1 Ca tún tu meyahtoʼob Yumtsileʼ cah binoʼob tiʼn wétel. Ca t dzah nucuch cheʼoʼob hach heʼlaʼan u formaʼil. Yaʼab u ténel cu yeʼesaʼal ten tumen Hahal Dios bix u deber in betiʼc le nucuch cheʼoʼob utiaʼal le barcooʼ.

2 Beyoʼ teneʼ, Nefieneʼ maʼ tiʼn dzah le cheʼoʼob heʼebix u betaal tumen maʼcoʼobeʼ mix tiʼn betah le barcooʼ heʼebix u betiʼc letiʼoʼoboʼ, sino tiʼn betah heʼebix tu yeʼesilac ten Yumtsileʼ, le betiʼqueʼ maʼ bey heʼebix suc u mentiʼc le maʼcoʼoboʼ.

3 Ten tún Nefieneʼ yaʼab u ténel quiʼn naʼacal yókol le caʼanal luʼumoʼ tu yoʼolal in kátiʼc tiʼ Yumtsil; le betiʼc túneʼ, letiʼ xaneʼ tu yeʼesah ten nucuch baʼaloʼob.

4 Le ca tún tiʼn dzoʼocsah le barcooʼ, heʼebix u yaʼalmaʼhil ten Yumtsileʼ, ca tu yilahoob in sucuʼunoʼobeʼ sén maʼalob yétel hach tu bel mentaanileʼ le betiʼqueʼ tu humillartubaoʼob tu tán Yumtsil tu caʼatén.

5 Ca tún h tal u tʼan Yumtsil tiʼn tataeʼ tán u yaʼalic tiʼ ca ococoʼon ichil le barcooʼ.

6 Tiʼ humpʼél hatscabkin, cu dzoʼocol c listocuntiʼc tulácal baʼaloʼobeʼ; yaʼabcach yich cheʼoʼob yétel bak t caxtah teʼ kaxoʼ, yaʼab cab yétel baʼaloʼob utiaʼal hantbil heʼebix u yaʼalmaʼhil toʼon Yumtsileʼ, cah ocoʼon ichil le barcooʼ yétel c cúch, c nekoʼob yétel tulácal le baʼaxoʼob c tasmaʼh t ételeʼ le cu páhtal u cuchic cada huntúl heʼebix chihaʼanileʼ; bey tún úchic c ocol teʼ ichil le barcooʼ, toʼon, c atanoʼob yétel c palal.

7 Tiʼn tata túneʼ h síh caʼatúl palal tiʼ ich kaxoʼ; u maʼs nohochil Jacob u kabaʼ, u maʼs chichanileʼ Jose.

8 Le tún cah dzoʼoc tún c ocol ichil le barcooʼ yétel tulácal baʼal utiaʼal c hantoʼ, tulácal le baʼaxoʼob h aʼalaʼab toʼon ca c chʼaʼoʼ cah hókoʼon yókol le haʼoʼ cah bisaʼaboʼon tumen le ikoʼ tu behil tac le prometertaan luʼumoʼ.

9 Cu dzoʼocol tún c bisaʼal tumen le ik ichil yaʼabach kinoʼ in sucuʼunoʼob yétel u yatanoʼobeʼ, beyxann u palal Ismaʼel, ca hoʼopʼ u kakas quiʼmaʼccunsic u yóloʼob, ca hoʼopʼ u kayoʼob u kakas ókotoʼob, tiʼ leloʼ cah tuʼub tiʼoʼob le páhtalil le tu bisoʼob tac teʼeloʼ, beyoʼ tu hach betoʼob baʼaloʼob yétel kakas tuculoʼob.

10 Ten tún Nefieneʼ ca hoʼopʼ in sahactal tumen maʼ xan ca kuʼuxuc Yumtsil t oʼolaliʼ yétel ca u hadzoʼon, tu yoʼolal c kebanoʼobeʼ ca u bet c búlul tu tamil le kaʼnaboʼ. Le betiʼc túneʼ ten Nefieneʼ ca hoʼopʼ in sén tsicbal tiʼoʼob, baʼaleʼ heʼel túnaʼ cah kuxinahoʼob tiʼ teneʼ, ca tu yaʼalahoʼob: Maʼ c kát ca u betuba c ídzin c nohchil ichiloʼoniʼ.

11 Laman tún yétel Lemueleʼ ca tu maʼchachénoʼobeʼ ca tu kaxenoʼob yétel sumeʼ ca tu loxenoʼob, Yumtsileʼ tu chaʼah u betiʼcoʼob beyoʼ tu yoʼolal u dzoʼocsic le baʼax u yaʼalmaʼhoʼ tu yoʼolal le kakas maʼcoʼoboʼ.

12 Beyoʼ cu dzoʼocol u kaxtiʼquenoʼobeʼ, maʼ h páhchah in pécsquiʼnbaiʼ, tiʼ le sútucoʼ le baʼal wolis cu yeʼesicoʼon le behoʼ, u mentmaʼh Yumtsil c tiaʼaloʼ, tu pʼat u meyah.

13 Le betiʼqueʼ maʼ tu yoholoʼob tuʼux u deber u binoʼob yétel le barcooʼ. Ca tún h cáh humpʼél kaʼam chác yétel ik, beyoʼ humpʼél kaʼam chác yétel ik hach tu háksah c ól; beyoʼ; ca tu betah c sut t pach tiʼ óxpʼél kinoʼob; ca tún hoʼopʼ u sén sahactaloʼob de que bín búlucoʼoboʼ teʼ ichil le kaʼnaboʼ. Pero maʼ tu wáchʼcaheʼnoʼobiʼ.

14 Tu canpʼél kineʼ cah puʼuloʼon t pachil, le kaʼam chác yétel ikoʼ tán u maʼs kaʼamtal.

15 Hach taitac c búlul teʼ tu tamil le kaʼnaboʼ beyoʼ. Cu dzoʼocol c bisaʼal tiʼ canpʼél kineʼ, in sucuʼunoʼobeʼ ca hoʼopʼ u naʼatiʼcoʼobeʼ u juicio Hahal Dios yan yókoloʼob yételeʼ bín químicoʼob wá maʼ tu pʼatiʼcoʼob le baʼaxoʼob kastac tu betahoʼoboʼ. Le betiʼc túneʼ ca tu nadzubaoʼob tiʼn wicnaleʼ ca tu wáchʼahoʼob u kaxbil sumil tiʼn kab, heʼel túnaʼ dzoʼoc u hach chuʼupul, bey xan u cal in woc hach chup yétel hach yah.

16 Quex tumen beyoʼ teniʼ in dzamaʼh in wól tiʼ in Hahal Dios yételeʼ quiʼn quiʼquiʼtʼantiʼc búlkin, maʼ xan tiʼn wáʼalah baʼal tu contra Yumtsil tu yoʼolal u hach yahil in woc.

17 In tata Lehieʼ u yaʼalmaʼh yaʼabach baʼaloʼob tiʼ in sucuʼunoʼob, bey xan tiʼ u palal Ismaʼel baʼaleʼ letiʼoʼobeʼ cu yaʼalicoʼobeʼ bín u bet kas tiʼ heʼemaʼxac cu yántiʼqueneʼ. Tumen tún dzoʼoc u chʼíhil in tataoʼob yétel úchic u sén yahtal u yóloʼob tu yoʼolal u palaloʼobeʼ, cah kohaʼanchahoʼob, beyoʼ, cah anchah u pʼátaloʼob chilicbaloʼob yaʼabach kin.

18 Tu yoʼolal xan u yahiloʼob yétel u yayah ólaloʼob yétel tu yoʼolal u kasiʼl u cuxtal in sucuʼunoʼobeʼ, taitac u kubic u pixanoʼob tiʼ Hahal Dios beyoʼ, u saquiʼl u poloʼobeʼ hach taitac u dzaʼabal ich luʼum beyoʼ, hach taitac u puʼululoʼob in tataoʼob teʼ kaʼnaboʼ utiaʼal u muʼuculoʼob.

19 Jacob yétel Jose túneʼ, tumen hach tanquelenoʼobeʼ, kabét ca hanicoʼob cah yahchah u yóloʼob tu yóʼolal u yayah ólaloʼob u tataoʼob, mix in wátan cu yókol yétel u kátiʼc tiʼ Hahal Dios mix in palal páhchah u kexic u pucsiʼkal in sucuʼunoʼob ca u wáchʼenoʼob.

20 Mixbaʼal chén u páhtalil Hahal Dios taitac u xuʼulsicoʼobeʼ cah páhchah u kexic u pucsiʼkaloʼobeʼ, le tún ca tu yilahoʼob hach bin buʼulucoʼob teʼ tu tamil le kaʼnaboʼ ca tu kexic u yóloʼob tiʼ le baʼax tu betahoʼob tenoʼ ca tu wáchʼaheʼnoʼob.

21 Cu dzoʼocol tún u wáchʼiquenoʼobeʼ heʼel túnaʼ ca tiʼn chʼaʼah le baʼax wolis cu yeʼesic le behoʼ ca hoʼopʼ u meyah heʼebix tiʼn wóltilʼaqueʼ, ca tún h orarnaheʼn tiʼ Yumtsil, cu dzoʼocol in orareʼ cah dzoʼoc le kaʼam chácoʼ cah anchah mix humpʼít ik mix chác.

22 Ten tún Nefieneʼ ca tiʼn guiartah le barcooʼ ca hoʼopʼ c bin tu caʼatén tiʼ le prometertaan luʼumoʼ.

23 Cu dzoʼocol tún c bin yókol haʼ tiʼ yaʼabach kinoʼobeʼ cah kuchoʼon teʼ luʼum prometertaanoʼ, cah émoʼoneʼ ca t wédzcuntah c otoch le mentaan yétel nokoʼ; cu t dzah u kabaʼeʼ u prometertaan luʼumil.

24 Ca tún hoʼopʼ c meyahtiʼc le luʼumoʼ, ca hoʼopʼ c pakal, beyoʼ, t pakah tulácal le nekoʼob t tasmaʼh cah lukoʼon Jerusalenoʼ, ca tún anchah u sén nuctaloʼob ca tu dzah toʼon yaʼab baʼaloʼob Hahal Dios.

25 Caʼaliquiʼl tún tán c bin teʼ kaxoʼ teʼ prometertaan luʼumoʼ, ca t ilah u heʼheʼlásil baʼalcheʼoʼob teʼ káxoʼ wácax, tsíminoʼob, queh, yétel tulácal u heʼheʼlásil baʼalcheʼoʼob kabét tiʼ maʼc, t caxtah xan u heʼheʼlásil baʼaloʼob yan ich luʼum bey heʼebix oro, plata yétel cobreoʼ.