1 Asin ta uminagi an panahon na sinda nagsaramba sa Kagurangnan, asin ta suminarabay sa sakuya; asin ta naggibo kami sa kahoy nin gibo na marahay-rahay. Asin igwang manga oras na ipinahiling sakuya kan Kagurangnan kun paano ko gigibohon an manga kahoy kan barko.

2 Ngonian ako, si Nephi, dai ko ginibo an manga kahoy siring sa paagi na inadalan nin tawo, ni ginibo ko an barko siring sa paggibo nin manga tawo; alagad ginibo ko idto siring sa paagi na ipinahiling sakuya kan Kagurangnan; kaya, bako ining susog sa manga paagi nin tawo.

3 Asin ako, si Nephi, danay akong nagtukad sa bulod, asin ta danay akong namibi sa Kagurangnan; kaya ipinahiling sa sakuya kan Kagurangnan an manga darakulang bagay.

4 Asin ta uminagi an panahon na pagkatapos na mahaman ko an barko, sunod sa tataramon kan Kagurangnan, nahiling kan sakuyang manga tugang na marahay idto, asin ta an pagkagibo kaidto labi-labi kapulido; kaya, sinda sa giraray nagpakurumbaba sa atubangan kan Kagurangnan.

5 Asin ta uminagi an panahon na an tingog kan Kagurangnan uminabot sa sakuyang ama, na kami magbarangon asin magpasiriring sa barko.

6 Asin ta uminagi an panahon na sa pagkaaga, pagkatapos na samuyang nahanda na an gabos na manga bagay, dakol na manga bunga nin kahoy asin karne na hali sa kadlagan, asin dakol na gayong manga dugos, asin manga pagkabuhay susog sa ipinagboot kan Kagurangnan samuya, nagpasiriring na kami sa barko, ikinarga gabos an samuyang manga dara-dara asin an samuyang manga pisog, asin kun ano-ano pang manga bagay na samuyang dinarara, sunod sa lambang pangangaipo kan lambang edad; kaya, nagsarakay na kami sa barko, kairiba an samuyang manga agom asin manga aki.

7 Asin ta ngonian, an sakuyang ama nagkaaki nin duwang aking lalaki sa kadlagan; an matua si Jacob asin an nguhod si Jose.

8 Asin ta uminagi an panahon pagkatapos na magsarakay na kami sa barko, asin samuya nang dinarara an gabos na pagkabuhay asin manga bagay na ipinagboot samuya, asin ta nag-anod na sa dagat asin dinara kan duros pasiring sa dagang ipinangako.

9 Asin pagkatapos na ipalid kami kan duros sa laog nin dakol na manga aldaw, totoo nanggad, an sakuyang manga tugang asin an manga aking lalaki ni Ismael asin man an saindang manga agom nagpoon mag-orogma, sagkod na sinda nagsarayaw, asin nagkaranta, asin ta nagtataram nin manga daing ugali, iyo, sagkod na sinda nakarilingaw kun anong kapangyarihan an nagdadara sainda duman, iyo, ta nadara sinda sa labi-labi na pagkadaing-ugali.

10 Asin ako, si Nephi, nagpoon maghandal nin labi-labi na tibaad maanggot an Kagurangnan samuya, asin padusahan kami huli sa samuyang karaotan, na tibaad halunon kami kan kahararoman kan dagat; kaya, ako, si Nephi, nagpoon magtaram sa sainda sa hababang boot; alagad totoo nagkaaranggot sinda sa sakuya, an sabi: Dai ta pagtugotan na an satuyang nguhod na tugang an maghadi sa satuya.

11 Asin ta uminagi an panahon na si Laman asin si Lemuel kinua ako asin ginapos nin pisi, asin ta pinasakitan ako, alagad an Kagurangnan tinugotan idto na mangyari tanganing maipahiling niya an saiyang kapangyarihan, sa pag-utob kan saiyang tataramon na saiyang tinaram manunungod kan manga masusumbikal.

12 Asin ta uminagi an panahon na pagkatapos na igarapos ninda ako sagkod na dai ako makahiro, an kompas na hinanda kan Kagurangnan, nagpundo sa paghiro.

13 Kaya, dai na ninda aram kun sain na papadumanon an barko, asin ta uminabot an makusog na bagyo, iyo, sarong makusog asin makangurungirhat na duros asin ta ipinalid kami pabalik sa lawod sa laog nin tulong aldaw; asin ta nagpoon na sindang matakot nin labi-labi ta tibaad sinda magkaralamos sa dagat; alagad dai pa ako ninda hinubadan.

14 Asin sa ika-apat na aldaw, kan kami ipinadpad pabalik, an bagyo kuminusog na gayo.

15 Asin ta uminagi an panahon na kami hahalonon kutana kan kahararoman kan dagat. Asin pagkatapos na kami ipadpad pabalik sa lawod sa laog nin apat na aldaw, nagpoon na magkasarabotan kan sakuyang manga tugang na an paghukom kan Dios itoon na sa sainda, asin ta magkakaparara sinda kun dai sinda magsorolsol kan saindang manga kasumbikalan; kaya, nagdurulok sinda sa sakuya, asin ta hinubad an gapos ko sa manga pulsohan asin ta an manga ini huminurubag na gayo; asin man an sakuyang buko-buko hubag na gayo asin ta makulog na gayo.

16 Alagad, nanarig ako sa sakuyang Dios, asin ta pinagrukyaw ko siya sa bilog na aldaw; asin ta dai ako nagngurob-ngurob sa Kagurangnan huli sa sakuyang manga kasakitan.

17 Ngonian an sakuyang ama, si Lehi, nagtaram nin dakol na manga bagay sa sainda, asin man sa manga aki ni Ismael; alagad, totoo nanggad, na nagpatakot sinda sa kiisay man na magtaram para sa sakuya; asin an sakuyang manga magurang huli ta gurang nang gayo, asin huli ta nagtios nin labi-labing pagmundo huli sa saiyang manga aki, rinuluya asin naghirilang.

18 Huli sa saindang pagmundo asin sa dakulang kapungawan, asin sa kasumbikalan kan sakuyang manga tugang, nagluya na sindang gayo sagkod na haros halion na sinda sa panahon na ini tanganing makaatubang na sinda sa saindang Dios; iyo, an saindang mapuputing buhok haros ihigda na sa daga; iyo, sagkod na haros sinda mahulog na may kamundoan sa sarong matubig na lulubngan.

19 Asin si Jacob asin si Joseph man, na manga aki pa, na nangangaipo nanggad nin dakol na pagkakan, namundo nin gayo huli sa manga kasakitan kan saindang ina; asin man an sakuyang agom na nagluluha asin nagpapamibi, asin man an sakuyang manga aki, dai nakapalumoy kan puso kan sakuyang manga tugang na hubadan ako.

20 Asin ta dai nang iba kundi an kapangyarihan kan Dios, na pinaghuhumaan sinda nin pagkarumpag, an makakapalumoy kan saindang manga puso; kaya, kan mahiling ninda na mahahalon na sinda sa kaararoman kan dagat, nagsorolsol sinda kan manga bagay na naginibo ninda, sagkod na ako saindang hinubadan.

21 Asin ta uminagi an panahon na pagkatapos na ako hubadan ninda, totoo nanggad, kinua ko an kompas, asin ta idto naghiro kun sain na boot ko. Asin ta uminagi an panahon na ako namibi sa Kagurangnan; asin pagkatapos na ako makapamibi nagpundo an duros, asin an bagyo nagpundo, asin ta nagkaigwa nin dakulang katuninongan.

22 Asin ta uminagi an panahon na ako, si Nephi, ako na an nag-antabay kan barko, sa samuyang paglayag giraray pasiring sa dagang ipinangako.

23 Asin ta uminagi an panahon na pagkatapos na maglayag kami nin magkapirang aldaw uminabot kami sa dagang ipinangako; asin nagduman kami sa daga, asin itinurugdok an samuyang manga tolda; asin ta inapod niamo ini na dagang ipinangako.

24 Asin ta uminagi an panahon na nagpoon na kami magbungkal kan daga, asin ta nagtaranom kami nin manga pisog; iyo, ta samuyang inubos an manga pisog na itinaranom sa daga, na samuyang dinara hali sa daga kan Jerusalem. Asin ta uminagi an panahon na an manga ini nagtaralubong gayo; kaya binalaogan kami nin kadakol.

25 Asin ta uminagi an panahon na samuyang naaraman duman sa dagang ipinangako, mantang nagraralakaw kami sa kadlagan, na igwa nin palaen-laen na manga hayop sa kadlagan, an babaeng baka asin an lalaking baka, asin an asno asin an kabayo, asin an kanding asin an kanding na lalaw, asin gabos na klase nin manga lalaw na hayop, na para sa pangngangaipo nin tawo. Asin nakakua kami nin gabos na klase nin manga metal, na bulawan, plata, asin tanso.