Kot El Babier Er A Nephi

Chomerredelel Me A Chosisecheklel

Cheldechedechal a Lehi me a bechil er a Sariah me a teuang el ngelekel sechal (el omuchel er a kot el klou) el Laman, eng mo Lemuel, eng mo Sam me a Nephi. A Rubak a cholchelechel er a Lehi me le tobed er a Jerusalem, le ngii a ulemlaoch el mo er a rechad el kirel a keuterir, me te mlo osiik el melemall er a klengar er ngii. Ng mirrael el edei el klebesei el obengkel a telungalk er ngii el mo er a oreomel. A Nephi a ngoititerir a rodam er ngii e lmuut er mo er a Jerusalem el kirel a rekord er a re chiJews. Chisel a chebulir. Te ngoititerir a rengelekel a Ishmael redil el mo becherir. Te ngoititerir a retelungalek er tir er tuobel el mo er a oreomel. A chelbulir me a ringel er a chelsel oreomel. A teletelel omerolir. Te mei er a klou el daob. A rodam er a Nephi a mlo omtok er ngii. Ng chemas a rengrir e dosechii a diall. Tomekedong er a ngklel a basio el kmo Kekeuii. Te dobechii a klou el daob el mo er a beluu er a telbiil me a lmuut el bebil. Tiang a oltirakl a chedechedechal a Nephi, me a lechub, e ngak el Nephi a milluches er tiang el rekord.

1 Bliongel

A Nephi omuchel er a rekord er a rechedal – A Lehi a mesa ues er a klou el ngau, e menguiu er a babier er a ulaoch – Ngii oldanges er a Dios, e omlaoch er a le mei a Messiah, e omlaoch er a telemellel a Jerusalem – A re chiJews omekcharm er ngii.

1 Ngak el Nephi el mlo ngelkel a kedung el chad me a bechil, me ak siluub er a demak a betok lungil tekoi. E dirrek el mla mes er a klengar er ngak a betok el meringel tekoi; endi Dios a mlo ungil a rengul er ngak meng milskak a mui el klemedngei er a rolel a ungil tekoi me a berrotel tekingel a Dios. Seia uchul me ak mocha meluches a rekord er a teletelel a klengar re ngak er a temek.

2 Oi, ak rekord lousbech a tekingel a demak, el ngii a uldekial a osisechakl er a re chiJews me a tekoi er a Egipten.

3 Me a kmal medengei el kmo, a ikang el rekord el kuluches a klemerang; meng kmal chimak a milluches, e kildmokl lokiu a klemedengei er ngak.

4 A ta er a klebesei er a uchelel a kot el rak lorredel a Sedekia el King er a Judah (a demak el Lehi a mlechell e mlu keroul er a Jerusalem) e tia el osisiu el rak e te mle betok el profet a ulemlaoch el mo er a rechad el kmo, alsekum eng diak bo louuchel a rengrir er a kenterir, e tial mesisiich el beluu er a Jerusalem a mo er a klou el kerrior el mo metruud.

5 Me a ikel klebsei ea demak el Lehi a kmal mle blak a rengul el meluluuch el mo er a Rubak er a rengul er rokir el kirel a re bebil er ngii.

6 A ta er a klebesei er a loluluuch el mora Rubal eng mla er ngii a klou el ngau el mlei er bebul a bad er medal; me ng miles e ri renges, a betok el tekoi. A ikei el tekoi lules me a le rirengs a rirellii meng mlo imis lomritel e mlo uedikl a rengul.

7 Mitiang, mocha er a blil er a Jerusalem el di mlo el mechoit er a dukellel, leng kmal mle misisiich Edaol Reng el ngar er ngii me a ikei tekoi el lules.

8 Itia el lemui er a Edaol Reng eng mlo chemolt er ngii a ues, meng milsa babluades el mlengai a chesmerel ea rengul eng milsa Dios el dengchokel er a kingellel, liiliuekl er a rubdois el anghel mengitakl e choldanges er a Dios er tir.

9 E mla er ngii a ta el lilsang el mle metengel er a babeluades el didiichel me a klebkellel a nga ruchei er a didichel a sils.

10 E dirrek el milsterir a re teruich me a terung lokiuellel, el didiichir a mle imong er a didiichel a btuch er a ianged.

11 Me te mle metengel el mei er a beluulechad, ngikang el mle kot a mlo dechor er a medal a demak e milsa babier e dilu, el kmo, monguiu.

12 Mitia er a bocha longuiu er ngii eng mlo mui er a Edaol Reng er a Rubak.

13 Meng mle nguiu el kmo, alii alii e Jerusalem, ak mla mes a delngerengerem! Oi, ngbetok el tekoi a lechiluiu a demak el kirel a Jerusalem el kmo ngmo metemall ngii me a rechad er ngii. Te betok a mo mad er a saider, me a remo mengai el mo kelebus er a Babilon.

14 Me a demak er a le ues e le chuiu a ika el betok el meklou e mengasireng el tekoi, eng mlo ouetkeu er a Dios el kmo, Rubak lolab a rokuil klisiich, a urerem a meklou e chodongesall, me a kingellem a ngar bab el ngar babeluades, me a klisiichem me a klungiolel a rengum, me a klechubchub er kau a rokui el nga er a beluulechad. Ngklechubechub er kau a uchul meng diak o bechititrir tirkei el osiik er kau me bo el riid.

15 Tiaikid a mle teletelel me a tekingel a dmak er a loldanges er a Dios er ngii; ngmlo mui er a deoureng, el kirel aike el lulmes; oi, aike el Rubak a ullecholt er ngii.

16 Elecha ngak el Nephi a diak kuuchais aike el rokui el liluches a demak, ele demak a liluches a betok el tekoi el kirel a ues el mlo chemolt er ngii, me a berrous. Ng dirrek el liluches a betok lulaoch, me a tekingel mo er a re ngelekel, el ngii a diak bo kuuchais er rokui.

17 Ak bai di mo meluches a ikei el dilubech er sei el temek. Ak mo oldak a ikei el rekord er a demak er a ikei el tibereberk e klalo el ngii a ngak a mirruul. E sei el bok merek el loldak a record er a demak e ngak a mochu ouchais a chisel a klengar er ngak.

18 Me a le uaisei ngsoak chobo modengei el kmo a uriul er a Rubak er a locholt a betok longasireng el tekoi el mo er a demak el Lehi el kirel a telmellel a Jerusalem, eng mlo merael lomlaoch e ouchais er tir a ikei el blal ues me a blal renges.

19 Meng mlo uaisei, endi a re chiJews a bai millenguul er ngii el kirel a ika el tekoi louchais er tir; leng di mle beches el melkoi a delngerngerir me a kentrir; ngullecholt er tir aikei lules me a rirenges, me a ikei el le chiliu er a babier el mle bleketakl melekoi el kirel osobel el Messiah el Osoblel a beluulechad.

20 Me sei er a rrenges a re chiJews eng ngilasech a rengrir er ngii el diuaia re profet er a nga er a mong el mlodik er a beluu, e ulebetech er a bad, e mlo er ra kodall. E dirrek el mlo melib er a kodellel. Endi ngak el Nephi a soak louchais er a klechubechub er a Rubak el mo er tirke el bla lolilt er tir leng mesisiich a klaumerang er tir, meng diak a ngera el sebechel el metemall er ngii.