1 Asin ta uminagi an panahon na ako nagsabi sa sakuyang manga tugang na lalaki, an sabi ko: Kaipuhan na pumasiring giraray kita sa Jerusalem, asin ta magi kitang maimbod sa pagsunod sa manga kasugoan kan Kagurangnan; huli ta siya orog na makapangyarihan sa gabos na nasa kinaban, kaya ngata ta dai siya maging orog na makapangyarihan pa ki Laban asin an saiyang limang pulo, iyo, o maski pa kan saiyang sampulong rinibo?

2 Kaya kita magbaralik na; magi kitang makusog siring ki Moises; huli ta siya totoong nagtaram sa tubig kan Pulang Dagat asin ta idto nabanga pasiring digdi asin pasiring duman, asin ta an satuyang kamagurangan nakalagbas, sa mamarang daga, hali sa pagkabihag, asin ta an manga hukbo ni Faraon nagralamag asin ta sinda nagkaralamos sa tubig kan Pulang Dagat.

3 Ngonian hilinga saindong naaraman na ini totoo; asin ta saindo man na naaraman na sarong anghel an nakipag-ulay sa saindo; kaya ano ta kamo nagduruwa-duwa pa? Magbaralik na kita; kaya kitang iligtas kan Kagurangnan siring sa satuyang manga kamagurangan, asin gadanon si Laban siring sa manga taga-Egipto.

4 Ngonian kan pakataram ko kan manga ini, naanggot pa sinda, asin ta padagos pa sindang nagngururob-ngurob; alagad nagsurunod sinda sakuya sagkod na makaabot kami sa luwas kan muralya kan Jerusalem.

5 Asin ta banggi kaidto; asin pinatago ko sinda sa luwas kan muralya. Asin kan makatago na sinda, ako, si Nephi, luway-luway na naglaog sa siudad asin nagpasiring sa harong ni Laban.

6 Asin ako inantabayan kan Espiritu, na sa enot dai ko pa aram an manga bagay na sakuyang gigibohon.

7 Alagad ta nagduman ako, asin ta kan harani na ako sa harong ni Laban nahiling ko an sarong lalaki, asin ta natumba siya sa daga sa atubangan ko, huli ta naburat siya nin arak.

8 Asin kan maranihan ko siya sakuyang namidbid na idto si Laban.

9 Asin ta sakuyang nahiling an saiyang espada, asin ta sakuyang hinugkot ini sa sarungan kaidto; asin ta an pulo kaidto tunay na bulawan, asin ta an pagkagibo malinig na marahay, asin ta nahiling ko an tarom kaidto pinakamahal na asero.

10 Asin ta uminagi an panahon na napiritan ako kan Espiritu na gadanon ko si Laban; alagad ako nagsabi sa puso ko: Dai pa nanggad sa arin man na panahon ako nagpabulos nin dugo nin tawo. Asin ta nagsibog ako asin ta sakuyang minawot na dai na siya gadanon.

11 Asin an Espiritu nagtaram sa sakuya giraray: Totoo na itinugot na siya sa saimong manga kamot kan Kagurangnan. Iyo, asin ta aram ko man na boot niya akong bawian kan sadiri kong buhay; iyo, asin ta dai siya nagdangog sa manga kasugoan kan Kagurangnan; asin ta saiyang kinua man an samuyang pagsadiri.

12 Asin ta uminagi an panahon na an Espiritu nagtaram sa sakuya giraray: Gadanon mo na siya, huli ta itinugot na siya sa saimong manga kamot kan Kagurangnan;

13 Totoo, an Kagurangnan ginagadan an manga masumbikal tanganing mangyari an saiyang manga matanos na katuyohan. Marahay pang mapara an sarong tawo ki sa an sarong nasion diit-diit na mawaraan nin pagtubod asin mapara sa daing pagtubod.

14 Asin ngonian, kan ako, si Nephi, madangog an manga tataramon na ini, sakuyang narumdoman an manga tataramon kan Kagurangnan na saiyang itinaram sa sakuya duman sa kadlagan, na an sinabi: Sagkod na an saimong manga bunga magsunod kan sakuyang manga katugonan, sinda mauswag sa dagang ipinangako.

15 Iyo, asin ta sakuyang inisip man na dai sinda makakasunod kan manga katugonan kan Kagurangnan sunod sa katugonan ni Moises, sagkod na dai sinda magkaigwa kan katugonan.

16 Asin ta sakuyang aram man na an manga katugonan nakaukit sa plakeng tanso.

17 Asin sa giraray, sakuyang nasabutan na itinugot kan Kagurangnan si Laban sa sakuyang manga kamot huli sa katuyohan na ini—tanganing makua ko an manga kasuratan susog sa saiyang manga tugon.

18 Kaya sakuyang sinunod an tingog kan Espiritu, asin kinapotan ko si Laban sa saiyang buhok, asin pinugot ko an saiyang payo kan saiya man sanang espada.

19 Asin pagkatapos na pugoton ko an saiyang payo kan saiya man sanang espada, sakuyang kinua an manga sulot na gubing ni Laban asin ta sakuyang isinulot idto sa sakuyang hawak; iyo, lambang saro kaidto; asin an saiyang armas sakuyang isinukbit sa sakuyang manga habayan.

20 Asin pagkatapos na sakuyang magibo ko ini, nagpasiring ako sa kaha ni Laban. Asin kan nagpapasiring ako sa kaha ni Laban, tulos, nahiling ko an surogoon ni Laban na nagkakapot kan manga lyabe kan kaha. Asin sakuyang pinagbotan siya siring sa tingog ni Laban, na ibahan niya ako sa kaha.

21 Asin ta naghuna siya na ako an saiyang amo, na si Laban, huli ta saiyang nahiling an sulot kong gubing asin an espada na nakasukbit sa sakuyang habayan.

22 Asin ta siya nagtaram sa sakuya manunungod kan manga namamayo kan manga Judio, ta aram niya na an saiyang amo, na si Laban, kairiba ninda kan bangging idto.

23 Asin ta nagtaram man ako sa saiya siring na ako si Laban.

24 Asin ta nagsabi ako saiya na dadarahon ko idtong manga nakaukit, na nasa plakeng tanso, sa manga matua kong tugang na lalaki, na nasa luwas kan manga muralya.

25 Asin ta sinabihan ko siya na magsunod sa sakuya.

26 Asin ta siya, sa paghuna na an pinagsasabi ko iyo an manga tugang sa simbahan, asin na ako iyo nanggad si Laban na ginadan ko na, kaya siya nagsunod sa sakuya.

27 Asin ta nagsabi siya sa sakuya nin kadakol na ulit manunungod kan manga namamayo kan manga Judio, mantang kami naglalakaw pasiring sa sakuyang manga tugang, na nasa luwas kan manga muralya.

28 Asin ta uminagi an panahon na kan mahiling ako ni Laman, natakot siya nin labi-labi, asin man si Lemuel asin si Sam. Asin ta nagdurulag sinda sakuya; huli ta an huna ninda si Laban ako, asin ta ako ginadan na asin ta sinda naman an hinahanap tanganing halian man nin manga buhay.

29 Asin ta uminagi an panahon na inarapod ko sinda, asin ta nadangog ninda ako; kaya nagpurundo sinda sa pagdurulag sa sakuya.

30 Asin ta uminagi an panahon na kan mahiling kan surogoon ni Laban an sakuyang manga tugang, tinakigan siya, asin ta madulag kuta na sako asin ta mabalik na sa siudad kan Jerusalem.

31 Asin ngonian ako, si Nephi, huli ta ako dakulang lalaki, asin huli sa pakakua ko nin labi-labing kusog sa Kagurangnan, kaya sakuyang kinapotan an surogoon ni Laban, asin pinugol ko, na dai makadulag.

32 Asin ta uminagi an panahon na sakuyang pinakihuronan siya, na kun magdangog siya sa sakuyang manga tataramon, sagkod na an Kagurangnan nabubuhay, asin sagkod na ako nabubuhay, asin kun siya magdangog sa samuyang manga tataramon, samuya siyang pababayaan na mabuhay.

33 Asin ta ako nagsabi saiya, na igwang kaibang pangako, na dai siya matakot; na siya magiging tiwasay na siring sa samuya kun mag-iba siya samuya sa kadlagan.

34 Asin ta ako nagtaram man sa saiya, an sabi ko: Totoo nanggad na an Kagurangnan nagboot samuya na gibohon an bagay na ini; asin ta bakong kaipuhan na hinguahon niato na sunodon an manga kasugoan kan Kagurangnan? Kaya, kun ika mag-iba samuya sa kadlagan sa samuyang ama magkakaigwa ka nin lugar samuya.

35 Asin ta uminagi an panahon na si Zoram nagkaigwa nin kusog sa sakuyang manga itinaram. Ngonian Zoram an pangaran kan surogoon; asin ta nangako siya na mag-iba samuya sa kadlagan sa samuyang ama. Iyo, asin ta siya nagsumpa man sa samuya na maerok siya samuya magpoon kan oras na idto.

36 Ngonian hiningua niamo na mag-erok siya samuya sa kadahilanan na ini, tanganing an manga Judio dai makaaram manunungod kan samuyang pagdulag sa kadlagan, ta tibaad lamagon kami ninda asin garadanon.

37 Asin ta uminagi an panahon na kan si Zoram nagsumpa sa samuya, nawara an samuyang takot manunungod saiya.

38 Asin ta uminagi an panahon na samuyang dinara an manga plakeng tanso asin an surogoon ni Laban, asin nagpaduman na kami pasiring sa kadlagan, asin nagralakaw pasiring sa tolda kan samuyang ama.