1 Ao ngkai, Iakobwa, I taekina aio nakoim: Natiu ae te karimoa i nanon au bong ni karawawataki i nanon te rereua. Ao taraia, ko a tia n rinanon te karawawataki ma te korakai i nanon am tai n ataei, ibukin iowawaaia tarim.

2 E ngae n anne, Iakobwa, ae au karimoa i nanon te rereua, ko ataa korakoran te Atua; ao e na onea karawawatam nakon taian kakabwaia ibukim.

3 Mangaia ae e na kakabwaiaki tamneim, ao ko na rau ni maeka ma tarim, ae Nibwaai; ao ko na beku ibukin Atuam ni kabanea bongin maium. Mangaia ae I ataia bwa ko a tia ni kabooaki ibukin raoiroin am Tia Kaboko; bwa ko a tia n noora rokon te Uea n uota te kamaiu nakoia aomata ni koron bongina.

4 Ao ko a tia n noora mimitongina n tain kairakem; mangaia ae ko na kakabwaiaki n aroia ake e na mwakuri n ibuobuoki nakoia n rabwatana n iriko; bwa bon titebo te Tamnei, ngkoananoa, n te bong aio, ao n aki toki. Ao e a tia ni katauraoaki te kawai man te tai are e moan bwaka iai te aomata, ao akea boon te kamaiuaki.

5 Ao a tia n reireinaki aomata n ae tau bwa a na ataa kaokoron te raoiroi man te buakaka. Ao a tia n anganaki aomata te tua. Ao akea ae maiu are e na aki rootaki n te tua; ke, bon man te tua are a na kaakeaki iai aomata. Eng, man tuan te maiun n rabwata are a kaakeaki iai; ao riki, bon man te tua n tamnei are a na mate iai man bwaai aika a raoiroi, ao ni karawawataaki n aki toki.

6 Mangaia ae e na reke te kaboaki iroun ao rinanon te Mesia ae Tabu; bwa e onrake n te akoi ma te koaua.

7 Taraia, e anga rabwatana bwa te karea ibukin te bure, bwa kakoroan bukin te tua, ibukiia ni kabane ake a uruaki nanoia man raraoma tamneia; ao bon akea riki ae na kona ni kakoroa bukin te tua.

8 Mangaia ae moan te kakawaki bwa a na tataekinaki bwaai aikai nakoia kaain aonaba, bwa a na ataia ae bon akea te iriko ae e kona ni maeka imatan te Atua, ma ti rinanon mwakuri aika raoiroi, ma ana nanoanga, ao ana akoi te Mesia ae Tabu, are e a tia n anga maiuna bwa e na tiringaki n te maiu n rabwata, ao e a manga anaia ni mwaakan te Tamnei, bwa e aonga ni karekea te mangauti ibukiia maate, ngkai bon ngaia are e na moan mangauti.

9 Mangaia are bon ngaia te moan ua nakon te Atua, bwa e aonga n riki bwa te tia tei ibukiia natiia aomata ni kabane; ao a na bane ni kamaiuaki ni kabane ake a kakoaua.

10 Ao ibukin teina ibukira ni kabane, a na bane n nakon te Atua aomata; mangaia are a na bane n tei imatana bwa a na motikaki taekaia irouna n aron te koaua ma te mimitong are mena i nanona. Mangaia are ibukin te tua are e a tia n anga Teuare Tabu, bon karaoan te rekenikai are e a tia ni motikaki ibukina, ao te rekenikai aio bon kaaitaran te kukurei are e a tia ni motikaki ni kakoroa bukin te mwakuri ni kamaiu—

11 Bwa e riai ae a na iai kaitaraan bwaai ni kabane. Bwa ngkana akea, natiu ae te karimoa n te rereua, e na bon aki kona n ataaki te raoiroi ke te buakaka, ke ae tabu ke te karawawataki, ke te tamaroa ke te aki tamaroa. Mangaia are, a riai n ikotaki bwaai ni kabane n ti teuana; mangaia are, ngke arona bwa e riai bwa e na ti teuana te rabwata e riai n teimatoa ni mate, n akea te maiu ke te mate irouna, ke te mka ke te aki mka, te kukurei ke te karawawataaki, ke te namakinaaba ke te aki namakinaaba.

12 Mangaia ae tiaki n ae e a tia ni karikaki te bwai bwa a na akea bukina; mangaia are a na akea bonganan bukin karikana. Mangaia ae te bwai aio e aki kona n riaon wanawanan te Atua ma ana mwakuri ae akea tokina, ao te mwaaka naba, ao te nanoanga, ao ana motiraoi te Atua.

13 Ao ngkana kam taekinna bwa akea te tua, ao titebo ngke kam taekinna naba bwa akea te bure. Ngkana kam taekinna bwa akea te bure, ao titebo naba ngke kam taekinna bwa akea te raoiroi. Ao ngkana akea te raoiroi ao a na akea naba te kukurei. Ao ngkana akea te raoiroi ke te kukurei ao a na akea naba te rekenikai ke te karawawataaki. Ao ngkana akea bwaai aikai ao bon akea te Atua. Ao ngkana akea te Atua ao akea ngaira, ke te aonaba; bwa a na bon akea naba karikan bwaai, ke ni mwakuri I bon iroum ke ni mwakuri i mwin tuangam; mangaia are, a na bane n tia ni mauna bwaai ni kabane.

14 Ao ngkai natiu, I taekin bwaai aikai nakoimi ibukin rikirakemi ma reireimi; bwa bon iai te Atua, ao e a tia ni kariki bwaai ni kabane, karawa ma aonaba, ao bwaai ni kabane ake iai, bwaai aika a kona ni mwammwakuri ma aika a karaoaki mwakuri nakoia.

15 Ao ni kakoroa bukin ana mwakuri ae akea tokina ibukin kabobongaan te aomata, ao ngke e a tia ni karikiia ara moani karo, ao manin aon te aba ma mannikiba, ao ni kakimototoa taekana, i mwin karikan bwaai ni kabane, ao e riai bwa e na iai kaaitaraia; n aiaron te uaanikai are tabuaki ni kaitaraa te kai ni kamaiu; e karewe teuana ao are teuana e mangingi.

16 Mangaia ae e anga te inaomata te Uea ae te Atua nakon te aomata bwa e na kona ni mwakuri i bon irouna. Mangaia ae e aki kona te aomata ni mwakuri i bon irouna ma ti ngkana e kairaki iroun te kai ni kamaiu ke te kai are tabu.

17 Ao ngai ae Riaai n aron bwaai ake I a tia ni wareki, I a katautaua bwa a na anera te Atua temanna, n aron are e a tia ni koreaki, e a bwaka mai karawa; man riki bwa te riaboro, ngkai e karaoi bwaai aika e taku te Atua bwa a buakaka

18 Ao ngkai e a tia ni bwaka mai karawa ao e na karawawataki n aki toki, e ukoukora naba karawawatakiia aomata. Mangaia are e taku nakon Nei Ewa, eng, n rabwatana ae te naeta, are te riaboro, are bon taman taian kewe ni kabane, ao e taku: Kana uaan te kai are e tabuaki, ao ko na aki maamate, ma ko na riki n aiaron te Atua, n ataa ae raoiroi ma ae buakaka.

19 Ao ngke e tia Atam ma Ewa ni kana uaan te kai are e tabuaki ao a kanakoaki man te nne n aroka are Eten, ao n ribana aontano.

20 Ao a karikiia natiia; eng, aika utun te aonaba ni kabuta.

21 Ao a na kananauaki aia bong natiia aomata, n aron nanon te Atua, bwa a aonga n rairinanoia ngkai a maiu n rabwata; mangaia ae e na reke maiuia aio bwa te tai ni kataaki, ao e a kananauaki maiuia, n aron nanon taian tua ake e anga te Uea ae te Atua nakoia natiia aomata. Bwa e anga ana tua ae a riai n rairinanoia aomata ni kabane; bwa e a tia ni kaotia nakoia aomata ni kabane ae a bane ni bua, ibukin riaoan te tua irouia aia karo.

22 Ao ngkai, nooria, ngke arona bwa e aki bure Atam ao e na bon aki bwaka, ma e na bon tiku naba n te nne n aroka are Eten. Ao a na bon tiku n aroia bwaai ni kabane ma ngke a moan karikaki; ao a na teimatoa n aroia akekei n aki toki, ao a na akea tokiia.

23 Ao a na akea natiia; ao a na teimatoa n aroia n aki ataibwai, n akea te kukurei irouia, bwa a aki ataa te karawawataaki; n aki karaoa ae raoiroi, ngkai a aki ataa te bure.

24 Ma nooria, bwaai ni kabane a bane ni karaoaki ni wanawanan teuare e atai bwaai ni kabane.

25 E bwaka Atam bwa aonga n riki aomata; ao a riki aomata bwa aonga ni karekea te kimwareirei.

26 Ao e na roko te Mesia ni koron bongina, bwa e na kabooia natiia aomata man te bwaka. Ao ngkai a tia ni kabooaki man te bwaka, a na kainaomataki n aki toki, n ataa te raoiroi man te buakaka; bwa a na mwakuri n aron oin nanoia ao n aki kairiraki, ma a na karaoaki mwakuri nakoia, ti man te rekenikai man te tua n te kabanea ni bong ae moan te kakawaki, n aron taian tua ake e a tia n anga te Atua.

27 Mangaia ae a inaomata aomata n aron te maiu n rabwata, ao a tia n anganaki bwaai ni kabane aika a tau ibukiia aomata. Ao a inaomata n rinea te inaomata ao te maiu ae akea tokina, rinanon te Tia Raoi ae korakora ibukiia aomata ni kabane, ke n rinea te tautoronaki ma te mate, n aron ana tautaeka ma mwaakan te riaboro; bwa e ukoukora karawawatakiia aomata ni kabane n ai arona.

28 Ao ngkai natiu, I tangiria bwa kam na onimakina te Tia Raoi ae korakora, ao n ongeaba nakon ana tua aika a korakora; ao ni kakaonimaki nakon ana taeka, ao rinea te maiu ae akea tokina, n aron nanon te Tamnei ae Tabu.

29 Ao n aki rinea te mate are akea tokina, n aron nanon te iriko ma te buakaka are mena i nanona, are e angan tamnein te riaboro te mwaaka n tautaeka, ni kairiko nako moone, bwa e aonga n uea iaom n abanueana.

30 I a tia n taekin taeka aikai nakoimi ni kabane, natiu, ni kabanean bongin katakiu; ao I a tia n rinea te itera ae raoiroi, n aron ana taeka te burabeti. Ao bon akea riki bukin taekinan bwaai aikai ma ti ibukin maiun tamneimi n aki totoki. Amen.