1 Kwaye ngoku, uYakobi wathetha izinto ezininzi ezingakumbi kubo abantu bam ngelo xesha; nangona kunjalo zezi zinto kuphela endithe ndenza ukuba mazibhalwe, kuba izinto endithe ndazibhala zindonele.

2 Kwaye ngoku mna, Nifayi, ndibhala amazwi angakumbi kaIsaya, kuba umphefumlo wam uyavuyiswa ngamazwi akhe. Kuba ndiya kuwafanekisa amazwi akhe nabantu bam, kwaye ndiya kuwathumela phambili kubo bonke abantwana bam, kuba wambona ngokwenene uMkhululi wam, kwanjengokuba nam ndambona.

3 Kwaye umntakwethu, uYakobi, kanjalo umbonile njengokuba nam ndimbonile; ngako oko, ndiya kuwathumela amazwi abo kubo abantwana bam ukungqina kubo ukuba amazwi am ayinyani. Ngako oko, ngamazwi wabathathu, uThixo uthe, ndiya kulizinzisa ilizwi lam. Nangona kunjalo, uThixo uthumela amangqina angakumbi, kwaye uyawangqina onke amazwi akhe.

4 Qaphelani, umphefumlo wam uyavuyiswa kukubonisa kubo abantu bam ngenyaniso yokuza kuka Krestu; kuba, kungale njongo umthetho kaMoses uthe wanikwa; kwaye zonke izinto ezithe zanikwa nguThixo ukususela ekuqalekeni kwehlabathi, ebantwini, zingumfuziselo wakhe.

5 Kwaye umphefumlo wam kanjalo uyavuyiswa yiminqophiso yeNkosi eyathi yawenza koobawo bethu; ewe, umphefumlo wam uyavuyiswa lubabalo lwakhe, nasebulungiseni bakhe, namandla, nenceba kwicebo lakhe elikhulu lanaphakade lokukhulula ekufeni.

6 Kwaye umphefumlo wam uyavuyiswa kukubonisa kubo abantu bam ukuba ngaphandle kokuba uKrestu abe uya kuza bonke abantu kufuneka batshabalale.

7 Kuba ukuba akunakubakho Krestu akunakubakho Thixo; kwaye ukuba akanakubakho uThixo asikho nathi, kuba ngeyingekho indalo. Kodwa ukhona uThixo, kwaye unguKrestu, kwaye uyeza ekuzalisekeni kwelakhe ixesha.

8 Kwaye ngoku ndibhala amanye kumazwi kaIsaya, ukuze nabani na kubantu bam abaya kuthi bawabone la mazwi babe nokuziphakamisela phezulu iintliziyo zabo kwaye bagcobele bonke abantu. Ngoku la ngamazwi, kwaye ningawafanekisa nani kwaye nabo bonke abantu.