1 Ca tún hoʼopʼ c bin tu caʼatén ich kax tán c bin lakin desde le kinoʼ cah binoʼon yétel yahchahoʼon yaʼab ich kaxoʼ, c atanoʼobeʼ tu dzahoʼob toʼon palal teʼeloʼ.

2 Quex beyoʼ hach nuctac u bendicionoʼob tu wecah Yumtsil t ókoloʼ, quex tumen cuxlahoʼon chén yétel cheʼecheʼ bak teʼ kaxoʼ, c atanoʼobeʼ hach anchah u kab yimoʼob utiaʼal u chuʼuch u meheʼn palaloʼobeʼ ca hach anchah u mukoʼob, beyoʼ le palaloʼoboʼ hach anchah u mukoʼob hach heʼebix u muk xíboʼobeʼ, ca hoʼopʼ u cuchic u cuchoʼob maʼ tu queharoʼobiʼ.

3 Bey túnoʼ c iliqueʼ u tʼan Hahal Dioseʼ yan u betaaleʼ, wá u palal maʼc cu betiʼc u tán Hahal Dioseʼ letiʼeʼ cu tséntiʼcoʼob yétel cu dzaic u mukoʼob, cu dzaic xan bix úchic u páhtal u betaal le tʼanoʼob u dzamaʼhoʼ; le betiʼqueʼ Yumtsileʼ tu dzah toʼon baʼax kabét toʼon caʼaliquiʼl tiʼ yanoʼon teʼ kaxoʼ.

4 Teʼeloʼ tiʼ cahlahoʼon yaʼabach haʼab, beyoʼ ocho haʼab h pʼátoʼon teʼ kaxoʼ.

5 Ca tún h kuchoʼon teʼ luʼum t dzah u kabaʼi Yaʼabil Yan tumen hach sénquech yaʼab u yich u cheʼiloʼob yétel hach yan cah caxtaan ich kaxiʼ; Yumtsil tu listocuntah tulácal lelaʼ tu yoʼolal maʼ c químil. Ca t ilah le kaʼnaboʼ u kabaʼ Irreantum, u kát yaʼaleʼ yaʼab haʼ.

6 Teʼ tún tu tsel le kaʼnaboʼ tiʼ t wédzcuntah c otochoʼobiʼ; quex tumen yahchahoʼon yaʼab, beyoʼ, tiʼ hach yaʼab yah ólal anchah toʼon de que maʼ tu páhtal c dzíbtiʼc tulácal, toʼoneʼ quex beyoʼ hach quiʼmaʼcchah c ól le cah kuchoʼon tu tsel le kaʼnaboʼ, ca t dzah u kabaʼ le luʼumoʼ Yaʼab Yanoʼ tumen hach yan yich u cheʼiloʼob.

7 Cu dzoʼocol tún in cahtal yaʼabach kinoʼob tiʼ luʼum u kabaʼeʼ Yaʼab Yanoʼ, ca tu tʼanaheʼn Yumtsileʼ, ca tu yaʼalah ten. Líkeneʼ ca naʼacaquech tiʼ yókol le caʼanal luʼumoʼ. Ca tún líkeneʼ ca naʼaquen yókol le caʼanal muloʼ ca kaʼam tʼanen tiʼ Yumtsil.

8 Ca tún tu tʼanaheʼn Yumtsileʼ ca tu yaʼalah ten: Yana betiʼc humpʼél barco, ten quiʼn weʼesic tech bixiʼ tu yoʼolal u páhtal in bisic a cahal teʼ ichil le haʼoʼobaʼ.

9 Ca tún tiʼn wáʼalah tiʼ Yumtsil: Tuʼux únchac in bin in chʼaʼ le metal kabét ten utiaʼal in betiʼc le heʼrramientoʼoboʼ utiaʼal in betiʼc le barcooʼ le bix dzoʼoc a weʼesic tenoʼ?

10 Ca tún tu yaʼalah ten Yumtsil tuʼux u deber in bin ca in caxt le metal utiaʼal in betiʼc le heʼrramientoʼoboʼ.

11 Ten tún Nefieneʼ ca tiʼn betah baʼaloʼob tiʼ u kéwel baʼalcheʼ utiaʼal u yustaal kak, cu dzoʼocol in betiʼc le heʼeloʼoboʼ le kabét ten utiaʼal u yustaal le kákoʼ, ca tiʼn koʼokolah caʼapʼél tunichoʼob, humpʼél tu yókol ulak, tu yoʼolal u hókol u kákilo.

12 Tumen tac tiʼ le kinoʼoboʼ, Yumtsileʼ maʼ u chaʼ u yantal toʼon yaʼab kák caʼaliquiʼl tán c bin teʼ kaxoʼ, tumen cu yaʼaliqueʼ ten bín in bet u quiʼchahal a woʼocheʼex tu yoʼolal maʼ kabét u preparartaaliʼ.

13 Ten xan a sásileʼneʼex teʼ kaxoʼ, yétel bín in weʼes teʼex le beh actán tiʼ teʼex wá ca betiʼqueʼex in tʼanoʼoboʼ. Le betiʼqueʼ wá ca wuʼuyiqueʼex in tʼanoʼobeʼ, bin bisaʼaqueʼex teʼ prometertaan luʼumoʼ yétel bín a wohélteʼexeʼ, ten h biseʼex.

14 Beyoʼ, ca tún tu yaʼalah Yumtsil xaneʼ: Le quen kuchuqueʼex teʼ luʼum prometertaanoʼ bín a wohélteʼexeʼ ten, Yumtsileʼ Hahal Diosen yételeʼ ten le Yumtsiloʼ tiʼn calánteʼex teʼex utiaʼal maʼ ta xuʼululeʼexiʼ, beyoʼ, ten xan hókseʼex tu luʼumil Jerusalen.

15 Le betiʼc túneʼ ten Nefieneʼ tán caʼach in dziquiʼnba in dzoʼocs u tʼan Yumtsil yételeʼ tán caʼach in tsolic u xiquiʼn in sucuʼunoʼob ca u creertoʼob yétel ca u dzah u yóloʼob.

16 Ca tún tiʼn mentah le heʼrramientoʼoboʼ yétel le metal h yiʼib tiʼ le tunichoʼ.

17 Le tún ca tu yilah in sucuʼunoʼob hach taitac in mentiʼc humpʼél barcoeʼ, cah hoʼopʼ u yaʼalic baʼal tiʼn woʼolal tán u yaʼalicoʼob: C ídzineʼ dzoʼoc u chocotal u pól; tán u tuclic heʼel u páhtal u mentiʼc humpʼél barcoeʼ, tún xan u tucliqueʼ yétel leloʼ heʼel u páhtal u bin chúmuc de nucuch haʼoʼoboʼ.

18 Bey úchic u yaʼalic baʼal in sucuʼunoʼob tiʼn woʼolal, yételeʼ maʼ tu yóltahoʼob meyahiʼ tumen tán u tuclicoʼobeʼ maʼ tán u páhtal in betiʼc humpʼél barcooʼ, mix xan tán u creertiʼcoʼob wá Yumtsil eʼesic ten bix quen in mentiʼl.

19 Cu dzoʼocol túneʼ cah anchah u yúchuleʼ, ten Nefieneʼ tiʼn wuʼuyah hach yan ten yayah ólal tu yoʼolal u chichil u pucsiʼkaloʼob; le tún ca tu yilahoʼob tán u yahtal in wóleʼ cah quiʼmaʼcchah yól u pucsiʼkaloʼob tiʼ ten, tán u yaʼalicoʼob: C oheʼleʼ maʼ tu páhtal a mentiʼc humpʼél barcoeʼ, tumen c oheʼleʼ minaʼan a naʼat utiaʼal a betiʼc nucuch meyahoʼobeʼ.

20 Techeʼ beyech c tata cu chaʼic u bisaʼal tumen u chan tuculil u pucsiʼkal maʼ tu beliʼ. Beyoʼ, tu hóksoʼon tu luʼumil Jerusalen, dzoʼoc c maʼn tiʼ yaʼab tuʼuxoʼob wáy kaxaʼ, tiʼ tulácal le kinoʼobaʼ c atanoʼobeʼ h meyanahoʼob quex tumen kohaʼanoʼob tiʼ chanpal, dzoʼoc xan u dzaicoʼob toʼon meheʼn palal wáy kaxaʼ tán u yahtal yóloʼob tiʼ tulácal baʼal, baʼaleʼ maʼ h químoʼobiʼ, maʼs maʼalob caʼach ca químicoʼob antes u hókloʼob Jerusaleneʼ tuʼux maʼ u taloʼob u yuʼuboʼob le yahoʼobaʼ.

21 Heʼel túnaʼ dzoʼoc u sén yahtal c ól wáy kaxaʼ tiʼ le kinoʼobaʼ; tiʼ tulácal le kinoʼobaʼ dzoʼoc caʼach c quiʼ óltal yétel baʼaxoʼob yan toʼon t cahal tuʼux yan toʼon le baʼaxoʼob tu pʼatah toʼon c ét lákiloʼob antes u químiloʼobeʼ, beyoʼ dzoʼoc caʼach u quiʼmaʼctal c óleʼ.

22 C oheʼl xaneʼ le maʼxoʼob yanoʼob caʼach tu luʼumil Jerusalenoʼ toh u cuxtaloʼob tumen cu yuʼubicoʼob u tʼan Yumtsil, heʼebix xan tulácal u tʼanoʼob heʼebix letiʼoʼ. Bey tún úchic u tʼan in sucuʼunoʼobeʼ tán u yaʼalicoʼob baʼal t oʼolal yétel tún taquiʼcoʼob c pól.

23 Ca tun anchah u yúchul le heʼelaʼ, ten Nefieneʼ ca tiʼn wáʼalah tiʼoʼob beyaʼ: Ca tucliqueʼexeʼ c tataoʼob u palal Israeleʼ, dzoʼoc wá caʼach u salvartiʼcubaoʼob tu kab le egiptoiloʼob wá maʼ úchic u yuʼubicoʼob u tʼan Yumtsileʼ?

24 Ca tucultiʼqueʼexeʼ dzoʼoc wá caʼach u páhtal u hókoloʼob tiʼ u esclavoiʼloʼob wá maʼ úchic u túxtaal Moises tumen Yumtsil tu yoʼolal u hóksaʼaloʼobeʼ?

25 Teʼexeʼ a woheʼleʼex u palal Israeleʼ bey esclavoʼob yanoʼob caʼachiʼ, ichil yaʼabach meyahoʼob hach istiʼcyah u meyahoʼobeʼ; le betiʼc túneʼ, a woheʼleʼex hach maʼalob ca bisaʼacoʼob nách tiʼ le maʼxoʼob cu meyahtiʼcoʼoboʼ.

26 Ulak baʼaxeʼ a woheʼleʼex Moiseseʼ h aʼalaʼab tiʼ tumen Yumtsil ca u bet le nohoch meyahoʼ; chén yétel u tʼaneʼ caʼa hadzpah le Mar Rojo tu yoʼolal u maʼnoʼob xímbalileʼ mix h chʼuʼul u yocoʼobiʼ.

27 Baʼaleʼ a woheʼleʼex le egiptoiloʼob u baʼatel maʼcoʼob Faraoneʼ láh búloʼob teʼ Mar Rojooʼ.

28 A woheʼleʼex xaneʼ h tséntaaboʼob yétel wáh desde caʼanoʼ le cah anchahoʼob teʼ kaxoʼ.

29 Beyoʼ a woheʼleʼex xaneʼ tu yoʼolal u tʼan Moises heʼebix u páhtalil Hahal Dios yan tiʼeʼ tu hadzah le tunichoʼ cah hók haʼ tiʼ tu yoʼolal u ca anac u yantal haʼ utiaʼal le ukahoʼob maʼquiʼloʼob Israel.

30 Quex tumen h eʼesaʼab tiʼoʼob le behoʼ tumen Yumtsil u Hahal Diosoʼob yétel le maʼx cu salvartiʼcoʼoboʼ, tánil cu bin tiʼ letiʼoʼob, ich kineʼ tán u yeʼesicoʼob le behoʼ yétel ich ákabeʼ cu dzaic sásil tiʼoʼob tán xan u betiʼc utiaʼaloʼobeʼ tulácal baʼal kabét u kamic maʼc, tu chichcuntah u pucsiʼkaloʼob, tu pixah u tuculoʼobeʼ, ca tu yaʼalahoʼob baʼal tu contra Moiseseʼ yétel tiʼ le hahil Dios cuxaʼanoʼ.

31 Ca tún anchah u yúchuleʼ, heʼebix u yaʼalmaʼhileʼ, tu xuʼulsahoʼob, heʼebix xan u yaʼalmaʼhileʼ tu yeʼes tiʼoʼob le behoʼ, beyoʼ heʼebix u yaʼalmaʼhileʼ tu betah tulácal baʼal tu yoʼolaloʼob, mixbaʼal h mentaab wá maʼ bey u yaʼalmaʼhiloʼ.

32 Le cah dzoʼoc u maʼnoʼob chúmuc Rio Jordaneʼ, letiʼ tu dzah tiʼoʼob u mukil utiaʼal u hók kiʼitpahoʼob antes u xuʼulsaʼal tiʼoʼob le maʼcoʼob cahaʼanoʼob teʼ luʼum heʼeloʼ, beyoʼ, tu kiʼkiʼtoʼob tac ca xuʼulsaʼacoʼob.

33 Behlaʼ, ca tucliqueʼexeʼ le maʼcoʼob cahacbaloʼob teʼ luʼum heʼelaʼ, le maʼxoʼob cahaʼanoʼob tu luʼumil prometertaanoʼ, le maʼxoʼob kiʼkiʼtaaboʼob tumen c úchben tataoʼoboʼ, ca tucliqueʼex wá hach toh u cuxtaloʼobeʼ? Heʼel túnaʼ quiʼn wáʼalic teʼexeʼ maʼ.

34 Ca tucliqueʼex wá de que c tataoʼobeʼ maʼs maʼalob que letiʼoʼob wá toh u cuxtaloʼob maʼcoʼob anchahoʼob teʼeloʼ antes tiʼ c tataoʼobeʼ? Quin wáʼalic teʼexeʼ maʼ.

35 Heʼel túnaʼ, Yumtsileʼ mixmaʼc heʼlaʼan cu pactiʼc letiʼ, tulácal igual u pactiʼc; le maʼx toh u cuxtaloʼ letiʼ cu yántaal tumen Hahal Dios. Baʼaleʼ ilawileʼexeʼ, le cahaʼ maʼ tu kamaʼh mix humpʼél u tʼan Hahal Diosiʼ, yétel hach dzoʼoc u yaʼabtal u kasiʼl, yétel xan u chuchʼanil u yutsil Hahal Dioseʼ tiʼ yan yókoloʼobeʼ. Yumtsil túneʼ ca tu kascuntah le luʼumaʼ tu contraoʼobeʼ; ca tu bendecirtah utiaʼal c tataoʼob. Beyoʼ tu kascuntah tu contraoʼob tac u xuʼululoʼobeʼ ca tu bendecirtah tu yoʼolal c tataoʼob ca pátac u yantal tiʼoʼob páhtalil yókoleʼ.

36 Heʼel túnaʼ, Yumtsileʼ dzoʼoc u betiʼc luʼum tu yoʼolal u cahtal maʼcoʼob yétel dzoʼoc xan u mentiʼc u palal tu yoʼolal u yantal tiʼoʼob.

37 Cu líksic u cahil le maʼxoʼob utsoʼoboʼ yétel cu xuʼulsic u cahil le kakas maʼcoʼoboʼ.

38 Cu bisic le toh u cuxtaloʼoboʼ tiʼ sénquech maʼalob luʼumoʼoboʼ yétel cu xuʼulsic le kakas maʼcoʼoboʼ tán u kascuntiʼc le luʼum tu contraoʼoboʼ.

39 Cu gobernartiʼc desde le caʼanoʼoboʼ tu tronoeʼ; yételeʼ le yókolcabaʼ u cúchilil tuʼux cu heʼesic u yoc.

40 Cu yabiltiʼc xan le maʼxoʼob kamic tiʼ bey u Diosiloʼ. Heʼel túnaʼ letiʼ tu yabiltah c tataoʼob yétel tu betah convenio yételoʼob, beyoʼ yétel Abraham, Isaac yétel Jacob ca tu kaʼahsah xan le promesaoʼob u mentmaʼhoʼ ca tu hóksoʼob tu luʼumil Egipto.

41 Ca tu hadzah tiʼoʼob yétel hundzít cheʼ ich kaxoʼ tumen tu chichcuntah u pucsiʼkaloʼob heʼebix dzoʼoc a betiʼqueʼex teʼexoʼ; le betiʼc túneʼ Yumtsileʼ tu hadzah tiʼoʼob tu yoʼolal u kebanoʼob. Ca tún tu túxtah xiknal kákil canoʼob ichiloʼob, le cah chiʼiboʼobeʼ, tu listocunt le behoʼ tu yoʼolal u dzaʼacaloʼob, le baʼax yan u betiʼcoʼoboʼ letiʼ chén ca u pactoʼob; tu yoʼolal tún hach facil le baʼax h dzaʼab tiʼoʼob ca u betoʼoboʼ, yaʼab h químoʼobiʼ.

42 Yaʼab u ténel tu chichcuntah u pucsiʼkaloʼobeʼ, ca tu yaʼalahoʼob baʼaloʼob tu contra Moises yétel Hahal Dios. Quex beyoʼ a woheʼleʼexeʼ tu yoʼolal u sén nohoch páhtalil Hahal Dios cah bisaʼaboʼob tiʼ le prometertaan luʼumoʼ.

43 Beʼoraaʼ, cu dzoʼocol tulácal leloʼ, dzoʼoc u kuchul tu kinil u chuchʼanil u kastaloʼob, maʼ in woheʼl wá maʼ taitac u xuʼululoʼob tiʼ le kinoʼobaʼ. Tumen in woheʼl hach tu hahil yan u kuchul u kinil u xuʼulsaʼaloʼob, yételeʼ chén yan dzeʼedzecoʼob cun bisbiloʼob esclavoʼoboʼ.

44 Le betiʼc túneʼ, Yumtsileʼ tu yaʼalah tiʼ in tataeʼ ca hókoc u bin ich kaxoʼ, le tún le Judioʼoboʼ tu yótah u quínsoʼob; beyoʼ, beyxann teʼex dzoʼoc a wóltiʼqueʼex a beteʼex beyoʼ; le betiʼqueʼ ca quínsiqueʼex maʼc ta tuculeʼex, yételeʼ beyeʼex heʼebix letiʼoʼoboʼ.

45 Séb ca betiʼqueʼex keban baʼaleʼ cu xántal a kaʼahsiqueʼex a Dioseʼex. Dzoʼoc a wiliqueʼex huntúl angeleʼ, letiʼ tu tʼanaheʼex. Beyoʼ dzoʼoc a wuʼuyiqueʼex u tsicbal yaʼab u ténel, yételeʼ dzoʼoc u tʼaniqueʼex yétel humpʼél chanbel tʼan, baʼaleʼ dzoʼoc u saʼataal teʼex le u páhtalil a wuʼuyiqueʼex tiʼoʼ, le betiʼqueʼ maʼ páhchah a wuʼuyiqueʼex le baʼax cu yaʼalicoʼ; le betiʼqueʼ kabét u tʼaniqueʼex yétel tʼan bey tiʼ u lémbal chác cu humeʼ, cu betiʼc u títiʼcuba luʼum bey bin u kaʼam hádzaʼaleʼ.

46 Teʼexeʼ a woheʼleʼex tu yoʼolal u páhtalil u sén nohoch tʼaneʼ cu páhtal u betiʼc u saʼatal luʼum, beyoʼ, tu yoʼolal u ca táxchahacoʼob, yétel cu páhtal u betiʼc u nohochtal caʼanal le táx luʼumoʼoboʼ. Baʼaxtén tún hach chich a pucsiʼkaleʼex?

47 Ta woʼolaleʼexeʼ yahchahaʼan in wól, hach yah in pucsiʼkal tumen sahquen ca puʼuluqueʼex minaʼan u xul u kinil. Heʼel túnaʼ hach chupen yétel u pixan Hahal Dioseʼ, minaʼan u muk in wínclil.

48 Le ca tún h dzoʼoc in wáʼalic tiʼoʼob beyaʼ, h kuxilnahoʼob tiʼn woʼolaleʼ, ca tu yóltahoʼob u pulenoʼob tu tamil le kaʼnaboʼ. Baʼaleʼ le cah nádzoʼob tiʼn wicnal utiaʼal u maʼchiquenoʼobeʼ, ca wáʼalahlen tán in wáʼalic tiʼoʼob: Tu kabaʼ Hahal Dios le yan tulácal páhtalil tiʼoʼ, quiʼn wáʼalic teʼexeʼ maʼ a maʼchiqueneʼex tumen chupen yétel u pixan Hahal Dios tac u yiʼibil in bakel; heʼemaʼxac wá cu maʼchiqueneʼ cu tiʼiʼquiʼl bey humpʼél xíw tiʼquiʼneʼ; le maʼxoʼ bín ilaʼac bey mixbaʼal letiʼ tu tán u páhtalil Hahal Dioseʼ, tumen Hahal Dios cun u bet lob tiʼ.

49 Ten tún Nefieneʼ tiʼn wáʼalah tiʼoʼobeʼ maʼ u deber u yaʼalic baʼal tu contra u tata; bey xaneʼ tiʼn wáʼalah ca meyahnacoʼob ca u yántenoʼob tumen Hahal Dios u yaʼalmaʼh ten ca in bet humpʼél barcooʼ.

50 Ca tiʼn wáʼalah tiʼoʼob: Wá Hahal Dios cu yaʼalic ten caʼach ca in bet tulácal baʼaleʼ heʼel u páhtal in betiʼqueʼ. Wá cu yaʼalic ten ca in wáʼal tiʼ le haʼaʼ; sutaba luʼumil, cu sutiʼcuba; wá xan quiʼn wáʼalic tiʼ beyoʼ, bey bín betiʼloʼ.

51 Le betiʼc túneʼ wá Yumtsil yan tiʼ sénquech páhtalil tiʼ, yétel dzoʼoc xan u betiʼc yaʼabach baʼal cu háksic yól maʼc ichil u palal maʼqueʼ, Baʼaxtén maʼ únchac u páhtal u caʼansic ten in bet humpʼél barcoiʼ?

52 Ten tún Nefieneʼ tiʼn wáʼalah yaʼabach baʼaloʼob tiʼ in sucuʼunoʼob, le betiʼc túneʼ cah xaʼakpah u tuculoʼobeʼ maʼ h páhchah u núquiʼcoʼob ten mixbaʼaliʼ; mix tu yóltahoʼob u maʼchénoʼob yétel u yal u kaboʼob ichil yaʼabach kinoʼobiʼ. Maʼ tu yóltahoʼob u betoʼob leloʼ tumen sahacoʼob u tiʼiʼquiʼloʼob tiʼn tán tumen hach sén nohoch u páhtalil u pixan Hahal Dios; bey úchic u betiʼc u tuclicoʼoboʼ.

53 Ca tún tu yaʼalah ten Yumtsil: Tuʼchʼkabt tiʼ a sucuʼunoʼob, baʼaleʼ maʼ bín tiʼiʼquiʼcoʼob ta tán, sino quiʼn betiʼc u quiʼquiʼlanquiʼloʼob, cu yaʼalic Yumtsil; yan in betiʼc beyoʼ tu yoʼolal u yoheltiʼcoʼob ten Yumtsil u Hahal Diosiloʼob.

54 Ca tún tiʼn tuʼchʼubtah. Quiʼquiʼlanquiʼloʼob in sucuʼunoʼobeʼ yétel maʼ h tiʼiʼcoʼob tiʼn tániʼ, sino h betaab u títaaloʼob tumen Yumtsil, heʼebix tu yaʼalmaʼhileʼ.

55 Ca tún tu yaʼalahoʼob: Beʼoraaʼ c oheʼl hach tu hahileʼ yan Yumtsil ta wételeʼ, tumen c kahóltiʼc u páhtalil Yumtsil le tu betah c quiʼquiʼlanquiʼl. Cah chinahoʼob tiʼn woc utiaʼal u adorartiʼquenoʼob. Baʼaleʼ maʼ tiʼn chaʼah tiʼoʼobeʼ ca tiʼn wáʼalah tiʼoʼob: Teneʼ chén a wídzineʼexeʼ, le betiʼqueʼ adorarteʼex Yumtsil yétel uʼuy u tʼan a tataeʼex tu yoʼolal u páhtal u yaʼabtal a kinileʼex wáy teʼ luʼum bín dzaʼabac teʼex tumen a Hahal Dioseʼexoʼ.