Ana Kauoua Ni Boki Nibwaai

1 Ao ngkai e koro bukina bwa ngkai Ngai ae Nibwaai, ngke I a tia n reireiniia tariu, ao tamara, ae Riaai, e taekin nakoia bwaai aika a bati, ao ni manga kaoki riki nakoia, n aron bwaai aika a tamaroa ake e a tia ni karaoi te Uea ibukiia ni kairakiia nako mai aban Ierutarem.

2 Ao e taekin nakoia aron unraaia i nanon marawa, ao ana nanoanga te Atua ngke e kamauri maiuia, ao a aikoa iinako i nanon marawa.

3 Ao e taetae naba nakoia ni kaineti ma te aba ni berita, are e a tia n reke irouia—ai korakorara ana nanoanga te Uea nakoira ngke e tuatua bwa ti na kitana aban Ierutarem.

4 Bwa nooria, e taku, I a tia n noora te mii ni burabeti, are I a ataia mai iai bwa e a tia n uruakaki Ierutarem; ao ngke arona bwa ti tiku i Ierutarem ao are ti a tia ngkai ni mate.

5 Ma e taku, e ngae ngke ti a tia ni karawawataki ao e a tia n reke iroura te aba ni berita, ae te aba ae rineaki i buakoia aaba nako; are te aba are e berita n ae tabu iai nakoiu te Uea ae te Atua bwa e na riki bwa abaia kanoau. Eng, e a tia ni berita n ae tabu te Uea bwa e na anga te aba aio nakoiu, ao nakoia natiu n aki toki, ao nakoia naba ake a na kairaki n nakomai ma n aaba nako n ana kairiri te Uea.

6 Mangaia ae, Ngai, ae Riaai, I taetae ni burabeti n aron ana mwakuri te Tamnei are e mena irou, bwa a na bon akea ae e na roko n te aba aei ma ti ngkana a kairaki ni bain te Uea.

7 Mangaia ae e a tia ni katabuaki te aba aio nakoia ake e kairiia n nakomai te Uea. Ao ngkana a toro irouna n iri ana tua ake e a tia n anganiia, ao e na riki te aba aio bwa te aba n inaomata ibukiia; mangaia ae a na aki kona ni manga reke i an te tautoronaki; ao ngkana e riki anne ao e na riki ibukin te bure; ao ngkana e korakora te bure ao e na maraia te aba ibukin aia mwakuri, ma a na teimatoa kakabwaia nakoia aika a raoiroi n aki toki.

8 Ao taraia, bon te iango ae wanawana bwa e na karabaki te aba aio n te tai aio man aaba ake tabeua; bwa ngkana e ataaki taekana n aaba ake tabeua; a na mwaiti aaba ake a na kaona te aba, ao a na akea abaia ake bon oin kaain te aba.

9 Mangaia ae Ngai, Riaai, I a karekea te berita mai iroun te Uea ae te Atua, bwa a riai aomata ni kabane ake a kanakoaki nakon te aba aio mai Ierutarem irouna bwa a na kaawakin ana tua, ao a na maiu raoi i aon te aba aio; ao a na raba taekaia man aaba ake tabeua, bwa a na abana te aba aio n ti ngaia. Ao ngkana a teimatoa ni kaawakin ana tua ao a na kakabwaiaki i aon te aba aio, ao a na akea ae e kaaitaraia, ke n anai aban rikiia; ao a na maeka i nanon te rau n aki toki.

10 Ma nooria, ngkana e roko te tai are a na bua iai i nanon aia kerikaaki n aia aki onimaki, i mwin reken kakabwaia aika a mwaiti irouia ma ni bain te Uea—ao n ataa aron karikan te aonaba, ao a ataia aomata ni kabane, aron ana mwakuri ae korakora ma ni kamimi te Uea man moan karikan te aonaba; ao n tia ni karekea te mwaaka ni karaoi bwaai ni kabane i nanon te onimaki; ma taian tua ni kabane mani moan rikin bwaai, ao n tia ni kairaki nakon te aba ni berita ae kakawaki aio n ana raoiroi ae aki totoki—ao taraia bwa I taku, bwa ngkana e roko te bong are a na kaitaraa iai Atuan Iteraera ae Tabu, ae te Mesia ni koaua, ae aia Tia Kaboia ae Atuaia, ao nooria, e na reke ana moti ae e tutuaraoi iaoia.

11 Eng, e na karokoi aaba riki tabeua nakoia, ao e na anganiia te mwaaka, ao e na anai mai irouia abaia ake aia bwai, ao e na kamaenakoia ma n tiringiia.

12 Eng, e na wakinaki te tiritiri man te roro teuana nakon te roro teuana, ao ni kawaraki ma te katuaeaki ae korakora; mangaia ae natiu, I tangiria bwa kam na uringnga; eng, I tangiria bwa kam na ongo n au taeka.

13 O bwa ngke arona bwa kam na uti; kam na uti man te matunako, eng, man te matu ni moone, ao kam na motiki taurekereke aika a buakaka ake kam kabaeaki iai, aika taurekereke aika a kabaeaki iai natiia aomata, ao a kairaki iai bwa taenikai nakon marawan te rawawata ae akea tokina ma te aki rau.

14 Uti! ao teirake man te tano, ao ongora n ana taeka te karo ae ruru, ao e a kaan karuoan rabwatana nako nanon te rua ni mate ae mwaitoro ma n aki rongoaa, ae e aki kona ni manga oki mai iai te tia mwananga; i nanon tabeua te bong ao N nang iranako kawain te aonaba ni kabane.

15 Ma nooria, e a tia te Uea ni kabooa tamneiu mai moone; I a tia n noora mimitongina, ao I a katobibiaki n bain ana tangira n aki toki.

16 Ao I tangiria bwa kam na uringnga n iri nanon ana tua ao ana moti te Uea; nooria, aio bon tabeaiangan tamneiu mai moana.

17 E a tia ni karawawataki nanou n te rawawata man te tai teuana nakon te tai teuana, bwa I raraoma, bwa e na bwakaringkami bwaninin unin te Uea ae Atuami ibukin matoan nanomi ao kam na kaakeaki ma n tiringaki n aki toki.

18 Ke e na roko te maraia i aomi i nanon rooro aika a mwaiti; ao e roko te kabang i aomi, ma taian rongo, ao kam ribaki, ao kam kairaki ni kaineti ma ana kantaninga ao ana tautaeka te riaboro.

19 O natiu aika mwaane, bwa a na aki riki bwaai aikai nakoimi, ao bwa kam na riki bwa aomata aika rineaki ma n tangiraki iroun te Uea. Ma nooria, e na karaoaki are nanona; bwa a raoiroi kawaina n aki toki.

20 Ao e a tia n taekinna bwa: Ngkana kam kaawakin au tua, ao kam na kakabwaiaki n te aba; ma ngkana kam aki kaawakin au tua, ao kam na kaakeaki mai matau.

21 Ao ngkai e aonga ni kukurei tamneiu iroumi, ao bwa e aonga ni kiitana te aonaba nanou ma te kukurei iroumi, bwa e aonga n aki irianaki mateu n te nanokawaki ma te rawawata, teirake man te tano, natiu mwane, ao kam na riki bwa oinimwaane, ao nanomatoa n te kaantaninga ae ti teuana ma te nano ae ti teuana, ni katiteuanaaki ni bwaai ni kabane, bwa kam aonga n aki reke i aan te tautoronaki.

22 Bwa kam aonga n aki kamaraiaaki n te maraia ae rawawata; ao riki bwa kam na aki karekea aki kukurein te Atua ae motiraoi, are e na reke te tiringaki iai, eng, are e na tiringaki iai n akea tokina te tamnei ma te rabwata.

23 Uti, natiu mwane; katokaa otangan te raoiroi. Motiki taurekereke ake kam kabaeaki iai, ao otinako man te aki ataibwai, ao teirake man te tano.

24 Tai manga kaaitaraa tarimi ae mimitong ana iango, are e a tia ni kaawakin taian tua man te tai are ti kiitana iai Ierutarem; are e a tia n riki bwa tabonibain te Atua, ni buoka kairara nakon te aba ni berita; bwa ngke arona bwa e aki karaoia, ao ti na kaman tia ni mate ni baki i nanon te rereua; e ngae n anne, ao kam a tia ni kataia n anaa maiuna; eng, ao e a tia n rinanon te rawawata ibukimi.

25 Ao e korakora maakun ma rurun rabwatau iroumi, bwa rimwi e na manga karawawataaki riki; bwa nooria, kam a tia ni bukinna bwa e ukoukora karekean te mwaaka ma te kariaiakaki i aomi; ma I ataia bwa e aki kan karekea te mwaaka ma te kariaiakaki i aomi, ma e a tia ni ukoukora mimitongin te Atua, ao mweraoimi ae akea tokina.

26 Ao kam a tia ni ngurengure ngkai e mataata are taekin nakoimi. Kam taku bwa e etimatoa; kam taku bwa e a tia n un nakoimi; ma nooria, etimatoana bon etimatoan mwaakan ana taeka te Atua, are e mena i nanona; ao te bwai are kam aranna bwa te un bon te koaua, n aron are e booraoi ma nanon te Atua, are e aki kona ni karabai, ni kaoti ma te koaua taekan ami bure iai.

27 Ao e riai bwa e na mena mwaakan te Atua irouna, n aiaron te tai naba are e tua nakoimi iai bwa kam na ongeaba. Ma nooria, bon tiaki ngaia, bwa bon Tamnein te Uea are mena irouna, are kauka wiina bwa e na taekin bwaai n aki kona ni kainna.

28 Ao ngkai natiu te mwane, Reimwan, ao Remuera naba ma Taam, ao ai uana naba ma natiu mwaane ake natin Itimaera, nooria, ngkana kam ongeaba n ana taeka Nibwaai ao kam na aki tiringaki. Ao ngkana kam ongeaba nakoina ao N na katoka au kakabwaia i aomi, eng, are bon moan au kakabwaia.

29 Ma ngkana kam aki ongeaba nakoina, ao N na anaa au moan kakabwaia, eng, are bon au kakabwaia, ao e na tiku i aona.

30 Ao ngkai, Tioram, I taetae nakoim: Nooria, ngkoe ae anaa toro Raban; e ngae n anne, ko a tia ni uotaki nako mai Ierutarem, ao I ataia bwa ngkoe bon raoraon natiu ae Nibwaai ni koaua, n aki toki.

31 Mangaia, ae ngkai ko a tia ni kakaonimaki ao a na kakabwaiaki kanoam iroun kanoana, bwa a na maeka ma te mwengaraoi i aon te aba aio; ao bon akea te bwai teuana, ma ti aia buakaka, ae kona n urua mwengaraoiia i aon te aba aio n aki toki.

32 Mangaia ae ngkana ko kaawakin ana tua te Uea, ao e a tia te Uea ni katabua te aba aio ibukin mwengaraoiia kanoam rinanon kanoaia natiu te mwaane.