1 Asin ta uminagi an panahon na pag-abot niamo sa kadlagan sa samuyang ama, tulos siya napano nin kaogmahan, asin man an sakuyang ina, na si Sariah, labi-labi an kaogmahan, huli ta siya totoong nagmundo nin labi-labi huli sa samuya.

2 Huli ta naghuna siya na napara na kami sa kadlagan; asin ta nagngurob-ngurob na siya tumang sa samuyang ama, na saiyang sinasabi na saro siyang paratubod sa nahiling niya sa saiyang isip; an sabi: Hilinga dinara mo kami hali sa daga na samuyang panunod, asin ta an manga aki kong lalaki dai na, asin mapapara pa kita digdi sa kadlagan.

3 Asin sa siring na tataramon nagngurob-ngurob an sakuyang ina tumang sa sakuyang ama.

4 Asin ta uminagi an panahon na an sakuyang ama nagsabi sa saiya, an sabi: Aram ko na saro akong nakakahiling sa sakuyang isip; ta kun dai ko nahiling an manga bagay kan Dios sa sarong bision dai ko kutana naaraman an karahayan kan Dios, alagad ta nag-erok sana kuta ako sa Jerusalem, asin ta napara na kutana ako siring kan sakuyang manga katugangan.

5 Alagad totoo, nakakua ako nin sarong daga na ipinangako, na sa manga bagay na ini ako naoogma; iyo, asin ta ako nakakaaram na an Kagurangnan ililigtas an sakuyang manga aki sa manga kamot ni Laban, asin ta dadarahon sinda pababa giraray satuya digdi sa kadlagan.

6 Asin sa siring na tataramon nagsabi an sakuyang ama, na si Lehi, na rinanga an sakuyang ina, na si Sariah, manunungod samuya, mantang kami nagraralakaw sa kadlagan pasiring sa daga kan Jerusalem, tanganing kuahon an kasuratan kan manga Judio.

7 Asin kan makabalik na kami sa tolda kan samuyang ama, tulos napano sinda nin kaogmahan, asin an sakuyang ina naranga.

8 Asin siya nagtaram, an sabi: Ngonian aram ko na nanggad na totoong sinugo an sakuyang agom kan Kagurangnan na magdulag pasiring sa kadlagan; iyo, asin ta aram ko man nanggad na an Kagurangnan, totoong sinangkoban an sakuyang manga aking lalaki asin ta ilinigtas sinda sa manga kamot ni Laban, asin ta tinawan sinda nin kapangyarihan tanganing makautob sinda kan manga bagay na kasugoan sainda kan Kagurangnan. Asin sa siring na tataramon siya nagtaram.

9 Asin ta uminagi an panahon na sinda nag-orogma nin labi-labi, asin ta nagdurulot nin atang asin tinutong na manga dulot sa Kagurangnan; asin ta nagpasaralamat sa Dios kan Israel.

10 Asin pagkatapos na sinda magpasaralamat sa Dios kan Israel, an sakuyang ama, na si Lehi, kinua an manga kasuratan na nakaukit sa plakeng tanso, asin ta saiyang binasa an manga idto magpoon sa kapinonan.

11 Asin ta saiyang nahiling na nasa laog an limang manga libro ni Moises, na nagsasaysay kan paglalang kan kinaban, asin man ki Adan asin ki Eva, na enot niatong manga magurang;

12 Asin man an kasuratan kan manga Judio magpoon sa kapinonan, sagkod sa pagpoon kan paghadi ni Sedecias, na hadi kan Juda;

13 Asin man an manga propesia kan banal na manga propeta, magpoon sa kapinonan, sagkod sa pagpoon kan paghahadi ni Sedecias; asin man dakol na manga propesia na itinaram kan nguso ni Jeremias.

14 Asin ta uminagi an panahon na an sakuyang ama, na si Lehi, nakua man sa plakeng tanso an ginikanan kan saiyang manga kamagurangan; kaya saiyang naaraman na gikan siya ki Jose; iyo, si Jose na aki ni Jacob, na ipinabakal sa Egipto, asin na iningatan kan kamot kan Kagurangnan, tanganing maingatan niya an saiyang ama, na si Jacob, asin an saiyang pag-iriba sa harong na dai mapara huli sa gutom.

15 Asin ta sinda dinarara hali sa pagkaoripon asin paluwas sa daga kan Egipto, kan parehong Dios na nag-ingat sa sainda.

16 Asin ta siring kan sakuyang ama, na si Lehi, nakua an ginikanan kan saiyang manga kamagurangan. Asin si Laban saro man na gikan ki Jose, kaya siya asin an saiyang manga ginikanan an nagtago kan manga kasuratan.

17 Asin ngonian kan mahiling an manga bagay na ini kan sakuyang ama, napano siya kan Espiritu, asin ta nagpoon siyang magpropesia manunungod kan saiyang ibubunga—

18 Na ining manga plakeng tanso maibalangibog sa gabos na manga nasion, manga rasa, manga tataramon, asin manga tawo na saiyang bunga.

19 Kaya, sinabi niya na ining manga plakeng tanso dai nanggad mapapara; ni an manga ini mapapadiklom kan panahon. Asin siya nagpropesia nin kadakol na manga bagay manunungod kan saiyang ibubunga.

20 Asin ta uminagi an panahon na sagkod sa siring na panahon ako asin an sakuyang ama nag-utob kan manga kasugoan na ipinagboot samuya kan Kagurangnan.

21 Asin ta samuyang nakua an manga kasuratan na sinugo samuya kan Kagurangnan, asin binasa an manga idto asin ta samuyang nahiling na an manga idto kawiliwili; iyo, sagkod na dakula an pakinabang sa samuya, huli ta samuyang maiingatan an manga tugon kan Kagurangnan para sa samuyang manga aki.

22 Kaya, kadunungan idto nin Kagurangnan na samuyang darahon an manga idto, mantang kami nagraralakaw sa kadlagan pasiring sa dagang ipinangako.