1 Asin ta ngonian boot kong maaraman nindo, na pagkatapos na magpropesia an sakuyang ama, na si Lehi, manunungod kan saiyang bunga, nangyari na an Kagurangnan nagtaram sa saiya giraray, na an sabi bakong tama saiya, si Lehi, na an saiyang pamilia sana an darahon sa kadlagan; alagad ta an saiyang manga aking lalaki kaipuhan na mag-aragom nin manga aking babae, tanganing magkairigwa asin magpadarakula sinda nin manga aki para sa Kagurangnan sa dagang ipinangako.

2 Asin ta uminagi an panahon na pinagbotan siya kan Kagurangnan na ako, si Nephi, asin an sakuyang manga tugang magbaralik giraray sa daga kan Jerusalem, asin darahon sa kadlagan si Ismael asin an saiyang pamilia.

3 Asin ta uminagi an panahon na ako, si Nephi, kaibahan an sakuyang manga tugang, nagpasiriring sa kadlagan asin ta nagturukad sa Jerusalem.

4 Asin ta uminagi an panahon na nagduruman kami sa harong ni Ismael, asin ta samuyang nakua an pag-uyon ni Ismael, na samuyang itinaram saiya an manga tataramon kan Kagurangnan.

5 Asin ta uminagi an panahon na pinalumoy kan Kagurangnan an puso ni Ismael, asin man an saiyang pag-iriba, sagkod na uminiba sinda samuya paduman sa kadlagan sa tolda kan sakuyang ama.

6 Asin ta uminagi an panahon na mantang nagraralakaw kami sa kadlagan, nangyari na si Laman asin si Lemuel, asin an duwang manga aking babae ni Ismael, asin an duwang aking manga lalaki ni Ismael, asin an saindang manga pamilia nakiiwal sa samuya; iyo, sa sakuya, si Nephi, asin ki Sam, asin sa saindang ama, na si Ismael, asin an saiyang agom, asin an saiyang tulo pang manga aking babae.

7 Asin ta uminagi an panahon na sa saindang pakiiwal, naghulaw sinda na magbaralik sa Jerusalem.

8 Asin ta ngonian ako, si Nephi, huli ta ako namundo sa katagasan kan saindang manga puso, kaya ako nagtaram sa sainda, an sabi ko, iyo, sagkod ki Laman asin ki Lemuel: Totoo na kamo an sakuyang manga matuang tugang, asin napaano ta labi katatagas kan saindong manga puso, asin ta nalalabogan an saindong manga isip, na kaipuhan pa nindo na ako, an nguhod nindong tugang, an magtaram saindo, asin magi pang sarong halimbawa sa saindo?

9 Napaano ta dai kamo nagdangog sa manga tataramon kan Kagurangnan?

10 Napaano ta nakalingaw kamo na nakahiling kamo nin anghel nin Kagurangnan?

11 Iyo, asin napaano ta nakalingaw kamo kan manga makangangalas na manga bagay na ginibo kan Kagurangnan satuya, sa pagligtas satuya sa manga kamot ni Laban, asin man tanganing satuyang makua an kasuratan?

12 Iyo, asin napaano ta nakalingaw kamo na an Kagurangnan nakakagibo kan gabos na manga bagay susog sa saiyang kagustohan, para sa manga aki nin tawo, kun sinda magkaigwa nin pagtubod saiya? Huli kaini magi kitang maimbod sa saiya.

13 Asin ta kun kita maging maimbod saiya satuyang makukua an dagang ipinangako; asin ta saindong maaraman sa maabot na panahon na an tataramon nin Kagurangnan mauutob manunungod kan pagkarumpag kan Jerusalem; huli ta an gabos na sinabi kan Kagurangnan manunungod kan pagrumpag kan Jerusalem mauutob nanggad.

14 Totoo nanggad, an Espiritu kan Kagurangnan maontok na madali sa pagtabang sa sainda; huli ta, saindang pinag-indahan an manga propeta, asin ta si Jeremias saindang ipinakarsel. Asin ta saindang pinaghumaan na halian nin buhay an sakuyang ama, sagkod na saindang isinubol siya paluwas sa daga.

15 Ngonian magdangog, sa sakuyang sasabihon sa saindo na kun kamo magbaralik sa Jerusalem mapapara man kamo na kaibahan ninda. Asin ta ngonian, kun iyo ini an pipilion nindo, na magbaralik sa Jerusalem, asin rumdomon an sakuyang manga tataramon na isinabi sa saindo, na kun kamo magduman mapapara man kamo; huli ta napiritan ako kan Espiritu kan Kagurangnan na ako magtaram kaini.

16 Asin ta uminagi an panahon na kan ako, si Nephi, nakapagtaram kan manga tataramon na ini sa sakuyang manga tugang, nagkaaranggot sinda sa sakuya. Asin ta uminagi an panahon na ako pinagbasangan kan saindang manga kamot huli ta aranggot sindang gayo asin ta saindang ginapos ako nin pisi ta boot ako nindang halian nin buhay, tanganing saindang bayaan ako sa kadlagan na kakanon kan manga mababangis na hayop.

17 Alagad ta uminagi an panahon na ako namibi sa Kagurangnan na an sabi: O Kagurangnan, susog sa sakuyang pagtubod na yaon sa saimo pagkanigoon mo na iligtas ako sa manga kamot kan sakuyang manga tugang; iyo, tawi man ako nin kusog na mapatod ko ining manga pisi na nakagapos sakuya.

18 Asin ta uminagi an panahon na kan ako makapagsabi kan manga tataramon na ini, totoo tuminuros an manga gapos sa sakuyang manga kamot asin manga bitis, asin tuminindog ako sa atubangan kan sakuyang manga tugang, asin ako nagtaram giraray sa sainda.

19 Asin ta uminagi an panahon na nagkaaranggot giraray sinda sakuya asin ta boot naman akong basangan kan saindang manga kamot; alagad hilinga, saro kan manga aking babae ni Ismael, iyo, asin an saiyang ina, asin saro sa manga aking lalaki ni Ismael, nakimaherak sa sakuyang manga tugang, sagkod na luminumoy an saindang manga puso; asin ta ominontok na sinda sa pagbalo na halian ako nin buhay.

20 Asin ta uminagi an panahon na sinda nagkamurundo, huli sa saindang kasumbikalan, sagkod na sinda nagduruko sa atubangan ko, asin nakimaherak sa sakuya na sinda sakuyang patawadon kan manga bagay na saindang ginibo sa sakuya.

21 Asin ta uminagi an panahon na tunay kong pinatawad sinda gabos sa manga ginibo ninda sa sakuya, asin ta sakuyang sinadol sinda na mamibi sa Kagurangnan nindang Dios para sa kapatawaran ninda. Asin ta uminagi an panahon na siring an ginibo ninda. Asin pagkatapos kan saindang pamibi sa Kagurangnan nagpadagos kami sa pagralakaw pasiring sa tolda kan samuyang ama.

22 Asin ta uminagi an panahon na pababa na kami pasiring sa tolda kan samuyang ama. Asin pagkatapos na ako asin an sakuyang manga tugang asin an manga pag-iriba sa harong ni Ismael makababa na sa tolda kan samuyang ama, sinda nagtaong pasalamat sa kagurangnan na saindang Dios; asin nagdurulot nin atang asin manga tinutong na dulot.