1 Ngan yana, ako, hi Nephi, in nagyayakan hiunong han mga panagna nga iginyakan han akon amay hiunong kan Jose, nga gindara ha Egipto.

2 Kay kamatuoran, ungod nga hiya in nagtagna hiunong han ngatanan nga iya tulin. Ngan dire damo an mga panagna nga iya iginsurat. Ngan hiya in nagtagna hiunong ha aton, ngan han aton masunod nga mga katulinan; ngan adto in nakasurat ha mga lamina nga tumbaga.

3 Tungod hito, han kahuman han akon amay pagyakan hiunong han mga panagna ni Jose, tinawag niya an mga anak ni Laman, an iya mga anak nga lalaki, ngan an iya anak nga mga babaye, ngan ginsiring hira: Pamati, anak ko nga mga lalaki ngan mga babaye, nga mga anak han akon suhag, karuyag ko nga hi kamo in manmati han akon mga tugon.

4 Kay iginsiring han Ginoo nga Diyos nga: Kun iyo tutumanon an akon mga kasugoanan kamo in magigin mainoswagon ha katunaan; ngan kun dire niyo tutumanon an akon mga kasugoanan kamo in mahihibulag tikang han akon atubangan.

5 Kundi kamatuoran, mga anak ko nga mga lalaki ngan hin mga babaye, dire ako mahingangadto han akon lubnganan samtang dire ko nahibibilin ha iyo an akon pagbendisyon; kay kamatuoran, maaram ako nga kun ikaw in ginpadako ha kaangayan nga pamatasan dire nimo ito babayaan.

6 Sanglit, kun kamo in iginsumpa, kalipay, igbibilin ko ha iyo an akon pagbendisyon, agud an sumpa in makuha ha iyo ngan batonon han iyo kag-anak.

7 Sanglit, tungod han akon pagbendisyon an Ginoo nga Diyos in dire matugot nga kamo in mamamatay; sanglit, hiya in magigin maloloy-on ha iyo ngan han iyo tulin ha kadayonan.

8 Ngan ine nahitabo nga han kahuman pakagyakan han akon amay ha mga anak nga lalaki ngan mga babaye ni Laman, ginhangyo niya nga iharani ha atubangan niya an mga anak nga lalaki ngan mga babaye ni Lemuel.

9 Ngan naghimangraw hiya ha ira, nga nagsiring: Pamati, mga anak ko nga mga lalaki ngan mga babaye, nga mga anak nga lalaki ngan mga babaye han akon ikaduha nga anak nga lalaki; kamatuoran ginbibilin ko ha iyo an sugad nga pagbendisyon nga iginbilin ko ngadto han mga anak nga lalaki ngan mga babaye ni Laman; sanglit, dire kamo mauubos kapoo; kundi ha urhi an iyo tulin in pagbebendisyonan.

10 Ngan ine nahitabo han katapos han akon amay pagyakan ha ira, ungod, hiya in nagyakan ngadto han mga anak nga lalaki ni Ismael, ngan liwat, bisan an ngatanan nga iya sulod balay.

11 Ngan kahuman nga hiya in maghimangraw ha ira, hiya in nagyakan kan Sam, nga nagsisiring: Bulahan ka, ngan han imo tulin; kay imo mapapanonod an katunaan sugad han imo bugto nga hi Nephi. Nga an imo tulin in mauupod han iya tulin; ngan ikaw in masusugad han imo bugto, ngan an imo tulin in pareho han iya tulin; ngan ikaw in bebendisyonan ha bug-os han imo kinabuhi.

12 Ngan ine nahitabo nga kahuman han akon amay, nga hi Lehi, in makaghimangraw ha ngatanan niya nga sulod balay, subay han mga inaabat han iya kapasidad ngan han Espiritu han Ginoo nga aada ha iya, hiya in nalagas. Ngan ine nahitabo nga hiya in namatay, ngan ginlubong.

13 Nga ine nahitabo nga waray humagos in damo nga mga adlaw kahuman han iya kamatay, hi Laman ngan hi Lemuel ngan an mga anak nga lalaki ni Ismael in nasina ha akon tungod han mga pahimatngon han Ginoo.

14 Ngan ako, hi Nephi, in napiritan nga maghimangraw ha ira, subay han iya tugon; tungod kay ako in naghimangraw hin damo nga mga pulong ha ira, ngan sugad man an akon amay, ugsa hiya namatay; an kadaman han iya mga iginsiring in nahisurat ha akon iba nga mga lamina; kay an durodamo nga dako nga bahin han kaagi in nahisurat ha akon iba nga mga lamina.

15 Ngan dinhe hine iginsurat ko an mga nahuna-huna han akon kalag, ngan damo nga baraan nga kasuratan an iginukit ha mga lamina nga tumbaga. Kay an akon kalag in nalilipay han mga baraan nga kasuratan, ngan an akon kaburut-on in nagtitirutimbang hito, ngan iginsurat adto para ha pag-aradman ngan kapulsanan han akon mga anak.

16 Kamatuoran, an akon kalag in nalilipay ha mga butang han Ginoo; ngan an akon kaburuton in padayon nga nagtitirutimbang han buhi nga mga butang nga akon nahikit-an ngan nahibatian.

17 Ngan nasugad, nga luyo han duro nga kabootan han Ginoo, ha pagpakita ha akon han iya darayawon ngan urusahon nga mga buruhaton, an akon kaburut-on in nakagsiring: O kamakaloluoy ko nga tigurang nga lalaki! Oo, ngan an akon kaburut-on in nagmamasubo tungod han akon unod; an akon kalag in nagmamabido tungod han akon mga karat-an.

18 Ako in ginpapalibotan, tungod han pagsulay ngan han mga sala nga madali makakapangalas ha akon.

19 Ngan kun karuyag ko maglipay, an akon kaburut-on in nangurudo tungod han akon mga sala; bisan kun sugad, maaram ako kun hin-o an akon gintapuran.

20 An akon Diyos in akon tambulig; ginbuligan niya ako han akon mga kakurian ha kamingawan; ngan iya ako ginbantayan ha bawbaw han haluag nga katubigan.

21 Ginpuno niya ako hin paghigugma, ngada han pagkaubos han akon unod.

22 lya ginpanggupong an akon mga kaaway, tubtub ngada han mangurog hira ha akon atubangan.

23 Kalipay, nabati niya an akon mga panginyupo ha oras, ngan gintagan niya ako hin hibaro pinaagi han mga bisyon ha gab-i.

24 Ngan ha oras ako in nagigin maisog ha tim-os nga pag-ampo ha atubangan niya; oo, ngan an akon tingog in ginpapaabot ko ha kahitas-an; ngan an mga anghel in linmusad pag-alagad ha akon.

25 Ngan ha mga pako han iya Espiritu gindara an akon lawas ha duro hin kahitaas nga bukid. Ngan an akon mga mata in nakakita hin darayawon nga mga bisyon, sugad man, bisan an duro hin kaurosahon para ha tawo; sanglit, ako an gindid-an pagsurat hadto.

26 O, pagkatapos ko mahikitan an sugad nga kaurosahon nga mga bisyon, kun an Ginoo ha iya pagpaubos ha anak han katawhan in bumisita ha tawo nga may dako nga pagkaluoy, kay ano nga an akon kaburut-on in nagtatangis ngan an akon kalag in nalangan dida han waray paglaum nga kahimtang han kabidoan, ngan an akon unod in naglalarang, nga an akon kusog in nanluya, tungod han akon pagkuri?

27 Ngan kay ano nga mauyon ako han mga sala, tungod han akon unod? Oo, kay ano nga tatagan ko hin dalan an pagsulay, nga an usa nga yawa nagkamayada lugar ha akon kasingkasing agud gubaon an kahimyang ngan pakurian an akon kalag? Kay ano nga ako nasisina tungod han akon kaaway?

28 Pagmata, kalag ko! Ayaw panluya ha mga sala. Maglipay ka, O kaburut-on ko, ngan ayaw paghatag hin lugar ha kaaway han akon kalag.

29 Ayaw na liwat kaurit tungod han akon mga kaaway. Ayaw panluyaha an akon mga kusog tungod han akon mga kakurian.

30 Maglipay ka, O akon kaburut-on, ngan pakimaluoy ngadto ha Ginoo, ngan magsiring: O Ginoo, akon ka pagdadayawon ha kadayonan; oo, ngan an akon kalag in malilipay ha imo, akon Diyos, ngan madig-on an akon katalwasan.

31 O Ginoo, mahimo ba nga tuboson mo an akon kalag? Mahimo ba nga talwason mo ako ha gawas nga mga pagtimangno han akon mga kaaway? Mahimo ba nga himoon nimo nga mangurog ako ha pagkita han sala?

32 Unta an mga purtahan han empiyerno in padayon nga masadhan ha atubangan ko, tungod kay an akon kaburut-on in mabidoon ngan an akon espiritu in mabinasulon! O Ginoo, mahimo nga dire mo sadhan an mga purtahan han imo kamatadong ha atubangan ko, agud ako maglakat ha dalan han habubo nga mahimyang nga kaupayan, ngan magpabilin ha patag nga dalan!

33 O Ginoo, mahimo ba nga palibotan mo ako han panapton han kamatadong! O Ginoo, mahimo ba nga ighimo mo ako hin dalan agud makapalagiw ha atubangan han akon mga kaaway! Mahimo ba nga himoon mo nga tadong an akon dalan! Mahimo ba nga dire ka magbutang hin bato nga kapapakdolan ha akon agianan — lugod in hawanan an akon agianan ha akon atubangan, ngan ayaw pag-ulangi an akon dalan, kundi an mga dalan han akon mga kaaway.

34 O Ginoo, ako in nagtapod ha imo, ngan ako in matapod ha imo ha kadayonan. Dire ako matapod ha butkon han lawas; kay maaram ako nga igsusumpa hira nga natapod han butkon han lawas. Oo, ngan sumpaon hiya nga natapod ha katawhan ngan ginhihimo nga lawas an iya butkon.

35 Oo, ngan maaram ako nga an Diyos in mahatag hin kahura ngadto han nangangaro. Oo, ngan an akon Diyos in maghahatag ha akon, kun mangaro hin dire nasupak ha kabatasanan; sanglit hahatas-on ko an akon tingog ngada ha imo; oo, ngan makikimaluoy ako ngadto ha imo, akon Diyos, an madig-on han akon kamatadong. Kamatuoran, an akon tingog in matipaigbaw ngadto ha imo ha kadayonan, akon bato ngan akon waray katapusan nga Diyos. Amen.