1 Asin ngonian ako, si Nephi, dai ko maitatao an ginikanan kan sakuyang manga kamagurangan digdi sa kabtang kan sakuyang kasuratan na ini; ni sakuyang itatao ini sa arin man na panahon pagkatapos kan manga plake na sakuyang sinusuratan; huli ta itinao sa kasuratan na ini na tinatago kan sakuyang ama; kaya, ako dai na masurat kaidto digdi sa manga gibong ini.

2 Huli ta tama nang sabihon ko na kami manga gikan ki Jose.

3 Dai na kaipuhan na sabihon ko pa an gabos na manga bagay manunungod sa kasaysayan kan sakuyang ama, huli ta dai man sana magkakanigo na isurat digdi sa manga plakeng ini, ta an boot kong matawan nin lugar na maisurat iyo an manga bagay na manunungod sa Dios.

4 Huli ta an bilog kong katuyohan iyo an sakuyang mapadagka an manga tawo na magdulok sa Dios ni Abraham, asin sa Dios ni Isaac, asin sa Dios ni Jacob, asin tanganing makaligtas.

5 Kaya, an manga bagay na ikinaoogma kan mundo dai ko na isusurat alagad an manga bagay na ikinaoogma kan Dios asin para duman sa manga bakong kinabanon.

6 Kaya, ako magtatao nin katugonan sa sakuyang manga ipapangaraki, na dai ninda pagbugtakan an manga plakeng ini nin manga bagay na daing halaga sa manga aki nin tawo.