Ing Kadua Nang Librung Nephi

1 At ngeni milyari a aku, i Nephi, kaibat keng pipusan ing pamanuru kareng kakung kapatad, ing tata mi, i Lehi, migsalita ya namang dakal a bage karela, at inulit na karela, nung makananu karagul a bage ing gewa ning Guinu para karela king pamipalual na karela king gabun ning Jerusalem.

2 At migsalita ya karela tungkul keng karelang pamanialangsang anyang atiu la king danuman, at ding lunus ning Dios king pamagligtas na karing karelang bie, bang ela mayakmul king dayatmalat.

3 At migsalita ya naman karela tungkul king labuad ning pangaku, a ikua da na — kapamakalulu ning Guinu king pamamala na kekatamu a dapat tamung mitakas palual king gabun ning Jerusalem.

4 Uling, oini, sinabi na, menakit kung malikmata, a nung kesanu balu ku ing Jerusalem malasak ya; at nung menatili tamu king Jerusalem mete tamu mu naman sana.

5 Dapot, sinabi na, sumangid da ring kasakitan tamu, ikua taya ing labuad ning pangaku, metung yang labuad a mepili kareng aliwa pang labuad; metung a labuad a ing Guinu pengaku na kaku a dapat yang maging labuad a pekamana kareng kakung bini. Wa, ing Guinu apangaku ne kaku ing labuad a ini, at kareng kakung anak kapilanman, at kareta mu namang eganaganang dapat mipatnubayan ipalual kareng aliwang bansa ning gamat ning Guinu.

6 Anya pin, aku, i Lehi, menula ku agpang king dapat na ning Espiritu a atiu kaku, a alang metung mang munta kening labuad a ini nung e midala la kapamilatan ning gamat ning Guinu.

7 Anya pin, ing labuad a ini megawa yang banal kea a keang idala. At nung malyari ing suyuan de agpang karing kautusan a biniye na, iti maging labuad ne ning kalayan karela; anya pin, eno kapilan man midala king pangasukul; nung makanian, iti uli ning karelang karokan; uling nung ing karokan dakal, misumpa ya ing labuad king uli da, dapot kareng mangayap mipanuanan ya kapilan man.

8 At lawan, iti kabiasnan a ing labuad a ini dapat misalikut ya pa king beluan da ring aliwang bansa; uling, nung ali, lawan, ding dakal a bansa katmuan de ing labuad, a ena mika lugal para keng mana.

9 Anya pin, aku, i Lehi, menikua kung pangaku, a kabang detang pepalual na ning Guinung Dios king labuad ning Jerusalem tutuparan do ring kautusan na, munlad la kening labuad a ini; at misalikut la kareng aliwang bansa, bang abandi re ing labuad a ini king sarili da. At nung tuparan do ring keang kautusan mipanuanan la kening babo ning labuad a iti, at alang ninuman ing makapangulu karela, o samsam keng karelang labuad a pekamana; at manuknangan lang ligtas kapilanman.

10 Dapot, makiramdam, potang datang na ing panaun a misadlak la king kelan kapaniwalan, a kaibat dang tinanggap a maragul a biyaya ibat king gamat na ning Guinu — a atin nong beluan king pangalalang na ning yatu, at ding eganaganang tau, a balu da na ing dakila at makapagmulalang obra ning Guinu manibatan king pangalalang ning yatu; atin na lang upayang mibiye karela bang gawan ing eganaganang bage kapamilatan ning kasalpantayanan; a atiu no karela ding kautusan keta pang minuna, at midala la kapamilatan ning keang alang anggang kayapan kening maulagang labuad a pangakung a ini — makiramdam, sasabian ku, nung ing aldo datang a tanggian de ing Banal a Metung ning Israel, ing tune Mesias, ing karelang Manatbus at karelang Dios, oini, ing kayatulan nitang makatarungan dugpa ya karela.

11 Wa, idala no ring aliwang bansa karela, at ibiye na karela ing upaya, at ilako ne karela ing labuad a bandi ra, at papalyarian na ing mikalat la at miparusan.

12 Wa, kabang ing metung a salinlahi lalabas ya king aliwa mika patayan, at maragul a pamamarusa karela; anya pin, anak ku, buri ku tandanan yu; wa, buri ku makiramdam kayu kareng amanu ku.

13 O, sana migising kayu; migising kayu king malalam a pamanudtud, wa, anggiyaman king pamanudtud yu king infierno, at ugunan ye ing makatakut a tanikalang makagapus kekayu, a ilang tanikalang gagapus karing anak da ring tau, a midala la king pangasukul angga king alang kapupusan a malawak a kabiguan at kalungkutan.

14 Migising! at mibangun manibatan king alikabuk, at makiramdam kareng amanu da reng mangalgal a pengari, a nung ninu ding gamat at bitis da ena maglambat ikera yu la king marimla at tahimik a kutkutan, a nung nukarin alang maglakbe a makapagbalik; mapilan namung aldo at mako na ku king yatu.

15 Dapot tutu, ing Guinu inatbus ne ing kaladua ku king infierno; ikit ku ing glorya na, at makapadurut kung alang angga kareng gamat ning keang lugud.

16 At pagnasan ku ing dapat yung tandanan ing pamintuan la ring batas at kayatulan na ning Guinu; makiramdam, iti na ing pigaganakan ning kakung kaladua keta pang minuna.

17 Ing pusu ku kabayatnan ya king lungkut pamisan-misan, uling mitatakutan ku, king kesiasan da ring kekayung pusu ing Guinu yung Dios lumual ya king kabilugan ning keang mua kekayu a ikayu misumpa kayu at malasak kapilanman;

18 O kaya, a ing metung a sumpa dapat yang datang kekayu kilub ning dakal a salinlahi; at miparusan kayu kapamilatan ning giyera, at king danup, at mikamuan, at mipatnubayan agpang king kaburian at pamanalipan na ning demonyu.

19 O kakung anak, a deng bage a reni ela datang kekayu, dapot ikayu mapili kayu at maging mipaborang tau ning Guinu. Dapot makiramdam, ing kaburian na yang malyari; uling ding paralan na ila ring kayapan kapilan man.

20 At sinabi na: Anti king tutuparan yula ding kakung kautusan munlad kayu king labuad; dapot anti king eyula tutuparan ding kakung kautusan mikawani kayu king arapan ku.

21 At ngeni bang ing kaladua ku tumula ya kekayu, at bang ing pusu ku lakuan ne ing yatung ini a ating saya king uli yu, bang eku midalang makilumbe at lungkut king kutkutan, mibangun ko manibatan king alikabuk, anak ku, at magpakalalaki kayu, at maging determinadu kayu king metung a isip at pusu, misasanmetung king eganaganang bage, bang ekayu midala king pangaalipan;

22 Bang ekayu misumpa king mabagsik a sumpa, at makanian mu naman bang eye apamua ing makatuliran a Dios kekayu, angga king pangalasak, wa, ing alang anggang pangalasak ning pareung kaladua at katawan.

23 Migising, anak ku; isulud ye ing baluti ning kayapan. Ugunan yo ding tanikalang makagapus kekayu, at mibangun kayu king madalumdum, at mibangun kayu manibatan king alikabuk.

24 Enako sasalangsang laban keng kapatad yu, a ding keang opinyun makaglorya la, at nung ninu ing tinupad karing kautusan manibat pa anyang lakuan taya ing Jerusalem; at nung ninu ing meging kasangkapan king gamat ning Dios, king pamagdala na kekatamu king labuad ning pangaku; uling nung e kea, mengamate tangan sana king danup king ilang; makanian man, pignasan yeng kuanan ing keang bie; wa, at menamdaman yang masyadung kalungkutan king uli yu.

25 At masyadu kung tatakut at mangalgal king uli yu, king takut a misakitan yang pasibayu; uling lawan, bibintanganan yeng menintun yang upaya at autoridad babo yu, dapot balu ku a eya menintun upaya at autoridad babo yu, dapot menintun yang glorya ning Dios, at ing sarili yung alang kapupusan a kapakanan.

26 At memagbulung kayu uling meging prangka ya kekayu. Sasabian yu a ginamit yang kaistriktuan kekayu; sasabian yu ing mua ya kekayu; dapot lawan, ing keang kaistriktuan yapin ing kaistriktuan ning upaya na ning amanu ning Dios, a atiu kea; at itang ausan yung mua yapin ing katutuan, agpang king katutuan a atiu king Dios; a ena asabat, a papakit masala tungkul kareng kekayung karokan.

27 At kailangan a ing upaya ning Dios atiu kea angga king pamanutus na kekayu a dapat kayung mamintu. Dapot lawan, aliwa ya, dapot ing Espiritu ning Guinung atiu kea, a mibuklat king asbuk na para magsalita a iti ene asara.

28 At ngeni anak kung Laman, at Lemuel at Sam mu naman, at ding anak ku mu namang anak nang Ismael, tune, nung makiramdam kayu king siwala nang Nephi ekayu mate. At nung makiramdam kayu kea maglakuan ku kekayung bendisyun, wa, anggiyang ing mumuna kung bendisyun.

29 Dapot nung ekayu makiramdam kea ilako ke ing mumuna kung bendisyun, wa, anggiyang ing kakung bendisyun, at iti manatili ya kea.

30 At ngeni, Zoram, magsalita ku keka: Lawan, ika ing alipan nang Laban; makanian man, midala kang palual king labuad ning Jerusalem, at balu ku metung kang tapat a kaluguran king kakung anak, i Nephi, kapilanman.

31 Anya pin, uling ika meging tapat ka ding kekang bini mipanuanan la karing keang bini, a mie lang maunlad king lupa ning labuad a ini; at ala, nung e ing karokan da, ing makapanasakit at makapangabala king karelang kasaganan king lupa ning labuad a ini kapilanman

32 Anya pin, nung tuparan mu la ding kautusan na ning Guinu, ing Guinu pepabanal ne ing labuad a ini para king kaligtasan da ring kekang bini kayabe da ring bini ning kakung anak.