1 Dapot lawan, mika dakal — king aldo a ita potang isundu ku ing gawang makapagmulalang obra karela, bang aganaka ko ring pangaku kung gewa karing anak da ring tau, ba keng asadiang pasibayu ing gamat ku king kaduang besis bang abalik ko ring kanakung tau, a kabilang king bale ning Israel;

2 At makanian mu naman, bang ganakan ku la ding pangakung gewa ku keka, Nephi, at kang tata mu naman, a ganakan ko ring bini mu; at ding amanu da ring kekang bini lumual lang manibatan king asbuk ku karing bini mu; at ding amanu ku bibiung la karing anggang sepu na ning yatu, para maging alimbawa la karing kakung memalen, a kabilang king bale ning Israel;

3 At uling ding kakung amanu bibiung la — dakal karing Gentil ding sumabing: Biblia! Biblia! atin na kaming Biblia; ala nang aliwa pang Biblia.

4 Dapot kanita sabian na ning Guinung Dios: O ding mangmang, mika biblia la; at misundu ya manibatan kareng Judio, ding kakung minunang mipangakuanang tau. At nanung pasalamatan da karing Judio para king Bibliang tinggap da manibat karela? Wa, nanung buri dang sabian ding Gentil? Agaganaka do pa ring gulu, at ing pagal, at ing sakit a penamdaman da ring Judio, at ing karelang pamagtiyaga kaku, king pamagdalang kaligtasan kareng Gentil?

5 O ikayung Gentil, atatandanan yo ring Judio, ding kakung minunang mipangakuanang tau? Ali; dapot sinumpa yu la, at kemuan yu la, at eyo pignasang ibalik. Dapot tutu, ibalik ku la ding anggang bage deni karing sarili yung buntuk; uling aku ing Guinu eko kelinguan ding kakung tau.

6 Ikayung mangmang, a sasabing: Biblia, atin na kaming Biblia at ena ke mangailangan Biblia. Menikua na ko waring Biblia nung e king kapamilatan da ring Judio?

7 Eyu wari balung ating dakal a bansa migit king metung? Eyu wari balung aku, ing Guinu yung Dios, lelangan ko ngan ding tau; at ing aganaka ko ngan detang atiu babo ning isla ning dayatmalat; at mamuntukan ku king babo banua at king yatu lalam; at dela ku ing amanu ku kareng anak ning tau, wa, anggiyang karing anggang bansa na ning yatu?

8 Anya pin bubulung kayu, uling tanggap kayu pang dakal kareng amanu ku? Eyu wari balung ing patutu da ring aduang bansa metung yang saksi kekayu a aku ing Dios, a agaganaka ke ing metung a bansa anti king aliwa? Anya pin, magsalita kung pareung amanu king metung a bansa anti king aliwa. At potang ding aduang bansa lumakad lang miyagnan ding patutu da ring aduang bansa miyagnan la mu naman.

9 At gagawan ku iti bang apatunayan ku karing dakal a aku pareu ku naman napun, ngeni, at kapilanman; at sasabian ko ring kakung amanu agpang king kakung sariling kaligayan. At uling migsalita na kung metung a amanu, eyu ipagpalage a enaku makapagsalita pang aliwa; uling ing obra ku epa meyari; at iti epa mayari angga king kapupusan ning tau, ni manibat king mumunang panaun at kapilanman.

10 Anya pin, uling atin kayung Biblia eyu ipagpalage a maglaman ya kareng eganaganang amanu ku; ni eyu kailangang ipagpalage a enaku pasulat pang karagdagan.

11 Uling utusan ko ngan ding tau, pareung king aslagan at king albugan, at king paralaya, at king paroba, at karing isla na ning dayatmalat, a isulat do ring amanung sinabi ku karela; uling manibatan kareng librung misulat atulan ke ing yatu, balang tau agpang king gewa na, agpang ketang misulat.

12 Uling lawan, magsalita ku karing Judio at isulat da iti; at magsalita ku naman karing Nephite at isulat da iti; at magsalita ku naman kareng aliwang tribu ning bale nang Israel, a dela kung parayu, at isulat da iti; at magsalita ku naman kareng eganaganang bansa na ning yatu at isulat da iti.

13 At malyari a ding Judio akua do reng amanu da reng Nephite, at ding Nephite akua do reng amanu da reng Judio; at ding Nephite at ding Judio akua do ring amanu da reng mewalang tribu ning Israel; at ding mewalang tribu ning Israel akua do ring amanu da ring Nephite at ding Judio.

14 At malyari a ding tau ku, a kayabe king bale nang Israel, mitipun lang pauli karing labuad a pibandian da; at ing amanu ku mu naman matipun ya bilang metung. At ipakit ku karelang lalaban keng amanu ku at lalaban kareng tau ku, a kayabe keng bale nang Israel, a aku ing Dios, at mengaku ku kang Abraham a ganakan ko ring bini na kapilanman.