U Yáx Libroil Nefi
U Nohchilil Yétel U Ministerio
Utsicbal Lehi, Sariah u yatan, yétel u cantúl palaloʼob, u kabaʼoʼobeʼ, (cu cáhal tac tú maʼs nohochileʼ) Laman, Lemuel, Sam yétel Nefi. Cu túxtaal aʼalbil tiʼ Lehi tumen Yumtsileʼ ca hókoc tu luʼumil Jerusalen, tumen letiʼ tún aʼalic le baʼax bín úchuc tu cahal tu yoʼolal u kebanoʼob, le betiʼqueʼ tán u yilicoʼob bix únchac u quínsicoʼob letiʼ. Ichil óxpʼél kineʼ tán u bin chén ich kax yétel u yét lákiloʼob. Nefieʼ, sunah tu luʼumil Jerusalen yétel u sucuʼunoʼob, tu yoʼolal u chʼaʼic u dzíbtaan tsicbalil le judioʼoboʼ. U tsicbalil u hach mukyahoʼob. Cu dzoʼocol u beloʼob yétel u xchʼupul palal Ismaʼel. Cu hókoloʼobeʼ cah binoʼob nách ich kax yétel u yet lákiloʼob. U mukyah ich kaxoʼ. Le tuʼuxoʼob maʼn ich kaxoʼ. Cu kuchuloʼob tiʼ le nucuch haʼoʼoboʼ. U sucuʼunoʼob Nefieʼ ca hoʼopʼ u kuxiloʼob yétel letiʼ. Letiʼ cu sutiʼc yóloʼobeʼ ca tu mentah humpʼél cheʼm. Ca tu dzahoʼob u kabaʼ le cúchiloʼ Yaʼabil Yan. Cu maʼnoʼob chúmuc le nucuch haʼoʼoboʼ cah kuchoʼob tiʼ le tuʼux aʼalaʼan ca dzaʼabac tiʼoʼob. Lelaʼ hach heʼebix tsolaʼanil tumen Nefieʼ wá xaniʼ, ten Nefieʼ, tiʼn dzíbtah le tsicbalaʼ.
Capitulo 1
H chícpah ilbil tu tucul Lehi u caʼanal kák yétel u libroil le baʼax bín úchucoʼ. Cu yaálic yoʼolal u xul bín úchuc tiʼJerusalen yétel u tal Mesiasoʼ. Le Judioʼoboʼ tu yóltahoʼob u quínsoʼob tiʼ Lehi.
1 Ten Nefieneʼ, h síheʼn tiʼ hach utsil tatatsiloʼob, ca tún cambalnahaʼanen tiʼ tulácal u naʼatiʼl in tata; beyoʼ in wilmaʼh yaʼabach yayah ólaloʼob tiʼ tulácal u kinil in cuxtal, quex beyoʼ in kammaʼh xan yaʼabach utsiloʼob tiʼ Yumtsil tulácal u kiniloʼob in cuxtal; hach beyoʼ in wohél maʼalob u yutsil Hahal Dios yétel le baʼax maʼ oheʼltaanoʼ, le betiʼc tún quiʼn dzíbtiʼc u tsicbalil baʼax úch tiʼ in cuxtaliʼl.
2 Beyoʼ quʼn dzíbtiʼc le cuentoaʼ ichil u tʼan in tata, ich le tʼanoʼ yan u caʼansahil le judioʼoboʼ yétel u tʼanil le Egiptoiloʼoboʼ.
3 In wohél xaneʼ le tsicbal quiʼn dzíbtiʼcaʼ hach u hahil; yétel xan quiʼn dzíbtiʼc tiʼn kabil ten heʼebix u bin le baʼax in wohéloʼoboʼ.
4 Cah úch tún utiaʼal u cáhbal u yáx haʼabil u betiʼc u nohchilil Zedequiʼasoʼ, u reyil Judaeʼ (in tata Lehieʼ cahaʼan tiʼ Jerusalen tulácal u kinil u cuxtaleʼ); beyoʼ, h kuchoʼob yaʼabach profetaoʼob ich le cahoʼ ca u pʼatoʼob u kebanoʼob le maʼcoʼob teʼ cahoʼ wá maʼeʼ u noh cahil Jerusalen yan u xuʼulsaʼal.
5 Ca tún h úcheʼ, Lehi in tataeʼ, hókeʼ cah orarnah tiʼ Yumtsil, beyoʼ, yétel tulácal yól u pucsiʼkal, tu yoʼolal u cahal.
6 Caʼaliquiʼl tán u orar tiʼ Yumtsileʼ, cah chícpah actán tiʼ humpʼél caʼanal kák yókol humpʼél tunicheʼ; tiʼ hach yaʼabil le baʼax tu yilah yétel tu yuʼubahoʼ; ca hoʼopʼ u sén quiʼquiʼlanquiʼl tu yoʼolal le baʼax tu yilah yétel tu yuʼubahoʼ.
7 Le ca tún h sunah tu yotoch ich Jerusaleneʼ cah lúb yókol u camaʼ tumen chup u yól yétel u pixanil Dios tu yoʼolal le baʼaxoʼob dzoʼoc u yilicoʼ.
8 Ca tún chup u yól bey yétel le pixanoʼ cah bisaʼab tiʼ humpʼél baʼax dzaʼan ilbil tiʼ tumen Dios, tiʼ tu yilah u heʼebpahal le caʼanoʼoboʼ ca tu tuculaheʼ tán u yilic Hahal Dios culucbal tu tronoil, baʼpachtaan tumen yaʼabach angeloʼob tán u kayoʼob, tán u quiʼquiʼtʼantiʼcoʼob Hahal Dios.
9 Ca tún tu yilah u yémel tiʼ caʼan huntúl maʼc maʼs cu lémbal que le kinoʼ le can anac tu chúmuquiʼl caʼan.
10 Ca tu yilah xaneʼ cu taloʼob tu pach letiʼ ulak doce maʼcoʼob beyoʼ maʼs hach cu lémbaloʼob tiʼ le estrellaoʼob yan teʼ caʼanoʼ.
11 Ca tún h émoʼobeʼ cah binoʼob yókolcab; u yáx huntúleʼ h tal cah wáʼalah tu tánil in tataeʼ ca tu dzah humpʼél libro tiʼ, tán u yaʼalic tiʼ ca u xoqueʼ.
12 Caʼaliquiʼl tún tán u xoquiʼqueʼ cah chuʼup yétel u Pixanil Yumtsil.
13 Cah xocnah tán u yaʼalic: Ótsilech, ótsilech Jerusalen, tumen dzoʼoc in wilic a kebanoʼob. Beyoʼ in tataeʼ tu xocah yaʼabach baʼaloʼob tu yoʼolal Jerusalen, bix bín xuʼulsaʼac yétel u maʼquiʼloʼob cahaʼanoʼob tiʼ; yaʼab tiʼoʼob xan bin quínsaʼacoʼob yétel tadz maʼscab; yétel yaʼab tiʼoʼob xan bín bisaʼac esclavoiʼ tiʼ Babiloniaiʼ.
14 Le ca tún h dzoʼoc u xoc in tata yétel u yilic yaʼabach nuctac baʼaloʼob cu haʼaksic yóleʼ, ca hoʼopʼ u kaʼam aʼalic tiʼ Yumtsil beyaʼ: Hach nuctac a meyahoʼob Yumtsil Hahal Dios yan tulácal páhtalil tiʼ tech, hach cu háksic in wól. A tronoeʼ tyaʼan tu caʼanalil teʼ caʼanoʼoboʼ, yétel ca chʼaʼic ótsilil tu yókol u maʼquiʼloʼob cahaʼan ich luʼum, yétel tumen ca chʼaʼic ótsilileʼ maʼ bin a chaʼ u xuʼulsaʼal le maʼxoʼob cu nadzcubaoʼob ta wicnaloʼ.
15 Bey u tʼan in tata ichil u quiʼquiʼtʼan tiʼ Hahal Dios; tumen hach cu quiʼmaʼcchahal u yól, yétel u pucsíkcaleʼ hach cu chuʼupul tu yoʼolal le baʼaxoʼob dzoʼoc u yilicoʼ, beyoʼ, le baʼaloʼoboʼ h eʼesaʼab tiʼ tumen Yumtsil.
16 Ten Nefieneʼ, maʼ tu páhtal in tsolic hach chucaʼan le baʼaxoʼob tu dzíbtah in tataoʼ, tumen yaʼabach baʼaloʼob tu dzíbtah xan heʼebix ie baʼax dzaʼan ilbil tiʼ tumen Diosoʼ yétel le baʼax h chícpah tiʼ le tán u weneloʼ; beyxann u dzíbtmaʼh yaʼab baʼaxoʼob u yaʼalmaʼh bín úchuc, ca tu yaʼalah tiʼ u palaloʼoboʼ, leloʼobaʼ maʼ tán in tsolic tulácal.
17 Beyoʼ, bín in caʼah in dzíbt le baʼax úch tenoʼ tu kinil in cuxtal ten. Heʼel túnaʼ bin caʼah in tsol le baʼaxoʼob tu betah in tata yókol le laminaoʼob in betmaʼh yétel in kaboʼob tenoʼ, cu dzoʼocol in tsolic humpʼít u tsicbalil in tataeʼ quiʼn dzíbtiʼc u tsicbalil in cuxtal ten.
18 Le betiʼc túneʼ in kát ca a wohéltiʼqueʼexeʼ, le cah dzoʼoc u yilaʼal le nuctac baʼaloʼob tumen in tataoʼ hach sén hakaʼan yóleʼ Yumtsileʼ tu yeʼesah tiʼ baʼax cun úchul utiaʼal u xuʼulsaʼal Jerusalen; heʼel túnaʼ cah hók ichil le cahoʼ ca hoʼopʼ u yaʼalic tiʼoʼob baʼax bín úchuc yétel le baʼax dzoʼoc u yilic yétel le cu yuʼubicoʼ.
19 Le tún le Judioʼoboʼ ca hoʼopʼ yaʼalic baʼal tu yoʼolal le baʼaxoʼob cu yaʼalic tiʼoʼoboʼ, tumen hach tu hahileʼ tu yaʼalah tiʼoʼob le kebanoʼob cu betiʼcoʼoboʼ; ca xan tu yaʼalah u hahil tʼan tiʼoʼobeʼ, le baʼaxoʼob dzoʼoc u yilic yétel dzoʼoc u yuʼubicoʼ, beyxann le baʼax tu xocah teʼ librooʼ, cu yeʼesicoʼob u tal le Mesiasoʼ yétel u lubsic u kebanoʼob yókolcab.
20 Le Judioʼoboʼ le ca tu yuʼubahoʼob le baʼaloʼobaʼ ca kuxilnahoʼob tiʼ heʼebix tu betahiloʼob yétel le profetaoʼob tiʼ le úchben kinoʼoboʼ, le maʼxoʼob dzoʼoc u puʼulul ichil le cahoʼ, dzoʼoc u chʼiʼinchʼiʼinaʼaloʼob yétel u quínsaʼaloʼob; hach beyxannoʼ tun yilicoʼob bix u quínsicoʼob in tata ca u chʼaʼicoʼob u cuxtal. Baʼaleʼ ten Nefieneʼ, bin in weʼes teʼex cu hach chʼaʼic ótsilil Yumtsil tiʼ le maʼxoʼob dzoʼoc u yéyic tu yoʼolal hach toh u cuxtaloʼob, ca u dzaʼ páhtalil tiʼoʼob utiaʼal u pʼatoʼob le u baʼal kasoʼoboʼ.