1 Asin ta uminagi an panahon na ako, si Nephi, nagbalik hali sa pakipag-ulay sa Kagurangnan, duman sa tolda kan sakuyang ama.

2 Asin ta uminagi an panahon na siya nagtaram sa sakuya, na an sabi: Totoo nanggad na ako nangaturogan nin sarong pangaturogan, na kun sain an Kagurangnan pinagbotan ako na ika asin an saimong manga tugang na lalaki magbalik sa Jerusalem.

3 Huli nanggad, ta yaon ki Laban an kasuratan kan manga Judio asin man an manga ginikanan kan sakuyang manga kamagurangan, asin ini nakaukit sa manga plakeng tanso.

4 Huli kaidto, nagboot sakuya an Kagurangnan na ika asin an saimong manga tugang magbalik duman sa harong ni Laban, asin hanapon an manga kasuratan, asin ta darahon digdi sa kadlagan.

5 Asin ta ngonian, an saimong manga tugang nagngungurob-ngurob, na an sabi magabat na labi-labi an sakuyang ipinapagibo sa sainda; alagad totoo bako man ako an nagpapagibo kaidto sa sainda, alagad ta tugon idto kan Kagurangnan.

6 Kaya magduman ka, aki ko, asin ta ika nauyonan kan Kagurangnan, huli ta dai ika nagngurob-ngurob.

7 Asin ta uminagi an panahon na ako, si Nephi, nagsabi sa sakuyang ama: Maduman ako asin ta gigibohon ko an manga bagay na ipinagigibo kan Kagurangnan, huli ta aram ko na an Kagurangnan dai nagtatao nin manga kasugoan sa manga aki nin tawo na dai siya nag-andam nin paagi para sa sainda tanganing mautob ninda an bagay na saiyang ipinagboot sa sainda.

8 Asin ta uminagi an panahon na kan madangog kan sakuyang ama an manga tataramon na ini naogma siya nin labi-labi, huli ta saiyang naaraman na ako benendisionan kan Kagurangnan.

9 Asin ta ako, si Nephi, asin an sakuyang manga tugang na lalaki nagpoon kan paglakaw sa kadlagan na dara an samuyang manga tolda, patukad sa daga kan Jerusalem.

10 Asin ta uminagi an panahon na kan kami nasa daga na kan Jerusalem, ako asin an sakuyang manga tugang naghuroron-huron.

11 Asin ta nagripa kami—kun siisay sa samuya an maduman sa harong ni Laban. Asin ta nangyari na an natungdan si Laman; asin ta si Laman nagduman sa harong ni Laban, asin ta siya nakipaghuron saiya mantang nagtutukaw siya sa saiyang harong.

12 Asin ta saiyang minawot ki Laban an manga kasuratan na nakasurat sa plakeng tanso, na napapalaman man an ginikanan kan sakuyang ama.

13 Asin totoo, uminagi an panahon na si Laban naanggot, asin ta pinahali siya paluwas sa saiyang atubangan; asin ta habo niya na mapasamuya an manga kasuratan. Huli kaidto nagtaram siya: Totoong saro kang mahabon, asin gagadanon ko ika.

14 Alagad si Laman nagdulag pahali sa saiyang atubangan, asin isinumbong sa samuya an manga bagay na ginibo ni Laban. Asin ta kami nagpoon na magmurundo nin labi-labi, asin an sakuyang manga tugang boot nang magbaralik sa sakuyang ama sa kadlagan.

15 Alagad totoo ako nagtaram sa sainda na: Sagkod na an Kagurangnan nabubuhay, asin na kita buhay pa dai kita mababa sa satuyang ama sa kadlagan sagkod na dai nautob niato an kasugoan kan Kagurangnan satuya.

16 Kaya, kaipuhan na magi kitang maimbod sa pagsunod kan manga tugon kan Kagurangnan; kaya kaipuhan na bumaba kita sa dagang pinanunod kan satuyang ama, huli ta totoong nawalat niya an saiyang bulawan asin plata, asin gabos na palaen-laen na manga kayamanan. Asin an gabos na ini ginibo niya huli sa kapagbotan kan Kagurangnan.

17 Huli ta aram niya na an Jerusalem rurumpagon, huli sa kasumbikalan kan manga tawo.

18 Huli ta totoo, isinirikwal ninda an manga tataramon kan manga propeta. Kaya, kun an sakuyang ama mag-erok pa sa Jerusalem pagkatapos na pagbotan siya na maghali duman, totoo nanggad na siya mapapara man. Kaya, kaipuhan nanggad na maghali na siya sa dagang idto.

19 Asin totoo nanggad, na ini kadunungan kan Dios na makua niato an manga kasuratan na ini, tanganing maingatan niato para sa satuyang manga aki an tataramon kan satuyang manga kamagurangan;

20 Asin man tanganing maingatan niato para sa sainda an manga tataramon na tinaram kan manga nguso kan gabos na banal na manga propeta, na itinao sa sainda kan Espiritu asin kapangyarihan kan Dios, magpoon sa kapinonan pa kan kinaban, iyo sagkod sa manga panahon na ini.

21 Asin ta uminagi an panahon na sa siring na paagi nin tataramon na sakuyang pinakiulayan an sakuyang manga tugang, na magi sindang maimbod sa pagsunod kan manga katugonan kan Dios.

22 Asin ta uminagi an panahon na kami nagbaba sa dagang samuyang pinanunod, asin ta samuyang tiniripon an samuyang bulawan, asin an samuyang plata, asin an samuyang manga mahahalagang manga bagay.

23 Asin pagkatapos na samuyang magkatiripon an manga bagay na ini nagturukad giraray kami sa harong ni Laban.

24 Asin ta uminagi an panahon na kami nagpaduman ki Laban, asin ta hinagad saiya na itao niya sa samuya an manga kasuratan na nakaukit sa plakeng tanso, na para kaidto itatao niamo saiya an samuyang bulawan, asin an samuyang plata, asin an gabos niamong mahahalagang manga bagay.

25 Asin ta uminagi an panahon na kan mahiling ni Laban an samuyang pagsadiri, asin ta idto kadakol na gayo, nagkaigwa siyang pagkahagas kaidto, na isinubol niya kami paluwas, asin sinugo an saiyang manga surogoon na garadanon kami, tanganing makua niya an samuyang pagsadiri.

26 Asin ta uminagi an panahon na kami nagdurulag sa manga surogoon ni Laban, asin ta napiritan kami na iwalat an samuyang manga pagsadiri, asin ta idto napasa manga kamot ni Laban.

27 Asin ta uminagi an panahon na kami nagdurulag pasiring sa kadlagan, asin ta dai man kami inabot kan manga surogoon ni Laban, asin ta kami tuminarago sa luho nin sarong gapo.

28 Asin ta uminagi an panahon na si Laman naanggot sa sakuya, asin man sa sakuyang ama; asin siring man si Lemuel, huli ta siya nagdangog sa manga tataramon ni Laman. Kaya si Laman asin si Lemuel nagtaram nin magagabat na manga tataramon sa samuya na saindang nguhod na manga tugang na lalaki, asin sagkod na hinampak ninda kami nin sarong pamakol.

29 Asin ta uminagi an panahon na kan pinaghahampak ninda kami nin sarong pamakol, biglang nag-abot an sarong anghel kan Kagurangnan asin ta tuminindog sa atubangan ninda, asin siya nagtaram sa sainda, na an sabi; Ngata ta pinaghahampak nindo an saindong nguhod na tugang na lalaki nin pamakol? Dai nindo aram na siya pinili kan Kagurangnan na maging pamayo nindo asin ini huli sa saindong manga kasumbikalan? Sa ngonian kamo magduruman giraray sa Jerusalem, asin ta itutugot kan Kagurangnan si Laban sa saindong manga kamot.

30 Asin ta pagkatapos na an anghel magtaram sa samuya, naghali na siya.

31 Asin pagkatapos na an anghel humali, si Laman asin si Lemuel nagpoon magngurob-ngurob giraray, na an sabi: Paanong mangyayari na itutugot kan Kagurangnan sa satuyang manga kamot si Laban? Totoo nanggad, na siya makusog na lalaki, asin ta kaya niyang pagbotan an limang pulo, iyo, sagkod limang pulo pa kaya niyang gadanon; saka kita pa daw?