1 Behlaʼ túneʼ in kát in wáʼal teʼexeʼ, in tata Lehi le cah dzoʼoc u yaʼalic le baʼax bín úchuc tu palal u palaleʼ, cah caʼa tʼan tumen Yumtsil, tán u yaʼalaʼal tiʼeʼ maʼ u deber u bisic u yét lákiloʼob teʼ le kaxoʼ; baʼaleʼ u xíbil palaleʼ u deber ca dzoʼococ u beloʼob tu yoʼolal u páhtal u yantal u paialoʼob utiaʼal Yumtsil teʼ luʼum aʼalaʼan u dzaʼabal tiʼoʼoboʼ.

2 Ca tún h aʼalaʼab tiʼeʼ ca u bet c sut, ten yétel in sucuʼunoʼobeʼ, tu luʼumil Jerusaleneʼ tu yoʼolal c bisic Ismaʼel yétel u lákiloʼob tiʼ le kaxoʼ.

3 Ten Nefi, yétel in sucuʼunoʼobeʼ ca anchah c xímbal tu caʼatén teʼ kaxoʼ tu yoʼolal c caʼa sut Jerusalen.

4 Le cah kuchoʼon tiʼcnal Ismaʼeleʼ, heʼel túnaʼ tu kamaʼhoʼon yétel nohoch quiʼmaʼc ólal, tu yoʼolaleʼ h páhchah c tsolic tiʼ u tʼan Yumtsil.

5 Yumtsil túneʼ tu betah u yutstal tu xiquiʼn Ismaʼel yétel tulácal le maʼxoʼob yan tu yotochoʼ; tu yoʼolaleʼ h taloʼob t étel teʼ kaxoʼ tac tuʼux yan u yotoch c tataoʼ.

6 Caʼaliquiʼl tún tán c bin teʼ kaxoʼ, heʼel túnaʼ Laman, Lemuel, caʼatúl u xchʼupul palal yétel caʼatúl u xíbil palal Ismaʼel yétel u familiaoʼobeʼ maʼ tu yuʼuboʼob c tʼan, tiʼ ten Nefien, tiʼ Sam, tiʼ Ismaʼel, u yatan yétel ulak u xchʼupul palal letiʼ.

7 Ichil tún u baʼateloʼobeʼ tán u yaʼalic u sutoʼob tu luʼumil Jerusalen.

8 Ten, Nefieneʼ hach yahchah tiʼn wól yoʼolal maʼ tu yuʼuboʼob le maʼalob tʼanoʼ cah tʼanaheʼn yétel Laman beyxann Lemuel tan in wáʼalic tiʼoʼob: Heʼel túnaʼ, teʼexeʼ in sucuʼuneʼex. Baʼaxtén hach chictac a pucsiʼkaleʼex yétel hach chʼoptac a naʼateʼex, ten a wídzineneʼexeʼ kabét ca in wáʼal teʼex yétel ca in weʼes teʼex bix u deber a betiʼc baʼaloʼob?

9 Bix maʼ anac a wuʼuyiqueʼex u tʼan Yumtsiliʼ?

10 Bix úchic u tuʼubul teʼex ta wilaheʼex huntúl u angel Yumtsil?

11 Beyoʼ, yételeʼ bix úchic u tuʼubul teʼex le nucuch baʼaloʼob u betmaʼh Yumtsil? Tiʼ toʼonoʼ, tu calántoʼon tu kab Labaneʼ ca tu chaʼah c chʼaʼic le baʼaxoʼob dzíbtaanoʼ.

12 Beyoʼ, bix úchic u tuʼubul teʼex yan páhtalil tiʼ Yumtsil u betiʼc tulácal baʼaloʼob utiaʼal u palal maʼcoʼob heʼebix u kátoʼob wá yan fe tiʼoʼob tiʼ Yumtsil? Bey túnoʼ coʼox dzic c ól tiʼ letiʼ.

13 Tumen wá chucaʼan c ól tiʼ letiʼeʼ bín anac toʼon le luʼum aʼalaʼan u dzaʼabal toʼonoʼ; yétel bín a wohélteʼex maʼ nách kineʼ, bín dzoʼocsaʼac u tʼan Yumtsil tu yoʼolal cun xuʼulsbil Jerusalen; tumen tulácal baʼax u yaʼalmaʼh Yumtsil tu yoʼolal u xuʼululeʼ yan u yúchul.

14 Heʼel túnaʼ u Pixan Yumtsileʼ yan u lukul tiʼcnaloʼob sébaʼan tumen maʼ tu yóltahoʼob u kamoʼob le profetaoʼoboʼ yétel tu pulahoʼob Jeremias tiʼ humpʼél calabozo. Dzoʼoc xan u yóltiʼcoʼob u quínsoʼob in tata tu yoʼolaleʼ anchah u púdzul tiʼ le cahoʼ.

15 Le betiʼc quiʼn wáʼalic teʼexeʼ wá ca suteʼex Jerusaleneʼ yan xan a químileʼex yételoʼob. Bey túnoʼ, wá a káteʼexeʼ suneneʼex teʼ cahoʼ yételeʼ kaʼahac teʼex le baʼaxoʼob dzoʼoc in wáʼalic teʼexoʼ, wá ca bineʼexeʼ yan xan a químileʼex; tumen bey u dzaic ten ca tʼanaquen u Pixan Yumtsil.

16 Ten Nefien, le cah dzoʼoc in wáʼalic le tʼanoʼob tiʼ in sucuʼunoʼobaʼ, hach pʼuʼuhoʼob tiʼn woʼolal. Ca tu pulahubaoʼob tiʼn wókol tumen hach pʼuʼuhoʼob, ca tu yóltahoʼob u quínsenoʼob, ca tu kaxtenoʼob yétel sumoʼobeʼ beyoʼ bín u pʼatenoʼob ich kaxoʼ tu yoʼolal u páhtal in hantaal tumen baʼalcheʼoʼob.

17 Chén baʼaleʼ ca tún tiʼn kátah tiʼ Yumtsil tán in wáʼalic: In Yumtsil heʼebix yaniʼl in fe tiʼ techeʼ, salvarteʼn tu kab in sucuʼunoʼob; beyoʼ, dza ten muk tu yoʼolal u páhtal in tʼoquiʼc le sumoʼob kaxmaʼhilenaʼ.

18 Le tún cah dzoʼoc in wáʼalic le tʼanoʼobaʼ le sumoʼob kaxmaʼhil in kabeʼ wáchʼlaʼahoʼob beyxann in woc, ca tún wáʼalaheʼn tu tán in sucuʼunoʼobeʼ ca tiʼn caʼa tʼanahoʼob.

19 Ca tún h pʼuʼuhoʼob tiʼn woʼolal tu caʼaténeʼ ca tu yóltahoʼob u maʼchénoʼob; baʼaleʼ heʼel túnaʼ, huntúl tiʼ u xchʼupul palal Ismaʼeleʼ, beyoʼ beyxann u maʼmaʼ yétel huntúl tiʼ u xíbil palal Ismaʼeleʼ h tʼanahoʼob yételin sucuʼunoʼob tiʼn woʼolal, le betiʼc túneʼ maʼ chich u pucsiʼkaloʼobeʼ ca tu pʼatoʼob u yaʼalic u quínsiquenoʼob.

20 Ca tún anchah u sén yahtal u yóloʼob tu yoʼolal u kebanoʼobeʼ ca tu chin u póloʼob tiʼn tán utiaʼal u sén kátiʼcoʼob ten ca in perdonart tiʼoʼob le baʼaxoʼob dzoʼoc u mentiʼcoʼob tenoʼ.

21 Ca tún tiʼn perdonart tiʼoʼob yétel quiʼmaʼc ólal tulácal baʼaxoʼob u mentmaʼhoʼob teneʼ ca tiʼn wáʼalah tiʼoʼob ca u kátoʼob perdon tiʼ Yumtsil Hahal Dios xan. Ca tún anchah u betiʼcoʼob beyoʼ. Cu dzoʼocol u oraroʼob tiʼ Yumtsileʼ, ca hoʼopʼ c bin tu caʼatén teʼ tuʼux yan u yotoch c tata le mentaan yétel nokoʼ.

22 Ca tún anchah c kuchul tu yotoch c tata; le cah kuchoʼon, ten yétel in sucuʼunoʼob, yétel tulácal u familia Ismaʼel teʼ tu yotoch in tataoʼ, letiʼoʼobeʼ tu dzahoʼob gracias tiʼ Yumtsil Hahal Dios; yétel tu tocahoʼob baʼalcheʼoʼob tu yoʼolal u dzaicoʼob sacrificio tiʼ Hahal Dios.