1 A ta er a klebesei ea Rubak a mlengedecheduch er a demak er a chelsel a berrous, e dilu er ngii el kmo: ke ngeltengat e Lehi er a ike el rokui el chobla moruul, me kulerrenges a llechuk e dilur er a rechad aike el kdilu er kau, me elechang mlo sorir el melai er a klengar re kau.

2 A ta er a klebsei ea Rubak a dilu er a demak er a chelsel a berrous el kmo, mnguu a telungalek er kau e mchiis el mo er a oreomel.

3 Me a bocha le uai sei endi mlo oltirakl a ikei el le dilu er ngii a Rubak. Meng riruul a ike el Rubak a dilu er ngii.

4 A ta er a klebesei eng riieda el mocha er a oreomel, e mlo iikrii a blil, me a chetemel, me a kloklel me a ududel kolt me a silber, me a meringel chad el kloklel, ngii el rokui el di mlo medechel. Ng di ngiluu a telungalek er ngii, me a kall me a tento e remiid el mora oreomel.

5 Ng mle metengel mei er bita er a Bekerkard el Daob, e mirrael er a chelsel tia el oreomel er bita er a Bekerekard el Daob ngii me a telungalek er ngii, el mlarngii a delak el Sariah me a rubekuk el mle, Laman me a Lemuel me a Sam.

6 Meng milrael el edei el klebesei er a chelsel oreomel e mocha mekedecherur a tento er ngii er a delongelel a ked er bita er a omoachel.

7 A ta er a klebesei e ngilai a bad el mei meng chodsii a altar, e mlo meruul a uldars el mo er a Rubak e uluureng a sulel a Rubak el Dios er kid.

8 A ta er a klebsei eng milengeklii tia el omoachel el Laman, el mirrael mo tuobed er a Bekerekard el Daob, tia el blel tobed er ngii, a nga er a delongelel a ked.

9 Me a demak er a lesa tia el ralm er a omoachel merael mo tuobed er a Bekerekard el Daob, eng millekoi er a Laman el kmo, chulkum meke mo mesisiich el uai tia el omoachel el di merael mo er a madedok er a rokui el melemalt el tekoi.

10 E dirrek el millekoi el mo er a Lemuel kmo, chulkum kemo uai tia el delongelel a ika el ked, el mesisiich el ka longitektik er a rolel chotireklel a llechul a Rubak.

11 Elcha uchul meng mlo melekoi el uaisei, a Laman me a Lemuel a mle mechitechut a rengrir me te di mengiremrum er a demerir er a di mle ues eng mla ngoititrir el tuobed er a Jerusalem, e chemoit a chetemir me a kloklir el kolt me a silber me a meringel chad el ngodech el klalo, e llocha tir a di mo mad er a oreomel, el klebelngul a demerir a uchul, a ikaia mle omelkingir.

12 Ma ikaia mle teletelir tirka el teru el obekuk el Laman me a Lemuel el di mle blechoel mengiremrum er a demerir. Me te mlengiremrum leng dimlak lodenge a urelel a Dios lulmeob er tir.

13 Ng dirrek el dimlak loumerang el kmo a Jerusalem, tia el mesiich el beluu a mo metemall el ua ike el dilu a reprofet. Te di mle uai tirkei re chiJews el mla er a Jerusalem el mle sorir el melai er a klengar er a demak.

14 A ta er a klebesei er tia el basio er a Lemuel, ea demak a mle mui er a Reng e mlellach er tir me tedi mlo omritel, el di mlolmuk e dikea el loutoketok e mocha oltirakl a tikingel.

15 Me a demak a kiliei er a tento.

16 A ta er a klebesei e ngak el Nephi er a dirke kekerei, engdi mle meklou a bedengek, eng mle semeriar a renguk el mo medenge berrotel tikingel a Dios, me a klilangel el mo er a Rubak, meng mlei el domedemkii a renguk, me ak mlo oumerang a ikei el tikingel a demak; meng dimlak bo kumtok er ngii el uai a rubekuk.

17 Me ak milngedecheduch er a Sam e ullecholt er ngii a ikei el tekoi el Rubak a ullecholt er ngak lokiu Edaol Reng er Ngii. Mi tiang mlo umerang a tikingek.

18 Endi a Laman me a Lemuel a dimlak el bo loumerang a tikingek; meng kmal mlo mekngit a renguk er a delechercherel a rengrir, me a klilangel el mo er a Rubak el kirir.

19 Me a ta er a klebesei ea Rubak a dilu er ngak el kmo: ke ngeltengat e Nephi leng klemera er kau a uchul me kedi blechoel losiik er ngak loba kle ngariou el reng.

20 Ea lsekum ke moltirakl a llechuk eng moungil besum, me ngak a mo omekrael er kau el mo er a beluu er a telbiil. Oi, tiang a beluu el ngak a di mla kudmeklii el kirem; Oi, tia el beluu a ngaruchei lungil er a rokui el beluu.

21 Endi alsekum a rubekum a di melemolm lomtok er kau, e te mo medort e mo cheroid er medal a Dios.

22 Ea lsekum kau a di melmolem loltirakl a llechul a Dios, eng kau a mo merreder e olisechakl er a rubekum.

23 Ak subedau el kmo, sei sils el bo lomtok er ngak, e ak mo melbeakl er tir loba klou el dellebeakl, me a re ngelekir a diak el sebechir el mo mesisiich er a re ngelekem, endi mo diak alsekum a rengelekem a dirrek el mo omtok er ngak.

24 Me a lsekum ea ta er a klebsei e tir a mo omtok er ngak, e te mo cherreuir a rengelekem, meng mo uchul eng mo sebechir el lelmuut el mo dobedebekak.