1 A ta er a klebesei e ngak el Nephi er a bochakmerek el mengedecheduch er a Rubak, ea kluueta el mo er a tento er a demak.

2 Itiang, mocha mengedecheduch er ngak el kmo: kamorrenges, ak ulemerrous er a ta el berrous, er Rubak a dilu er ngak el kmo, kau me a rubekum a lmuut el mo er a Jerusalem.

3 Komong, le Laban olab a rekord er a re chiJews, e dirrek lolab a rekord er a redemad er a rechuodel mei, el ngii a blotk er a ikei el tibereberk el sintsyu.

4 Seia uchul me a Rubak a mla dmu er ngak el kmo, kau me a rubekum a kiriu el mo er a blil a Laban me komsmiik a ikei el rekord, e ngmai el mei er tia el dengarngii el oreomel.

5 Endi elechang ea rubekum a mengiremrum e kmo, tia el blak delii er tir a kmal meringel tekoi; endi, ndiak le ngak oldurch er tir, tiang a llechul a Rubak.

6 Me kau bong e rungalk, me bo lungil a rengul a Rubak er kau, le kau tia el diak mongiremrum.

7 Mitia el bochal temel, e ngak el Nephi a dilu er a demak el kmo: Ak mo meruul aikel tekoi el Rubak a mla meskemam a llach el kirel, le kmedengei el kmo a Rubak a diak le besterir a rengalk el chad a ngii di le llach, alsekum endiak le kedmeklii a mo rolel engmo sebechel mo motirakl a llechul.

8 Mitia er a renges a ika el tekoi a demak eng kmal mlo ungil a rengul, leng mlo medenge el kmo, ak mla mukngeltengat er a Rubak.

9 Me ngak el Nephi me a rubekuk a morolang er a chelsel oreomel lolab a tento er kemam el mo bedul a Jerusalem.

10 Mitia el kibocha er a Jerusalem e ngak me a rubekuk a mlo melib er a kibo mobang el tekoi.

11 Me a kimlo melmors el kmo ngtechang er kemam a mo soiseb er a blil a Laban. Mitiang, ea Laman a ngilmersii, meng ngii a mlo er a blil a Laban, ea lebong dengchokl me te mlo chadecheduch.

12 Meng mle soal melai er a Laban a ikei el rekord el blotk er a ikei el tibereberk el sintsyu el nga er ngii a cheldechedechal a kliblillel a demak er a irechar.

13 Mitia ulengesechii a rengul a Laban, me ngultbechii lotebedii er a blil, e dimlak lebsa rekord. Ng bai dilu er ngii el kmo kau a merchorch, me elecha ak mokodkau.

14 Me a Laman a chiliis el me subedemam er a teletelel a Laban. Meng kmal mlo mekngit a rengmam, me a rubekuk a mlo sorir el lmuut el mormei er a demak el nga er a oreomel.

15 Mitia kdula er tir el kmo: Alsekum a Rubak a ngar, me kid a ngar, endiak a rolel e dluut el mo remei er a demad el ngar oreomel, el di merekmo sei el dotirakl a ikei el llechul a Rubak el me er kid.

16 Me kamei me bol blak a rengud loltirakl a llechul a Rubak; Mei medebo er a belual a demad el mo er a blil, leng di milechei a kolt me a silber me a betok el meringel chad el klalo, eleng di mlo oltirakl a llechul a Rubak.

17 Leng mle medengei el kmo a Jerusalem a mla mo kirel metemall, le rechad a kmal mla mo dengerenger.

18 Le te dimlak lorrenges a tekingir a re profet. Me alsekum a demak a di kiliei er a uriul er a Rubak ra le dilung er ngii el kmo mechiis el tuobed er tia el beluu, engii meng dirrek el mad. Seia uchul meng tilobed er a beluu.

19 Me a le uaisei e nguldesuel a Dios a uchul meng kired el mo ngmai a ika el rekord e kudmokl el kirir a rengelked meng diak lobes a tekingir er a redemerir.

20 E dirrek luchul eng mo sebeched el kudmokel e mdid el mo er tir a tekoi el meldung er a ngerir a re chedaol profet, el mlong er tir lokiu a Reng me a klisiichel a Dios er a uchelel a beluulechad el me er chelcha el taem.

21 Mitia el kulkinga choa ika el tekoi, e te mlechitikaik a rubekuk el mo melasm el mo mlisiich a klaumerang ertir el kirel otireklel a llechul a Dios.

22 Me chelcha kimerola el mo er tia el belumam er a redemmam, me a kingmai a ika el kolt me a silber me a meringel chad el kloklam.

23 Me a kibocha merek loldekdak ngii el klalo, ea kiluuetang el mocha er a blil a Laban.

24 Me a kimorael tuunga el momes er a Laban, e a kidilur er ngii el kmo, alsekum eke meskemam a ike el rekord el blotk er a ike el tibereberk el sintsyu, ea kimeskau ika el kolt me a silber me a rokui el meringel chad el kloklam.

25 Chelcha Laban er a le ues a ika el mle betok el klalo el kimullab, eng kmal mlo soal meng nguleldik er kemam me aki tobedang. Ko er a kimorael engii choderchetrir a remesiungel el me omekeuad er kemam, e melai a kloklam el mo kloklel.

26 Mitia kichiliis er a remesiungel a Laban e chiloit a ika el kloklam meng dimlo er a chimal a Laban.

27 Me a kichiliis el mo er a chelsel oreomel, e ulemart er kemam er a kerriu el bad, meng dimlak le betik er kemam.

28 Chelcha Laman a mla mo kesib a rengul er ngak me a demak; me a Lemuel meng dirrek el kesib a rengul, leng di milchetakl er a ngerel a Laman. Me chelcha Laman me a Lemuel a mocha melkoi a betok el meringel tekoi el me er kemam el lochellir, e dirrek el mlo mengelebed er kemam loba rechelel a kerrekar.

29 Mitia er a longelebed er kemam loba rechelel a kerrekar, ea anghel er a Rubak a mlo dechor er mederir e millekoi er tir el kmo: ngerang me komengelebed er a re mekerei er kemiu loba kerrekar? Ng diak modenge el kmo a Rubak a mla tutkii a Nephi el mo merreder er kemiu, leng kngtemiu auchul? Morrenges, ko lmuut el mo er a Jerusalem le Rubak a morolii a Laban el mora chimomiu.

30 A uriul er a longedecheduch er kemam a anghel eng mlo dibus.

31 A uriul er a lorola anghel, ea Laman me a Lemuel a luutal mocha mengiremrum e melkoi el kmo: Ng mekera sebechel a Rubak el nguu a Laban el orolii el mo er a chimad? Chobo ngikal mesisiich el chad, el sebechel oderdeterir ar rokeim el chad, e dirrek el sebechel mekodetrir a rokeim; ngmekerang e diak lokotkid?