, e mlo er a chereomel mo siik a kelir a re telungalk er kemam. Me a kimlo metik me a ki mlekoad e ngilael mera telungalek er kemam er a oreomel er tiael basio er a Shazer. Elecha kililuut el melemolm er a omrolam, loltirakl er a bekerredechel chutem el ngar bita er a Bekerekard el Daob.

15 Elecha kimirrael betok el klebesei, e chousebech a balech me a kelel a balech me a balech, me a bad, losiik a kelam.

16 Me a kidi ultirakl er tiael lolutk er ngii tiael mechibeob el klalo, me a kidi mirrael er tiael bekerredechel chutem er a chelsel choreomel.

17 A uriul er a mle betok el klebesei el kimorael, ea kimocha mekedecherur a tento er kemam, e mocha olengull e osiik a bo longa telungalek er kemam.

18 A tara klebesei e ngak el Nephi a mirrael mo malech a mo odimam, e chomur a belechek el mirruul er a ikel mesisiich el deel; tia er a le metemall a belechek, ea rubekuk a mlo kesib a rengerir, leng dikeael sebecham el smiik a mo odimam.

19 Elecha kimluuta el meremang, engdiak a kall el kimolab el me er a tlungalek er kemam. Elechang saul er a klemngetel omrael el mo modak er a diak a kall, a mlo uchul a klou el klengerenger.

20 Elecha bocha el uaitia teletael, ea Laman me a Lemuel me a re ngelekel a Ishmael el sechal a mocha mesisiich el mengiremrum el kirel tia el longarm el mla morengii er a chelsel oreomel; me a demak meng dirrek el mlo mengiremrum er a Rubak el Dios er ngii, me tir rokui a mlo imis el kesib a rengrir, el mlo el mocha mengiremrum er a Rubak.

21 Me chelecha ngak el Nephi a kmal mlo chuarm er a tekoi me a ngerroel er a rubekuk, le belchir a ririid a ukerelel, meng meral mlo meringel a kimosiik a mo kelam.

22 Me chelcha e ngak el Nephi a mle betok el tekoi a kullekoi el mo er a rubekuk, le teliluut el docherecher a rengrir me te luutang el mocha kesib a rengrir e ouuchel er a Rubak el Dios er tir.

23 Chelcha ngak el Nephi ngiluu a di kerrekar el mei me ak rullii a belechek, me a tama er ngii meng di mle melemalt el kerrekar; me ngi kaikid, me a balech er a bad ak ngilai e mlo oker er a demak el kmo, ngarker ak bo kulai a bodongang er ngii?

24 Mitia eng mocha ker er a Rubak, le temla ngmai a rengrir el meriou, er a ika el betok el tekoi el kullekoi er tir, lek meral millekoi er tir aikel mlara chelsel a renguk.

25 Elecha tara klebesei ea ngerel a Rubak a mle er a demak; el mlo ungil loterkii a rengul kirel omengiremrum er ngii el mo er a Rubak, meng kmal mlo mekngit e mlo ouuchel a rengul.

26 Me a ngerel a Rubak a mle er ngii el kmo: momes er tia el mechibeob el klalo e monguiu a ike el lelluches er ngii.

27 Ma demak er a leues a ike el mle lluches er bebul tia el mechibeob el klalo, eng mlo omritel er a dakt ngii me a rubekuk, me a re ngelekel a Ishmael el sechal me a re bechemam.

28 Me chelecha ngak el Nephi er a kumes ea ika el techetechel tia el mechibeob el klalo, a ika oureor loltirakl a klaumerang er kid me a blechoel ulekerreu.

29 Me a ike el llechukl meng moe kuk mo ngodech. Ng mle beot a donguiu, e mle bleketakl lochotii er kid a rolel a Rubak; me a llechukl meng di moe mo ngodech el di ultuil er a klaumerang er kau me a rengum loltirakl a ike el ngar ngii. Me kamesang, a mekekere el tekoi er a Rubak, a klou al rellii el me er kid.

30 Me chelecha ngak el Nephi a mirrael mo er bebul a rois, el di oltirakl aika el tekoi lelluches er bebul tia el mechibeob el klalo.

31 Mak milalech a bebil er a teblik el charm e ngilai meng mlo kelir a re telungalek er kemam.

32 Me chelecha kurola el mo er a tento er kemam el chellungel aika el charm el bla kukeuad, me leskak eng kmal mlo ungil a rengrir, e liluut el monguu a ngariou e uldechomel reng er medal a Rubak e mlo oureng a sulel.

33 Me a rekil tiang ea kiluuta el mocha melemolem er a omrolam el dirrek el kora di omdid er a diosisiu el rael; ea uriul er a betok el klebesei ea kimocha mekedecherur a tento er kemam e mlo kiei el telkib e olengull.

34 A tara klebesei ea Ishmael a mlad, me a kidileklii er a Nahom.

35 Me a re ngelekel a Ishmael redil a mlora klou el klengit el reng, e lilangel kirel a kodellel a demerir. Me a ika el sal chorma er ngii er a chelsel oreomel; e te mle ngiremrum er a demak el kmo ng ngii a uchul me te tilobed er a Jerusalem e mle er a oreomel el di merorael diak lultebechel a lebor ngii. Meng kmal betok el ringel me a klengrenger me a ched el reng me a saul a blal bo er ngii. Me chelecha tedi uaisei el mol nguemed er a chelsel oreomel er a klengerenger.

36 Me a ikaia mle tekingir er a longiremrum er a demak me ngak, e mle sorir a lmuut el mo er a Jerusalem.

37 Chelecha Laman a mocha melkoi er a Lemuel me a re ngelekel a Ishmael el sechal el kmo: mei me dokodir a demmam me a ochellam er a Nephi, el di ngii el mla rullii el lekong merreder e sensei er kid el lelmuut el meklou er ngii.

38 Meng dilul kmo a Rubak a mle ngedecheduch er ngii, me a re anghel alko te mla mei me tolisechakl er ngii. Endi kid a medengei el kmo ngomulak er kid, e ouchais er kid a betok el tekoi, e dirrek el meduch el mengeblad meng rullid el mo oumerang er ngii, e uchul eng mla ngoikid el mo er a mesechesechel choreomel e rullii el mo king e merreder er kid me bol sebechel mor er sel soal er kid. Aikai a mle omerellel obekuk er a Laman er a longitikaik er tir el mo kesib a rengrir.

39 E ndi Rubak a ulebengkemam me a ngerel a Rubak a millekoi a betok el tekoi el mo er tir el kmal mlo meringel loungeroel er tir; tia ral rengesii a ngerel a Rubak el mellach er tir, eng mlo diak el kesib a rengrir, e mlo mekngit a rengrir el kirel a kenterir, me a Rubak a luuta el mocha omekngeltengat er tir er a kall, meng mlo diak kim ngemed.