1 Lawan, milyari a aku, i Nephi, menalangin kung dakal king kakung Guinung Dios, uli ning mua da ring kakung kapatad.

2 Dapot oini, ing mua da miragdag laban kanaku, angga king buri dang paten daku.

3 Wa, binulung la laban kaku, a sasabing: Ing kekatamung wali mimisip yang panimunan na katamu; at dakal tamu kapagsubukan king uli na; anya pin, ngeni paten taya, bang etana misakitan pa uli da ring keang amanu. Uling tutu, etaya tanggapan bilang pamuntuk tamu; uling iti kekatamu ya, a makatuang kapatad, ing mamuntukan karening tau.

4 Ngeni eku susulat karening lamina ding eganaganang amanung bubulung da laban kanaku. Dapot ustu na kaku ing sabian ku, a buri dang paten daku.

5 At milyari a ing Guinu bebalan naku a aku, i Nephi, dumayu ku karela at tumakas papunta king ilang, at detang eganaganang bisang tuki kanaku.

6 Anya pin, milyari a aku, i Nephi, dela ko ring pamilia ku, at i Zoram mu naman at ing keang pamilia, at i Sam, ing kakung makatuang kapatad at ing pamilia na, at i Jacob at i Jose, ding kakung maka waling kapatad, at ding kaku mu namang kapatad a babai, at detang eganaganang bisang tuki kaku. At detang eganaganang bisang tuki kaku ilapin ding maniwala karing babala at pamipatilip ning Dios; anya pin, mekiramdam la kareng kakung amanu.

7 At dela mila ring kekaming tolda, at ding eganaganang bage adala mi, at miglakbe kami king ilang kilub ning dakal a aldo. At kaibat ming mekapaglakbe kilub ning dakal a aldo, telakad mila ring kekaming tolda.

8 At ding kakung tau buri da ausan miyang Nephi ing lugal; anya pin inaus miyang Nephi.

9 At deta mu namang kayabe ku mebisa lang ausan ding sarili dang ding tau nang Nephi.

10 At pemintuan mila ding atul, at ding batas, at ding kautusan ning Guinu king eganaganang bage, agpang king batas nang Moises.

11 At ing Guinu kayabe miya; at minunlad keng masyadu; uling tinanam keng bini, at memupul keng dakal pasibayu. At megumpisa keng meneseng kawan, at miyaliwang klasing animales.

12 At aku, i Nephi, dela kula naman ding kasulatan a makadukit karing tansung lamina; at ing bola o kompas, a misadia para kang tata ku ning gamat ning Guinu, agpang ketang makasulat.

13 At milyari ing megumpisa keng minunlad masyadu, at merakal kami king labuad.

14 At aku, i Nephi, kinua ke ing ispada nang Laban, at ginawa kung dakal a ispadang kalupa na, pota ding taung ausan da ngening Lamanite salake la kekami at pamaten da kami; uling balu ku ing mua da kaku at kareng kakung anak, at karetang meyaus a tau ku.

15 At tiruanan ko ring tau kung mitalakad mangatas a bale, at gawang anggang klasi king dutung, at king bakal, at king singkaputi, at king tansu, at king aseru, at king gintu, at king pilak, at king maulagang batung makibakal, a nung sanung dakal.

16 At aku, i Nephi, mitalakad kung templo; at gewa ke kalupa ning templo nang Solomon maliban mu keng e megawa king dakal a maulagang bage; uling ela mayayakit king labuad, anya pin, eya malyaring italakad a kalupa na ning templo nang Solomon. Dapot ing paralan ning pangagawa na kalupa ne ning templo nang Solomon; at ing pangagawa na masanting ya.

17 At milyari a aku, i Nephi, tiruanan ko ring tau kung maging masipag, at magobra karing gamat da.

18 At milyari a buri da aku ing maging ari da. Dapot aku, i Nephi, buri ku ing ala lang ari; makanian man, gewa ku para karela ing agpang king kagiwan ku.

19 At lawan, ding amanu ning Guinu metupad la karing kakung kapatad, a sinabi na tungkul karela, a dapat kung maging pamuntuk da at talaturu. Anya pin, meging pamuntuk at talaturu da ku, agpang karing kautusan ning Guinu, angga keng panaun a pignasan dang paten da ku.

20 Anya pin, ing amanu ning Guinu metupad ya a sinabi na kaku, a sasabing: Anti king ela makiramdam king kekang amanu mikawani la king arapan ning Guinu. At tutu, mikawani la king arapan ning Guinu.