1 Elcha el taem e temlo mengull er a Rubak, e mlo obengkek me a kidilak loureor lousbech aika el kerrekar el kmal ngodech a teletael er a ureor el kimngar ngii. Ea Rubak a di mle blechoel lolecholt er ngak er a teletelel a kerrekar a doruul el mo diall.

2 Elcha ngak el Nephi a dimlak kulasech a ika el kerrekar el uaia teletelel a loruul a rechad, me a dimlak kuruul er a diall el uaia ikel loruul a rechad; Ak mirruul er ngii loltirakl er a teletael lolecholt er ngak a Rubak, meng dimlak el uaia teletelel a urelir a rechad.

3 Me ngak el Nephi a mle blechoel mo er a rois, e melluluuch el blechoel mo er a Rubak; miseia uchul ea Rubak a ullecholt er ngak a betok el mengasireng el tekoi.

4 Me a tara klebesei er a bochak merek er a diall el di mlotirakl a tekingel a Rubak, me a rubekuk er a lesa klungiolel, me a ureor el mlorngii el kmal mle meringel chad, e teliluut el ngmai a rengrir el meriou er medal a Rubak.

5 A tara klebseei ea ngerel a Rubak a mle er a demak el kmo, ng kiram el mekiis e merael mo soiseb er a diall.

6 A bochal klukuk er a uriul er a kiblam kedmokl a rokui el klalo, me a betok el rodech me a techel a charm er a chereomel, me a betok lilaout, me a klalo el Rubak a dilu mngai, ea kimocha soiseb er a diall lolab a telchellam, me a tane er kemam, me a ikel kloklam el kimngilai, a remekekrei el mo er a remeklou, e morolael mo er a chelsel a diall lobetetrir a rebechemam me a rengelekam.

7 Elecha demak a mlamor ngii a re terung el ngelekel sechal el mlechell er a oreomel; a Jakob a mle ngklel a klou, ea Josef a mle kekerei.

8 Elchang mla mongmasech a rokui el telechull, me a klalo el le dilu Rubak me a kingmai, me a kimocha metengel mo er a diall e mocha omekall loltirakl er a iolt el mo bedul a beluu er a telbiil.

9 Elcha uriul er aki momekall loltirakl er a yolt el mle betok el klebsei, ea rubekuk me a re rengelekel a Ishmael me a rebecherir a mocha meruul er a ungil klebesei, me te mocha meloik, e mengitakl, e melkoi a mekngit el teletelel a cheldecheduch, e ulebes el kmo, ng klisiichel techang a uchul me te ngar tiang, e mirrael mo imong el mekngit omerellir.

10 Elecha ngak el Nephi a kmal medektang, le kumdasu el kmo, a Rubak a mo kesib a rengul er kemam, e melsemam el kirel a kentemam me a kimol ruchorech el mo er a dilochel er a daob; me chelecha ngak el Nephi a mocha melkoi er tir a klemerang; endi tir a mlo kesib a rengerir rengak e dilung el kmo: kemam a diak el somam a kekre lochellam a bo lorredel er kemam.

11 Elcha Laman me a Lemuel a mlekiis el ngmai lechet el lochetak e ulemekcharm er ngak, endi Rubak a mlechititerir leng mle soal mo chotii a klisiichel el di moltirakl a ikel tekingel kirir a re dengerenger.

12 Elecha bochal merek el lochetak meng mlo diak kungitentik, e tia el kombas el le kildmeklii a Rubak a mlo diak loureor.

13 Meng mlo diak lodengei el kmo, tomsiuel er a diall el mo er ker, e lmuut kung meng mlor ngii a klou el mekngit el ianged, Oi e mlorngii a klou el ses el yolt, meng mlorngii edei el klebesei el ki moubetetelluut me te kmal mlo medakt le rengreir e tedi mo remos er a daob; endi dimlak el kedekedak.

14 A uriul er a ongeua el klebesei el ki moubetetelluut, ea ses el iolt a liluut el mo meringel.

15 Elecha kemam a rengmam a kidi mo remiid er a dilochel. Ea ongewa er a klebesei er a kimoluut, ea rubekuk a kol mocha omdesuael kmo, a chimal a Rubak a mla me ertir, me chelcha tedi monguemed alsekum ngdiak bo louuchel a rengerir er a kenterir; me te mermang me te mocha kudoked a lechetel a chimak, el merael mla mo oburk, me a ochik meng dirrek el kmal mla mo oburk, meng merael mle meringel.

16 Endi akdi millanges el mo er a Dios, e uleldanges er ngii el tial sils, e dimlak kungiremerum lomtok er a Rubak el kirel a betok el ringel el mle erngak.

17 Elecha demak el Lehi a mle betok lolekoi er tir, me a rengelkel a Ishmael el sechal, endi tirka mlo melkoi a chelbedel a ngii dilechad el mlo mesebechakl er ngak; ea demak me a delak el kmal chudelang, e dirrek el kmal chormang er a uldesuir er a rengelekir a dimlo mechiuaiu el diuaia le silecher.

18 Elecha klou el klengit el reng me a lengelir el kirel a kenterir er a rubekuk, a mlo uchul le kiloe temo mesa Dios er tir, me a cheball er a beterrir a kilong moriou el mo mechiuaiu er a chebechab; Oi ng di kilo temo mechoit lobengkel a klengit el reng el mou debull er a daob.

19 Me a Jakob me a Josef el kmal dirke mle mekekerei me tuluusbech er a delemam lomka ertir a dirrek el mlo chuarm le ringel el mlo er a derrir, me a bechik me a iuosech er a medal me a nglunguchel, me a rengelekek a dimlak el demedemek a rengrir er a rubekuk mel kedekedak.

20 Ng dimlak a ngodech, ng dimle klisiichel a Dios el kilo te metemall er ngii, a dilemedemek a rengerir, me tia ra bocha lodngei el kmo, temo remiid er a dilochel, e te mocha ouuchel a rengerir er a omerellir me te mocha kodekedak.

21 Elecha le kedekedak, e ak mocha nguu a kombas, ea knguu e ngoureor loltirakl er sel soak. Mak mocha meluluuch el mo er a Rubak; ea uriul er a kululuuch, eng mlo diak a iolt, me a yanged a mlo ungil, e mlorngii a klou el iusech.

22 Elecha eng ngak el Nephi a mlo omekall er a diall, me a kiluutael mocha omekall el mo bedul a beluu er a telbiil.

23 Ng mlo betok el klebesei el ki momekall e kol meremae er a beluu er a telbiil; me a kimlo er a bluu me a ki mekedechor a tentoer kemam, e mengeklii el kmo beluu er a telbiil.

24 Elecha kimocha meruul a sers, e melalem a tane, me a ki dilalm a rokui el tane er kamam el kimngilai er a Jerusalem el mei. Ea uriul eng dilubech el kmal mlo bekerredechel, meng mlo klou a klengeltengat el me er kemam.

25 Elecha kimlo metik el ngarngii er a beluu er a telbiil, er tiael kimorael er a chereomel, a betok el bedengel a charm, a kerbou me a ox, me a roba, me a uos, me a kaming, me a teblik el kaming, me a betok el charm el kirel dousbech a rechad. E miltik a betok el bedengel a deel, me a kolt me a silber me a bekerekard el deel.