1 Le ca tún h dzoʼoc in tʼan yétel in sucuʼunoʼobeʼ, ten Nefieneʼ, ca tu yaʼalahoʼob ten: Techeʼ ta wáʼalah toʼon baʼaloʼob hach talamtac, hach chictac maʼs tiʼ le cu páhtal c kamicoʼ.

2 Ca tiʼn núcah tiʼoʼobeʼ ca tiʼn wáʼalah: In woheʼleʼ tiʼn wáʼalah tʼanoʼob hach chichtacoʼob tu yoʼolal le kakas maʼcoʼoboʼ, heʼebix u hahileʼ, yétel dzoʼoc in dzaic muk tiʼ le toh u cuxtaloʼoboʼ, yétel in wáʼalmaʼheʼ le heʼeloʼobaʼ bin líkiʼcoʼob tu dzoʼoc kin, tu yoʼolal leloʼ le maʼ toh u cuxtaloʼoboʼ, haheʼ hach chich u yilicoʼob le hahiloʼ tumen cu xoʼotʼoloʼob tac hach tu dzuʼoʼob.

3 Le betiʼc túneʼ in sucuʼuneʼex wá teʼex toh a cuxtaleʼexeʼ, yétel ca a dzíbolteʼex a wuʼuyeʼex le hahiloʼ yétel ca a beteʼexeʼ tu yoʼolal ca xímbalnaqueʼex toh tu tán Hahal Dioseʼ behlaʼ maʼ tán a wáʼalic baʼal tu yoʼolal le hahoʼ tán a wáʼaliqueʼexeʼ tán in wáʼalic chich baʼaloʼob ta woʼolaleʼex.

4 Teʼ tún Nefieneʼ ca tiʼn wáʼalah hach tu bel tiʼn sucuʼunoʼob ca u betoʼob u tʼan Yumtsil.

5 Ca tún tu humillartubaoʼob tu tán Yumtsil, hach bey tu betoʼoboʼ cah hach quiʼmaʼcchah in wól tu yoʼolaloʼob ca xímbalnacoʼob tiʼ u toh behil le justiʼciaoʼ.

6 Tulácal le baʼaloʼobaʼ h aʼalaʼaboʼ yétel h mentaab caʼaliquiʼl cahaʼan in tata tu yotoch le mentaan yétel nokoʼ teʼ luʼum tuʼux tu dzah u kabaʼ u luʼumil Lemuel.

7 Ten tún Nefieneʼ ca tún h dzoʼoc in bel yételhuntúl u xchʼupal Ismaʼel; in sucuʼunoʼob xaneʼ cah dzoʼoc u beloʼob yétel ulak u xchʼupaloʼob Ismaʼel; Zorameʼ h dzoʼoc u bel yételu maʼs chʼíhaʼan u xchʼupal Ismaʼel.

8 Bey tún úchuc u betiʼc in tata tulácal le tʼanoʼob h dzaʼab tiʼ tumen Yumtsileʼ ten tún Nefieneʼ hach sén bendecirtaaben tumen Yumtsil.

9 Tu yákabileʼ cah tʼaʼan in tata tumen Yumtsil, tán u yaʼalaʼal tiʼeʼ ca hoʼopʼoʼc u bin tu caʼatén sámaʼl ich kaxoʼ.

10 Leca tún h lík in tata cah hók teʼ ichil u nahil le mentaan yétel nokoʼ cah sáschah tulak kinoʼ, hach sén haʼak u yól le tu yilah humpʼél baʼal wolis hach sén heʼlaʼan; le heʼeloʼ h betaab yétel bronce. Tiʼ le baʼal wolisoʼ yan caʼadzít baʼaxoʼob tiʼ, le hundzítoʼ cu túchʼubtiʼc le behoʼ.

11 Ca tún t molah tulácal baʼaxoʼob yan c bisic teʼ kaxoʼ yétel u yalab baʼal c hánt u dzamaʼh toʼon Yumtsil ca t múchʼquiʼntah tulácal u heʼheʼlásil nekoʼob utiaʼal c bis teʼ kaxoʼ.

12 Ca tún t cuchah c otoch le mentaan yétel nokoʼ cah hókoʼon teʼ kaxoʼ tán maʼn tulak tsel u rioil Laman.

13 Ichil cuatro kinoʼob tán u bin c xímbal tiʼ nohol lakineʼ ca tún t wédzcuntah c otoch le mentaan yétel nokoʼ tu caʼaténeʼ ca t dzah u kabaʼil le cúchiloʼ Xázer.

14 Caʼaliquiʼl tún teʼ yanoʼon teʼ kaxoʼ ca t chʼaʼah c arcoʼob yétel flechas cah hókoʼon c caxtiʼc wábaʼax c dzoneʼ utiaʼal u hant c ét lákiloʼob. Cu dzoʼocol c dzoneʼ cah sunahoʼon t otoch teʼ kaxoʼ tuʼux yan le cúchil cu kabaʼtiʼc Xázeroʼ. Ca tún hoʼopʼ c bin tu caʼatén teʼ kaxoʼ. Tán u bin c bin lailiʼ tu tohil tuʼux c bin caʼacheʼ tán c maʼn tiʼ tuʼuxoʼob hach maʼalobtac u luʼumil utiaʼal pakal teʼ kaxoʼ lailiʼ nadz tiʼ le Mar Rojooʼ.

15 Ca tún anchah u bin c xímbal ichil yaʼabach kinoʼob, tán c dzonic baʼaxoʼob cu kabétchahal toʼon teʼ behoʼ utiaʼal c hanteʼ, tán c dzonic yétel c arcoʼoboʼ yétel c flechas yétel c dzon yétel c tunichoʼob.

16 Toʼoneʼ tán c bin heʼebix yaʼalic toʼon le baʼax wolisoʼ cu yeʼesic toʼon le behoʼ tiʼ le tuʼuxoʼob hach maʼalobtac utiaʼal pakal teʼ kaxoʼ.

17 Cu dzoʼocol c xímbal yaʼabach kinoʼobeʼ ca t wédzcuntah c otochoʼob mentaan yétel nokoʼ chén utiaʼal humpʼít kinoʼob ca c chan heʼesicba yétel utiaʼal u yantal baʼal c hant yétel c ét lákiloʼob.

18 Ten tún Nefieneʼ le cah hóken utiaʼal in bin dzoneʼ, cah paʼakah in arco le mentaan yétel ácero, heʼel túnaʼ in sucuʼunoʼobeʼ cah kuxilnahoʼob tiʼ ten tu yoʼolal úchic in kascuntiʼc in arco beyoʼ tumen maʼ t caxtah baʼal c hantiʼ.

19 Ca tún h sunahoʼoneʼ mixbaʼal yan hantbil utiaʼal c ét lákiloʼob, cu dzoʼocoleʼ letiʼoʼobeʼ hach caʼanaʼanoʼob tu yoʼolal c sén xímbaleʼ, hach sén yahchahoʼob tumen minaʼan mixbaʼal c hanteʼ.

20 Ca tún anchah u hoʼopʼoʼl sén yaʼalic baʼal Laman yétel Lemuel bey heʼebix xan u palal Ismaʼeloʼ tu yoʼolal u sén yahtaloʼob yétel u yayah ólaloʼob teʼ kaxoʼ, tac in tata hoʼopʼ u yaʼalic baʼal tu contra Yumtsil u Hahal Dios, beyoʼ tu yoʼolal hach sén yaʼab u yayah ólaloʼobeʼ ca hoʼopʼ u sén yaʼalic baʼal tu contra Hahal Dios.

21 Ten tún Nefieneʼ yahchah in wól tu yoʼolal u tʼan in sucuʼunoʼob tu yoʼolal paʼakahaʼan in arco, tumen u arcoʼoboʼoʼob letiʼoʼobeʼ maʼ tu dzonoʼob maʼalobiʼ tu yoʼolal minaʼan u mukeʼ, beyoʼ hach istiʼcyah tiʼ toʼon ca tún h pʼateʼ maʼ páhchah c caxtiʼc baʼal c hantiʼ.

22 Ten Nefieneʼ ca tiʼn sén tʼanaheʼn tiʼn sucuʼunoʼob, tumen dzoʼoc caʼach u chichtal u pucsiʼkaloʼob tu caʼatén tán tac u yaʼalic baʼal tu contra Yumtsil u Hahal Diosoʼob.

23 Ten tún Nefieneʼ ca tiʼn betah humpʼél arco yétel cheʼ beyxann humpʼél toh bekech cheʼ utiaʼal flecha, tiʼn yétel betah humpʼél dzonil nokoʼ yétel tiʼn molah chan tunichoʼob utiaʼal dzonbil. Cu dzoʼocoleʼ ca tiʼn wáʼalah tiʼ in tata: Tuʼux u deber in bin ca páhchahac in caxtiʼc baʼal c hanteʼ?

24 In tata túneʼ ca tu kátah tiʼ Yumtsil tumen tu humillartubaoʼob tu yoʼolal le baʼax tiʼn wáʼalah tiʼoʼoboʼ; tumen tiʼn wáʼalah yaʼabach baʼal tiʼoʼob yétel tulácal yól in pucsiʼkal.

25 Ca tún h tʼaʼan in tata tumen Yumtsil, tu hahileʼ h keʼey tu yoʼolal úchic u yaʼalic baʼal tu contra Yumtsil, tu yoʼolal úchic u kéyeloʼ ca sén yayah ólchahiʼ.

26 Ca tún h aʼalaʼab tiʼ tumen Yumtsil: Il a wil le wolis baʼaloʼ ca a xoc le baʼaxoʼob dzíbtaanoʼ.

27 Le ca tún h dzoʼoc yilic in tata baʼaxoʼob dzíbtaan yókol le baʼax wolisoʼ h sahacchaheʼ ca hoʼopʼ u sén quiʼquiʼlanquiʼl, beyxann in sucuʼunoʼob yétel u palal Ismaʼel beyxann c atanoʼob.

28 Ten tún Nefieneʼ tiʼn wilaheʼ le baʼaxoʼob cu túchʼubtiʼcoʼ le yanoʼob teʼ baʼal wolisoʼ tán u yeʼesic toʼon le behoʼ hach heʼebix c mentiʼlac le baʼax cu yaʼalic toʼonoʼ yétel xan le fe c dzic tiʼoʼ.

29 Yókol xaneʼ tiʼ yan humpʼél túmben dzíbiʼ, le dzíbaʼ maʼ istiʼcyah u xoʼocoliʼ, letiʼ cu dzaic c ohélt u beloʼob Yumtsil cu dzíbtaaleʼ cu kexpahal u dzíbil ich hun sútuquiʼl, heʼebix le c fe tiʼoʼ yétel heʼebix c dzicba c ment le baʼax cu yaʼalicoʼ bey túnoʼ c iliqueʼ tiʼ baʼaloʼob meheʼntaqueʼ, Yumtsil cu páhtal u betiʼc nucuch baʼaloʼob.

30 Ten Nefien, túneʼ, h naʼaquen tac tu hach caʼanalil le caʼanal luʼumoʼ heʼebix tu yeʼesahil le baʼax wolisoʼ.

31 Ca tún tiʼn quínsah baʼalcheʼoʼobeʼ cah anchah baʼal u hant c ét lákiloʼob.

32 Ca tún h sunaheʼn tiʼ t otochoʼob le mentaan yétel nokoʼ in cuchmaʼh le baʼalcheʼoʼob tiʼn quínsahoʼoboʼ le ca tún tu yilahoʼob tiʼn tasah baʼal hantbileʼ, hach sén quiʼmaʼc yóloʼob ca tu humillartubaoʼob tu tán Yumtsileʼ, yétel ca tu dzahoʼob diosboʼotiʼc tiʼ.

33 Cu dzoʼocol tún leloʼ ca hoʼopʼ c bin tu caʼatén tu tohil tuʼux h binoʼon caʼachoʼ. Cu dzoʼocol c xímbal yaʼabach kinoʼobeʼ ca t wédzcuntah c otochoʼob tu caʼatén tu yoʼolal c pʼátal dzeʼedzec kin teʼeloʼ.

34 Ca tún h quím Ismaʼeleʼ cah muʼuc tiʼ humpʼél cúchil cu kabaʼtiʼc Nahom.

35 U palal Ismaʼeleʼ sén okolnahoʼob yoʼolal u tataoʼob tán xan u sén yahtal u yóloʼob tu yoʼolal hach istiʼcyah ca hoʼopʼ u yaʼalic baʼal tu contra in tata tumen letiʼ hóksoʼob tu luʼumil Jerusalen, tán u yaʼalicoʼob: C tataeʼ dzoʼoc u químil, beyoʼ, toʼoneʼ dzoʼoc c maʼn yaʼab tuʼux ich kax tán c uʼuyic ukahoʼon, wiʼihoʼon yétel sénquech caʼanaʼanoʼoneʼ; cu dzoʼocol le nucuch yayah ólal yan toʼonaʼ wáy bín químicoʼonaʼ sén wiʼihoʼon ich kaxaʼ.

36 Beyoʼ tu yaʼalah baʼal tu contra in tata, beyxann tiʼ ten, hach tac u sutoʼob Jerusalen.

37 Ca tún tu yaʼalah Laman tiʼ Lemuel yétel tiʼ u palal Ismaʼel: Heʼel túnaʼ coʼoneʼex quínsic c tata yétel c ídzin Nefi tumen hach u kát u betuba nohochil yétel u caʼansicoʼon toʼon u nucuch sucuʼunoʼon.

38 Beʼoraaʼ cu yaʼaliqueʼ, Yumtsileʼ dzoʼoc u tʼan yétel, dzoʼoc xan u kamic u xímbal angeloʼob. Baʼaleʼ toʼoneʼ c oheʼl chén cu tus. Cu yaʼalic toʼon tulácal le baʼaloʼobaʼ yétel cu betiʼc le ulak baʼaloʼob cu tuclicoʼ tu yoʼolal u páhtal u tusicoʼon tán u tucliqueʼ ca páhchahac u bisicoʼon ich kaxaʼ; cu dzoʼocol u bisicoʼoneʼ, cu tucluqueʼ heʼel u betiʼcuba c reyil yétel c nohchil tu yoʼolal u betiʼc toʼon le baʼax cu yóltoʼ. Bey tún úchic u betiʼc in su cuʼun Laman u kuʼuxul u pucsiʼkaloʼoboʼ.

39 Ca tún h tal Yumtsil tiʼcnal, beyoʼ h aʼalaʼab yaʼabach baʼaloʼob tiʼoʼob tumen Yumtsil, yétel sén h keʼeyoʼob in sucuʼunoʼob. Cu dzoʼocol tún u keʼeyeloʼob tumen Yumtsileʼ, chan tu pʼatoʼob u kuxiloob ca tu pʼatoʼob u kebanoʼob, le betiʼc túneʼ, Yumtsileʼ tu bendecirtoʼon yétel hanal tu caʼatén tu yoʼolal maʼ químicoʼoniʼ.